Россия Украинадаги уруш тизгинини қўлга олиш учун ҳарбий етакчиларни алмаштирмоқда
Россия жанг майдонидаги муваффақиятсизликлардан сўнг Украинадаги урушга масъул раҳбариятини алмаштирмоқда.
Россия Мудофаа вазирлигининг маълум қилишича, Бош штаб раҳбари Валерий Герасимов Сергей Суровикин ўрнига Украинадаги қўшинларнинг олий қўмондони лавозимига тайинланди.
Эндиликда Герасимов Россиянинг Украинадаги “махсус ҳарбий операцияси” бевосита жавобгар бўлади. Ўзининг шафқатсизлиги билан "Генерал Армагеддон" лақабини олган генерал Сергей Суровикин бир неча ой бош қўмондон лавозимида ишлади.
Мудофаа вазирлиги эълон қилган баёнотида, ўзгартиришлар ҳарбий бўлинмалар ўртасидаги алоқаларни яхшилаш ҳамда қўмондонлик тузилмасининг “сифат ва самарадорлигини” ошириш мақсадида қилинганини билдирди.
Тайинловлар Соледар учун шиддатли жанглар кетаётган бир пайтда амалга оширилди.
Россиянинг “Вагнер” хусусий ҳарбий ташкилоти Соледар шаҳрини эгаллаганини даъво қилмоқда.
"Террорчи давлат ва унинг тарғибот машинаси Соледар шаҳрининг босқинчилар томонидан деярли бутунлай вайрон қилинган бир қисмини Россиянинг қандайдир ғалабаси сифатида кўрсатишга ҳаракат қилмоқд", дея юқоридаги даъволарни инкор этди Зеленский.
У шунингдек, "жанглар давом этаётганини" айтиб, Украина мудофаани кучайтиришини қўшимча қилди.
Украина Давлат чегара хизмати Соледарда ҳужум остида қолган рус аскарларининг видеосини тақдим қилди.
Рейтерс агентлиги видео жойлашувини тасдиқлади, бироқ санасини мустақил равишда тасдиқлай олмади.
Кунпаякун бўлган Соледар ва Бахмут
Сунъий йўлдошдан олинган тасвирларда Солeдар ва Бахмутдаги вайронагарчиликларни кўриш мумкин. Ҳозирда мазкур икки шаҳар Россия билан шиддатли жанглар марказига айланган.
Махаr Теchnologies компанияси тақдим этган суратларда Солeдардаги куйиб кулга айланган аҳоли пунктлари, Бахмутда эса ракета снарядлари қолдирган излар акс этган.
Россиянинг “Вагнер” хусусий ҳарбий гуруҳи раҳбари Солeдар тўлиқ назоратга олинганини, 500 га яқин украин аскари ҳалок бўлганини даъво қилди.
Украина президенти Владимир Зеленский бу даъволарни инкор қилиб, жанглар ҳануз давом этаётганини билдирган.
Рейтерс Солeдардаги вазиятни мустақил равишда текшира олмади.
Агар Россия кучлари Солeдарни эгаллайдиган бўлса, бу Москва учун шарқий Донбас минтақасини, жумладан Бахмутни қўлга киритиш йўлида йирик қадам бўлиши мумкин.
Туркияда Украина, Россия ва Туркия вакиллари гуманитар масалалар юзасидан учрашуви бўлиб ўтмоқда
Россия, Туркия ва Украинанинг инсон ҳуқуқлари бўйича вакиллари шу ҳафта Анқарада гуманитар коридор яратишни муҳокама қилиш учун уч томонлама учрашув ўтказяпти. Бу ҳақида Рейтерс хабар берди.
Биринчи учрашув 40 минут давом этди. Томонлар 40 нафар ҳарбий асирни алмаштириш ҳақида келишганини маълум қилди.
Музокаралар давомида томонлар болалар ҳуқуқлари, инсон ҳуқуқлари ва маҳбуслар алмашинуви бўйича йўл харитасини ҳам ишлаб чиқиши кўзда тутилган.
Туркия омбудсмани Сереф Малкоч, Туркия Россия ва Украина ўртасида имкон қадар тезроқ ўт очиш тўхтатилиши йўлида ҳаракат қилаётганини, бироқ баъзилар зиддият давом этишини истаётганини таъкидлади.
Украина жаҳон етакчиларидан Россиянинг кучайиб бораётган тажовузига қарши кўпроқ ҳарбий ёрдам сўрамоқда
Ғарбнинг Украинани замонавий қурол-яроғ билан таъминлаши жуда муҳим. Россия навбатдаги йирик ҳужум учун куч тўпламоқда, деди Владимир Зеленский.
“Россия агрессиясини тўхтатиш ва террорчи давлатни мағлубиятга учратиш учун зарур бўлган ҳамма нарса эркин дунёда бор. Бу нафақат биз учун муҳим, балки глобал демократия, эркинликни қадрлайдиган барча учун муҳим. Айниқса, Россия янги ҳужумга ўтиш учун куч тўплаётганини ҳисобга олсак, бу янада долзарб" — деди Зеленский ўзининг тунги видеомурожаатида.
Украина президенти Владимир Зеленский шунингдек, Олтин глобус мукофотини топшириш маросимида сўзлаган онлайн нутқида Украина Россия босқинини тўхтатишини, бироқ олдинда ҳали жанглар борлигини таъкидлади.
Актёр Шон Пенн Зеленскийни “жаҳон даражасидаги шахс” сифатида таништирар экан, Зеленскийнинг жасорати кино ёзувчилар ва режиссёрларини илҳомлантиришини қўшимча қилди.
Зеленский эркинлик ва демократия учун курашда Украинани қўллаб-қувватлаётганларга миннатдорлик билдирди.
“Биринчи жаҳон уруши миллионлаб одамларнинг ҳаётига зомин бўлди, иккинчи жаҳон урушида эса ўн миллионлаб одамлар қурбон бўлди. Учинчи жаҳон уруши бўлмайди. Украина Россиянинг тажовузини тўхтатади, биз буни бутун эркин дунё билан биргаликда амалга оширамиз. Умид қиламанки, барчангиз ғалаба қозонган пайтимизда ҳам биз билан бўласиз. Яшасин Украина!”, деди Зеленский.
Ғарб давлатларининг ҳарбий ва молиявий кўмаги билан Украина босиб олинган ҳудудининг бир қисмини Россиядан қайтариб олди. Бироқ ҳозирда Украинанинг шарқи ва жанубида жанглар давом этмоқда.