Линклар

Шошилинч хабар
03 декабр 2020, Тошкент вақти: 16:27

Ўзбекистон хабарлари

Мирзиёев электр станцияларининг эскирганлик даражаси 50 фоиздан юқори эканини эътироф этди

Бугунги кунда Ўзбекистонда электр станцияларининг эскирганлик даражаси 50 фоиздан юқори. Бундан ташқари, эски қувватларда ёқилғи сарфи янги буғ-газ қурилмаларига нисбатан 2 баравар зиёд. Бу ҳақда 26 октябрь куни президент Шавкат Мирзиёев раислигида электр энергетикаси корхоналарини трансформация қилиш бўйича устувор вазифалар муҳокамаси юзасидан ўтказилган йиғилишда айтилган.

Президент матбуот хизмати маълумотига кўра, йиғилишда электр таъминоти бўйича модернизация ишларини давом эттириш, лекин буни олдингидек давлат кафолати ҳисобига эмас, балки хусусий капитални жалб қилиш орқали амалга ошириш зарурлиги қайд этилган.

“Ўзбекистон миллий электр тармоқлари”, “Ҳудудий электр тармоқлари”, “Иссиқлик электр станциялари” ҳамда “Ўзбекгидроэнерго” акциядорлик жамиятларида молиявий ҳисоботларни жаҳон стандартлари асосида тайёрлаш тизимига ўтиш кераклиги таъкидланган.

Қайд этилишича, бу халқаро кредит рейтинги олиш, келгусида еврооблигациялар чиқаришда муҳим омил бўлади. Мутасаддиларга шу мақсадлардан келиб чиқиб, мазкур 4 та компаниянинг уч йиллик молиявий модели ва бизнес режаларини ишлаб чиқиш вазифаси қўйилган.

Трансформация жараёнларига кўмаклашиш учун корхоналар бошқарувига ва кузатув кенгашларига чет эллик мутахассислар жалб қилиниши бўйича кўрсатмалар берилган.

“Ҳозирда электр энергияси улгуржи бозори қоидалари белгиланмагани сабабли инвесторлар билан энергияни қатъий нархларда харид қилиш бўйича узоқ муддатли шартномалар имзоланмоқда. Бундай ёндашув келгусида рақобатнинг чекланишига олиб келиши мумкин. Шу боис электр энергияси рақобатли бозорига ўтиш босқичлари ва қоидаларини белгиловчи ҳужжат ишлаб чиқиш зарурлиги таъкидланди”, дейилади президент матбуот хизмати хабарномасида.

Йиғилишда соҳага илғор технологияларни кенг жорий этиш, “рақамли трансформация”ни амалга ошириш бўйича ҳам топшириқлар берилган.

Ўзбекистонда қиш мавсуми яқинлашиши билан электр таъминотида муаммолар кўпайгани кузатилади. Бу каби муаммолар бўйича Озодлик таҳририятига ҳар йили қишлоқ жойлардан айниқса кўп шикоят тушади.

Кун янгиликлари

Тошкентда ўқиш япон ва ўзбек тилларида олиб бориладиган университет ташкил этилади

Ўзбекистон пойтахти Тошкент шаҳрида Япония рақамли университети ташкил этилади. Бунга оид ҳукумат қарори жорий йил 2 декабрида қабул қилинган.

Олий ва ўрта махсус таълим вазирлиги маълумотига кўра, янги университетнинг асосий вазифалари ва фаолият йўналишлари этиб АКТ, дастурий таъминотни ишлаб чиқиш, ахборот тизими ва компьютер тармоқларини бошқариш бўйича олий маълумотли рақобатбардош кадрларни тайёрлаш ҳамда бошқалар белгиланган.

Ҳукумат қарорига мувофиқ, Тошкентдаги Япония рақамли университети нодавлат олий таълим муассасаси ҳисобланади.

Университетда ўқитиш Япониянинг Отемае университети, Токио онлайн университети ва бошқа нуфузли ОТМ ҳамда Ўзбекистон давлат таълим стандартлари талаблари инобатга олинган ҳолда Олий ва ўрта махсус таълим вазирлиги билан келишилган ҳолда тасдиқланадиган ўқув режалари ва фан дастурларига мувофиқ равишда япон ва ўзбек тилларида тўлов-контракт асосида амалга оширилади.

Университетда бакалавриат таълим йўналишлари бўйича кундузги ва масофавий таълим шаклларида кадрлар тайёрланади.

“Муҳандис-дастурчи” бакалавриат таълим йўналиши бўйича университетга талабаларни қабул қилиш 2020/2021 ўқув йилидан, “Компьютер графикаси ва дизайн” бакалавриат таълим йўналиши бўйича – кейинги ўқув йилидан бошлаб амалга оширилади.

“2020/2021 ўқув йили ҳамда кейинги ўқув йилларида университетга қабул қилиш параметрлари Олий ва ўрта махсус таълим вазирлиги билан келишилган ҳолда белгиланади”, дейилган хабарномада.

Қайд этилишича, битирувчиларга олий таълим тўғрисидаги ҳужжат сифатида тан олинадиган Япония университетлари ҳамда Ўзбекистон Республикасининг белгиланган намунадаги дипломлари берилади.

Тошкентда Британияда рўйхатдан ўтган “шубҳали ширкат” қураётгани иддао қилинган завод ишга туширилади

2017 йилда Тошкент металлургия заводи лойиҳаси келиб чиқиши ўзбекистонлик бўлган қозоғистонлик миллиардер Фаттоҳ Шодиевга қарашли экани иддао қилинган эди.

Йилига 500 минг тонна темирни қайта ишловчи Тошкент металлургия заводи 4 декабрь куни ишга туширилади. Бу ҳақда ТАСС “Метпром” давлат концерни раҳбари Андрей Дейнекога таянган ҳолда хабар тарқатди.

Хабарда айтилишича, мазкур завод Ўзбекистон ҳукумати ва Россиянинг “Метпром” ширкати ҳамкорлигида қуриб битказилди. Лойиҳанинг умумий қиймати 325 миллион еврони ташкил қилган. Бу маблағнинг 50 фоизини Росэксимбанк таъминлаган. Лойиҳанинг қолган эллик фоизини Ўзбекистон ҳукумати ва хусусий инвестор молиялаштирган.

Дайнеконинг айтишича, Россия ҳукумати лойиҳани молиялаштирибгина қолмай, балки уни амалга ошириш учун қўшимча 90 миллион евро миқдорида кўмак кўрсатган. Яъни техник лойиҳалаштириш, инжиниринг, ускунлар ва метал конструкцияларини етказиб бериш ишларини амалга оширган.

“Тошкент металлургия заводини қуришда 30та ишлаб чиқарувчи ва мингга яқин одам иш билан таъминланди”,-деди Дейнеко.

