Кўнгиллилар фронт чизиғидагиларни боқмоқда
Гуманитар ёрдам кўрсатувчи World Central Kitchen кўнгиллилари Украинадаги уруш фронти бўйлаб жойлашган қишлоқларнинг мингдан ортиқ аҳолисига озиқ-овқат етказиб бермоқда.
Куриловка қишлоғи аҳолиси тўрт ойдан бери иссиқлик, электр, сув ва алоқа тармоғисиз кун кечирмоқда.
Бу қишлоқ қақшатқич жанг кетаётган фронт чизиғидан 15 километр узоқликда жойлашган.
Қишлоқла портлаш овозлари эшитилиб туради. Фронт чизиғидаги отишмаларга қарамай, World Central Kitchen кўнгиллилари аҳолини ҳар куни иссиқ овқат билан таъминлаб келмоқда.
Мобилизация қилинганларнинг спермаси музлатиладиган бўлди
Уруш жазавасига тушган Россия Украинага аскар жўнатишнинг турли йўлларини ўйлаб топмоқда.
Эндиликда рус ҳукумати фуқароларига Украинага урушга бориш эвазига ўз спермасини текинга музлатиб қўйиш таклифи билан чиқди.
Бу тадбир рус аскари урушда ўлган тақдирда унинг жуфти эрининг музлатилган спермасидан фойдаланиб, ҳомиладор бўлиш имконини беради.
Бу ҳақда хабар қилган “Россия адвокатлари иттифоқи” жамоат ташкилоти президенти Игорь Труновга кўра, Россия соғлиқни сақлаш вазирлиги 2022-2024 йилларда сафарбарликка олинган фуқароларнинг спермасини музлатиш ва сақлаш харажатлари федерал бюджетдан молияланишини билдирган.
Соғлиқни сақлаш вазирлиги ушбу хабарга изоҳ берганича йўқ.
Россия мурофаа вазири Сергей Шойгунинг ҳисоб-китобича, Украинада 5937 нафар россиялик ўлган. Пентагон эълон қилган ҳисоботда эса Украина урушида ўлган ва ярадор бўлган россияликлар сони 100 мингдан зиёдни ташкил қилади.
Россияда мобилизация қилинган аскар командирини уриб ўлдирди
Россиянинг ушбу вилоятида Украина билан урушга сафарбарликка олинган аскар мастликда ўз командирини уриб ўлдирди. У Магнитогорск гарнизони ҳарбий суди қарори билан ҳибсга олинган.
Тергов маълумотига кўра, ичиб маст бўлган катта сержант 23 декабрь куни Мисяш станциясида тўхтаб турган ҳарбий эшелоннинг штаб вагонида ўзи каби сафарбарлик асосида ҳарбий хизматга чақирилган капитанга ҳамла қилиб, уни дўппослаган. Командир олган жароҳатлари оқибатида воқеа жойида ўлган.
Ҳарбий прокуратура ушбу воқеа юзасидан “сафарбарлик даврида ўз бошлиғига нисбатан зўравонлик ҳаракатларини содир этиш” моддаси бўйча жиноят иши очгани айтилмоқда. Айбланувчи 5 йилдан 15 йилгача муддатга қамалиши мумкин.
Медведов урушдан қочганларни Россияга киритмасликни таклиф қилди
Россиянинг собиқ президенти, Хавфсизлик кенгаши раисининг ўринбосари Дмитрий Медведев Россияни тарк этганларни “хоинлар” ва “душманлар” деб атади ва уларни мамлакатга киритмасликни таклиф қилди. Бу ҳақда у ўзининг Телеграм каналида ёзди:
“Ўз мамлакатидан нафратланиб, унга мағлубият ва ҳалокат тилаётган хоинларга hostis publicus, яъни жамият душманлари деб кўрилмоғи лозим. Қилмишлари юридик нуқтаи назардан қандай малакаланишидан қатъий назар уларга бу таъриф ёрлиқ каби маҳкам ёпиштирилиши керак. Ҳатто бу кимсаларга нисбатан маъмурий ёки жиноий иш очилмаган бўлса ҳам”.
Президент Путиннинг 21 сентябрь кунги ҳарбий сафарбарлик эълонидан сўнг урушга боришни истамаган минглаб россиялик қочишга мажбур бўлди. Уларнинг аниқ сони маълум эмас. Урушдан қочган россияликларнинг бир қисми Ўзбекистонга ҳам келган.
Озодлик мобилизациядан Ўзбекистонга қочиб келган россияликлар ҳақида махсус фильм тайёрлаган. Агар фильмни томоша қилмаган бўлсангиз қуйида линк тақдим қиламиз. Албатта томоша қилинг!