Латвия, Литва ва Эстония Германияни Леопард танкларини зудлик билан Украинага беришга чақирди
Латвия, Литва ва Эстония ташқи ишлар вазирлари Германияни Украинага Леопард 2 танкларини етказиб беришни кечиктирмасликка чақирмоқда. Бу ҳақда сиёсатчиларнинг Тwиттердаги қўшма баёнотида маълум қилинди.
"Биз, Литва, Латвия ва Эстония ташқи ишлар вазирлари Германияни ҳозирданоқ Украинага Леопард танкларини беришга чақирамиз. Бу Россия агрессиясини тўхтатиш, Украинага ёрдам бериш ва Европада тинчликни тезда тиклаш учун зарур. Европанинг етакчи давлати сифатида Германиянинг бу хусусда алоҳида масъулияти бор", деб ёзди Литва ташқи ишлар вазири Габриелюс Ландсбергис Твиттерда.
Худди шундай матнли твитларни унинг эстониялик ҳамкасби Урмас Рейнсалу ва Латвия ташқи ишлар вазири Эдгарс Ринкевичслар ҳам жойлаштирган.
Аввалроқ Германиядаги Рамштайн авиабазасида ўтказилган йирик давлатлар саммити Украинага танкларни етказиб бериш бўйича узоқ кутилган қарорни қабул қила олмагани хабар қилинган эди.
Германия мудофаа вазири Борис Писториус танкларни етказиб бериш бўйича консенсусга эришиб бўлмаганини айтди. Унинг қўшимча қилишича, яқин орада қарор қабул қилинади ва бу Германия канцлери Олаф Шолцга боғлиқ.
Айни пайтда эса Германия мудофаа вазири Борис Писториус Украинага ташриф буюришни режалаштирмоқда
У Bild am Sonntag нашрига берган интервюсида, янги лавозимида биринчи бўлиб қаерга бориши ҳақидаги саволга: "Мен яқинда Украинага боришимга шубҳам йўқ. Эҳтимол, яқин тўрт ҳафта ичида", деди.
Писториус, шунингдек, Украинага немис Леопард танклари етказиб берилишига изоҳ бериб, Германия “бу масала бўйича ҳамкорлар, биринчи навбатда, АҚШ билан интенсив мулоқот олиб бораётганини” айтди.
Москва вилоятида ҳаво ҳужумидан мудофаа машқлари ўтказилди
Россия Мудофаа вазирлигининг хабар беришича, С-300 зенит-ракета мажмуаси экипажлари “муҳим ҳарбий, саноат ва маъмурий объектларга ҳаво ҳужумларини қайтаришни” машқ қилган.
Машғулотларда 150 дан ортиқ ҳарбий хизматчи ҳамда 30 дан ортиқ қурол-яроғ, ҳарбий ва махсус техника иштирок этди, дея қўшимча қилди Россия Мудофаа вазирлиги.
Январ ойи ўрталарида Интернетда Москва марказидаги ҳаво ҳужумидан мудофаа тизимларининг фотосуратлари пайдо бўла бошлади. Хусусан, ушбу қурилмалардан бири Россия Федерацияси Мудофаа вазирлигининг томига ўрнатилди.
Bloomberg агентлигининг ёзишича, бу Россия расмийлари Украина учувчисиз учоқларининг ҳужумидан хавфсираётганини кўрсатади.
Агентлик суҳбатдошларининг таъкидлашича, ҳаво ҳужумидан мудофаа бўйича қарор Рязан ва Саратов яқинидаги ҳарбий аэродромларга учувчисиз дронлар томонидан қилинган ҳужумлардан сўнг қабул қилинган.
Россия Донецк ва Херсон вилоятларини ўққа тутди
Донецк вилоятидаги қишлоқлардан бирига Россия ракеталари келиб тушди, қурбонлар йўқ.
