Соледар даҳшатли жанглар марказига айланди
Сўнгги тўрт кун ичида рус қўшинлари у ерда тактик ютуқларга эришаётгани айтилмоқда. Украина Қуролли кучлари бош штабининг билдиришича, Россия ҳарбийлари Бахмут, Авдиивка ва Лиман йўналишида ҳужум қилмоқда.
Айни пайтида, Украина ҳарбийлари, ўтган тунда Россия позициялари ва зенит-ракета тизимларига зарба бергани ҳақида баёнот тарқатди.
Британия разведкаси, Россия “Бахмут шаҳрини шимолдан тўсиб қўйиш” ва Украинани таъминот линияларидан узиб қўйиш учун Солeдарни эгаллашга зўр бераётганини билдирди.
Британия разведкаси ўз ҳисоботида шунингдек, Россия ҳарбийлари Вагнер гуруҳи билан биргаликда сўнгги тўрт кун ичида Солeдар йўналишида "тактик ютуқларга эришаётгани" ҳақида билдирди.
Разведка маълумотларида келтирилишича, иккала томон ҳам ўз ҳужумларида Соледар конидаги эски 200 километрлик ерости туннелларидан фойдаланиши мумкин.
Украина томони аввалроқ Россия Бахмутни эгаллай олмаганидан сўнг, қўшинларини Соледарга йўналтирган, деб баёнот берганди. Донецк вилояти губернатори Павло Кириленко Соледар Украина қўшинлари назоратида, Россия қўшинлари шаҳарни эгаллагани ҳақидаги хабарлар “ёлғон”, деган.
Украина ҚК: Армия “Вагнер” гуруҳи ҳужумларини қайтармоқда
Украина армияси, “Вагнер” ёлланма гуруҳининг Бахмут ва бошқа шаҳарларга доимий ҳужумларини қайтармоқда, деб баёнот берди Украина Қуролли кучлари раҳбарияти.
Жумладан, Харковдаги бозор ҳудудига келиб тушган ракетадан сўнг катта ўра ҳосил бўлди, қутқарувчилар вайроналарни кўздан кечирмоқда.
Ўтган ҳафталар бироз тинчроқ эди, дейди маҳаллий турғунлардан бири.Расмийларга кўра, икки аёл ўлган, 10 ёшли ўсмир қиз яраланган.
Фронт чизиғидаги Северск шаҳрида хизмат қилаётган украиналик ҳарбийлар совуқ ҳаво ҳарорати ва қор Россия қўшинларининг ҳаракатларини кузатишда қўл келаётганини айтади.
"Ҳозирги об-ҳаво шароитида душман ҳеч қандай ҳужум ҳаракатларини амалга ошира олмайди. Улар фронт чизиғидаги ҳаракатларини яширишга ҳаракат қилмоқда. Биз эса уларни нишонга олиш учун ҳаводан туриб уларни доимий кузатиб боряпмиз".
Ўтган якшанба куни Владимир Зеленский Россия Рождество байрами учун ўзи таклиф қилган сулҳга ўзи риоя қилмади, деган эди. Украина томони, Россия таклиф қилган сулҳни рус қўшинлари нафас ростлаб олиши учун ўйлаб топилган найранг, дея рад этган.
Россия Краматорскка берилган ракета зарбаси оқибатида 600 нафар украиналик аскар ўлди, деган. Аммо воқеа жойини кўздан кечирган Рейтерс мухбирлари, бунчалик инсоний талофат изларини топмаганини хабар қилди.
Зеленский: Рус қўшинларининг Украинадаги ҳар бир куни ўлим, жароҳат, азоб келтирмоқда
Украина қўшинларининг Донбасс шарқида мудофаани ушлаб туриш, вақтдан ютишга имкон бермоқда, деди президент Зеленский ўзининг тунги видеомурожаатида:
“Херсон ва Очакив шаҳарларига, Донецк вилояти ва Харков вилоятига ҳужумлар, чегарадаги Суми вилояти аҳолисига қарши қилинаётган террор... Босиб олинган ҳудудлар аҳолисига қарши қилинаётган террор... Рус қўшинларининг Украинадаги ҳар бир куни одамларга ўлим, жароҳат, оғриқ ва азоб олиб келмоқда. Бутун дунё бундан яхши хабардор. Украина мамлакатдан рус террорчиларини чиқариб юбориш ва халқимизни Россиянинг ҳар қандай босқинчилик режаларидан ишончли ҳимоя қилиш учун керак бўлган барча нарсани олиши керак ".
Зеленский вақт ва кучдан ютдик деганда айнан нимани назарда тутганига тўхталмади. Украина расмийлари Россия яқин ойларда йирик ҳужумни режалаштираётгани ҳақида огоҳлантирган.
Айни пайтда, АҚШ Украинага ёрдам беришни тўхтатса, Европада экстремизмнинг тарқалиши хавфи юзага келади, дея хавотир билдирди АҚШ Конгресси сенатори Ангус Кинг.
Кинг, АҚШнинг Украинага ёрдами ҳал қилувчи эганини таъкидларкан, Америка, Владимир Путин ҳокимиятдан кетгунга қадар Украинани қўллаб-қувватлашда давом этиши керак деди.
Украинани қўллаб-қувватлашда давом этмаслик, Ғарб давлатларининг 1930 йилларда Германия фашизми ривожига йўл қўйиб бергани каби катта бир хатонинг такрорланиши бўлади, деди сенатор.
Кремль эса, 10 январь кунги баёнотида, Украина ва Ғарбнинг қатор лидерларини “уятсизлик”да муносабатда айблади.
"Киев ва қатор Ғарб етакчиларининг уятсизларча муносабатига дуч келдик”, деди Кремл матбуот котиби Дмитрий Песков.
Айни пайтда Россия Украинани сулҳ шартини бузиш, Украина эса Россияни сулҳ пайтида тинч аҳолини ўққа тутишда айбламоқда.
Озодлик уруш шароитида томонлар берган баёнотларни мустақил манбалардан тезкор тасдиқлаш имконига эга эмас.
ЕИ ва НАТО раҳбарлари Брюсселда учрашди
НАТО ва Европа Иттифоқи етакчилари ЕИ ва НАТО ҳамкорлиги тўғрисидаги қўшма декларацияни имзолаш учун Брюсселда учрашди.
Еврокомиссия президенти Урсула фон дер Ляен ва Европа Кенгаши раҳбари Шарл Мишел йиғилишдан сўнг НАТО бош котиби Йенс Столтенберг билан қўшма матбуот анжумани ўтказди.
“Украинадаги уруш бошланганидан бери бир нарсани айтиб келяпман, Украина ўз ҳудудини ҳимоя қилиши учун зарур бўлган барча ҳарбий ёрдамни олиши керак. Гап албатта илғор ҳаво ҳужумидан мудофаа тизимлари ва бошқа ҳарбий техникалар ҳақида бормоқда. Бу ёрдам нафақат Украинани ҳимоя қилиш учун балки, БМТнинг қабул қилинган асосий нормалари бўлмиш ташкилот бош низоми ва халқаро ҳуқуқ тамойилларини ҳимоя қилиш учун ҳам керак”, деди Урсула фон дер Ляен, Еврокомиссия раҳбари.