Озодлик радиоси 2017-2018 йилларда Ўзбекистондаги йирик бизнес лойиҳалар, жумладан, Тошкент металлургия заводи лойиҳаси шубҳали ширкатлар томонидан амалга оширилиши режалаштирилаётгани ҳақида мақолалар берган эди.

Ўзбекистонда бошланган йирик бизнес лойиҳаларига оид маълумотлардан яхши хабардор мулозимнинг Озодлик билан суҳбатда иддао қилишича¸ 2017 йил февраль ойида президент Шавкат Мирзиëев бевосита танишиб¸ маъқуллаган Тошкент металлургия заводи лойиҳаси келиб чиқиши ўзбекистонлик бўлган қозоғистонлик миллиардер Фаттоҳ Шодиевга қарашли.

Ўзбек матбуоти ўшанда 1000 иш ўрни яратадиган бу янги завод икки йил ичида Сергели туманидаги 100 гектарлик ҳудудда қурилиши ҳақида билдирганди. Лойиҳа таъсисчиси сифатида Британияда рўйхатдан ўтган Quality Trade Supplies номи келтирилди¸ лойиҳанинг умумий қиймати 278¸2 миллион еврога тенглиги айтилди.

The Herald газетаси Quality Trade Supplies (қисқартмаси QTS) Шотландияда ëмон ном чиқарган ва Transparency International томонидан “пул ювиш механизми” сифатида баҳоланган чекланган шерикчилик компанияларидан бири экани ҳақидаги журналистик суриштирувни эълон қилган.

Spot нашри эса Тошкент металлургия заводи бошқаруви SFI Management Group ширкатига берилишини билдирди.

Озодлик 2020 йилнинг 11 сентябрида эълон қилган мақолада айтилишича, Ўзбек ва Россия матбуоти SFI Management Groupнинг асли наманганлик миллиардер Алишер Усмоновга қарашли экани ҳақида ëзгани ортидан Усмонов унинг асли жиззахлик яна бир миллиардер Фаттоҳ Шодиевнинг акаси Қобул Шодиевники экани¸ айни пайтда ўзининг бу гуруҳ билан бирга ишлашини билдирган эди.

2017-2018 йиллари Ўзбекистон металлургия комбинати, Олмалиқ кон-металлургия комбинати, Тошкент металлургия заводи Вазирлар Маҳкамаси ва президент қарорлари асосида айни йилда таъсис этилган SFI Management Group ишончли бошқарувига берилди.

2021 йилда Абдулла Орипов, Ўткир Хошимов ва Ботир Зокиров юбилейлари нишонланади

Ўзбекистон халқ шоири Абдулла Орипов 2016 йилнинг 5 ноябрида вафот этган.

Ўзбекистонда 2021 йилнинг мартида Абдулла Орипов, августида Ўткир Хошимов, декабрида Ботир Зокировнинг юбилейлари давлат даражасида тантанали нишонланади. Бу борадаги қарорларни президент Шавкат Мирзиёев 2 декабрда имзолади.

2021 йил март ойининг учинчи ўн кунлигида Ўзбекистон Халқаро анжуманлар саройида Абдулла Орипов хотирасига бағишланган тантанали адабий-бадиий хотира кечаси ўтказилади.

Шоирнинг ўзбек тилидаги икки жилдлик “Танланган асарлар”и, қорақалпоқ, рус, инглиз ва бошқа тилларга таржима қилинган шеърий тўпламлари, шунингдек, “Абдулла Орипов замондошлари хотирасида” китоби нашр этилади.

2021 йил август ойининг биринчи ўн кунлигида Ўзбек Миллий академик драма театрида Ўткир Ҳошимов таваллудининг 80 йиллигига бағишланган адабий-бадиий хотира кеча ўтказилади.

Адибнинг ўзбек тилидаги “Танланган асарлар”ини, қорақалпоқ, рус ва бошқа хорижий тилларга таржима қилинган асарларини, шунингдек, “Ўткир Ҳошимов замондошлари хотирасида” китобини нашрга тайёрлаш ва чоп этиш назарда тутилмоқда.

Бундан ташқари Тошкент шаҳридаги кўчалардан бирига Ўткир Ҳошимов номи берилади.

Ўзбекистон халқ артисти Ботир Зокиров таваллудининг 85 йиллиги эса 2021 йил декабрь ойининг биринчи ўн кунлигида Ўзбекистон Халқаро анжуманлар саройида нишонланади.

Тошкент шаҳрида Ботир Зокиров номидаги миллий эстрада олий мактаби ва мактаб қошида хонанда хотирасига бағишланган ёдгорлик мажмуаси ва музейи ташкил этилади.

Тошкент шаҳрида Ботир Зокиров ҳайкали ўрнатилади. Ўзбекистон давлат консерваторияси жойлашган кўчага Ботир Зокиров номи берилади.

Ўзбекистон давлат филармониясининг Миллий эстрада-симфоник оркестри билан Ботир Зокиров номидаги эстрада оркестрини бирлаштириб, Ботир Зокиров номидаги миллий эстрада-симфоник оркестри ташкил этилади.

Ўзбекистондаги бозорлар хусусий шахсларга сотилади ва ижарага берилади

Тошкентдаги "Олой" бозори.

Давлат активларини бошқариш агентлиги хусусий шахсларга сотилиши ва ижарага берилиши назарда тутилган бозорлар рўйхатини эълон қилди. Мазкур рўйхатдан 339та бозор ўрин олган.

Мазкур рўйхатга озиқ-овқат маҳсулотлари билан савдо қилувчи марказий деҳқон бозорларида ташқари, буюм, қурилиш маҳсулотлари ва автомобилларни сотувчи бозорлар, савдо марказлари ҳам киритилган.

Давлат активларини бошқариш агентлиги Ўзбекистондаги энг йирик “Сергели” автомобил бозори ҳам сотилишини эълон қилди.

Spot нашрининг хабар беришича, бозорни бошқарадиган «Истеъмолда бўлган транспорт воситалари ва эҳтиёт қисмлар Сергели бозори» МЧЖнинг йиллик соф фойдаси 3,3 миллиард сўмни ташкил қилади.

Компаниянинг қарзи 1,5 миллиард сўм. Бошқа компаниялар эса автомобиль бозоридан 3,7 миллиард сўм қарздор.

Мирзиёев Россия Федерацияси делегациясини қабул қилди

Ўзбекистон президенти Шавкат Мирзиёев (ў) ва Россия президенти администрацияси раҳбарининг ўринбосари Дмитрий Козак (ч), Тошкент, 2020 йил 2 декабри

Ўзбекистон президенти Шавкат Мирзиёев 2 декабрь куни амалий ташриф билан Тошкентга келган Россия президенти администрацияси раҳбарининг ўринбосари Дмитрий Козак бошчилигидаги делегацияни қабул қилган.

