Линклар

Шошилинч хабар
18 июн 2021, Тошкент вақти: 01:24

Ўзбекистон хабарлари

Тошкент ХТТБ рўмолли қизнинг мактабга киритилмагани воқеасига муносабат билдирди

Тошкент шаҳар Халқ таълими бош бошқармаси Қора-қамиш даҳасидаги мактабда директор рўмол ўраган қизларни мактабга киргизмаётгани ҳақида ижтимоий тармоқда тарқалган хабарларга муносабат билдирди.

Бошқарманинг билдиришича, мазкур ҳолат Олмазор туман халқ таълими бўлими ишчи гуруҳи томонидан ўрганилган.

"Ижтимоий тармоқлар орқали расми кўрсатилган вояга етмаган қиз мактабнинг 3-синфи ўқувчиси бўлиб, жорий ўқув йилида пандемия сабабли ўқувчининг ота-онаси талаби билан ўқувчи III-чоракка қадар масофавий шаклда таълим олган.

2021 йил 18 январь куни ўқув йилининг III-чорак бошида ўқувчи қизнинг онаси мактабга келиб қизи ҳижобга кирганлигини, дарсларда ҳижобда ўтиришига мактаб маъмуриятидан рухсат беришини сўраган. Акс ҳолда у вояга етмаган фарзандини дарсга юбормаслигини айтган.

Мактаб маъмурияти томонидан ўқувчининг онасига, ҳар бир мактаб ўзининг тасдиқланган ички тартиб-қоидалар тўғрисидаги Низомга амал қилган ҳолда муассасанинг фаолиятини ташкил этиши ҳақида тушунтирилган", - дейилади бошқарма баёнотида.

Мактаб биносидан ташқарисида эса вояга етмаган қизларнинг рўмол ўраб юришига мактаб маъмуриятининг ҳеч қандай эътирози йўқлиги маълум қилинган.

“Она мазкур жавобга қониқмасдан, агар қизим ҳижобда келишига рухсат берилмаса унинг отаси ўзини осиб қўяди, деган таҳдид билан мактабдан фарзандини олиб чиқиб кетган”, дейилади бошқарма хабарида.

Ўзбекистон Вазирлар Маҳкамасининг 2018 йил 15 августдаги “Давлат умумий ўрта таълим муассасалари ўқувчиларини замонавий ягона мактаб формаси билан таъминлаш чора-тадбирлари тўғрисида”ги 666-сонли Қарорига кўра, мамлакат аҳолиси турли миллат ва диний конфессиялар вакилларидан иборатлиги ҳамда мажбурий умумий ўрта таълим дунёвий характерга эгалиги муносабати билан ўқувчиларнинг мактаб формасига турли дин конфессиялари ҳамда субмаданиятларга мансубликни акс эттирувчи элементларни (ҳижоб, кипа, кашая, хоч ва бошқалар) қўшишга йўл қўйилмаслиги ҳақида айтилган.

Кун янгиликлари

Бир ярим ойда юз миллиард сўмдан кўпроқ давлат харидлари ноқонуний амалга оширилган

Давлат харидларини қонунбузарликлар билан амалга оширган вилоятлар орасида Андижон биринчи ўринни эгаллаган.

Жорий йилнинг май-июнь ойида 101,5 миллиард сўмлик давлат харидлари ноқонуний амалга оширилган. Бу ҳақда Коррупцияга қарши курашиш агентлиги 17 июнь куни маълум қилди.

Расман билдирилишича, давлат харидларини қонунбузарликлар билан амалга оширган вилоятлар орасида Андижон биринчи ўринни эгаллаган. Мазкур вилоятда 20 миллиард сўмлик 51 та давлат хариди ноқонуний равишда бўлгани аниқланган.

Тошкент шаҳрида 19,5 млрд. сўмлик (51 та), Самарқандда 12,8 млрд. сўмлик (52 та), Жиззахда 8,3 млрд. сўмлик (20 та) танловлар бўйича давлат харидларига оид қонунчилик талаблари бузилганлиги маълум бўлди. Қолган вилоятларда ҳам ноқонуний давлат харидлари миқдори миллиардлаб сўмларни ташкил қилади.

Давлат харидларига оид қонунчилик талаблари бузилган танловлардан 72 таси (24,6 млрд.) туман (шаҳар) ҳокимликлари, 71 таси (20,9 млрд.) Халқ таълими вазирлиги, 61 таси (17,9 млрд.) Соғлиқни сақлаш вазирлиги, 33 таси (11,1 млрд.) Мактабгача таълим вазирлиги, 24 таси (7,9 млрд.) Олий ва ўрта махсус таълим вазирлиги, 9 таси (3,6 млрд.) Сув хўжалиги вазирлиги ва қолган 54 таси (15,5 млрд.) бошқа вазирлик ва идоралар ҳисобига тўғри келади.

Тошкентдан Деҳлига жума куни амалга ошириладиган парвозлар бекор қилинди

Иллюстратив сурат.

Uzbekistan Airways 18 июндан бошлаб Ҳиндистоннинг Деҳли шаҳрига ҳар жума куни амалга ошириладиган парвозларни бекор қилди. Ширкат матбуот хизматининг билдиришича, бу ҳақда Коронавирусга қарши кураш бўйича махсус респбулика комиссияси қарор чиқарди.

Тошкент-Деҳли-Тошкент рейсининг бекор қилинишига Ҳиндистонда коронавирус билан боғлиқ оғир эпидемиологик вазият сабаб бўлган.

“Бекор қилинган рейсларнинг йўловчиларига билет учун тўлаган пуллари қайтариб берилади”,-дейилади расмий билдирувда.

Айни пайтда Тошкентдан Деҳлига ҳар сешанба кунлари амалга ошириладиган парвозлар белгиланган тартиб асосида амалга оширилади.

Жаҳон банки Ўзбекистон солиқ тизими ислоҳоти учун 60 миллион доллар қарз беради

Жаҳон банки Ўзбекистон солиқ тизими ислоҳоти учун 60 миллион доллар қарз бериш лойиҳасини тасдиқлади.

