Донецкда фавқулодда хизмат ходимлари ҳамон Макеевка шаҳридаги бинони вайроналардан тозалашда давом этмоқда
Янги йил арафасида Украина кучлари рус қўшинлари жойлашган бинони ракета зарбалари билан вайрон қилди.
Россия Мудофаа вазирлиги қурбонлар сони 89 нафарга етганини билдирди.
Россияда миллатчилар ва айрим депутатлар эътиборсизлиги учун армия қўмондонларини жазолашни талаб қилди.
Уларнинг айтишича, қўмондонлар Украина ракеталарига нишон бўлиши мумкинлигини билишларига қарамай, аскарларни ўқ-дорилар омборига яқин ҳудудга жойлаштирган.
Украиналик кўнгиллилар ҳалок бўлган аскарлар жасадларини уларнинг оилаларига етказиб бермоқда
Кўнгиллилар гуруҳи фронт чизиғида ҳалок бўлган аскарларнинг жасадларини излаб топиш ва жасадларни аскарларнинг оилаларига қайтаришни ўз олдига вазифа қилиб қўйган.
100 га яқин кўнгиллилардан иборат "Қора лолалар миссияси" гуруҳи портлашлар вақтида рус ва украин аскарларнинг жасадларини топиш ва эксгумация қилишдек хавфли вазифани бажармоқда.
Олексий Иуков илгари Иккинчи Жаҳон урушида ҳалок бўлган аскарлар қолдиқларини топишда иштирок этган. Ҳозирда у “Қора лолалар” гуруҳи таркибида ҳам ҳаракат қилмоқда.
"Ҳозирги ҳолатни англаш, қабул қилиш қийин. Ахир биз 21 асрда яшаяпмиз, бироқ уруш кетяпти. Йўлларда, ўрмонда ва бино вайроналарида жасадлар ётибди. Биз Украина учун ҳалок бўлган ҳар бир аскар жасадини топиб, уни оиласига юбориш учун ҳаракат қиляпмиз", дейди Иуков.
"Украин аскарлари жасадларини қазиб олиб оиласига жўнатиш орқали хайрли иш қиляпмиз деб ўйлайман. Чунки, уларнинг ота-оналари жасадларни анъанага кўра дафн қилишни хоҳлашади. Хоҳ у насроний урф-одатлари бўлсин хоҳ бошқа дин. Ҳалок бўлганлар жасадлари ўрмонда, далада ёки кўчаларда ётмаслиги керак, - дея қўшимча қилди кўнгиллилардан бири Артур Симейко.
Жасадларни излаш хавфли бўлиши мумкин, негаки аксар ҳолларда жасадлар ёнида миналар қолиб кетади ёки атайин миналаштирилади. Гуруҳ шу чоққача қанча жасад топганини айтишдан бош тортди.
Гуруҳ аъзолари хавф-хатарларга қарамай, "Қора лолалар миссияси" тўхтамаслигини айтишади.
"Бунга кўникиш мушкул. Ҳар сафар бир жасадни қазиб олганингизда, у ҳаётининг сўнгги лаҳзаларида бошидан кечирган даҳшатини сиз ҳам худди қўрқинчли туш каби бошдан кечирасиз. Биласизми бир оилага уларнинг суйган инсон энди ёъқлигини айтишингиз кераклигини англаш бу жуда қийин. Аскарларнинг оилалари фарзандлари асирга олинган ёки яширинган бўлишига умид қилишади. Бироқ биз жасадни топар эканмиз бир оилани сўнгги умидларидан ҳам маҳрум қиламиз. Бу жуда даҳшат", - деди Иуков.
Россия Мудофаа Вазирлиги: 89 ҳарбийнинг ўлимига мобил телефондан фойдаланиш сабаб бўлган
Россия мудофаа вазирлиги Украинанинг Макеевкага уюштирган ҳужумида 89 нафар ҳарбий хизматчи ҳалок бўлганини тасдиқлади. Вазирликнинг билдиришича, ҳарбийларнинг мобил телефонлардан рухсатсиз фойдаланиши ҳужумга сабаб бўлган.