Президент матбуот хизмати маълумотига кўра, қабул чоғида бўлажак икки томонлама ва кўп томонлама форматдаги учрашувларга тайёргарлик кўриш ва уларни ўтказиш масалалари кўриб чиқилган.

Учрашув чоғида халқаро сиёсатнинг айрим жиҳатлари юзасидан ҳам фикр алмашилди.

Ортиқча ҳужжат талаб қилган ўнга яқин ОТМ масъули интизомий жазога тортилди

Иллюстратив сурат

Ўзбекистонда абитуриентлардан асоссиз равишда ортиқча ҳужжат талаб қилган 10 нафарга яқин ОТМ раҳбар ходими жазоланган. Бу ҳақда Адлия вазирлигининг матбуот хизмати маълумот тарқатди.

Қайд этилишича, адлия органлари Самарқанд вилоятидаги ОТМларда фуқаролардан талаб қилиш тақиқланган ҳужжатлар олинганлиги, белгиланган талабларга зид равишда расмий ҳужжатларнинг нусхалари талаб қилинганлиги ва бошқа бюрократик ғовлар мавжудлигини аниқлаган.

Мисол учун, Самарқанд давлат чет тиллар университети абитуриентлардан фуқаролик паспортидан нусха, солиқ тўловчининг ҳисобга қўйилганлиги тўғрисида гувоҳнома, жисмоний шахслардан жамғариб бориладиган пенсия тизимига қўйилганлиги тўғрисида маълумотнома каби ҳужжатларни тақдим этишни асоссиз равишда талаб қилган”, дейилган вазирлик хабарномасида.

Шунга асосан Адлия вазирлиги олий таълим муассасалари томонидан ортиқча бюрократик ғов ва тўсиқларга барҳам бериш бўйича Олий ва ўрта махсус таълим вазирлигига тегишли тақдимнома киритган.

Бунинг ортидан 10 нафарга яқин олий таълим муассасаларининг раҳбар ходимларига турли интизомий жазо чоралари кўрилган.

Вазирлик ортиқча бюрократик тўсиқларни бартараф этиш юзасидан адлия органлари тизимли ишларни амалга оширишда давом этишини билдирган.

Навоийда кўрсаткичи паст бўлган 26 та мактабнинг директори ишдан олинди

Навоий вилоятида таълим сифати паст бўлган 26 нафар мактабнинг директори, 2 нафар халқ таълими бўлими мудири, 3 нафар халқ таълими бўлими мудири ўринбосари эгаллаб турган лавозимидан озод этилган. Бу ҳақда, вилоят ҳокимлиги ахборот хизмати маълумотига кўра, халқ депутатлари Навоий вилояти кенгашининг 1 декабрь куни бўлиб ўтган галдаги сессиясида билдирилган.

Айни пайтда Навоий вилоятининг туман ва шаҳарларида ўтказилган йиғилишларда олий таълим муассасасига кириш кўрсаткичи юқори бўлган 106 та мактабнинг директори 10 миллион сўмдан пул мукофоти билан тақдирланган.

Сессияда вилоят халқ таълими бошқармаси бошлиғи Марат Шамуратов шу кунда “Битирувчи–2021” маълумотлар базаси шакллантирилгани ҳамда битирувчи синф ўқувчилари қизиқиши, билими, салоҳиятидан келиб чиққан ҳолда ОТМлар ҳамда касбий курсларга йўналтирилаётганини маълум қилган.

Аввалроқ Озодлик Қашқадарё вилоятида бирорта битирувчиси олий таълим муассасаларига кирмаган 20 та мактабнинг директори ишдан олингани ҳақида хабар қилган эди.

Ҳукумат ҳокимларга ҳафтасига камида бир марта ишга автомобилсиз келишни тавсия қилди

Бош вазир ўринбосари Азиз Абдуҳакимов иштирокида Тошкентда ўтказилган велопойга

Жорий йилнинг 1 декабридан Ўзбекистонда барча давлат органлари ва ташкилотлари ҳамда ҳокимлар ва ўринбосарларига “Шахсий намуна” тамойили асосида ҳафтада камида бир марта автомобиллардан фойдаланмаган ҳолда ишга келиб-кетиш тавсия этилди.

Мазкур тавсия “Аҳолининг соғлом турмуш тарзини қўллаб-қувватлаш ва жисмоний фаоллигини оширишга доир қўшимча чора-тадбирлар тўғрисида”ги ҳукумат қарорида акс этган.

Қарорга мувофиқ, 2021 йил 1 апрелига қадар маҳаллалар, қишлоқлар, туманлар, шаҳарлардаги пиёда ва велосипедда юриш учун мўлжалланган “Саломатлик йўлаклари” ташкил этилади. Мазкур йўлакларда автомобил қўйишни тақиқловчи белгилар ва йўлакларнинг бошланиш қисмига махсус тўсиқлар ўрнатилади.

2021 йилдан бошлаб 22 сентябрь куни республика бўйича “Автомобилсиз кун” сифатида эълон қилинган.

Ҳукуматнинг мазкур қарори Ўзбекистон президенти томонидан шу йил октябрь ойи охирида имзоланган “Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида”ги фармонга асосланган.

Ўзбек расмийларининг мамлакатда соғлом турмуш тарзини татбиқ этиш бўйича саъй-ҳаракатларини бир томондан ижобий баҳолаган Озодлик суҳбатдошлари бошқа томондан бу ишнинг қиш-қировли кунларда бошлангани ҳамда “хўжакўрсин” тадбирларга йўл очаётганига норозилик билдирмоқдалар.

Фарғонадаги футбол беллашувида чиққан оммавий муштлашувда иштирок этган 6 киши ушланди

Фарғонада 1 декабрь куни футбол беллашуви оммавий муштлашувга айланиб кетгани юзасидан жиноят иши қўзғатилди ва дастлабки тергов бошланди. Бу ҳақда 2 декабрь куни Фарғона вилоят ИИБ Ахборот хизмати маълум қилди.

Хабарда айтилишича, Жиноят кодексининг 277-моддаси 3-қисми “в” банди (оммавий тадбирлар ўтказилаётган вақтда безорилик қилиш) асосида қўзғатилган жиноят иши доирасида 6 нафар шахс гумонланувчи сифатида қўлга олинди.

Бундан ташқари 5 киши Маъмурий жавобгарлик тўғрисидаги кодекснинг 183-моддаси (майда безорилик) асосида маъмурий тартибда ушланган ҳамда уларга нисбатан тегишли ҳужжатлар расмийлаштирилган.

“Тергов ҳаракатлари якунига кўра, ишга алоқадор бўлган барча шахсларнинг ҳаракатларига ҳуқуқий баҳо берилади.Мазкур ҳолат вилоят Ички ишлар бошқармаси томонидан назоратга олинган. Тергов ҳаракатлари якунига кўра, қўшимча хабар берилади”,-дейилади расмий хабарда.