Жаҳон банкининг 17 июнда маълум қилишича, Давлат солиқ қўмитаси фаолиятининг самарадорлигини ва маҳаллий солиқ тўловчиларга кўрсатилаётган хизмат сифатини яхшилашга қаратилган лойиҳа учун қарз “жуда оз фоиз билан 30 йилга” берилмоқда.

Таъкидланишича, лойиҳа натижасида Ўзбекистонда солиқ базаси кенгайтирилади ва бу яширин иқтисодиёт кўламининг қисқаришига хизмат қилади. Жаҳон банкининг таъкидлашича, бугунги кунда Ўзбекистон иқтисодиётининг 50 фоизга яқини яшириндир, яъни солиқ тўламайди.

Жаҳон банки лойиҳа амалга оширилиши оқибатида Ўзбекистон бюджетига тушадиган солиқ миқдори кўпайишига, фирма ва ширкатларда янги иш ўринлари яратилишига умид қилмоқда.

Сирдарёда экстремистик материалларни тарқатганликда гумонланган 20 киши қўлга олинди

Иллюстратив сурат.

Сирдарё вилоятининг Мирзаобод ва Янгиер туманларида Telegram орқали экстремистик материалларни тарқатишда гумонланган 20 киши қўлга олингани тўғрисида вилоят Ички ишлар бошқармаси маълум қилди.

Расман билдирилишича, гумонланувчилар Ички ишлар бошқармаси ва Давлат хавфсизлик хизмати 16 июнда ҳамкорликда ўтказган тезкор тадбир доирасида ушланган.

Қўлга олинган гуруҳ Telegram орқали экстремист ва террорчи ташкилотларни тарғиб қилувчи аудио ва видеоларни тарқатиб келганликда гумонланмоқда.

Ички ишлар бошқармаси тарқатган хабарга гуруҳ аъзолари уйи тинтув қилинганида топилгани иддао қилинаётган тўппонча ва оптик мўлжалга олиш ускунаси бўлган милтиқ сурати ҳам илова қилинган.

Жиззах вилоят Ички ишлар бошқармаси 15 июнда Ғаллаорол туманида Сурия Араб Республикасида террорчилик ҳаракатларини амалга ошираётган “Тавҳид ва жиҳод катибаси” таркибига қўшилишни режалаштираётган гуруҳ қўлга олингани ҳақида маълум қилганди.

Июнь ойининг бошларида эса Самарқандда Сурияга кетмоқчи бўлган 14 киши ушлангани расман билдирилган.

Ўзбекистонда коронавирус: Самарқанд Тошкентдан кейин иккинчи ўринга чиқди

Соғлиқни сақлаш вазирлигининг билдиришича, сўнгги бир сутка ичида яна 371 кишида коронавирус аниқланди.

Ўзбекистонда коронавирус инфекцияси қайд этилганлар сони 16 июнь ҳолатига кўра, 104834 нафарга етди. Соғлиқни сақлаш вазирлигининг билдиришича, сўнгги бир сутка ичида яна 371 кишида коронавирус аниқланди.

Вирусга янги чалинганларнинг 170 нафари Тошкент шаҳрида, 40 нафари Самарқанд вилоятида, 39 нафари Тошкент вилоятида, 27 нафари Сурхондарё вилоятида.

Бундан ташқари Жиззахда 21 кишида, Фарғонада 19 кишида, Бухорода 15 кишида, Қашқадарёда 10 киишида коронавирус аниқланди. Қолган вилоятларнинг ҳар бирида 3 нафардан 8 нафаргача янги бемор аниқланган.

16 июнда коронавирусга чалинган 2 нафар бемор вафот этган. Бу билан касалликдан ўлганлар сони 713 нафарни ташкил қилди.

Касалликдан соғайганлар жами 100623 нафарга етди ва соғайиш кўрсаткичи 96 фоизни ташкил этмоқда. Айни пайтда тиббиёт муассасаларида 3498 нафар бемор даволанмоқда.

Ўзбекистон президенти икки кунлик амалий ташриф билан Андижон вилоятига жўнаб кетди

Ўзбекистон президенти Шавкат Мирзиёев ҳудудлардаги ўзгаришлар, аҳоли ҳаёти билан яқиндан танишиш мақсадида 17 июнь куни Андижон вилоятига жўнаб кетган.

Президент матбуот хизмати маълумотига кўра, икки кунлик амалий ташриф давомида мазкур вилоятда тўқимачилик, агросаноат ва қишлоқ хўжалиги корхоналари фаолияти билан танишиш, бунёдкорлик ишларини кўздан кечириш режаланган.

Қайд этилишича, “Янги Андижон” шаҳри қурилиши бошланиши ташрифнинг энг муҳим воқеаларидан бири бўлади.

Президент Ш. Мирзиёев 17-18 июнь кунлари Андижонга бориши ҳақида Озодлик аввалроқ хабар қилган.

Андижондан аввал президент 1-2 июнь кунлари Сурхондарёга сафар қилганди.

ДХХнинг собиқ бош биноси қарийб 20 миллион АҚШ долларига сотилди

ДХХнинг собиқ марказий биноси жойлашган Сайилгоҳ кўчаси

Давлат хавфсизлик хизматининг (аввалги Миллий хавфсизлик хизмати ёки МХХ) Тошкент шаҳри Сайилгоҳ кўчасида жойлашган собиқ марказий биноси 210 миллиард сўмга сотилди.

Давлат активларини бошқариш агентлиги маълумотига мувофиқ, мазкур бино бўйича “METROPOL GROUP” МЧЖ савдо ғолиби, деб топилган.

Davletov.uz Телеграм-канали қайдича, “METROPOL GROUP” МЧЖ муассиси (100%) Камилов Данияр Абдулазизович бўлиб ҳисобланади.

Д. Комилов Ўзбекистоннинг амалдаги ташқи ишлар вазири Абдулазиз Комиловнинг ўғлидир.

Аввалроқ Озодлик Давактив маълумотига таянган ҳолда, ДХХнинг Сайилгоҳ кўчасидаги собиқ бош қароргоҳи аукцион савдоларига қўйилгани, бинонинг “1 сўм” бошланғич қийматда оммавий савдоларга чиқарилиши белгилангани ҳақида хабар қилганди.

