Давлат Думаси спикери Россияни тарк этган фуқароларнинг мол-мулкини мусодара қилишни таклиф қилди
Давлат Думаси спикери Вячеслав Володин Жиноят кодексига Россия армиясини “обрўсизлантирган”и учун мамлакатни тарк этган россияликларнинг мол-мулкини мусодара қилиш бўйича ўзгартириш киритишни таклиф қилмоқда.
Федерация Кенгашининг Конституциявий қонунчилик ва давлат қурилиши қўмитаси раҳбари Андрей Клишас бу ғояни амалга ошириш мумкин, деб ҳисоблайди, бироқ унинг сўзларига кўра, жиноий ҳуқуқбузарлик мазмунини белгилаш ва Жиноят кодексига ўзгартиришлар киритиш зарур.
Россияда 2022 йил 21 сентабрда “қисман сафарбарлик” эълон қилинди. Кейин минглаб руслар мамлакатни тарк этишга қарор қилишди, улар Арманистон, Грузия, Қозоғистон, Қирғизистон, Ўзбекистон ва Туркияга кетишди.
Сўнгги пайтларда Россияда юқори мартабали сиёсатчилар мамлакатни тарк этган фуқароларни “сотқинлар” деб атай бошладилар.
Собиқ президент Дмитрий Медведев уларни "кунлари охиригача" Россияга киритмасликни таклиф қилди ва Давлат Думаси спикери Вячеслав Володин улар учун солиқларни ошириш зарурлигини эълон қилди.
Украина омбудсмани: Россия шу пайтгача ўлган деб ҳисобланган украин фуқароларининг тирик эканини тасдиқлади
Россия ва Украина омбудсменлари Туркия пойтахти Анқарада ўтказилган халқаро анжуман доирасида гуманитар масалалар бўйича музокара ўтказди.
Бу икки томоннинг учинчи учрашувидир. Сешанба куни кечқурун ва чоршанба куни иккита учрашув бўлиб ўтди. Бу учрашув ҳам аввалги икки учрашув каби ёпиқ эшиклар ортида бўлди. Учрашувда Туркия бош омбудсмани иштирок этди.
"Биз Анқарада бўлиб ўтган йиғилишда ўз мамлакатларига қайтишни хоҳловчи фуқаролар рўйхатини алмашдик. Муҳими, бу инсон ҳуқуқлари масаласи бўлиб, уни самарали ва тўғри ҳал қилиш учун уни сиёсийлаштирмаслик керак”, - дейди Россия инсон ҳуқуқлари бўйича комиссари Татьяна Москалкова.
Украина парламенти инсон ҳуқуқлари бўйича Омбудсмени Дмитрий Лубинец эса бундай деди:
"Туркия президентидан гуманитар йўлак бўйича янги ғоя ҳақидаги янги ташаббусни эшитдик. Менимча, бу яхши. Ўйлайманки, бу янги платформа маҳбусларни алмашиш тартибини яхшилашга ёрдам беради".
Анқарада бўлиб ўтган учрашув сўнггида Лубенецнинг билдиришича, "Россия томони шу пайтгача ўлган деб ҳисобланган украин фуқароларининг тирик эканини тасдиқлаган. “23 нафар йигитимиз, қаҳрамонларимиз тирик. Бу ижобий ҳолат", - деб ёзди украин Омбудсмени ўзининг Телеграм-каналида.
Украинанинг Туркиядаги элчихонаси мулозимининг айтишича, музокаралар тахминан тўрт соат давом этган, бироқ расмий бирон бир сезиларли ютуқларга эришилгани ҳақида маълумот бермаган.
Туркия матбуотига кўра, учрашувда барча томонлар ўт очишни тўхтатиш бўйича ўз фикрларини билдирган.
Болалар ҳуқуқлари, инсон ҳуқуқлари ва маҳбуслар алмашинуви бўйича йўл харитасини ишлаб чиқиш ва гуманитар коридор очиш муҳокама қилинди, деди Туркия бош омбудсмени Шереф Малқоч.
Украина Омбудсменининг сўзларига кўра, томонлар рўйхатларини алмашган – айни пайтда Россия биринчи марта “аслида 2014 йилдан бери Россия Федерациясида асирликда сақланаётган” шахслар рўйхатини қабул қилган. “Бизда 2014 йилдан бери асирликда бўлганлар рўйхати бор, бизда “Кремл асирлари” рўйхати бор – 158 нафар Украина фуқаролари, уларнинг аксарияти Қрим-татар халқи вакиллари”, — деб ёзган Лубинец.
Унинг сўзларига кўра, Россия томони “бу одамлар қаерда, қандай ҳолатда экани ҳақида маълумот беришга” рози бўлган.