Кеча кечки пайтда Донецк вилоятидаги қишлоқлардан бирига ракета снарядлари келиб тушди. Оқибатда болалар боғчаси ва яқин атрофдаги биноларга зарар етган, бироқ қурбонлар йўқ, дея маълум қиди ҳудуд расмийларидан бири.
Константинивка ҳарбий маъмурияти раҳбари Олексий Рословнинг сўзларига кўра, Россиянинг иккита S-300 ракетаси Бахмутдан 30 километр узоқликдаги Билокузминивка қишлоғига тушган.
“Ракеталардан бири мактабга, иккинчиси болалар боғчасига келиб тушди. Бино ойналари cинган, томига ҳам зарар етган. Лекин қурбонлар ҳақида ҳозирча маълумот йўқ”, дейди Олексий исмли маҳаллий аҳоли вакили.
Ўтган сутка давомида Россия қўшинлари Херсон вилояти ҳудудини 49 марта ўққа тутди, 3 киши яраланди,
“Улар шаҳарнинг аҳоли турар-жойларини ўққа тутди.Душман снарядлари давлат корхонаси, дарё порти, новвойхона ва фуқароларнинг уйларига тушди”, деди вилоят ҳарбий маъмурияти раҳбари Ярослав Янушевич.
Харков вилоят ҳарбий маъмурияти раҳбари Олег Синегубовнинг ёзишича, Купянскда сут консерва заводи ва иккита хусусий уйга ракета тушган, Волчанскда хусусий бинолар вайрон бўлган, Ветеринарно қишлоғида 46 ёшли фуқаро жароҳат олиб, касалхонага ётқизилган.
Ўтган суткада Донецк вилоятининг Бахмут шаҳри ўққа тутилиши натижасида икки киши яраланган, деб хабар берди вилоят ҳарбий бошқармаси бошлиғи Павел Кириленко.
"Руслар тунда ҳудудни уч марта оғир артиллериядан ўққа тутди. Марганецкаянинг асосий қисми зарба остида қолди. Душман шаҳар ва қишлоқларга 30 дан ортиқ снаряд отган. Одамлар жабрланмаган", - дейди Днепропетровск вилояти ҳарбий бошқармаси бошлиғи Валентин Резниченко. Унинг қўшимча қилишича, Марганецкда лицей, саноат корхонаси, сув таъминоти насос станцияси, маъмурият биноси вайрон бўлган»
Вертолёт ҳалокатида қурбон бўлганларни хотирлаш маросими бўлиб ўтди
Маросимда қатнашган президент Владимир Зеленский кўз ёшларини тийиб туролмади.
Вертолёт ҳалокати Россиянинг Днепр шаҳридаги ракета ҳужумидан бир неча кун ўтиб содир бўлди.
Украина президенти Владимир Зеленский тунги мурожаатида вертолёт қулаб тушиши оқибатида ҳалок бўлганлар хотирасини ёдга олди.
"Буни эслаш оғриқли, ҳозир бу ҳақда гапириш оғриқли. Денис ҳам профессионал, ҳам чинакам инсон эди. Ички ишлар вазири қандай бўлиши керак бўлса, у шундай шахс эди. Биз йўқотаётган ватандошларимизни ҳеч қачон унутмаймиз. Ватанпарвар, профессионал инсонларни, давлатга садоқатли одамларни афсуски ортга қайтариб бўлмайди”, — деди Зеленский ўзининг тунги видеомурожаатида.
18 январь куни Францияда ишлаб чиқарилган Супер Пума вертолёти Киевнинг шарқий чеккасидаги болалар боғчаси яқинига қулаб тушди.
Вертолёт бортида бўлган Украина ички ишлар вазири Денис Монастирский, унинг ўринбосари ва яна вазирликнинг беш нафар юқори мартабали амалдори ҳалок бўлди.
Ҳодиса оқибатида яна етти киши ҳалок бўлди, улардан бир нафари бола экани айтилди. Расмийлар ҳалокат сабабларини ўрганишда давом этмоқда.