Бухорода бюджет ташкилоти қарийб 65 миллиард сўмлик давлат харидини тендерсиз амалга оширган

Монополияга қарши курашиш қўмитасининг Бухоро вилояти ҳудудий бошқармаси “Бухоро йўллардан мунтазам фойдаланиш" унитар корхонаси фаолиятида “Давлат харидлари тўғрисида”ги ва “Рақобат тўғрисида”ги қонун талабларининг бузилиш ҳолатларини аниқлаган.

Аксилмонополия қўмитаси матбуот хизмати маълумотига кўра, ўрганиш “Бухоро йўллардан мунтазам фойдаланиш” УК томонидан тақдим қилинган ҳужжатлар асосида олиб борилган.

Ўрганиш чоғида Бухоро ЙМФУК “Давлат харидлари тўғрисида”ги қонун талабларига зид равишда 2019 йилда 31 миллиард 413 миллион 366 минг 209 сўмлик, 2020 йилда эса 33 миллиард 420 миллион 96 минг 221 сўмлик (жами 6 миллион АҚШ долларидан кўпроқ - таҳр.) товарлар аукцион савдоларисиз ва хизматлар тендер савдоларисиз тўғридан-тўғри харид қилиш бўйича шартномалар имзоланиб, харидлар амалга оширилгани қайд этилган.

Аксилмонополия қўмитасининг махсус комиссияси томонидан “Бухоро йўллардан мунтазам фойдаланиш” УКга қайд этилган қонунбузарликни бартараф этиш ва келгусида мазкур қонун бузилиши ҳолатларига йўл қўймаслик тўғрисида кўрсатма берилган.

Мирзиёев давлат органлари фаолиятининг очиқлигини таъминлашга оид фармон имзолади

Ўзбекистон президенти Шавкат Мирзиёев

Ўзбекистонда мансабдор шахслар зиммасига хизмат сафарлари ва хориждан ташриф буюрган меҳмонларни кутиб олиш харажатларини ўз ташкилотлари расмий сайтларида эълон қилиш мажбурияти юклатилди. Бу ҳақда президент Шавкат Мирзиёев томонидан шу йил 16 июнида имзоланган "Давлат органлари ва ташкилотларининг фаолияти очиқлигини таъминлаш, шунингдек, жамоатчилик назоратини самарали амалга оширишга доир қўшимча чора-тадбирлар тўғрисида"ги фармонда қайд этилган.

Ҳужжатга мувофиқ, давлат органлари ва ташкилотлари 2021 йил 1 июлдан бошлаб қуйидагилар тўғрисидаги маълумотларни Ўзбекистон Республикасининг Очиқ маълумотлар порталига ва ўз расмий веб-сайтларига жойлаштириб, уларни ҳар чоракда янгилаб боради:

амалга оширилган давлат харидлари, шу жумладан, тўғридан-тўғри шартномалар бўйича харид қилинадиган товарлар (ишлар, хизматлар);

мансабдор шахсларнинг хизмат сафарлари ва хориждан ташриф буюрган меҳмонларни кутиб олиш харажатлари (хизмат сафарининг ёки ташрифнинг мақсади, суткалик пул, транспорт ва яшаш билан боғлиқ харажатлар, бундан давлат сирлари ва хизматда фойдаланиш учун мўлжалланган маълумотлар мустасно);

Ўзбекистон президенти, Вазирлар Маҳкамаси ҳужжатлари билан солиқ ва божхона имтиёзлари ҳамда преференциялар, шу жумладан, индивидуал имтиёзлар берилган субъектларнинг бенефициарлари (якуний манфаатдор жисмоний шахслари), улар томонидан тўланган солиқлар ва молиявий кўрсаткичлар;

ўзларининг йиллик харажатлар сметаси ва унинг ижроси, шу жумладан, объектларни қуриш, реконструкция қилиш ва капитал таъмирлаш ишлари, автомототранспорт воситаларини сотиб олиш харажатлари.

Фармон билан давлат идоралари зиммасига ҳар йили 1 мартга қадар ўз фаолиятига оид ҳисоботни (давлат сирлари ва хизматда фойдаланиш учун мўлжалланган маълумотлар бундан мустасно) расмий веб-сайтларига жойлаштириб, 10 мартга қадар уни кенг жамоатчилик иштирокида муҳокама қилиш жойи ва вақти ҳақида хабар бериш ҳамда 1 апрелга қадар ўз фаолиятига оид ҳисоботни кенг жамоатчилик иштирокида муҳокама қилиш учун матбуот анжуманларини ўтказиш вазифаси топширилган.

ОТМларга ҳужжат қабул қилиш жараёни 3 кундан сўнг бошланади

Ўтган йили аксар ОТМларда қабул имтиҳонлари карантин талабларидан келиб чиққан ҳолда очиқ майдонларда ўтказилганди

Ўзбекистондаги олий таълим муассасаларида янги ўқув йили учун онлайн тарзда ҳужжат қабул қилиш 20 июндан бошланади. Бу ҳақда президент Шавкат Мирзиёев раислигида 16 июнь куни олий таълим тизимидаги устувор вазифаларга бағишланиб ўтказилган видеоселектор йиғилишида айтилган.

Олий ва ўрта махсус таълим вазирлиги маълумотига кўра, икки ҳафта муддатда қўшимча давлат гранти асосида (имтиёзли) қабул параметрлари тасдиқланади.

Видеоселектор йиғилишида бу йил ОТМларга қабул сони ўтган йилга нисбатан 13 фоизга оширилиб, 181 минг нафарга етказилиши айтилган. Қайд этилишича, 2021/2022 ўқув йили учун 1,5 миллион нафардан зиёд абитуриент ОТМга кириш учун ҳужжат топшириши кутиляпти. Шу боис президент ушбу жараённи карантин ва хавфсизлик талабларини таъминлаган ҳолда, юқори савияда ўтказиш бўйича топшириқлар берган.