Озодлик 1 декабрда Ўзбекистоннинг суперлигасига йўлланма олиш учун Фарғонанинг “Нефтчи” ва Яйпаннинг “Турон” командалари ўртасида 1 декабрь куни ўтказилган ўйин оммавий муштлашувга уланиб кетгани тўғрисида хабар берган эди.

ИИВ: Ёшларни Сурияга жўнатиб келаётган шахс қўлга олинди

"Сурияга ёшларни жўнатган шахс" ДХХ ва ИИВ қўшма амалиёти пайтида қўлга олинди.

Ўзбекистонлик ёшларни Суриядаги “Тавҳид ва жиҳод катибаси” террор ташкилоти сафига жўнатиш билан шуғулланиб келган шахс ДХХ ва ИИВ қўшма амалиёти пайтида қўлга олинди. Бу ҳақда Ички ишлар вазирлиги 2 декабрь куни маълум қилди.

Вазирликнинг билдиришича, 1996 йилда Самарқанд вилоятида туғилган О. Х., 2019 йилда Миср Араб Республикасида ўқиши давомида “халқаро террорчилик ташкилоти раҳнамоларининг ғоявий таъсирига тушиб” қолган.

Қўлга олинган шахс Мисрга диний таълим олиш мақсадида борган ёшлар орасида “ўзининг ақидапарастлик ғояларини тарғиб қилган ҳамда Сурия давлати ҳудудида фаолият олиб бораётган “Тавҳид ва жиҳод катибаси” халқаро террорчилик ташкилотининг сафига қўшилишга даъват қилиб, уларни юбориш билан шуғулланиб келган”.

Ички ишлар вазирлиги расмий билдирувида ушланган шахснинг уяли телефон аппарати хотирасида экстремистик мазмундаги материаллар мавжудлиги аниқлангани таъкидланади. Бироқ у қачон, қаерда, қандай шароитда ва кимларни Сурияга жўнатгани тўғрисида бирорта маълумот берилмаган.

Ўзбекистон Республикаси Олий судининг 2016 йил 26 сентябрдаги қарори билан "Тавҳид ва жиҳод катибаси" халқаро террорчилик ташкилоти фаолияти Ўзбекистон Республикаси ҳудудида тақиқланган ташкилотлар рўйхатига киритилган.

Ўзбекистонда ОИВга чалинганлар сони 43,5 мингдан ошди

1 декабрь Бутунжаҳон ОИТСга қарши кураш куни сифатида нишонланади.

Ўзбекистонда 2020 йилнинг 1 ноябрь ҳолатига кўра, ОИВ инфекцияси билан яшовчилар сони 43 581 нафарни ташкил этмоқда. Бу ҳақда Республика ОИСТга қарши кураш маркази директори Қаҳрамон Йўлдошев маълум қилди.

Расмийнинг айтишича, 2020 йилнинг шу давригача ОИВга чалинган 1483 киши аниқланган. Бу ўтган йилнинг шу даврига солиштирганда анча оз. Маълумотларга қараганда 2019 йилнинг 10 ойида 3337 кишида ОИВ аниқланган эди.

“Мамлакатимизда 78 та ОИВ диагностика лабораториялари фаолият олиб бормоқда, улардан 15 таси ОИТСга қарши кураш марказларидаги лаборатория комплекслари ва 63 та туманлараро лабораториялардир. Ушбу лабораторияларда ИФА, иммуноблот, ПЦР, иммунологик, клиник, биокимёвий ва бактериологик текширувлар ўтказилади. Давлатимиз томонидан лабораторияларни тест-система ва реагентлар билан таъминлаш учун ҳар йили 8 миллиард сўмдан ортиқ маблағ ажратилмоқда”,-деди Қаҳрамон Йўлдошев.

Жаҳон соғлиқни сақлаш ташкилоти ҳамда БМТ бош Ассамблеясининг 1988 йилидаги қарорига асосан, 1 декабрь Бутунжаҳон ОИТСга қарши кураш куни сифатида нишонланади.

БМТ исоботида билдирилишича, ўтган йили 1,7 миллион киши ОИВ-ОИТСга чалинган, 690 минг одам бу касалликдан вафот этган.

Жаҳонда айни пайтда ОИВ-ОИТСга чалинган 38 миллион одам яшайди. Улардан 12 миллиони даволаниш имкониятига эга эмас.

Тўртта вилоятда қўғирчоқ ва мусиқали драма театрлари ташкил этилади

Санъат ва маданият институтида “Қўғирчоқ ясаш технологияси” таълим йўналиши очилади.

Наманган, Сирдарё, Навоий ва Тошкент вилоятларида қўғирчоқ театрлари ташкил этилади. Бу борада Вазирлар Маҳкамасининг “Республикада айрим давлат театрлари фаолиятини ташкил этиш чора-тадбирлари тўғрисида”ги қарорида кўрсатма берилди.

Адлия вазирлигининг билдиришича, Наманган ва Сирдарё вилоятларида қўғирчоқ театрлари, Навоий ва Тошкент вилоятларида қўғирчоқ театрлари ва мусиқали драма театрлари фаолияти ташкил этилади.

Қўғирчоқ театрлари ва мусиқали драма театрлари фаолияти самарадорлигини ошириш, уларнинг ижодий фаолиятини ривожлантириш ва моддий-техника базасини мустаҳкамлаш мақсадида “дўстлар клублари” фаолияти йўлга қўйилади.

Бундан ташқари, қарорга асосан, 2021/2022 ўқув йилидан санъат ва маданият институтида “Қўғирчоқ ясаш технологияси” таълим йўналиши очилади. Қўғирчоқ театри режиссёрлиги, актёрлиги ва драматургия йўналиши бўйича махсус сиртқи бўлимлар ташкил этилади.

Камолиддин Беҳзод номидаги Миллий рассомлик ва дизайн институтида “Қўғирчоқ театри рассоми” ихтисослиги бўйича таълим йўналишини очиш чоралари кўрилади.

Судлар ички ишлар ходимлари билан тил бириктириб, катта миқдордаги пулни ўғирлашди

Судьялар 5 мингта сохта қарор чиқарган. Фотосурат "Газета уз"дан олинди.

Маъмурий ишлар бўйича Тошкент шаҳар судининг бир неча судьяси йўл ҳаракати хавфсизлиги бошқармаси ходимлари билан келишган ҳолда 8 миллиард сўмни ноқонуний ўзлаштиришган. Мазкур ҳолат бўйича жиноят иши очилди.

“Газета уз” нашрининг ёзишича, бу ҳақда Коррупцияга қарши кураш бўйича агентлик директорининг ўринбосари Умида Тўхташева маълум қилди.

Тил бириктирган судья ва йўл ҳаракати хавфсизлиги бошқармаси ходимлари йўл қоидалари бузилиши юзасидан тузилган маъмурий баёномаларни суд канцеляриясида рўйхатдан ўткизмаган, маъмурий ишларни тарафлар иштирокида кўриб чиқмаган ва баённомаларни йўқ қилиб ташлаган.

