Запорожьега ракеталар билан зарба берилди
16 январга ўтар кечаси Россия қўшинлари Запорожьега ракеталар билан зарба берди, дея маълум қилди Запорожье вилояти ҳарбий маъмурияти раҳбари Александр Старух.
“С-300 ракетаси Запорожье шаҳри марказидаги қурилиши тугалланмаган бинога тегиб, портлаши натижасида ҳосил бўлган зарба тўлқинидан беш қаватли уй шикастланди: дераза ва эшиклар қўпорилди, иситиш тизими ишдан чиқди. Ойна синиқлари ва кўчиб тушган девор бўлаклари беш кишига жароҳат етказди, улардан икки нафари 9 ва 15 яшар болалардир”, деб ёзди Старух ўз телеграм-каналида.
У, шунингдек, С-300 ракеталаридан бири вилоятнинг Запорожье тумани, Кушугум кентида жойлашган енгил саноат корхонаси ҳудудига тушганини билдирди. Натижада, тайёр маҳсулотлар сақланаётган омборда ёнғин чиққан.
Аввалроқ Запорожье шаҳри кенгаши котиби Анатолий Куртев Запорожьега ҳужум натижасида уч киши, жумладан икки бола касалхонага ётқизилганини билдириб, зарбалар оқибатлари акс этган фотосуратларни эълон қилган эди.
"Челленжер 2" танкларининг аҳамияти нимада?
Шу кунда жамоатчилик эътибори, НАТО давлатлари орасида биринчилардан бўлиб Буюк Британия Украинага етказиб берадиган - Ғарб намунасидаги "Челленжер 2" танклари бўлмоқда.
"Челленжер 2" русумидаги 14 танкдан иборат эскадрон яқин орада Украинадаги жанг майдонига йўлланиши расман тасдиқланди.
“Челленжер 2” жанговар танки - танклар ва зирҳли транспорт воситаларини йўқ қилишга мўлжалланган махсус техника ҳисобланади. Мазкур ҳарбий транспорт атиги икки йил аввал НАТО машғулотларида синовдан ўтказилган.
Украина армияси, ҳозирги жангларда асосан Совет даврида ишлаб чиқарилган эски танклар ва Россия армиясидан тортиб олинган танклардан фойдаланмоқда.
Президент Зеленский, анчадан бери иттифоқчи давлатлардан замонавий танкларни сўраб келаётди.
Москва Ғарб танкларининг жанг майдонига ташланишини - урушни авж олдириш истаги сифатида қабул қилишини айтган. Бундан ташқари, НАТО бу можарога тўғридан-тўғри аралашишни истамаётир.
Январда Германия, АҚШ ва Франция Украинага АМХ-10 RC енгил танклари, Marder ва Bradley жанговар машиналарини етказиб беришни ваъда қилди.
“Оғир қуроллар етказиб бериш бўйича яқинда берилган ваъдалар жуда муҳим. Тез орада улар янада кўпайишини кутаман”, деди НАТО бош котиби Йенс Столтенберг Германиянинг Handelsblatt нашри билан суҳбатда.
Бу сўзлар Украинани қўллаб-қувватлаш мақсадида ташкил қилинган Рамштайн форматидаги навбатдаги учрашув арафасида айтилди.
“Биз урушнинг ҳал қилувчи палласидамиз. Бинобарин, Украинага унинг ғалабаси учун зарур қуролларни етказиб беришимиз жуда муҳим”, дея урғулади Столтенберг.
У Владимир Путин Украинага ҳужум қилиб катта хато қилганини таъкидлади. НАТО бош котибига кўра, Россия президенти ўз армияси қудратига керагидан ортиқ ишонган.
“Биз Россия армиясида хатоларни, жанговар руҳ йўқлигини, қўмондонлик ва таъминотда муаммолар мавжудлигини кўриб турибмиз”, дея қўшимча қилди у. Шунга қарамай, “россияликлар ўз мақсадига эришиш учун улкан талафотлар беришга тайёр”.
15 январь куни Буюк Британия яқин ҳафталарда Украинага 14 та “Челленжер-2” русумли оғир танкларни етказиб бериши маълум қилинди. Бу ҳақда Британия ҳукумати баёнот берди. Шу тариқа Британия Украинага Ғарбда ишлаб чиқарилган танкларни бераётган биринчи мамлакат бўлди.
