Путин биринчи марта Украинага босқинда қатнашган қўшинлари штабига борди
Россия президенти Владимир Путин Украина ҳудудидаги ҳарбий ҳаракатларда иштирок этаётган ҳарбий қисмларнинг қўшма штабига боргани хабар қилинди.
Кремль сайтидаги хабарда айтилишича, президент 16 декабрь куни бутун кун давомида штаб-квартирада қолган. Ҳарбий раҳбарларнинг яқин истиқболдаги ва ўрта муддатли истиқболдаги чора-тадбирлар бўйича таклифлари тинглнган.
Фотосуратлар ва видеоларда Путин билан бирга Мудофаа вазири Шойгу, Бош штаб бошлиғи Валерий Герасимов ва Украина билан урушда бирлашган кучлар гуруҳи қўмондони Сергей Суровикин акс этган.
Президент ҳарбийлар билан айнан қаерда учрашгани ҳақида Кремль хабар бермади. Россия президенти ҳеч қачон уруш зонасида бўлмаган.
Украинага урушнинг 297-куни муҳим янгиликлари
- Россиянинг Волгоград вилояти Эланский туманига бир нечта "номаълум учувчи жисмлар" қулаб тушган. Талафотлар ҳақида маълумот йўқ. Бу Россиянинг Украинага янги ракета ҳужуми билан бир вақтга тўғри келди.
- Украина Қуролли кучлари маълумотларига кўра, Россия қўшинлари Украина шаҳарларига 70 та қанотли ракета ва 4 та бошқариладиган ҳаво ракеталарини отган. Қуролли кучлар 60 та қанотли ракетани уриб туширишга муваффақ бўлган.
- Европа Иттифоқининг Россияга қарши санкцияларининг тўққизинчи пакети кучга кирди. Унга рус армияси, амалдорлар, депутатлар ва сенаторлар, судялар, губернаторлар кирган. Уруш бошланганидан бери Россияда 1300 дан ортиқ шахс санкцияга учради.
- Британия бош вазири Риши Сунак Украинага ҳарбий ёрдамни текширишни сўради - қанча маблағ ва нималар юборилгани, қандай натижага эришилганини баҳолаш зарурлигини айтди.
Россия ракета зарбаларидан Украина бўйлаб яна электр ўчирилди
Харьков вилояти маъмурияти раҳбари Олег Синегубовга кўра, вилоятга қарата 10 та ракета учирилган, натижада муҳим инфратузилма объектлари шикастланган, Харьков шаҳрида электр йўқ, вилоят ҳудудида узилишлар кузатилмоқда, жабрланганлар йўқ.
Киев вилоятининг Бровари шаҳрида уриб туширилган ракета бўлаклари турар-жой биноларига тушган. Уч иморат томи ва ҳовли деворларига шикаст етган. Аҳоли орасида жабрланганлар йўқ. Украина ҚК Ҳаво кучлари вакили Юрий Игнат Украина ҳудудига жами 60 дан зиёд ракета учирилганини билдирди.
“Одатдагидек, Ту-95 учоқларидан Х-555 ва Х-101 ракеталари учирилди. Қора денгиздаги кемалардан учирилган “Калибр”лар, С-300 ракеталари бор. Шунингдек, Ту-22 М3 бомбаловчи учоқлари Х-22 ракеталарини отди. “Кинжал” ракеталарини ташувчи МиГ-31К учоғи ҳам осмонга кўтарилгани қайд этилди», деди у.
Рейтерс гувоҳларининг айтишича, бугун Киевда учта портлаш содир бўлган. Бутун Украина бўйлаб ҳаво ҳужумидан мудофаа тизимлари ишламоқда. Украина темир йўл операторининг билдиришича, бир қатор темир йўл линиялари элeктр қувватисиз қолган.
Киев мэри Виталий Кличко эса, ўз навбатида, шаҳарнинг Десня, Днепр ва Голосеев туманларида портлашлар рўй бергани ҳақида хабар қилди.
Сўнгги ракета зарбалари Харков вилояти, Одесса ва Винницадаги муҳим инфратузилма обьектларига берилган. Расмийлар Харков, Полтава ва Киевнинг бир қисми электрсиз қолгани, шимолий Суми вилоятида эса электр таъминотида узилишлар кузатилаётгани ҳақида маълум қилди.
Украина президенти девони раҳбари ўринбосари Кирило Тимошенко, Кривой Рог марказидаги турар-жой биноси вайроналари остида одамлар қолган бўлиши мумкинлигини билдирди. Қурбонлар ҳақида ҳозирча маълумот йўқ.
Москва инфратузилма обектларига қилинган ҳужумлар Украинанинг ҳарбий салоҳиятини синдиришга қаратилганини айтиб, бу ҳаракатини оқлаб келади. Украина эса бу ҳужумларни уруш жинояти, деб баҳолайди.
Европа етакчилари Россияга қарши тўққизинчи санкциялар пакетини тасдиқлади
Европа Иттифоқи етакчилари 2022 йилдаги сўнгги саммитда келгуси йил Украинага 18 миллиард евролик ёрдам ажратиш ва Россияга нисбатан янги санкциялар қўллашга келишиб олди.
Польша сўнгги лаҳзаларда Украинага молиявий ёрдам пакети ажратиш ва минимал глобал корпоратив солиқ борасидаги эътирозларини қайтариб олди.
"Биз яна бир бор Россия агрессиясини қатъий қоралаш, Кремльнинг уруш машинасига босим ўтказиш ва шу билан бирга Европани Иттифоқнинг мажбуриятлари озиқ-овқат хавфсизлигига таъсир қилмаслиги йўлини топяпмиз", деди Шарл Мишел, Европа Кенгаши раҳбари.
Саммит якунида Босния ва Герцеговинага расмий номзод мақоми ҳам берилди.
Россияга қарши санкциялар пакетини бир овоздан маъқуллаган бўлсада, ЕИ аъзолари, энергия ва иқтисод муаммоларида ягона тўхтамга кела олмади.
Россия ТИВ матбуот котиби Мария Захарова, Россия Европа Иттифоқи томонидан киритилган тўққизинчи санкциялар пакетига, худди аввалгилари сингари муносиб жавоб беришини айтди.
Украинага уруш бошлаганидан бери, Европа Иттифоқи Россияга қарши санкциялар жорий қилиб келмоқда. Бу эса энергия нархи ва инфляциянинг ўсишига сабаб бўлди, Европада қатор иқтисодий муаммоларни келтириб чиқарди.