Умида Тўхташеванинг айтишича, бунинг оқибатида судлар томонидан 5 мингта сохта қарор чиқарилган ва мазкур қарорлар асосида 8 миллиард сўм ўғирланган.

Бу ҳолат юзасидан Жиноят кодексининг 167 –(ўзлаштириш ёки растрата йўли билан талон-торож қилиш) ва 209 – (мансаб сохтакорлиги) моддалари асосида жиноят иши қўзғатилди.

Фарғонадаги футбол беллашуви муштлашувга уланиб кетди

Ўзбекистоннинг суперлигасига йўлланма олиш учун Фарғонанинг “Нефтчи” ва Яйпаннинг “Турон” командалари ўртасида 1 декабрь куни ўтказилган ўйин оммавий муштлашувга уланиб кетди.

Маълумотларга кўра, беллашув “Турон” фойдасига 1:0 ҳисоби билан тугаган. Шундан сўнг ютқазган команда ўйинчилари ҳакамга эътироз билдира бошлаганлар, пировардида бу тортишув тартибсизликка айланиб кетган, муштлашаётган футболчиларга ўйинни томоша қилиб ўтирган ишқибозлар ҳам қўшилиб кетган.

Ўзбекистон Профессионал футбол лигаси ўйин пайтида юз берган кўнгилсиз ҳодиса юзасидан шарҳ бергани йўқ. ПФЛ сайтида Про лига 20-туридан ўрин олган “Нефтчи” ҳамда “Турон” жамоалари ўртасидаги ўйин ўз ниҳоясига етгани, Фарғонадаги “Истиқлол” стадионида кечган учрашувда яйпанликлар 1:0 ҳисобида ғалаба қозонгани ҳақидагина хабар берилган, холос.

Айни пайтда Фарғона вилояти ички ишлар бошқармаси мазкур ҳолат тартиб посбонлари томонидан назоратга олинганлиги ҳақида маълумот тарқатди.

“Ҳозирда барча ҳуқуқбузарлар ушланиб, терговга қадар текширув ҳаракатлари олиб борилмокда”, дейилади ИИБ расмий баёнотида.

Фарғоналик ҳуқуқ-тартиботчилар воқеага алоқадор ҳар бир иштирокчининг ҳаракатига қонуний баҳо берилишини билдирганлар.

Хотинига памперс едирган самарқандлик эркак 6 йилга қамалди

Жиноят ишлари бўйича Самарқанд шаҳар суди рафиқасига мажбурлаб памперс едирган Ш.К.ни 6 йилга озодликдан маҳрум қилиш ҳақида ҳукм чиқарди. “Дарё” нашри хабарига кўра, ҳукм судья Зарифа Аҳмедова томонидан 1 декабрь куни чиқарилган.

Қайд этилишича, 35 ёшли судланувчи Ўзбекистон Жиноят кодексининг 103-моддаси (ўзини ўзи ўлдириш даражасига етказиш) ва 105-моддаси 2-қисми “г” банди (ўта шафқатсизлик билан қасддан баданга ўртача оғир шикаст етказиш) билан айбдор деб топилган.

Судланувчи сўнгги сўзида бундай ишларни бошқа такрорламаслиги, уч ой ичида барча қилмишларини тушуниб етганлигини билдирган. У қўйилаётган айбловнинг “ўзини ўзи ўлдириш даражасига етказиш” қисмини тан олмаслигини айтган, бироқ рафиқасини калтаклаганини эътироф этган. Жабрланувчи Мустаҳкам Ваҳобова эса судга ишонишини ва унинг чиқарган қароридан розилигини қайд этган.

Ўтган ҳафта бўлиб ўтган судда прокурор Ш.К. га 8,5 йил қамоқ жазоси сўрагани ҳақида хабар қилган эдик.

Самарқандлик 25 ёшли М. Ваҳобованинг эри томонидан аёвсиз калтакланганига оид видео шу йил ёзида ижтимоий тармоқларда қизғин муҳокамаларга сабаб бўлганди. Маҳаллий блогер ва журналистлар билан суҳбатда аёл эри уни анча йиллардан бери таҳқирлаб келгани ҳамда унга мажбурлаб 3 кунлик “памперс” едирганини айтиб берганди.

Ш.К.нинг зўравонлиги акс этган видео интернетда тарқаб кетганидан кейин у уйидан қочиб кетган, бироқ шу йил 23 августида Тошкентда қўлга олиниб, Самарқандга олиб кетилганди. Мазкур иш бўйича суд 12 ноябрь куни бошланган эди.

Энергетика вазирлиги рад қилган маълумотни Монополияга қарши курашиш қўмитаси тасдиқлади

Ўзбекистонда цемент ишлаб чиқарувчиларга етказиб бериладиган газ босимининг пасайиши оқибатида “Қувасойцемент” АЖ ва “Оҳангаронцемент” АЖ томонидан цемент ишлаб чиқарилиши тўхтатилган. Шу боис иккала ишлаб чиқарувчининг цемент маҳсулоти ўтган ҳафтада фонд биржа рўйхатига олинмаган. Бу ҳақда Монополияга қарши курашиш қўмитаси (МҚКҚ) ўз Телеграм-канали орқали билдирди.

Қўмита вакилларига кўра, биржага цемент кам миқдорда чиққани сабабли унинг нархи ошиб кетган.

Айтайлик, ҳафта бошида 1 кг цемент 512 сўм бўлган бўлса, ҳафта охирида у 539,1 сўмгача (ёки 5 фоизга) кўтарилган”, дейилган МҚКҚ хабарномасида.

Ўтган ҳафта Энергетика вазирлиги цемент ишлаб чиқарувчи корхоналар фаолият тўхтаганига оид маълумотни рад этган ва бу ҳақда хабар тарқатаётган манбаларни ёлғон маълумот тарқатишдан огоҳлантирганди.

Қайд этиш жоизки, Монополияга қарши курашиш қўмитаси ўз хабарномасида “Қувасойцемент” ва “Оҳангаронцемент” ўз фаолиятини газ таъминотидаги муаммолар боис тўхтатганини, Энергетика вазирлиги эса мазкур корхоналарга электр энергияси аввалгидек етказиб берилаётганию улар фаолияти тўхтамагани ҳақида сўз юритган.

Энергия манбалари ўртасидаги фарқдан қатъи назар бу ўринда эътиборли жиҳат корхоналар фаолиятининг тўхтатилган-тўхтатилмагани ҳамда бунинг Ўзбекистонда цемент нархи ошишига кўрсатган таъсири бўлиб ҳисобланади.

Тошкент аэропортида йўловчилар ўзини ўзи рўйхатдан ўтказиш имкониятига эга бўлди

Тошкент халқаро аэропорти.