Украина кучларига Британия танклари ва артиллериясидан фойдаланишни ўргатиш учун маълум вақт керак бўлади.
Айни пайтда, АҚШ ҳарбийлари 16 январдан бошлаб, Германия ҳудудида украин ҳарбийларига ҳарбий ўқув машғулотларини бошлагани маълум қилинди.
Беларусь “Вагнер ХҲШ”га ўхшаш ўз хусусий ҳарбий ширкатини ташкил қилмоқда
Бу ҳақда Светлана Тихановскаянинг Бирлашган ўтиш ҳукумати мудофаа ва хавфсизлик масалалари бўйича аъзоси Валерий Сахашчикка таянган ҳолда Deutsche Welle хабар берди.
Унинг сўзларига кўра, беларус ХҲШ катта эҳтимол билан “ГардСервис” номли хусусий қўриқлаш фирмаси негизида тузилмоқда. Кадрларни топиш ва тайёрлаш бир неча ойдан бери давом этяпти. Беларусь “спецнази” зобитлари бир неча полигонда “ГардСервис”нинг мингдан зиёд ходимига махсус ҳарбий таълим бераётир.
Улар орасида махсус амалиёт кучлари ҳамда Беларусь кучишлатар идораларининг собиқ офицерлари, прапоршиклари ва аскарлари бор. Сахашчик улар кейинроқ урушда ёки разведка-қўпорувчилик амалиётларида қўлланиши мумкин, деб ҳисоблайди:
“Мендаги маълумот Валерий Сахашчикникидан бир оз фарқли. “ГардСервис” аслида Лукашенко оиласининг тижорат манфаатларини ҳимоя қилиш мақсадида унинг яқин дўсти ва эски улфати Виктор Шейман томонидан таъсис қилинган. Бу ишларнинг тепасида айнан Виктор турибди…
Биринчидан, Путин Лукашенкодан Украинага қўшин киритишни талаб қилганига биронта ҳам далилимиз йўқ. Мен билишимча, Путин беларус қўшинларига реал жанговар куч деб қарамайди. Улар Беларусда сон-саноқсиз расмий-норасмий жосусларига эга: украинлар билан жанг қилишга беларусларнинг ҳуши йўқлигини, Украина ҳудудига йўлланган тақдирда ихтиёрий асирга тушишини ёки, энг ёмони, Украинага тарафига ўтиб кетишини жуда яхши англашади. Путин буни жуда яхши билади. Шу боис беларусларга доимий ротациялар, машқлар ўтказиш билан ахборот босими уюштириш вазифаси юкланган. Бу ҳам оз эмас, албатта. Украинанинг кам деганда 15-20 минг аскари шу тариқа шимолий йўналишда “кишанлаб қўйиляпти...”
Вахтанг Кикабидзе 84 ёшида вафот этди
Россиянинг Украинага босқинини муттасил қоралаб келган таниқли грузиин актёри, қўшиқчи, режиссёр ва жамоат арбоби Вахтанг Кикабидзе 84 ёшида вафот этди.
Актёрнинг касаллик ортидан вафот этгани айтилди. 1980 йилда Грузияда халқ артисти унвонига сазовор бўлган Вахтанг Кикабидзе ўтган асрнинг 70-йилларида режиссёр Георгий Данелия фильмларида ўйнаган роллари ва эстрада саҳнасидаги чиқишлари билан собиқ СССР бўйлаб танилганди.
Айниқса, машҳур “Мимино” фильмидаги роли орқали уни ўзбек томошабинлари ҳам яхши таниган.
Кикабидзе Қрим аннексиясини ҳам, Россия қўшинларининг 2022 йил февралида Украинага бостириб киришини ҳам қоралаб чиққан.
2008 йилдаги Россия-Грузия урушидан буён Россияда чиқиш қилмаган. Ўтган йилги интервьюларидан бирида Кикабидзе “агар ҳеч бўлмаганда 20 ёшга кичик бўлганимда, қўлимга милтиқ ёки автомат олиб, қардош мамлакатни ҳимоя қилишга борган бўлардим”, деган эди.