Давлат Думаси депутати “киевлик Вова деган бола”га Янги йилга ракеталар жўнатишга ваъда берди
“Справедливая Россия - За правду” партиясидан сайланган Давлат Думаси депутати Олег Нилов болаларга бағишланган “Тилаклар арчаси номли” хайрия тадбири чоғида “Вова исмли киевлик бола”га Россия ракеталарини совға қилиб юборишга ваъда берди. Бу воқеа акс этган видео ўнлаб ОАВ ва телеграм-каналларда ёйинланди.
“Тилаклар арчаси” Давлат Думасининг анъанавий Янги йил олди тадбири бўлиб, унда депутатлар имконияти чекланган болалар, муҳтож оилаларнинг фарзандлари ҳамда етим болалар откриткаларга ёзиб жўнатган тилакларини ўқиб эшиттирадилар ва рўёбга чиқарадилар. Бу йил сафар қилинган россияликларнинг фарзандлари, шунингдек Украинанинг Россия оккупация қилган ҳудудларида яшовчи болалар ҳам откриткаларга ўз тилакларини битиб, жўнатишган эди.
Депутат Олег Нилов арча шохидан битта откриткани олиб, ўқиди: “Киевлик Вова исмли болакай ракеталарни орзу қилар экан. Вова, сенга ракеталар боради, бир оз сабр қил”. Шундан сўнг Нилов “ҳазиллашдим” деб қўшимча қилди, аммо орқароқда турган Думанинг ёшлар сиёсати қўмитаси раиси Артём Метелёв унинг ишидан хижолат бўлгандек кафти билан юзини тўсди.
Уруш бошланганидан бери Россия қўшинлари Украина шаҳарларига ўн минглаб ракета отди. БМТ маълумотига кўра, декабрь ойи бошларигача ҳарбий ҳаракатлар натижасида 6702 нафар тинч украин фуқароси, жумладан 424 бола қурбон бўлган, лекин ҳақиқий талафот бундан анча кўп бўлиши мумкин.
Украина омбудсмени: Херсондаги қийноқхоналардан бирида “болалар камераси” топилди
Херсонни Россия оккупация қилиб турган вақтда қийноқхоналардан бирида вояга етмаган шахслар сақланган алоҳида хона бўлган. Бу ҳақда Украина Олий Радасининг инсон ҳуқуқлари бўйича вакили Дмитрий Лубинец маълум қилди.
“Биз болалар қийноққа солингани фактини биринчи марта қайд этдик”, дея омбудсмендан иқтибос келтиради “Крим.Реалии”.
Айтилишича, омбудсмен офиси ходимлари Херсонда вояга етмаган шахслар сақланган алоҳида камерани топишган. “Гувоҳларнинг сўзларига кўра, бу камерада украин болалари сақланган. Босқинчиларнинг ўзи уни “болалар камераси” деб аташган”, дейди Лубинец.
Омбудсменга кўра, Россия ҳарбийлари болаларга кунора сув беришган ва овқатдан сиқишган, бунинг устига уларга руий тазйиқ ўтказишган, хусусан, гўё ота-оналари улардан воз кечганини айтишган.
“Масалан, 14 ёшли бир болани мажақланган рус танкини суратга олгани учунгина ўша ерга қамаб, қийноққа солганлар”, деди Лубинец.
Херсон вилоятининг босқиндан озод этилган қисмида 10 та қийноқхона топилгани, шундан тўрттаси Херсон шаҳрида бўлгани айтилмоқда.
Украина: Қочқинлар ва мамлакат ичкарисида кўчган шахслар сони 12 миллионга етди
Россия Украина ҳудудида кенг кўламли уруш бошлаганидан сўнг мамлакатнинг қарийб 12 миллион фуқароси ўз уйларини тарк этди, дея маълум қилди Олий Раданинг инсон ҳуқуқлари бўйича вакили Дмитрий Лубинец.
Улардан 4,9 млн нафари Украинанинг хавфли ҳудудларидан бирмунча хавфсиз жойларга кўчиб ўтган бўлса, 7 миллион киши (ёки мамлакат аҳолисининг 20 фоизи) хорижга йўл олган.
Шунингдек, Лубинецга кўра, Украинанинг 13 миллион фуқароси “қизғин жанглар бўлаётган” ва Россия қўшинлари босиб олган ҳудудларда қолмоқда.
Италия бош вазири Полша Россия билан қарши қарама-қаршиликнинг олдинги чизиғида турганини таъкидлади
Италия бош вазири Жоржио Мелони Полша Россия билан қарши қарама-қаршиликнинг олдинги чизиғида турганини айтди:
"Мен Полша ҳақидаги янгиликлардан хабардор бўлиб бораман. Полша Европадаги украин халқининг ташвишини ўз зиммасига олган давлат", - деди Мелони Сенатга мурожаатида
"Полша бизнинг дўстимиз эмас деб Россияга қандай сигнал берган бўламиз? Биз ўзимиз учун устувор бўлган масалаларда эҳтиёт бўлишимиз керак, жаноблар”, — дея қўшимча қилди Мелони.
Италия бош вазири Европа Иттифоқи Украинага ёрдам бериш борасида бирдамликни сақлаши, шу билан бир қаторда ўт очишни тўхтатиш бўйича саъй-ҳаракатларни кучайтириши зарурлигини айтди.
Жоржио Мелони Европа Иттифоқи саммити олдидан Италия парламентига мурожаат қилар экан, ўт очишни тўхтатишга эришиш учун дипломатик имкониятлар “жуда чекланганлиги”, бироқ Италия бунга эришилиши учун қўлидан келганча ҳаракат қилишини билдирди.