Ўзбекистондаги барча халқаро аэропортларда босқичма-босқич йўловчиларнинг мустақил равишда ўзини ўзи рўйхатдан ўтказиш – Self Check-In замонавий тизими жорий қилинмоқда. Бу ҳақда “Uzbekistan Airports” акциядорлик жамияти ахборот хизмати маълум қилди.

Ширкат маълумотига кўра, мазкур тизим ҳаво транспорти коммуникациялари ва ахборот технологиялари соҳасида дунёда етакчи - SITA компанияси томонидан ишлаб чиқилган бўлиб, шу кунларда И. Каримов номидаги Тошкент халқаро аэропортида 4 та шундай киоск ўрнатилган.

Ўзини ўзи рўйхатдан ўтказиш – Self Check-In хизмати орқали йўловчиларнинг рўйхатдан тез ва осон ўтишлари таъминланади. Самолётнинг исталган ўриндиғидан жойни банд этиш ва бир вақтнинг ўзида жойлашиш ҳақидаги талонни ҳам олиш мумкин. Саёҳатга отланганлар юкларини киоскдан мустақил рўйхатдан ўтказиб, парвоздан аввал уларни тегишли хизматларга топшириш имкониятлари мавжуд”, дейилган хабарномада.

Қайд этилишича, Uzbekistan Airports Тошкент халқаро аэропортига мунтазам парвозларни амалга ошираётган барча авиакомпанияларга Self Check-In киоскларига уланиш, хизматдан самарали фойдаланиш таклифини киритган. Аммо пандемия чекловлари туфайли ҳозир бу киоск хизматларидан фақатгина Turkish Airlines авиаширкати йўловчиларигина фойдаланмоқда.

Хабарномада Uzbekistan Airports ва Тошкент халқаро аэропорти ҳозирда SITA компанияси билан йўловчиларнинг юкларини ҳам автоматик рўйхатдан ўтказиш – Self BagDrop тизимини йўлга қўйиш бўйича музокаралар олиб бораётгани қўшимча қилинган. Режага кўра, бу амалиёт тизимли равишда Ўзбекистондаги 11 та халқаро аэропортнинг ҳаммасига татбиқ этилади.

АҚШ ва Ўзбекистон бош дипломатлари телефон орқали мулоқот қилди

Ўзбекистон ташқи ишлар вазири Абдулазиз Комилов (ў) ва АҚШ Давлат котиби Майкл Помпео (ч), Тошкент, 2020 йил 3 феврали

Ўзбекистон ташқи ишлар вазири Абдулазиз Комилов ва АҚШ Давлат котиби Майкл Помпео ўртасида 30 ноябрь куни телефон орқали мулоқот бўлиб ўтган.

Ўзбекистон Ташқи ишлар вазирлиги матбуот хизмати маълумотига кўра, мулоқот чоғида М. Помпео АҚШнинг Ўзбекистон мустақиллиги, суверенитети ва ҳудудий яхлитлигини, шунингдек президент Шавкат Мирзиёев бошчилигида олиб борилаётган ислоҳотлар дастурини изчил қўллаб-қувватлашда собит эканлигини тасдиқлаган.

Шу йил 16-20 ноябрь кунлари А. Комилов бошчилигидаги ўзбек делегацияси Вашингтонга сафар қилгани ва қатор расмийлар билан учрашгани ҳақида Озодлик аввалроқ хабар қилган. Хусусан, 20 ноябрь куни делегация Ўзбекистон – АҚШ сиёсий маслаҳатлашувларининг саккизинчи раундида иштирок этган.

Давлат котиби кечаги мулоқотда сиёсий маслаҳатлашувлар шакли Ўзбекистон ва АҚШ ўртасидаги кўп қиррали ҳамкорлик даражаси ва суръатини акс эттирувчи Стратегик шериклик мулоқотига ўзгарганлигининг аҳамиятини алоҳида таъкидлаган.

АҚШ Давлат департаменти маълумотига кўра, мулоқот чоғида икки дипломат диний эркинликларни кенгайтириш, одам савдосига қарши кураш ҳамда фуқаролик жамияти ва журналистлар фаолияти учун майдонни кенгайтириш дохил инсон ҳуқуқлари соҳасида олиб борилаётган ислоҳотлар ривожини муҳокама қилганлар. Шунингдек, улар Ўзбекистон юритаётган хусусийлаштириш ҳамда бозор ривожланиши учун қулай сиёсат қабатида америкалик экспортёрлар ва инвесторлар учун имкониятларни муҳокама қилганлар.

Ўзбекистон ТИВ матбуот хизмати А. Комилов ва М. Помпео мулоқоти чоғида минтақавий ҳамкорлик, “C5+1” форматидаги ўзаро муносабатлар, Афғонистондаги вазиятни тартибга солиш, ушбу мамлакатни ижтимоий-иқтисодий қайта тиклаш ва барқарорликни таъминлаш масалалари бўйича ўзаро фикр алмашилганига эътибор қаратган.

Мазкур мулоқот президент Ш. Мирзиёев администрацияси ҳузуридаги Ахборот ва оммавий коммуникациялар агентлиги томонидан Ўзбекистондаги қатор мустақил нашрларга “огоҳлантириш хати” йўлланганидан бир неча кун ўтиб амалга ошди. Мустақил нашрлар АОКАнинг бу қадамини ўзларига нисбатан босим ўлароқ баҳолаганлар.

АОКАнинг бу ҳаракати Ўзбекистонда фаолият олиб бораётган қатор дипломатлар томонидан қораланган, хусусан, АҚШ элчиси Даниэл Розенблюм бунинг расмий Тошкент олиб бораётган ислоҳотлар руҳига зид эканини таъкидлаганди.

Энергетика вазири портлаб кетаётганига қарамай "барибир "Технопарк" ҳисоблагичларини ўрнатамиз", деб айтди

Андижонда ўрнатилганидан 2 соатча ўтиб-ўтмай портлаган газ ҳисоблагичи Osten брендидаги қурилмадир.

Энергетика вазири Алишер Султонов портлаб кетаётганига қарамай, “Технопарк” компаниясининг электрон газ ҳисоблагичларини аҳоли хонадонларига ўрнатиш давом эттирилишини билдирди.

Вазир Alter Ego лойиҳасига берган интервьюсида “Технопарк” газ ҳисоблагичларининг портлаши “ёмон ниятдаги одамлар томонидан махсус” уюштирилаётганини иддао қилди:

“Бу атайлаб амалга оширилган. Биз текширув ўтказдик ва буни аниқладик. Ушбу “оғайнилар” биз билан қанчалик курашмасин, барибир ҳисоблагичларни ўрнатамиз ва одамларни истеъмол қилган нарсаси учун пул тўлашга мажбур қиламиз. Тартиб ўрнатамиз ва ўғирликларга барҳам берамиз”, — деб айтган вазир.