Таъкидланишича, бу йил илк маротаба 9 та нодавлат ОТМда 22 йўналиш бўйича талабаларни ўқитиш учун 500 та давлат гранти ажратилади.

Йиғилишда бугунги кунда талабалар учун қўшимча 149 мингта турар жойга эҳтиёж мавжуд урғуланиб, ётоқхоналарни тадбиркорлар билан хусусий шериклик асосида ташкил этиш учун олий таълим муассасаси ҳудудидан ёки унга яқин жойдан аукцион орқали ер ажратилиши белгиланган.

“My5” камераси флеш картасини чайнаб ташлагани иддао этилган ҳокимлик мулозимига ҳайфсан берилди

Иштихон тумани ҳокимлиги мулозимининг “My5” камераси хотира картасини суғуриб олаётгани тасвирга тушиб қолган (Kun.uz фотоси)

Самарқанд вилоятининг Иштихон туманида стелеканали журналистларига тегишли камера хотира картасини чайнаб ташлагани иддао қилинган туман ҳокимлиги ахборот хизмати ходими жазоланди. Бу ҳақда Самарқанд вилоят ҳокимлиги матбуот хизмати маълумот тарқатди.

Аввалроқ маҳаллий матбуот 14 июнь куни “My5” журналистлари Иштихон деҳқон бозорида юз берган ёнғин ҳақида материал тайёрлаш учун воқеа жойига боргани, у ерда туман ҳокимлиги вакили Илҳом Бобоев қаршилигига учрагани, И. Бобоев камера хотира картасини олиб қўйгани ва оғзига солиб, чайнаб юборгани ҳақида воқеа гувоҳларига таянган ҳолда хабар қилган.

Қайд этилишича, мазкур ҳолат 16 июнь куни Самарқанд вилояти ҳокимлиги ахборот хизмати ҳамда АОКА ҳудудий бошқармаси томонидан иккала тараф иштирокида ўрганилган.

Туман ҳокимлиги ахборот хизмати раҳбари И. Бобоев бозордаги ёнғин бўлган жой хавфли ҳолатда эканлигини инобатга олиб, ёниб кетган устунлар одамлар устига қулаши мумкин, деган хавотирда “фуқаролар тарқалгандан кейин тасвирга оласизлар” деб, журналистдан камерани ўчириб туришни сўрагани, натижада ўртада келишмовчилик юзага келганини билдирган. Матбуот котиби камера хотира картасини олмагани, ютиб юбормагани, бу гаплар асоссизлигини айтган, айни пайтда у камерага тегинганини тан олган.

“My5” телеканали мухбири Отажон Раббонақулов эса аввал-бошда туман ҳокимлиги ахборот хизмати раҳбари тасвирга олишга қаршилик кўрсатгани, кейинчалик эса мухбир туман ҳокими ва бошқалардан интервью олганини айтиб, И. Бобоев камера хотира картасини ютиб юборганини ўз кўзи билан кўрмагани, бу ҳақда бошқалардан эшитганини қўшимча қилган. У ўзи тайёрлаган лавҳада ҳам ва бошқа нашр мухбирлари билан суҳбатда ҳам “хотира картаси ютиб юборилди” деган сўзларни ишлатмаганини айтган.

О. Раббонқулов матбуот котиби тегинган камера айни пайтда ишлаб тургани, бироқ тасвир сифати бироз пастлигини (тасвирлар қорароқ) қайд этган.

Ўрганиш якунида Иштихон туман ҳокимининг шу йил 16 июнидаги фармойиши билан матбуот котиби И. Бобоевга ҳайфсан берилган, “My5” мухбири О. Раббонақуловга эса телеканал мулкига зиён етказилгани важи бўйича асос мавжуд бўлган ҳолатда судга мурожаат қилиш зарурлиги тушунтирилган.

Ҳокимлик хабарномасида туман ҳокимлиги мулозими томонидан чайнаб ташлангани иддао қилинган хотира картаси “My5” вакилларига бус-бутун қайтарилган-қайтарилмагани ҳақида лом-мим дейилмаган.

Президент аҳолининг жисмоний тайёргарлик даражасини баҳолашга буйруқ берди

Президентнинг “Аҳолининг жисмоний тайёргарлик даражасини баҳолаш тизимини жорий этишнинг ташкилий чора-тадбирлари тўғрисида”ги қарорига асосан 2021 йил 1 августдан бошлаб аҳолининг жисмоний тайёргарлик даражасини баҳолаш тизими жорий этилади.

Қарорда таъкидланишича, мана шу мақсадда ҳар йили бир марта 11 та ёш тоифаси бўйича спорт синовлари ўтказилади. Мусобақаларда иштирок этганларга эгаллаган ўрни ва даражасига қараб спорт разрядлари ҳамда унвонлари берилади.

Бундан ташқари, спорт синовларининг махсус талабларини муваффақиятли бажарганларга бир йил давомида сафарбарлик чақируви резервидаги ҳарбий хизмат тўловининг 50 фоизини тўлаш ва муддатли ҳарбий хизматга юборишда устунлик берилади.

Мусобақаларда I – ўринни эгаллаганлар “Темурбеклар мактаби”га синовларсиз кира олади ва кўп тармоқли тиббиёт муассасасида бепул кўрикдан ўтказилади.

Жомбойдаги мактаб таъмирига болалар жалб этилишига президент кўрсатмаси сабаб бўлгани расман айтилди

Иллюстратив сурат.

Самарқанд вилояти Халқ таълими бошқармаси ахборот хизмати Жомбой туманидаги 28-мактаб ўқувчиларининг таъмирлаш ишларига жалб қилинганлиги тўғрисида ижтимоий тармоқларда тарқалган суратларга изоҳ берди.

Бошқарманинг билдиришича, ўқувчилар ота-оналарининг рухсати билан таъмирлаш ишларига жалб қилинган. Бундан ташқари Самарқанд вилояти Халқ таълими бошқармаси ахборот хизмати мазкур тадбир президентнинг топшириқларини бажариш асосида амалга оширилганини ҳам иддао қилган.

