“Газпром” ва “Роснефть” ходимларига чет элга чиқиш ман қилинди
Бу ҳақда “Вёрстка” нашрига Россия нефт-газ ширкатларидаги аноним манбалар маълум қилишган.
“Газпром”нинг Петербург офисида ишловчи ўртача лавозимдаги раҳбар унга ва ходимларига “ҳатто Туркияга чиқиш норасмий тарзда тақиқланган”ини айтган. Тақиқ нафақат ходимларга, балки уларнинг энг яқин қариндошлари – хотинлари ва болаларига ҳам тааллуқли экан.
“Бизга ҳар қандай чет эл сафарларини ман қилиб қўйишди. Оқибатлари айтилмади, лекин биз фаҳмлаб турибмиз”, деган “Вёртска”нинг “Газпром”даги бошқа манбаси ушбу маълумотни тасдиқлар экан.
Унинг айтишича, ходимлар чекловни бузмаслиги учун уларни хавфсизлик хизмати кузатади. Янги қоида атиги бир неча кун олдин эълон қилингани айтилмоқда.
“Кўплар аллақачон билет сотиб олган ва Янги йил таътилига меҳмонхоналардан жой брон қилиб қўйган эди. Лекин, таътил тугул, даволанишга бориш ҳам мумкин эмас. Одамлар қаттиқ норози бўлишяпти”, дея Россия газ ширкатидаги манбасидан иқтибос келтирган “Вёрстка” нашри.
Менежментга нисбатан айни тақиқлар “Роснефт” ширкатида ҳам жорий этилган. Давлат ширкати бўлимларидан бирининг бошлиғи “Вёрстка” билан суҳбатда ходимлар хорижга ҳар қандай сафарни тақиқловчи қўшимча шартнома имзолашга мажбур қилинганини билдирган.
Давлат Думаси депутати “киевлик Вова деган бола”га Янги йилга ракеталар жўнатишга ваъда берди
“Справедливая Россия - За правду” партиясидан сайланган Давлат Думаси депутати Олег Нилов болаларга бағишланган “Тилаклар арчаси номли” хайрия тадбири чоғида “Вова исмли киевлик бола”га Россия ракеталарини совға қилиб юборишга ваъда берди. Бу воқеа акс этган видео ўнлаб ОАВ ва телеграм-каналларда ёйинланди.
“Тилаклар арчаси” Давлат Думасининг анъанавий Янги йил олди тадбири бўлиб, унда депутатлар имконияти чекланган болалар, муҳтож оилаларнинг фарзандлари ҳамда етим болалар откриткаларга ёзиб жўнатган тилакларини ўқиб эшиттирадилар ва рўёбга чиқарадилар. Бу йил сафар қилинган россияликларнинг фарзандлари, шунингдек Украинанинг Россия оккупация қилган ҳудудларида яшовчи болалар ҳам откриткаларга ўз тилакларини битиб, жўнатишган эди.
Депутат Олег Нилов арча шохидан битта откриткани олиб, ўқиди: “Киевлик Вова исмли болакай ракеталарни орзу қилар экан. Вова, сенга ракеталар боради, бир оз сабр қил”. Шундан сўнг Нилов “ҳазиллашдим” деб қўшимча қилди, аммо орқароқда турган Думанинг ёшлар сиёсати қўмитаси раиси Артём Метелёв унинг ишидан хижолат бўлгандек кафти билан юзини тўсди.
Уруш бошланганидан бери Россия қўшинлари Украина шаҳарларига ўн минглаб ракета отди. БМТ маълумотига кўра, декабрь ойи бошларигача ҳарбий ҳаракатлар натижасида 6702 нафар тинч украин фуқароси, жумладан 424 бола қурбон бўлган, лекин ҳақиқий талафот бундан анча кўп бўлиши мумкин.
Украина омбудсмени: Херсондаги қийноқхоналардан бирида “болалар камераси” топилди
Херсонни Россия оккупация қилиб турган вақтда қийноқхоналардан бирида вояга етмаган шахслар сақланган алоҳида хона бўлган. Бу ҳақда Украина Олий Радасининг инсон ҳуқуқлари бўйича вакили Дмитрий Лубинец маълум қилди.
“Биз болалар қийноққа солингани фактини биринчи марта қайд этдик”, дея омбудсмендан иқтибос келтиради “Крим.Реалии”.
Айтилишича, омбудсмен офиси ходимлари Херсонда вояга етмаган шахслар сақланган алоҳида камерани топишган. “Гувоҳларнинг сўзларига кўра, бу камерада украин болалари сақланган. Босқинчиларнинг ўзи уни “болалар камераси” деб аташган”, дейди Лубинец.
Омбудсменга кўра, Россия ҳарбийлари болаларга кунора сув беришган ва овқатдан сиқишган, бунинг устига уларга руий тазйиқ ўтказишган, хусусан, гўё ота-оналари улардан воз кечганини айтишган.
“Масалан, 14 ёшли бир болани мажақланган рус танкини суратга олгани учунгина ўша ерга қамаб, қийноққа солганлар”, деди Лубинец.
Херсон вилоятининг босқиндан озод этилган қисмида 10 та қийноқхона топилгани, шундан тўрттаси Херсон шаҳрида бўлгани айтилмоқда.
Украина: Қочқинлар ва мамлакат ичкарисида кўчган шахслар сони 12 миллионга етди
Россия Украина ҳудудида кенг кўламли уруш бошлаганидан сўнг мамлакатнинг қарийб 12 миллион фуқароси ўз уйларини тарк этди, дея маълум қилди Олий Раданинг инсон ҳуқуқлари бўйича вакили Дмитрий Лубинец.
Улардан 4,9 млн нафари Украинанинг хавфли ҳудудларидан бирмунча хавфсиз жойларга кўчиб ўтган бўлса, 7 миллион киши (ёки мамлакат аҳолисининг 20 фоизи) хорижга йўл олган.
Шунингдек, Лубинецга кўра, Украинанинг 13 миллион фуқароси “қизғин жанглар бўлаётган” ва Россия қўшинлари босиб олган ҳудудларда қолмоқда.