"Вагнер" ўликларини фураларда Россияга ташимоқда
Россиянинг “Вагнер” хусусий ҳарбий гуруҳи ўлган аскарларини юк машиналари ёрдамида Украинадан Россия шаҳарларига олиб кетмоқда, деб ёзади "Осторожно, новости" телеграм-канали.
Буюртмани бажариш учун компания ҳам бир фурага 60 минг рублгача тўламоқда, пудратчига қўйиладиган талаблардан бири юк машинада металл қобиққа ўралган 6 тонна оғирликдаги юкни маълум ҳароратда сақлайдиган совутгич албатта бўлиши керак.
Бундай буюртмаларни қабул қилувчи фирмалардан бири Ростовдаги юк ташувчи ширкат “Дисавтотранс”дир.
Ширкат цинк жўнатмалари "деярли ҳар куни" деярли ҳар куни амалга ошираётганини тан олди, буюртмачи “Вагнер” ширкати эканлигини тасдиқлади.
Украина Россиянинг Соледарни ишғол қилгани иддаоларини яна бир бор рад этди
Украина қуролли кучларининг Шарқий гуруҳи вакили Сергей Череватий Украина кучлари ҳамон шаҳар ичида қолмоқда.
"Украина қўшинлари Соледарни тарк этгани ҳақидаги маълумотлар ҳақиқатга тўғри келмайди, жанглар давом этмоқда. Жангчиларимизнинг тактик позициясини ошкор қилмаслик учун тафсилотлар ҳақида гапирмаяпмиз. Душман максимал куч ташлаган. Лекин бизнинг кучларимиз ҳали ҳам шаҳарнинг ўзида жанг қилмоқда ", Череватий.
Бундан олдин Украина президенти Владимир Зеленский ҳам Соледар шаҳрида украин кучлари ўз позицияларини сақлаб, Россия қўшинларига катта талофатлар етказмоқда, дея баёнот берди.
Зеленский видеомурожаатида "ўз позицияларини эгаллаб, душманга катта талофат етказаётган" Соледардаги икки украин бўлинмасига миннатдорчилик билдирди.
Зеленский, шунингдек, украиналик юқори мартабали қўмондонлар билан учрашгани, Соледар ва унга яқин шаҳарлар учун курашда қандай қўшимча кучлар зарурлиги ва яқин кунларда қандай чоралар кўриш кераклигини батафсил таҳлил қилганини айтди.
“Албатта, асосий масала - Соледар, Бахмут ва умуман Донецк йўналиши. Керакли қарорларни олдик, зарур бўлган қўшимча кучлар ва қўмондонлар томонидан келгуси кунларда қилинадиган қадамларни батафсил таҳлил қилдик. Шунингдек, биз қўшинларни қурол-яроғ ва ўқ-дорилар билан таъминлаш, шерикларимиз билан тегишли ҳамкорликни муҳокама қилдик”.
Украина мудофаа вазирлигига кўра, Соледарда энг шиддатли жанглар кечмоқда.
Россия кучлари ўтган тунда артиллерия, ракеталар ва учоқлардан фойдаланган ҳолда, стратегик аҳамиятга эга Бахмут шаҳрининг шимоли-шарқий чеккасида жойлашган Соледарга зарбалар берган.
"Қийин вазиятга қарамай, Украина аскарлари шижоат билан жанг қилмоқда", - дейилади Украина Мудофаа вазирлиги баёнотида.
Maxar Technologies эълон қилган сунъий йўлдош тасвирларида бир неча ҳафталик шиддатли жанглар ортидан Соледар кумпаякун бўлгани кўринади.
Аввалроқ, Кремлга алоқадор Россиянинг "Вагнер" хусусий ёлланма гуруҳига раҳбарлик қилаётган Евгений Пригожин унинг кучлари шаҳарни эгаллаб олганини иддао қилиб чиққан эди.
Уруш шароитида бу иддаони мустақил тасдиқлаш имконсиз.
Урушни ўрганиш Америка институти фронтдаги вазият таҳлил қилинган жума кунги ҳисоботида "Россия кучлари Соледар ҳудудини тўлиқ бўлмаса-да, аксар қисмини назоратга олгани, Украина қўшинларини шаҳарнинг ғарбий чеккасидан сиқиб чиқаришга муваффақ бўлган"и ҳақида гап боради .
Соледар - Донецк вилоятидаги Бахмутдан 10 километр шимоли-шарқда жойлашган кичик шаҳар. Аҳолиси 2022 йил февралга қадар 10 мингга яқин кишини ташкил қилган . У ерда Шарқий ва Марказий Европадаги энг йирик туз ишлаб чиқарувчи “Артёмсоль” давлат корхонаси жойлашган..