Қуйида Самарқанд вилояти Халқ таълими бошқармаси ахборот хизмати расмий билдирувини тўлиғича эътиборингизга ҳавола этамиз.

“Президентимизнинг 2021 йил 15-16 апрель кунлари Самарқанд вилоятига ташрифи давомида вилоят фаоллари билан ўтказилган учрашувда ёшларни мактаб давриданоқ касб-ҳунарга ўқитиш, деҳқончилик сирларини ўргатиш бўйича “Самарқанд тажрибаси”ни амалга ошириш бўйича топшириқлар берган эди. Ушбу топшириқлар ижросини таъминлаш мақсадида вилоятдаги айрим мактабларда ўқувчиларни полиз экинлари етиштириш, боғдорчилик, шунингдек, бошқа касб-ҳунарларга ўргатиш тажриба-синовлари амалга оширилмоқда.

Дарҳақиқат, бундай тадбирлар ўқувчиларни меҳнатга ўргатиш, меҳнати орқасидан даромад топиш, оиласига моддий манфаат келтириш ҳамда тадбиркорлик кўникмаларига эга бўлишида имконият яратади.

Айни кунларда интернет ва ижтимоий тармоқларда Жомбой тумани 28-умумтаълим мактаби ўқувчиларининг мактабдаги енгил таъмирлаш ишларига жалб қилинганлиги акс этган расмлар турли муҳокамаларга сабаб бўлмоқда.

Самарқанд вилояти Халқ таълими бошқармаси ва Жомбой туман Халқ таълими бўлими раҳбар-ходимлари томонидан мазкур ҳолат бўйича ўрганиш ишлари олиб борилди. Ўрганиш давомида ҳақиқатан ҳам Жомбой тумани 28-умумтаълим мактабида ёлланма ишчи ходимлар томонидан енгил таъмирлаш ишлари олиб борилмоқда. Суратдаги ўқувчилар, яъни 6 нафар 7-9 синф ўғил болалари мактабда олиб борилаётган таъмирлаш ишларига ёрдам бериш учун ота-оналарининг розилиги билан келганлиги маълум бўлди.
Ўрганиш давомида ўқувчиларнинг ота-оналари ҳам фарзандини ўз розилиги билан мактабдаги таъмирлаш ишларига ёрдам бериш ва таътил даврида ҳунар ўрганиш учун юборганини тасдиқлашди.

Суратдаги 5 нафар қиз ўқувчилар эса мактабнинг 11-а ва 11-в синф ўқувчилари бўлиб, улар билан суҳбатлашилганда, қизлар якуний давлат имтиҳонларининг баҳоларини билиш мақсадида келганлиги аниқланди.

Шунингдек, мазкур мактаб раҳбарияти ҳамда ўқитувчилари, синф раҳбарлари билан суҳбатлашиш жараёнида улар ўқувчиларни мажбурий меҳнатга жалб қилиш қонунга зид эканлигидан хабардорлигини билдиришди ва ўқувчиларни мактабдаги таъмирлаш ишларига чақирмаганликларини маълум қилишди.

Айни пайтга қадар олиб борилган ўрганишлар хулосасига кўра, Жомбой тумани 28-умумтаълим мактаби ўқувчилари ўзи ва ота-оналарининг ихтиёрига зид равишда таъмирлаш ишларига жалб қилинмаган.

Бугунги кунда ушбу ҳолат юзасидан ўрганиш ишлари давом этмоқда”.

Ҳар бир тухумга 50 сўмдан, парранда гўшти килосига минг сўмдан субсидия ажратилади

Иллюстратив сурат.

2021 йил 1 июндан ҚҚС тўловчиси бўлган паррандачилик хўжаликларига реализация қилинган тухумнинг ҳар бир донаси учун 50 сўмдан ва парранда гўштининг ҳар бир килоси учун 1 000 сўмдан субсидия ажратилади.

Адлия вазирлигининг билдиришича, бу борадаги “Паррандачиликни ривожлантириш ва тармоқ озуқа базасини мустаҳкамлашга қаратилган қўшимча чора-тадбирлар тўғрисида”ги президент қарори 14 июнда қабул қилинди.

Қарорда таъкидланишича, 2021 йил 1 июлдан 2024 йил 1 июлга қадар асосий фаолият тури паррандачилик бўлган тадбиркорлар учун фойда солиғи, мол-мулк солиғи, ер солиғи ва сув ресурсларидан фойдаланганлик учун солиқ ставкаси 50 фоиз миқдорида қўлланилади.

Бундан ташқари паррандачилик лойиҳаларини молиялаштириш учун 85 миллион доллар миқдоридаги маблағ “Микрокредитбанк” АТБга йўналтирилади.

2022 йил 1 июлга қадар тухум, парранда гўшти ва маҳсулотларини экспорт қилувчи ҳамда соя донини импорт қилувчи тадбиркорлар (уларнинг ваколатли вакиллари)га автомобиль, темир йўл ва ҳаво транспортида ташиш харажатларини 50 фоизигача миқдорда компенсация қилишга субсидиялар тақдим этилади

Ўзбекистонда президентлик сайловини ўтказиш учун 300 миллиард сўм ажратилади

Иллюстратив сурат.

Жорий йилнинг октябрь ойида бўлиб ўтадиган Ўзбекистон президенти сайловига тайёргарлик кўриш ва уни ўтказиш билан боғлиқ харажатларга 300 миллиард сўм ажратилади. Бу ҳақда Марказий сайлов комиссияси - МСКнинг 16 июнда ўтган йиғилишида маълум қилинди.

Жумладан, 14 та округ сайлов комиссиясининг ҳар бирига 56 миллион 991 минг сўмдан, шунингдек, қарийб 10 800 та участка сайлов комиссиясининг ҳар бирига 11 миллион 813 минг сўмдан маблағ ажратиш режалаштирилган.

Округ ва участка сайлов комиссиялари учун ажратилаётган ушбу маблағларнинг 80 фоиздан кўпроғи мазкур комиссиялар аъзоларининг иш ҳақи, компенсация ҳамда ягона ижтимоий тўловлар учун сарфланади.