Алишер Султоновга кўра, электрон газ ҳисоблагичларни ўрнатиш бўйича очиқ ўтказилган тендерда “Технопарк” ғолиб бўлган.

Озодлик радиоси жорий йилда “Суриштирув: $555 млнлик газ ҳисоблагич лойиҳаси Tошкент ҳокими Ортиқхўжаевга алоқадор компанияларга берилди”, “Андижонда портлаш: Жаҳонгир Ортиқхўжаев бренди билан 3,5 миллион хонадонга мажбуран ўрнатилаëтган газ ҳисоблагич хавфсизлиги савол остида”, “Ҳужжатлар Ортиқхўжаев билан тузилган $583 млнлик шартнома қонунийлигини савол остига қўймоқда” каби қатор мақолаларни эълон қилган эди.

Мазкур мақолалардан бирида бу ташкилот томонидан ўрнатилаётган газ ҳисоблагичлари портлаб кетаётгани ҳақида гап боради.

Озодлик суриштирувида келтирилган факт ва маълумотларга ҳозирга қадар на бу жараëн тепасида турган Вазирлар Маҳкамаси¸ на давлат буюртмачиси ролидаги “Ҳудудтаъминотгаз”¸ на Жаҳонгир Ортиқхўжаев раҳбар бўлган Тошкент шаҳар ҳокимлиги ва на унинг бу лойиҳага алоқадор хусусий бизнес структуралари бирор шаклда муносабат билдирган эмас.

Пахта ҳосили ўтган йилга нисбатан 9 фоизга кўп бўлди

Ўзбекистондаги пахта даласи.

Жорий йилда Ўзбекистонда 1 миллион 34 минг гектар ерга пахта экилиб, ҳосил 3 миллион 82 минг тоннани ташкил қилди. Бу 2019 йилга нисбатан 109 фоизга кўпдир.

Қишлоқ хўжалиги вазирлигининг билдиришича, энг кўп пахта ҳосили Фарғона вилоятида (107,7 фоиз) етиштирилган.

Қашқадарёда (95,8 %), Сирдарёда (93,5 %), Бухоро (89,1 %), Сурхондарё (82,3 %) вилоятларидан бошқа барча вилоятларда режа юз фоиздан кўпроққа бажарилган.

Вазирликнинг билдиришича, пахта етиштирувчи 136 та тумандан пахта йиғим-теримини тизимли ташкил этган 104 таси, 97 та пахта-тўқимачилик кластеридан 78 таси, 11 та пахта кооперациясидан 8 таси ҳамда 29 мингта фермер хўжаликларидан 23 мингтаси шартномани бажарди.

Республикада ҳар гектар пахта майдонида ўртача ҳосилдорлик 29,8 центнерни ташкил қилди.

“Жорий йилда фаолият юритган 97 та пахта-тўқимачилик кластерлари томонидан 927 минг гектар майдондан 2 млн 794 тонна ва 11 та кооперациялар томонидан 106,6 гектар майдондан 288 минг тонна пахта хомашёси етиштирилди”,-дейилади расмий билдирувда.

Мирзиёев телефон орқали Путин билан мулоқот қилди

Президент матбуот хизматининг билдиришича, “суҳбат ҳар доимгидек самимий, дўстона ва конструктив руҳда ўтди”.

Ўзбекистон президенти Шавкат Мирзиёев 30 ноябрь куни Россия президенти Владимир Путин билан телефон орқали мулоқот қилди.

Президент матбуот хизматининг билдиришича, мулоқот давомида икки мамлакат ўртасидаги стратегик шериклик муносабатларини янада мустаҳкамлаш ва кўп қиррали ҳамкорликни кенгайтиришнинг долзарб масалалари кўриб чиқилди.

Бундан ташқари декабрь ойида видеоанжуман шаклида ўтказилиши режалаштирилган МДҲ саммитига тайёргарлик кўриш масаласига алоҳида эътибор қаратилди. Жорий йилги МДҲ саммитига Ўзбекистон раислик қилади.

“Ўзбекистон ва Россия Президентлари коронавирус пандемиясининг тарқалиши оқибатида келиб чиққан глобал инқироз шароитида икки томонлама савдо-иқтисодий алоқалар барқарор суръат билан ривожланиб бораётганини катта мамнуният билан қайд этдилар”,-дейилади хабарда.

Президент матбуот хизматининг билдиришича, “суҳбат ҳар доимгидек самимий, дўстона ва конструктив руҳда ўтди”.

Андижонда қизининг ўлими учун товон талаб қилган аёл ўзига ўт қўйди

Бош прокуратура бу воқеа юзасидан тезкор хабар тарқатди.

Бош прокуратуранинг маълум қилишича, 30 ноябрь куни соат 13:20 ларда Андижон вилоят прокуратураси олдида қизининг ўлими учун айбланувчидан “Спарк” автомашинасини товон сифатида ундириб беришни талаб қилган аёл ўзига ўт қўйди.

“Шу вақтда воқеалар ривожини кузатиб турган Андижон вилоят ИИБ пост-патруль хизмати ходимлари томонидан С.Б.,нинг эгнида ёнаётган кийимлари ечиб олиниб, унинг куйиб оғир тан жароҳати олиши олди олинган. Айни вақтда С.Б.,нинг юзи, қўллари, бўйин ва кўкрак қафаси соҳалари жами танасининг 15 фоиз қисми куйиш ташхиси билан шифохонага жойлаштирилди. Мазкур ҳолат бўйича Андижон шаҳар прокуратураси томонидан терговга қадар текширув ҳаракатлари олиб борилмоқда”,-дейилади расмий баёнотда.

Бош прокуратуранинг билдиришича, жорий йилнинг 24 июль куни соат 23:00 ларда Марҳамат тумани, “Тош йўли” МФЙ, “Садоқат” кўчасида яшовчи 1999 йилда туғилган Н.М. , севган йигитини кутиб турган вояга етмаган Т.М.,ни уяли телефонига расмга олиб, ушбу фотосуратларни унинг ота-онаси ва профилактика инспекторига кўрсатишини айтган.

Бу маълумот бошқаларга ошкор бўлишидан қўрққан қиз ўзини осиб, жонига қасд қилган. Мазкур ҳолат юзасидан Жиноят кодексининг 141-1-моддаси (Шахсий ҳаёт дахлсизлигини бузиш) билан жиноят иши қўзғатилган ва ҳозирда тергов ҳаракатлари олиб борилмоқда.

Бош прокуратура баёнотида айтилишича, марҳуманинг онаси С.Б., олиб борилаётган тергов ҳаракатларидан норози бўлиб, 30 ноябрь куни соат 12-15 ларда Андижон вилоят прокуратурасига келган ва вилоят прокурорининг биринчи ўринбосари Ф. Раҳмонов томонидан қабул қилинган.