“Афсуски, ҳодисада ҳалок бўлган ҳарбийларимиз сони 89 нафарга етди. Ҳалок бўлганлар орасида полк командири ўринбосари, подполковник Бачурин ҳам бор. Ҳалок бўлган ҳарбийларнинг оилаларига зарурий барча ёрдам кўрсатилмоқда”, деди Россия қуролли кучлари лейтенанти Сергей Севрюков.
Россия мудофаа вазирлиги ҳужум АҚШда ишлаб чиқарилган ҲИМАРС ракеталари ёрдамида амалга оширилганини маълум қилди. Тўртта “ҲИМАРС ракеталарининг снарядлари портлаши натижасида ҳарбий база томи қулаб тушган.
Россия мудофаа вазирлиги бунга жавобан Донецкдаги Дружкивка темир йўл вокзали яқинидаги базани бомбардимон қилганини билдирди. Бунинг натижасида 200 га яқин украиналик ҳарбий ҳалок бўлди, тўртта ҲИМАРС ракета тизими ва 800 дан ортиқ ракеталар йўқ қилинди, дейилади мудофаа вазирлиги келтирган баёнотда.
Рейтерс мазкур хабарни мустақил равишда тасдиқлай олмади.
Украина президенти Владимир Зеленскийнинг ёрдамчиси Кирило Тимошенко Дружкивкадаги хоккей аренаси вайрон бўлган ҳужумда икки киши жароҳатланганини айтди.
Россияда газ ишлаб чиқариш ва экспорти кескин камайган
Россиянинг газ гиганти "Газпром" 2022 йилда Россияда газ ишлаб чиқариш ва экспорти кескин камайганини маълум қилди.
Ширкат бош директори Алексей Миллернинг сўзларига кўра, 2022 йилда “Газпром” 412, 6 миллиард куб метр газ ишлаб чиқарган, бу 2021 йилга нисбатан 20 фоизга кам.
Ширкат 2022 йилда 100, 9 миллиард куб метр газ экспорт қилган, бу 2021 йилги экспорт даражасидан 45, 5 фоизга кам.. .
Россия-Украина можароси бошланганидан сўнг, кўплаб ғарб давлатлари, шу жумладан Британия, Россия табиий гази импортини кескин камайтирди.
Британия 2023 йил 1 январдан бошлаб Россиядан суюлтирилган газ импортини тақиқлади.
Лондон расмийларига кўра, ушбу чора мамлакатнинг Россия энергетикасига бўлган қарамлигини камайтиришга ёрдам беради.
2021 йилда Буюк Британия 3, 12 миллиард куб метр рус газини импорт қилди, бу мамлакат умумий истеъмолининг тахминан 4 фоизини ташкил этди.
Гарчи ғарб давлатлари Россия энергетикасига нисбатан санкциялар қўллашда давом этаётган бўлса-да, Россия ва Япония ўртасидаги савдо 2022 йилнинг биринчи 11 ойида глобал энергия нархларининг юқорилиги туфайли йиллик 10 фоизга ўсган.
Хабар қилинишича, 2022 йилда Россия ва Япония ўртасидаги ўзаро савдо ҳажми 2, 365 триллион йенни (тахминан 18 миллиард АҚШ доллари)ни ташкил этган.
2011 йилда Фукусима атом электр станцияси зилзила ва цунами оқибатида зарар кўрганидан сўнг Япониянинг электр таъминоти тузилмаси сезиларли ўзгаришларга учради.
Япония электр таъминотининг 30 фоизини ташкил этган атом энергияси аста-секин 10 фоизга камайди, аввалроқ эса иссиқлик энергияси ишлаб чиқариш кўпайган. Тахминан 70 фоизгача. Япониянинг халқаро энергия импортига қарамлиги ҳам шундан бери кучайди.
Россия Япониянинг асосий суюлтирилган газ етказиб берувчиларидан бири бўлиб қолмоқда, бу Япония газ импортининг қарийб 9 фоизини ташкил қилади. Газ нархининг ошиши Япониянинг Россиядан импорти 2022 йилнинг биринчи 11 ойида 35 фоизга ошиб, 1, 82 триллион йенни (тахминан 14 миллиард АҚШ доллари)ни ташкил этди.