Бундан ташқари сайлов жараёнидаги умумпартиявий тадбирлар ва сиёсий партия томонидан кўрсатилган номзодларнинг сайловолди ташвиқоти учун 15 миллиард 486 миллион сўм ажратилади. Таъкидланишича, бу маблағ бўлинганида ҳар бир номзодга 3 миллиард 97 миллион сўмдан тўғри келмоқда.

“Avto 60 oy”га алданганларга маблағларини қайтариш бошланди

Суд 29 март куни “Avto 60 oy” МЧЖ раҳбари Жамшид Баҳодировни 8 йил қамоқ жазосига ҳукм қилган эди.

“Avto 60 oy”га алданганларга маблағларини қайтариш учун ҳар бир вилоятда ишчи гуруҳи ташкил этилди. Бу ҳақда Мажбурий ижро бюроси маълум қилди.

“Avto 60 oy”дан жабрланганларга маблағларини қайтариш билан Ўзбекистон Бош прокуратураси ҳузуридаги Мажбурий ижро бюроси ходимларидан иборат таркибда ташкил этилган гуруҳлар шуғулланади.

“Ҳозирда ишчи гуруҳларга 2144 нафар фуқаро мурожаат қилиб, ўзларига тегишли ҳисоб рақамлар хақидаги маълумотларни тақдим қилишган”,-дейилади хабарда.

Мажбурий ижро бюроси “Avto 60 oy”дан пулларини қайтариб ололмаган фуқароларни шахсини тасдиқловчи ҳужжатлар (фуқаролик паспорти) ҳамда пластик карточкалари билан Мажбурий ижро бюросининг ҳудудий бошқармаларига душанба-жума кунлари соат 09-00 дан 18-00 га қадар мурожаат қилишга чақирди.

Вилоятларда ташкил қилинган ишчи гуруҳларининг рўйхати, манзили ва телефон рақамлари билан мана бу ерда танишиш мумкин.

Жиноят ишлари бўйича Чилонзор туман суди 29 март куни “Avto 60 oy” МЧЖ раҳбари Жамшид Баҳодировни 8 йил қамоқ жазосига ҳукм қилган эди. 25 ёшли Жамшид Баҳодиров билан биргаликда МЧЖга алоқадор яна 4 киши судланди.

19 мингга яқин мижоздан 57 миллиард сўмдан ортиқ пул йиғиб¸ фақат 100 нафар мижозгагина машина бергани ортидан жиноят иши фигуранти бўлган “Avto 60 oy” МЧЖси раҳбари Жамшид Баҳодировга нисбатан суд жараёни вилоятларда ўтказилган эди. Ўшанда иш юзасидан гувоҳларнинг кўплиги сабабли мана шундай қарорга келингани хабар қилинган.

Коронавирус қурбонларининг умумий сони 710 нафардан ошди

Ўзбекистонда коронавирус чалингани ортидан вафот этганлар сони 711 нафарга етди. Бу ҳақда Соғлиқни сақлаш вазирлиги маълумот тарқатди.

Жорий йилнинг 15 июнь ҳолатига кўра, Ўзбекистонда коронавирус инфекцияси қайд этилганлар сони, 104 минг 463 нафарга етган. Вазирлик қайдича, кеча мамлакатнинг истисносиз барча ҳудудларида 350 нафар киши коронавирусга чалинган.

Айни пайтда ўтган кеча-кундузда Қорақалпоғистон Республикаси, Бухоро, Жиззах, Қашқадарё, Навоий, Наманган, Самарқанд, Сурхондарё, Фарғона, Хоразм, Тошкент вилоятлари ҳамда Тошкент шаҳрида 342 нафар бемор тузалиб, соғайганлар сони 100 минг 328 нафарга етган.

Касалхоналарда муолажаси давом этаётган беморлар сони эса шу кунда 3 минг 424 нафарни ташкил этмоқда.

Ўзбекистонлик футболчилар Жаҳон чемпионатига чиқиш имкониятини қўлдан бой беришди

Ўзбекистон терма жамоаси бош мураббийи Вадим Абрамов Саудия Арабистони термаси билан ўйиндан сўнг футбол мухлисларидан узр сўради

Ўзбекистоннинг футбол бўйича миллий терма жамоаси 15 июнь куни 2022 йилги Жаҳон чемпионати саралаш босқичининг иккинчи даврасида Саудия Арабистони терма жамоасига қарши майдонга тушди.

Учрашув 3:0 ҳисобида ўзбекистонлик футболчилар мағлубияти билан якунланди. Шу тариқа Ўзбекистон терма жамоаси кейинги йилда бўлиб ўтадиган Жаҳон чемпионати саралаш босқичининг учинчи даврасига чиқиш ҳамда Қатарда ўтказилажак ЖЧда иштирок этиш имкониятини қўлдан бой беришди.

Ўйиндан сўнг Ўзбекистон терма жамоаси бош мураббийи Вадим Абрамов футбол мухлисларининг ишончини оқлай олмагани учун улардан узр сўради.

Иштихонда туман ҳокимлиги ходими “My5” камерасининг хотира картасини чайнаб ташлагани иддао қилинди

Иштихон тумани ҳокимлиги ахборот хизмати ходимининг “My5” телеканали камераси хотира картасини чайнаб ташлагани айтилмоқда (Kun.uz фотоси)

Самарқанд вилоятининг Иштихон туманида ҳокимлик ахборот хизмати ходими, маҳаллий матбуотда чиққан хабарларга кўра, “My 5” телеканалига тегишли камеранинг хотира картасини чайнаб, йўқ қилган.

Қайд этилишича, 14 июнь куни “My5” телеканали вакиллари Иштихон деҳқон бозорида юз берган ёнғин ҳақида материал тайёрлаш учун воқеа жойига борган.

Тележурналистлар у ерда Иштихон тумани ҳокимлиги вакили Илҳом Бобоев қаршилигига учраган. Суратга олиш жараёнида ахборот хизмати ходимининг камера картасини суғуриб олаётгани ҳам тушиб қолган.

