Россия мудофаа вазири Сергей Шойгу Украинадаги Россия қўшинлари позицияларига борди
Мудофаа вазирлиги хабарига кўра, Шойгу вертолётда олдинги марраларни айланиб чиққан ва қўмондонларнинг ҳисоботларини тинглаган. Вазир айнан қаерларда бўлгани очиқланмаган.
Хабарда қайд этилишича, Шойгу “қўшинларни ҳар томонлама таъминлашни ташкиллаштиришга, шахсий таркибнинг дала шароитида яшаш шарт-шароитларига, шунингдек тиббиёт ва таъминот бўлинмалари фаолиятига алоҳида эътибор берган”.
Аввалроқ, Россия президенти Владимир Путин 17 декабрь, шанба куни Украина ҳудудидаги ҳарбий ҳаракатларда иштирок этаётган қўшин турлари бирлашган штабида бўлиб, қўмондонлар билан йиғилиш ўтказгани маълум қилинган эди.
АҚШнинг Урушни ўрганиш институти (ISW) Кремль шу тариқа Путинни уруш даврининг масъулиятли раҳбари ўлароқ кўрсатишга тиришиб, уруш тарафдорларининг президентга қаратилган танқидларини юмшатмоқчи бўляпти, деб ҳисоблайди.
Шунингдек, ISW экспертлари фикрича, Кремль Рамзан Қодиров ва Евгений Пригожин ҳамда уларга бўйсинувчи ҳарбий тузилмалар нуфузи ортиши манзарасида Мудофаа вазирлигини ягона ва самарадор ташкилот сифатида кўрсатишга ва унинг имижини яхшилашга ҳаракат қилиб, вазиятни мувозанатга келтиришни истайди.
Россия назоратидаги Донецкда уч киши жароҳатланди
17 декабрь Украина кучлари Россия назоратидаги Донецк шаҳрини ўққа тутган. Бу ҳақда аннексия қилинган ҳудудларда фаолият юритаётган расмийлар маълум қилишди.
Россия дастаклаб келаётган «Донецк Халқ Республикаси» ўз Telegram каналида хабар беришича, шаҳарнинг Будённий туманига берилган зарбалар натижасида уч киши яраланган.
Улашилган видеода вайрон бўлган иморатларни кўриш мумкин.
Уйи зарбалар ортидан вайрон бўлганини айтган маҳаллий турғун Романнинг сўзларига кўра, 46 ёшли рафиқаси Оксананинг қўли синган ва шифохонага олиб кетилган.
«Иккита (снаряд) келиб тушганини эшитдим. Биринчисини аниқ эшитдим, иккинчиси ғира-шира эслайман. Уйимиз вайрон бўлди, шунинг учун дўстларимизникига келдик».
Аввалроқ Россия Мудофаа вазирлиги 16 декабрь куни «юқори аниқликдаги» қуроллар билан Украина ҳарбий-саноат мажмуаси ҳамда энергетика ва ҳарбий объектларга зарба берилганини маълум қилган эди.
Россия ва Украина Рождество муносабати билан оташкесим имзоланмаслигини маълум қилган. Айни дамда қарийб 10 ойдан бери тинчимаётган можарога барҳам бериш учун музокаралар олиб борилмаяпти.
Россия: жума куни Украина энергетика инфратузилмасига ва ҳарбий иншоотларига зарба бердик
Россия мудофаа вазирлиги 17 декабрь куни эълон қилинган видеода эътироф этилишича, 16 декабрь куни «юқори аниқликдаги» қуроллар билан Украина ҳарбий-саноат мажмуаси ҳамда энергетика ва ҳарбий объектларга зарба берилган.
Бу ҳақда Мудофаа вазирлиги матбуот котиби Игорь Конашанков:
«Барча белгиланган объектларга зарба берилди. Зарба натижасида хорижда ишлаб чиқарилган қурол-яроғ ва ўқ-дориларни етказиб бериш тўхтатилди, захирадаги аскарларнинг жанговар ҳудудларга юриши тўхтатилди, Украинанинг қурол-яроғ, ҳарбий техника ва ўқ-дори ишлаб чиқарадиган ва таъмирлайдиган мудофаа иншоотлари фаолияти тўхтатилди», — деди.
Украина расмийлари аввалроқ Россия жума куни Украинага қарата 70 дан ортиқ ракета отганини маълум қилишган эди. Ҳужамлар ортидан бутун мамлакат бўйлаб электр таъминотида узилишлар содир бўлган.
Киев марказида янги йил арчаси ўрнатилди
17 декабрь куни Киев шаҳри марказида янги йил арчаси ўрнатилди. Аввалроқ шаҳардаги муҳим инфратузилмага Россия ҳаводан зарба берган эди.
Киев мэри Виталий Кличко арчани «Енгилмас Рождество арчаси» деб атади. Арча қоронғи София майдонида қад кўтарди.
Кўп асрлик Авлиё София собори олдидаги кенг майдонда ҳар йили улкан арча ўрнатилар эди. Аммо бу йил расмийлар 12 метрли сунъий дарахтни ўрнатдилар. Сунъий арча энергияни тежовчи чироқлар билан безатилган бўлиб, улар генератор билан ёқилди.
Шаҳар турғуни Татьяна Reuters агентлиги билан суҳбатда одатдагидан кичикроқ арча унга маъқул келганини айтди.
«Бу ерда арча бўлиши керак деб ўйлаймиз, чунки бу ерда одам яшайди: уруш давом этаётган бўлса ҳам, украиналиклар, болалар байрамга муҳтож», - деди у.
«Бу сафар ҳақиқий байрам бўлади, деб ўйламайман. Лекин биз ҳаммамиз бирга эканлигимизни, бир-биримизга ёрдам беришимиз кераклигини тушунишимиз керак», - деди Киев турғуни Ирина Солойчук.
Кличконинг сўзларига кўра, арча донорлар ва ширкатлар ажратган маблағ эвазига ўрнатилган ва бу йил оммавий байрамлар ўтказилмайди.
Украинанинг аҳолиси 43 миллион бўлиб, уларнинг аксари православ насронийлардир.