Путин ғалаба учун харажат "чекланмаслиги"ни айтди
Путин Россия армияси Украинадаги 11 ойдан бери давом этаётган Кремл наздидаги "махсус ҳарбий операция" давомида учраган муаммолардан сабоқ олиши керак, деди. Шунингдек у, сафарбарлик кампанияси режалаштирилганидек ўтмади, деб тан олди.
Айни пайтда у, Путин ғалаба қозониш учун харажатлар "чекланмаслиги"ни ҳам алоҳида урғулади. Айни паллада, Мудофаа вазири Сергей Шойгу, Россия ғарбидаги Ижевск шаҳрида бўлган Калашников қурол заводига борди.
Шойгу Калашников заводи раҳбари Владимир Лепин ҳамроҳлигида заводдаги ишлаб чиқариш жараёнини кўздан кечирди ва давлат мудофаа тизими буюртмаси ижросини текширди.
Сергей Шойгуга заводда ишлаб чиқарилган энг сўнг автомат ва снайпер моделлари, юқори аниқликдаги ракета ва портатив зенит-ракета тизимлари намойиш этилгани хабар қилинди.
Чоршанба куни Россия мудофаа раҳбарлари ҳамда президент Владимир Путин иштирокида йил якунларига бағишланган йиғилиш бўлиб ўтди. Йиғилишда Шойгу Россия армиясига замонавий қурол-яроғ етказиб бериш тезлаштирилганини билдирди.
Ҳозирга келиб, кремлпараст блогерлар ҳам Россия генералларининг ҳаракатларидан, сафарбарликнинг тартибсиз боришидан ва Россия қўлга киритган ҳудудларини бой берганидан норозилик билдирмоқда.
"Кремл қимматга тушган бу урушини оқлаш истагида"
Урушни ўрганиш институти навбатдаги кунлик ҳисоботида, Владимир Путин ва Валерий Герасимовларнинг охирги баёнотларини таҳлил қилди.
Институт хабарида ёзилишича, Россиянинг бу урушни имкон қадар тез тугатиш ҳақидаги баёноти - Кремлнинг қимматга тушган бу урушини оқлаш истаги ифодасидир.
Путин, Украина президенти Зеленскийни ўзига тенг ҳамкор сифатида кўрмаслигини писанда қилиш риторикаси, Украинани суверен давлат сифатидаги қонуний мавжудлигини рад қилишини давом эттирмоқда.
Урушни ўрганиш институти ўз ҳисоботида маълум муддат телеэфирларда кўринмай қолган Россия Қуролли кулари Бош штаби рахбари Валерий Герасимов баёнотига ҳам алоҳида тўхталган.
Герасимов ўз чиқишида яна бир бор, Россия гўёки, Украинанинг Донбасс ва Қримга режалаган ҳужуми олдини олиш учун, бу давлат ҳудудида махсус амалиёт бошлаган. Бу мулозимнинг бундай баёнот билан саҳнага чиқарилиши эса - айнан уни бу урушга масъул қилиб кўрсатиш уринишидир, деб баҳоламоқда институт экспертлари.
Россия армияси бош штаби раҳбари Валерий Герасимов фронт чизиғидаги вазият барқарор экани ва Россия эътиборини Украинанинг шарқий Донецк вилоятини “озод қилишни якунлаш”га қаратаётганини билдирди:
"Тезкор кучларнинг жанговар қобилиятини ошириш бўйича кўрилган чора-тадбирлар туфайли фронт чизиғидаги вазият барқарорлашди. Россия қўшинларининг асосий эътибори Донецк Халқ Республикаси ҳудудини озод қилишни якунлашга қаратилган. Қолаверса, Украинадаги муҳим энергия ва транспорт инфратузилмасига зарба бериш давом этмоқда”.
Россия апрель ойида Киевдан чекинганидан бери Луганск вилояти ва шарқий Донбас минтақасини тўлиқ назорат қилишга ҳаракат қилиб келмоқда.
Луганск вилояти тўлиқ Россия кучлари назорат остида. Бироқ, Россия Донецк вилоятининг 60 фоизини назорат қилади. Вилоятнинг Бахмут шаҳри августдан буён шиддатли жанглар марказига айланган.
Россия ва Беларус ҳарбийлари Беларусда қўшма машғулот ўтказмоқда
Россия мудофаа вазирлиги эълон қилган видеода, танклар ва ракеталар иштирокидаги қўшма машғулот жараёни акс этган. Россия Мудофаа вазирлиги мақсад жанговар ҳаракатларни мувофиқлаштириш, демоқда.
Шу ҳафта бошида Владимир Путин, Минскда, Александр Лукашенко билан музокаралар ўтказди. Киевда эса бу Путин Лукашенкони Украинага қарши биргаликда ҳужумга ўтишга кўндирмоқчи, деган хавотирни кучайтирди.
Украина армияси генерали Валерий Залужний ўтган ҳафта Тhe Economist нашрига берган интервьюсида, Россия январь боши ёки эрта баҳорда шарқ, жануб ва Беларусдан 200 минглик янги қўшин билан йирик ҳужумга ўтишга тайёргарлик кўряпти, деган тахминини билдирган.
Озодликда Украинанинг юқори мартабали ҳарбийси билдирган бу тахминни асословчи бирор мустақил маълумот йўқ. Беларус бир неча бор Россиянинг Украинадаги "махсус ҳарбий операцияси" га қўшилмаслигини билдирган.
Путин “Патриот”ни Россиянинг S-300 тизимига қиёслаб, “бунчалик самаралимас” деди
Россия президенти Владимир Путин АҚШ Украинага етказиб бериши кутилаётган “Патриот” ҳаво ҳужумидан мудофаа тизимини эски қурол, деб атади:
"Патриотга келсак, бу анча эски тизим ва у Россиянинг S-300 тизими каби самарали эмас. Бизга қарши чиқаётганлар бу мудофаа қуроли эканини билади. Биз буни ҳисобга оламиз ва бунга қарши чора албатта топилади. Бу ҳеч қандай наф бермайди, шунчаки можарони узайтиради”.
Путин, Россия Украинадаги уруш тугаши ва барча қуролли низолар дипломатик музокаралар билан якунланишини хоҳлашини ҳам айтди.
“Бизнинг мақсадимиз ҳарбий можаронинг ғилдирагини айлантириш эмас, аксинча урушни тугатиш. Бунга интиламиз ва бундан кейин ҳам ҳаракат қиламиз. Бунинг бажарилиши қанча тез бўлса, шунча яхши”, деди Россия раҳбари.