Ҳар икки тараф Соледар ўз назоратида эканини даъво қилмоқда
Айни пайтда, Украина шарқидаги фронтда шиддатли жанглар давом этар экан, ҳам Россия ва ҳам Украина, Соледар шаҳри назорати ўзида эканини ҳануз даъво қилмоқда.
Жумладан, Россия Мудофаа вазирлиги 13 январь куни Соледарни қўлга киритдик, деб баёнот берган, бироқ Киев буни дарҳол инкор қилганди.
Украина президенти Владимир Зеленский эса шарқда кураш давом этаётганини билдирган. Украина кучлари Соледар шимоли-ғарбида ўз позицияларини ушлаб турибди, деди президент.
Яъни, Украина томонига кўра, 46-ҳаво ҳужуми бригадаси жангчилари қуршаб олинган, бироқ ҳамон қаршилик кўрсатмоқда.
Украина Миллий гвардияси қўмондони ўринбосари Владимир Назаренкога кўра, украин қўшинлари русларни ўз позицияларидан "қувиб чиқариш"га киришган.
Озодлик уруш шароитида томонлар бераётган бу баёнотларни мустақил манбалардан тезкор тасдиқлаш имконига эга эмас.
Зеленский: “рус террори”ни тўхтатиш учун кўпроқ қурол керак
Украина президенти Владимир Зеленский Ғарбдан “рус террори”ни тўхтатиш учун кўпроқ қурол етказиб беришни сўради.
"Кун давомида Украинага йўналтирилган 30 ракетадан 20 дан ортиғи уриб туширилди. Булар юзлаб қутқарилган ҳаёт, дегани. Ҳаво ҳужумидан мудофаачиларга ҳамда ёрдам берган барчага миннатдорлик билдираман”, деди Зеленский тунги мурожаатида, Днепрдаги вазиятга алоҳида тўхтатлиб:
“Россия террорини тўхтатса бўладими? Ҳа. Буни Украина жанг майдонларидан ташқарида қилиш мумкинми? Афсуски, йўқ. Буни бизнинг еримизда, осмонимизда, денгизимизда қилиш мумкин ва шундай қилиш ҳам керак. Бунинг учун нима зарур? Бунинг учун шерикларимиз омборларида турган ва аскарларимиз кутаётган қуроллар керак”.
Россия 14 январь куни Украинага кенг кўламли ракета ҳужумларини уюштирди. Натижада, Днепр шаҳридаги тўққиз қаватли турар-жой биноси вайрон бўлди, камида беш киши ҳалок бўлди, энергия инфратузилмасига зарар етди.
Россиянинг шанба кунги ракета ҳужумлари оқибатида Киев ва Харков вилоятлари энергия таъминотида узилишлар юзага келган.
Россияда армия ёши «баҳорда оширилади»
Россияда эса ҳарбийга сафарбарлик учун белгиланадиган ёш чегараси баҳорда кўтралиши мумкин, дея таъкидлади россиялик депутат Андрей Картаполов.
Россия томони ўз қуролли кучлари сонини 30 фоизга оширишни мақсад қилаётгани айтилган эди.
Владимир Путин декабрда мажбурий ҳарбий хизматни ўташ ёшини ҳозирги 18-27 дан 21-30 ёшга ўзгартириш таклифини қўллаб-қувватлаган.
Танқидчилар, Кремль Украинадаги оғир йўқотишлар натижасида Россия армиясида юзага келган танқисликни ҳарбий хизматга лаёқатли россияликлар сонини кўпайтириш орқали бартараф этишга уринмоқда, деган хулосани тилга олмоқда.
Россия қуролли кучлари шартнома асосидаги аскарлар ва муддатли ҳарбий хизматчилардан иборат. Шойгу Россияда ҳарбий хизматчиларнинг умумий сонини 1 миллион 150 мингдан - 1 ярим миллионга оширишни таклиф қилган.
Кремль матбуот котиби Дмитрий Песков, президент Путин чақирув ёшини оширишни “концептуал жиҳатдан қўллаб-қувватлагани”, аммо аниқ тафсилотларни Мудофаа вазирлиги билдиришини айтган.
Россияда БМТ ва Anadolu агентлиги сайтини блоклаш сўралди
Владимир вилояти ҳарбий прокуратураси БМТнинг асосий янгиликлар саҳифасини ҳамда Туркиянинг Anadolu ахборот агентлиги бош саҳифасини блоклаб қўйишни талаб қилмоқда. Бу ҳақда маҳаллий “Довод” нашри хабар берди.
Прокуратура томонидан ариза берилганини ушбу даъвони қабул қилган вилоятнинг Ленин тумани суди ТАСС агентлигига тасдиқлаган.
Суд прокуратуранинг эътирозлари моҳиятини очиқламаган бўлса-да, даъво бўйича манфаатдор томон Роскомнадзор эканини билдирган.
Россия Украинага бостириб кирганидан сўнг Давлат Думаси амалда ҳарбий цензура жорий этди. Россия ҳукумати жазо билан таҳдид қилган ҳолда фуқароларни урушни “махсус амалиёт” деб аташга ва фақат Россия томонининг расмий маълумотларидан фойдаланишга мажбурламоқда.
Бошқа манбаларнинг урушга доир маълумотларини эълон қилганларга жарима ва қамоқ муддати жорий этилди – мазкур жазо чоралари Россия армиясини обрўсизлантириш ва у ҳақида фейк хабарлар тарқатишга оид янги моддаларда назарда тутилган.