“My5” мухбири Kun.uz нашрига ижодий гуруҳ ёнғин содир бўлган ҳудудга борган пайтда маҳсулотлари ёниб кул бўлган тадбиркорлар билан суҳбатлашаётган туман ҳокимини учратгани ва ҳолат бўйича қисқача изоҳ ҳам олганини маълум қилган.

“Бироқ ҳокимлик ахборот хизмати айнан ёнғин жойидан тасвирлар олишимизга қаршилик кўрсатиб, муаммо ҳал бўлганини айта бошлади. Биз ҳеч қандай муаммони эмас, бўлган воқеани ёритмоқчимиз, дейишимизга қарамасдан қаршилик кўрсатишда давом этди. Кейин эса тўсатдан камерамиздан хотира картасини олиб қўйди. Шерикларим унинг картани оғзига солиб чайнаб юборганини айтмоқда. Ахборот хизмати ходими картани чайнаб йўқ қилдими, ютиб юбордими, нима қилди - аниқ билмайман. Аммо унда жуда муҳим ишларимиз бор эди. Тезда вазиятга ИИБ ходимлари аралашиб, Илҳом Бобоевнинг бизга қаршилигини тўхтатди, аммо барибир хотира картасиз қолдик", дея иқтибос келтирган нашр “My5” мухбири сўзларидан.

Самарқанд вилояти ҳокимлиги мазкур ҳолат ўрганилаётганини билдирган.

“Иштихон туманида ҳокимлик матбуот хизмати ва журналист билан боғлиқ ҳолат вилоят ҳокимлиги ахборот хизмати ҳамда АОКА ҳудудий бошқармаси томонидан иккала томон иштирокида тўлиқ ўрганиб чиқилиши белгиланди”, дейилган ҳокимлик хабарномасида.

Ўзбекистон ва Россия бош вазирлари кейинги ҳафтада Москвада учрашишади

Ўзбекистон бош вазири Абдулла Арипов

Ўзбекистон бош вазири Абдулла Арипов россиялик ҳамкасби Михаил Мишустин билан 22 июнь куни Москвада учрашади. Бу ҳақда Россиянинг Ўзбекистондаги элчиси Олег Мальгинов маълум қилган.

Дипломатга кўра, кейинги сешанба куни Россия пойтахтида ҳукумат раҳбарлари даражасида икки томонлама ҳамкорлик бўйича қўшма комиссиянинг иккинчи мажлиси бўлиб ўтади.

О. Мальгинов мажлисдаги кўриб чиқиладиган асосий мавзуларидан бири икки мамлакат президентларининг бўлажак музокараларига ҳар томонлама тайёргарлик кўриш масаласи бўлишини ҳам қўшимча қилган.

Шавкат Мирзиёевнинг Россияга расмий сафари 2020 йилга режаланганди. Бироқ коронавирус пандемияси туфайли сафар муддати ўзгарган. Кейинроқ Ўзбекистон президентининг матбуот котиби Шерзод Асадов Ш. Мирзиёевнинг Россияга сафари 2021 йилда бўлиб ўтишини маълум қилган.

Ўзбекистон ва Россия бош вазирлари бошчилигидаги қўшма комиссиянинг илк мажлиси 2019 йилнинг май ойида Урганчда ўтказилган. Ўшанда Россия ҳукуматини Дмитрий Медведев бошчилигидаги делегация тамсил этганди. Иккинчи мажлис 2020 йили бўлиб ўтиши керак эди, бироқ пандемия важидан тадбир муддати бир неча бор ўзгарган.

Ўзбекистонда БААнинг давлат бошқарувидаги тажрибасини жорий этиш бўйича “йўл харитаси” қабул қилинади

Ўзбекистон президенти Ш. Мирзиёев 15 июнь куни БААнинг ҳукумат делегациясини қабул қилди (president.uz фотоси)

Ўзбекистон президенти Шавкат Мирзиёев 15 июнь куни Бирлашган Араб Амирликлари Ҳукумат ишлари бўйича вазири Муҳаммад бин Абдуллоҳ ал-Гаргавий бошчилигидаги делегацияни қабул қилди.

Президент матбуот хизмати маълумотига кўра, қабул чоғида кўп қиррали Ўзбекистон-БАА муносабатларини янада кенгайтириш ва амалий ҳамкорликни ривожлантириш масалалари муҳокама қилинган.

Учрашувда муқобил энергетикани ривожлантириш ва энергетика объектларини модернизация қилиш, замонавий агросаноат кластерларини ташкил этиш, тадбиркорликка оид ташаббусларни қўллаб-қувватлаш учун инвестиция компанияси фаолиятини йўлга қўйиш бўйича лойиҳалар ҳамда қатор муҳим ижтимоий дастурлар изчил амалга оширилаётгани алоҳида қайд этилган.

Учрашув якунида БААнинг давлат бошқаруви соҳасидаги, узоқ муддатли янгиланишлар дастурини шакллантириш ва инновацион тараққиёт йўлига ўтиш борасидаги илғор тажрибасини кенг жорий қилишга қаратилган қўшма “йўл харитаси”ни қабул қилиш юзасидан келишувга эришилган.

Жиззахда Суриядаги террорчиларга қўшилмоқчи бўлганлар қўлга олингани иддао қилинди

Иллюстратив сурат.

Жиззах вилоятининг Ғаллаорол туманида Сурия Араб Республикасида террорчилик ҳаракатларини амалга ошираётган “Тавҳид ва жиҳод катибаси” таркибига қўшилишни режалаштираётган гуруҳ қўлга олингани ҳақида вилоят Ички ишлар бошқармаси 15 июнда маълум қилди.

Расман билдирилишича, гуруҳ 12 июнь куни ўтказилган тезкор тадбир давомида “ашёвий далиллар билан қўлга олинди”. Аммо хабарда гуруҳ неча кишидан иборат экани, ашёвий далиллар нималардан иборат экани ҳеч нарса айтилмаган.

“Мазкур фуқаролар хорижда бўлиши давомида Интернет тармоғи орқали террорчилик тузилмалари ёлловчиларининг таъсирига тушиб, яшаш манзилларига қайтиб келгандан сўнг ушбу террорчилик ташкилотининг бузғунчи ғояларини аҳоли орасида фаол тарғиб қилиб келганлиги аниқланган”,-дейилади хабарда.