С.Б.,қизининг ўлими учун товон сифатида айбланувчи Н.М.,дан “Спарк” автомашинасини ундириб беришни талаб қилган. Аммо “Спарк” автомашинасини ундириш тергов органларининг ваколатига кирмаслиги тўғрисида маълумот олгач, ўзига ўзи ўт қўйишини айтиб, прокуратурадан чиқиб кетган.

“Шу куни соат 13-20 ларда С.Б., вилоят прокуратураси автомашиналар тураргохида бақириб, бошқа шахсларни ўзига жалб қилиб, турмуш ўртоғи Х.Т.дан 1 литрли пластмасса идишда бўлган “Бензин” ёқилғиси ва гугуртни олиб, ўзининг елка қисмларига қуйган ва турмуш ўртоғи Х.Т. томонидан ўзини ёқиши ва вилоят прокуратураси биноси ичига югуриб кириб кетиши ҳақида кўрсатма олганидан сўнг ўзига ўт қўйиб ёқиб юборган”,-дейилади баёнотда.

Коронавирусга чалинганлар 73 мингдан ошди. Вазирлик ўлганлар ҳақида маълумот беришни тўхтатди

30 ноябрь куни янги касалланган 67 кишининг барчаси Тошкент шаҳрида аниқланган.

Ўзбекистонда коронавирус инфекцияси қайд этилганлар сони 73 041 кишига етди. Бу ҳақда Соғлиқни сақлаш вазирлиги маълум қилди.

Маълумотга қараганда, 30 ноябрь куни янги касалланган 67 кишининг барчаси Тошкент шаҳрида аниқланган.

Айни пайтда вазирлик 28 ноябрдан бери коронавирусдан ўлганлар тўғрисидаги маълумотларни бермай келмоқда. 28 ноябрь куни Соғлиқни сақлаш вазирлиги ўлганлар сони 608 кии бўлганини қайд этган эди.

Аммо жамоатчилик Соғлиқни сақлаш вазирлиги берган маълумотларга ишончсизлик билдириб, ўлганлар сони расмий кўрсаткичдан кўра кўпроқ деб ҳисоблаб келмоқда.

Коронавирусдан ўлимлар сони бўйича мустақил статистикани олиб бораётган “Дарё” нашрининг ёзишича, 1 декабрь ҳолатига кўра, коронавирусдан камида 627 киши ўлган.

Соғлиқни сақлаш вазирлиги коронавирус юққанлардан 70 303 нафари тузилиб, соғайиш кўрсаткичи 96 фоизни ташкил қилганини билдирди. Ҳозирда касалхоналарда 2130 нафар бемор даволанмоқда.

Мирзиёев Ўзбекистонда ишлаб чиқарилаётган автобуслар нархини пасайтириш муҳимлигини таъкидлади

Ўзбекистон президенти Шавкат Мирзиёев

Ўзбекистонда ишлаб чиқарилаётган автобусларнинг нархи хорижникига нисбатан юқори, шу боис маҳаллийлаштириш даражасини ошириб, автобус ва микроавтобуслар нархини тушириш муҳим. Бу ҳақда президент Шавкат Мирзиёев 30 ноябрь куни ҳудудларда жамоат транспортини ривожлантириш чора-тадбирлари муҳокама қилинган мажлисда таъкидлаган.

Президент матбуот хизмати маълумотига кўра, мажлисда туманлардан вилоят марказларига қатновчи автобуслар эскиргани, айримлари хизмат муддатидан ортиқ фойдаланилаётгани кўрсатиб ўтилган. Қайд этилишича, Ўзбекистонда бугунги кунда автобуслар билан таъминланганлик даражаси ҳар 100 минг аҳолига 24 тани ташкил этади. Бу кўрсаткич Сурхондарё, Қашқадарё, Наманган ва Андижонда 15 тага ҳам етмайди.

Мажлисда Ўзбекистон бўйича кунига қарийб 20 миллион йўловчидан бор-йўғи 4,4 миллиони ёки 22 фоизи жамоат транспортидан фойдаланаётгани, бу кўрсаткич Андижон, Қашқадарё, Наманган, Хоразм, Самарқанд, Фарғона, Бухоро ва Тошкент вилоятларида бундан ҳам пастлиги, 1 минг 200 та қишлоқ туман марказигача бўлган йўналишда жамоат транспорти билан қамраб олинмагани урғуланган.

Президент қишлоқдан туман марказигача ҳамда у ердан вилоят марказигача бўлган транспорт хизматлари кўламини кенгайтириш ва уларнинг сифатини ошириш зарурлигига эътибор қаратган.

Одамлар учун шаҳар, туман ва қишлоқлар орасида транспортни қулай, хавфсиз ва осон қилиш керак. Бу хизматлардан халқ рози бўлиши керак”, деган жумладан Ш. Мирзиёев.

Йиғилишда аҳоли талабидан келиб чиқиб, янги йўналишлар очиш, мавжудларини қайта кўриб чиқиш, автобус бекатларини реконструкция қилиш, бунга хусусий секторни жалб қилиш зарурлиги таъкидланган. Бу борадаги чора-тадбирлар ижроси жойларга чиққан ҳолда ўрганиб борилиши, халқ депутатлари кенгашларида ҳар уч ойда транспорт тизими раҳбарларининг ҳисоботлари эшитилиб, аниқ вазифалар қўйилиши белгиланган. Соҳага оид қонунларнинг бугунги кун талабига жавоб бермайдиганларини такомиллаштириш зарурлиги қайд этилган.

Тошкент вилоятининг COVID-19 дан вафот этган бош имоми ўрнига янги бош имом-хатиб тайинланди

Тошкент вилоятининг аввалги бош имом-хатиби Хайруллоҳ домла Турматов

Тошкент шаҳри бош имом-хатиби ўринбосари вазифасида ишлаб келаётган Жасур Раупов Тошкент вилояти бош имом-хатиби лавозимига тайинланди.

Ўзбекистон мусулмонлари идораси матбуот хизмати маълумотига кўра, мазкур масала 30 ноябрь куни бўлиб ўтган Тошкент вилояти имом-хатиблари йиғилишида кўриб чиқилган.

Қайд этилишича, Жасур Раупов Имом Бухорий номидаги Тошкент ислом институти ва Андижон давлат университетини тамомлаган. 1999 йилдан шу кунгача Тошкент шаҳридаги бир неча масжидда имом-хатиб вазифасида ишлаган. У 2010 йилдан бери Тошкент шаҳар бош имом-хатиби ўринбосари лавозимида ҳам фаолият юритиб келган.

Тошкент вилояти бош имом-хатиби Хайруллоҳ домла Турматов оламдан ўтган ҳақида Озодлик сентябрь ойи ўрталарида хабар қилганди. Имомнинг вафотига коронавирус инфекцияси юқтириб олган сабаб бўлгани айтилган эди.

Давомини ўқинг

XS
SM
MD
LG