ОАВ: Вашингтон Украинага “Пэтриот” ракетага қарши мудофаа тизимини бериши мумкин
Киев ва Херсон ракета ҳужумларига тутилган бир пайтда Қўшма Штатлар Украинага “Пэтриот” ракетага қарши мудофаа тизимини тақдим этишни режалаётгани ҳақидаги хабарлар ўртага чиқди.
Бир қатор ахборот воситалари юқори мартабали АҚШ расмийларига таяниб, Вашингтон Украинага “Пэтриот” ракетага қарши мудофаа тизимини тақдим этиш режалари ҳақида шу ҳафтадаёқ эълон қилиши мумкинлиги ҳақида хабар берди.
Ҳозирча, Пентагон ҳам, Украина ҳукумати ҳам бу борада ҳеч қандай изоҳ бермади.
АҚШнинг “Пэтриот” ҳаво ҳужумидан мудофаа тизимлари энг илғорларидан бири ҳисобланади. Бутун дунё бўйлаб ғарб ва уларнинг иттифоқчилари ана шу тизим билан ҳаво ҳудудини мудофаа қилади.
Россиянинг собиқ президенти Дмитрий Медведев НАТОни Киевга “Пэтриот” тизимлари етказиб бериш оқибатларидан огоҳлантирганди.
Айни пайтда Украина шарқида шиддатли жанглар давом этмоқда.
Украина қуролли кучлари Бош штаби 14 декабрь куни эрталаб Украина ҳарбийлари сўнгги 24 соат ичида уч вилоят – Донецк, Луганск ва Харьковдаги 14 та позиция бўйлаб Россия кучларининг ҳужумларини қайтарган.
Донецкнинг Бахмут ва Авдеевка шаҳарларида шиддатли жанглар давом этмоқда.
Россия кучлари бир неча ойдан бери стратегик шаҳар Бахмутни назоратига олишга ҳаракат қилмоқда.
Украина ҳарбийлари россиялик ҳарбийлар шаҳарнинг чекка ҳудудларини ёриб ўтганини тасдиқлади, ҳозир кўча жанглари давом этмоқда. Бахмутнинг асосий қисми Украина Қуролли Кучлари назорати остида қолмоқда.
Херсондаги вилоят маъмурий биноси ракета ҳужумига тутилди
Россия кучлари Херсон марказидаги вилоят маъмурияти биносини ракеталар ҳужумга тутган. Маҳаллий ҳокимиятнинг хабар беришича, қурбонлар йўқ, россиялик ҳарбийлар бир нечта ракета тизимларидан зарба берган.
Ўтган ой Россия қўшинлари Херсондан чекинган ва Днепрнинг ўнг қирғоғига ерлашганди.
Зеленский: Киевга отилган дронларнинг ҳаммаси уриб туширилди
Украина президенти Владимир Зеленский 14 декабрь куни Россия кучлари шаҳарга Эронда ишлаб чиқарилган 13та “Шаҳед” дронлари билан ҳужум қилгани, уларнинг барчаси уриб туширилганини айтди.
Киевга учирилган барча 13 та “Шаҳед” дронлари Украина ҳаво мудофааси томонидан уриб туширилганини айтди.
"Террорчилар бугун кунни 13 та “Шаҳед” дронларини учиришдан бошладилар. Дастлабки маълумотларга кўра, барча 13та дрон Украина ҳаво мудофааси томонидан уриб туширилган. Офарин, мен сизлар билан фахрланаман”, - деди Зеленский.
Киев мери Виталий Кличконинг айтишича, марказий Шевченковский туманида портлашлар содир бўлган, иккита маъмурий бино зарар кўрган.
Сўнгги ҳафталарда Украина Россиянинг кўламли ҳаво ҳужумларига тутилди, оқибатда мамлакат энергетика инфратузилмасига катта зарар етди, миллионлаб одам электр, сув ва иссиқликсиз қолди.
Чоршанба кунги ҳужум Киев вилоятидаги энергия таъминотига қанчалик зиён етказгани аниқ эмас.
Reuters: Россия АҚШ ва ЕИдан ракеталар учун зарур бўлган чипларни олишда давом этмоқда
Санкцияларга қарамай, Россия ғарб давлатларидан қанотли ракеталар ишлаб чиқариш учун зарур бўлган чипларни олишда давом этмоқда. Бу ҳақда Reuters Британия мудофаа тадқиқотлари бирлашган Қироллик институти билан ҳамкорликда ўтказган суриштирувда гап боради.
Суриштирувда аниқланишича, апрелдан ноябргача АҚШдан ва бир қатор Европа давлатларидан, жумладан, Германия ва Эстонидан Россия 777 миллион долларлик чипларни сотиб олган. Санкцияларни четлаб ўтиш учун Туркияда ва Ҳонконгда махсус фирмалар ташкил қилинган.
Суриштирувда мана шундай ширкатлардан бири Smart Trading Ltd ширкати тўғрисида батафсил маълумот берилади. Туркияда ташкил этилган бу фирманинг асосчиси Россиядаги Novelco логистик ширкати бош директори Григорий Григорьевдир.
Суриштирувда таъкидланишича, бу фирма ўзининг асл мақсадини сир тутмайди. Сентябрь ойида фирма ўз мижозлари учун “Россияга товар етказиб беришнинг муқобил йўлларини қандай топса бўлади” мавзусида семинар уюштирган.
Григорьевнинг ўзи эса Novelco Туркияда савдо чекловларига қарамай, АҚШ ва ЕИ маҳсулотларини Россияга жўнатувчи фирма очганини билдирган.
Айни пайтда Россияга қўйилган чекловларни четлаб ўтиш учун ҳар доим ҳам учинчи давлатларда фирмалар ташкил этиш лозим эмаслиги аниқланди. Масалан, июлда санкция жорий этилган Россиянинг “Радиант Груп” ширкати чиплар импорти билан шуғулланган. Бу ширкат ҳозирда ярим ўтказгичларни импорт қилаётган Titan-Micro фирмаси асосчиси экани эҳтимоли катта.
Reuters маълумотларига қараганда, бу икки ширкат Москвадаги Профсоюзная кўчасидаги бизнес марказнинг битта қаватида жойлашган.
Аввалроқ Украина ҳарбийлари Россия отган ракеталардан санкцияларга асосан Москвага сотилиши тақиқланган чиплар топилаётгани тўғрисида бир неча маротаба баёнот берган эдилар.