Ўтган йили Тошкентда камида 21 киши “Тавҳид ва жиҳод катибаси”га, Тошкент вилоятида 25 киши “Жиҳодчилар” гуруҳига, Сурхондарё вилояти Бойсун туманида ҳам бир неча киши “Жиҳодчилар” гуруҳига алоқадорликда гумонланиб қўлга олингани хабар қилинганди.

Фарғона шаҳрида тўрт эгизак туғилди

Иллюстратив сурат.

Фарғона шаҳрининг “Хўжамағиз” маҳалласида яшовчи Ғанижон Одилов ва Мунаввархон Одилова оиласида тўрт эгизак— уч ўғил ва бир қиз туғилди.

“Дарё” нашрининг ўз мухбирига таяниб хабар беришича, чақалоқларга Тўлқинбой, Абдукарим, Абдуҳаким ва Зилола деб исм қўйилган. Одиловлар оиласининг бундан ташқари 2016 ва 2018 йилда туғилган яна икки қиз фарзанди бор.

"Шифокорларнинг таъкидлашича, чақалоқлар соғлом, улар зудлик билан жонлантириш бўлимига ўтказилган ва керакли муолажалар қилинган”,-дейилади хабарда.

Ўзбекистонда бундан аввал уч ва тўрт эгизларга Шавкат Мирзиёев ҳокимиятга келгач Шавкат, Миромон, Мирзиё деб исм қўйиш урфга айланган эди.

Шу пайтгача бир неча шундай оилага автомашина совға қилинган. Бу ҳолат маҳаллий матбуотда танқид қилинди ҳам.

Масалан, “Даракчи”нинг 2019 йил 16 май сонида эълон қилинган мақола муаллифи бу ҳолатни “ошкора тамагирлик” деб атаган.

Ўзбекистон электр энергиясини сотишни хусусий ширкатларга топширмоқчи

Иллюстратив сурат.

Энергетика вазирлиги 2021-2025 йилларга мўлжалланган уч босқичдан иборат улгуржи рақобатбардош электр энергияси бозорига ўтиш кетма-кетлигини ишлаб чиқди.

Расман билдирилишича, биринчи босқичда электр энергияси корхоналарини эркинлаштириш ва электр энергиясини сотиш истагида бўлган хусусий корхоналар томонидан лицензия олиш кўзда тутилган.

Энергетика вазирлиги бундай йўл билан маҳсулот сифатини яхшилаш ва нархларнинг пасайишига эришилишини иддао қилмоқда.

Иккинчи босқичида электр энергиясини тақсимлаш тизимининг оператори яратилади ва истеъмолчиларга электр энергиясини сотиш функциялари таъминотчиларга босқичма-босқич ўтказилади.

“Таъкидлаш жоизки, ушбу босқичда истеъмолчилар электр энергиясини онлайн савдо платформаси ёки исталган таъминотчи орқали сотиб олишлари мумкин бўлади. Таъминотчилар ўртасида рақобат муҳити шаклланиши орқали электр энергиясининг таъминоти сифати ошишига эришилади”,-дейилади хабарда.

Учинчи босқичда “Кун ичи (соатбай) савдолар” йўлга қўйилади. Онлайн савдо платформасидаги эркин шартномалар ҳажмларига кўра, электр энергиясини режа асосида соатбай ишлаб чиқариш ва истеъмол қилишнинг ортиқча ёки етишмаётган ҳажмларини сотиш ва сотиб олиш операциялари амалга оширилади.

“Энергетика соҳасидаги давлат муносабатларининг кескин камайиши билан бозор муносабатларига ўтиш электр энергетикасини бошқариш тизимини такомиллаштиришга хизмат қилади.

Натижада мамлакатнинг энергетика хавфсизлиги, республика энергетика таъминотининг ишончлилиги ва барқарорлиги таъминланади. Асосийси, аҳолининг турмуш сифатини яхшилаш”,-дейилади Энергетика вазирлиги расмий билдирувида.

Президент Ўзбекистон фуқаролигини олишни енгиллаштириш тўғрисидаги қонунни имзолади

Эндиликда Ўзбекистонда туғилган, аммо фуқаролиги бўлмаганларга фуқаролик олиш учун мамлакатда узлуксиз 5 йил яшаш талаб этилмайди. Адлия вазирлигининг билдиришича, президент 14 июнь куни мазкур меъёр қайд этилган “Ўзбекистон Республикасининг фуқаролиги тўғрисида”ги қонунни имзолади.

Қонунга асосан, 2005 йил 1 январга қадар Ўзбекистонда доимий яшаш жойи бўйича рўйхатга олинган ҳамда муқаддам чет давлат фуқаролигида бўлмаган шахс хоҳиш билдирган тақдирда, Ўзбекистон фуқароси деб тан олинади.

Шунингдек, ота-онасидан бири (ёлғиз отаси ёки онаси) Ўзбекистон фуқароси деб тан олинган, чет давлат фуқаролигини қабул қилмаган ва Ўзбекистонда яшаб келаётган бола хоҳиш билдирган тақдирда, Ўзбекистон фуқароси деб тан олинади.

Қонунга кўра, эндиликда Ўзбекистон фуқароси деб тан олиш учун фактларни тасдиқловчи ҳужжатлар мавжуд бўлмаган тақдирда, ариза берувчи ушбу фактларни суд тартибида аниқлаши мумкин.

Бундан ташқари, Ўзбекистон ҳудудида туғилган ва яшаб келаётган фуқаролиги бўлмаган шахслар Ўзбекистон фуқаролигини олиш мақсадида илтимоснома билан мурожаат қилган кунга қадар 5 йил давомида (фуқаролиги бўлмаган шахсга яшаш гувоҳномаси олинган кундан эътиборан) узлуксиз яшаш шарти бекор қилиниши белгиланди.

Ушбу қонун расмий эълон қилинган кундан эътиборан кучга кирди.

Давомини ўқинг

XS
SM
MD
LG