Зеленский: Бизга танаффус керак
Владимир Зеленскийнинг Янги йил табриги уруш бошланганидан бери бўлаётган унинг кундалик тунги мурожаатларидан бири каби бўлди.
"Ўтган бу йил юракларимизни яралади. Кўп кўз ёш тўкдик. Кўп илтижолар қилдик. 311 кун. Аслида ўтган ҳар бир дақиқамиз ҳақида айтадиганларимиз бор. Аммо, кўп гапириш керак эмас. Бизга тушунтиришлар, безаклар керак эмас. Эшитиш учун бизга тинчлик керак. Тушуниш учун бизга танаффус керак", деди Зеленский.
Путин орқасидагилар ким?
Путиннинг Янги йил табриги фонида турган ҳарбий кийимдагилар тармоқлар фойдаланувчилари эътиборини тортди. Улар орасида айримлари Путиннинг турли учрашувларида тур хил образларда пайдо бўладиган шахслар экани таъкидланди.
Жумладан, ҳарбий кийимдаги бир аёлнинг нафақат Путин балки Медведев президент пайтидаги учрашувларда ҳам доимий иштирокчилардан бўлгани акс этган суратлар тарқалди.
Бироқ рус матбуоти бу ҳарбийлар Россия ҳануз “ҳарбий амалиёт” деб атаётган Украина жангларидаги муваффақиятлари учун тақдирланган шахслар эканини иддао қилиб чиқди.
Суратлари тарқалган аёл эса аслида 71- полкнинг тиббий ҳамшираси капитан Анна Сидоренко экани айтилди.
Россияда эркин матбуот йўқлиги сабаб давлат нашрлари эълон қилаётган маълумотларни мустақил текшириш имкони йўқ.
Путин урушда ғалаба қозонишига ваъда берди
Россия уруш оловини ҳали бери сўндирмаслиги Путиннинг анъанавий Янги йил табригида ҳам сезилди. Путин 22 йиллик ҳукмронлиги даврида Янги йил табиригини ҳар доим Кремл фонида қилган. Бу сафар Путин жангавор кийимдаги ҳарбийлар фонида россияликларга табрик йўллади:
«Махсус ҳарбий операцияда қатнашганларни Янги йил билан чин қалбимдан табриклайман. Ҳозир мен билан бирга бўлганлар, фронтдагилар, кейинчалик жанг қилиш учун ўқув марказларида тайёргарликдан ўтаётганлар, касалхонада ётганлар ёки ўз бурчини бажариб, уйга қайтганларни табриқлайман».
Кремль шу пайтгача Украинадаги урушни кўпчилик россияликлар ҳаётига таъсир қилмайдиган чекланган кампания сифатида тақдим этиб келди. Аммо жанговар кийимдаги аскарлар фонида ёзилган нутқида Путин урушни устувор масала сифатида тақдим қилди.
Путиннинг бу йилги Янги йил табриги тўққиз дақиқа чўзилди. Бу Путин 22 йиллик ҳукмронлиги даврида сўзлаган энг узун янги йил табригидир. Ўз нутқи давомида Путин можарога қарши чиқаётганларни нишонга олди.
Россия сўнгги олти ой ичида жанг майдонида катта ютуқларга эришмаган бўлса-да, Путин пировардида Россия ғалаба қозонишига ваъда берди.
Урушга борган уч ўзбекистонлик маҳбус Вагнер лагеридан қочди
Уч нафар Ўзбекистон ватандоши “Вагнер”гуруҳининг Луганскдаги ҳарбий лагеридан қочиб кетишган. Ўзбекистонлик бу уч киши Россия қамоғида сақланаётган пайти “Вагнер” томонидан Украина урушида қатнашиш учун ёлланган бўлишган. Уларнинг қамалиш сабаблари маълум эмас.
Россия Ички ишлар вазирлиги хабарига кўра, “Вагнер” ширкати лагеридан уч ўзбекистонликдан ташқари яна уч маҳкум қочган. Улар Қирғизистон, Беларусь ва Россия ватандошларидир. Ҳозирда бу олти кишига нисбатан қидирув эълон қилинган.
Янги йил кечаси хабар қилинган бу воқеа аслида 21-22 декабрь кунлари содир бўлган. Лагердан қочган олти кишида ҳам қурол борлиги айтилмоқда.
Экспертларга кўра, “Вагнер” гуруҳи Украинадаги урушга нафақат маҳкумларни балки Марказий осиёлик меҳнат мигрантларини ҳам ёллаб келаётгани аниқланган.
Россия Украинада кетма-кет муваффақиятсизликка учрагач, вагнерчилар ва қодировчиларга таянишга мажбур қолмоқда