"Патриот" жанговар эскадрони Германиянинг Гнойен ҳаво базасидан Польшага йўл олди
"Ва ниҳоят, бу жараён бошланганидан, кетишга рухсат берилганидан хурсандмиз ва жуда фахрланяпмиз. Йиллар давомида машғулотлардан ўтдик, энди бу қуролларни ишлатиш ва айни пайтда дунёга Германияга ишониш мумкинлиги, "Патриот" қурол тизимига ишониш мумкинлигини кўрсатиш вақти келганидан хурсандмиз”, дейди эскадронга ҳамроҳлик қилаётган майор.
Европа Иттифоқи ташқи ишлар вазирлари 23 январь куни Брюсселда учрашиб, Украинага қиймати 500 миллион еровлик ҳарбий ёрдам масаласини муҳокама қилди.
Шунингдек, вазирлар Россияга нисбатан 10-санкциялар пакети ҳамда Россиянинг музлатилган активларини Украинани тиклашга сарфлаш масаласини ҳам муҳокама қилди.
Польша: Немис танкларини Украинага берамиз
Сўнгги кунларда муҳокама мавзуи бўлиб турган асосий масала - Германия танкларининг Украинага етказлиши бўлиб қолмоқда.
Украина бир неча ойдан бери Ғарбдан Германияда ишлаб чиқарилган танкларни сўраб келади, аммо Германия ҳозиргача танкларни жўнатишдан бош тортиб келаётганди.
"Биз ҳар доим барча дўстларимиз ва иттифоқчиларимиз билан ҳар қандай масалани яқиндан муҳокама қилиб кейин қарор қабул қилганмиз. Бундан кейин ҳам шундай йўл тутамиз. Бу уруш жуда узоқ давом этиши мумкинлигини ҳисобга олишимиз керак. Шундай экан Украинани қўллаб-қувватлашни сусайтирмаслик ва Киевга қанча керак бўлса шунча ёрдам бериш янада муҳим. Биз фақатгина ҳамкорларимиз билан ўзаро келишган ҳолда ҳаракат қиламиз", деди Олаф Шольц, Германия канцлери.
Аммо, Германия ташқи ишлар вазири Анналена Бербок, агар Польша Украинага Германияда ишлаб чиқарилган “Леопард 2” танкларини жўнатмоқчи бўлса, Германия бунга қаршилик қилмаслигини билдирди.
Германия Украинага “Леопард 2” танкларини жўнатиш борасида иттифоқчи давлат босими остида қолди. Ғарб иттифоқчилари жума кунги учрашувда бироқ бир тўхтамга кела олишмаган эди.
Польша Бош вазири Матеуш Моравецки, унинг давлати ўз ихтиёридаги “Леопард 2” танкларини, Берлиннинг розилигисиз ҳам Украинага беришини билдирди:
"Биз бунинг учун Германиянинг розилигини сўраймиз, лекин бу - иккиламчи масала. Гарчи, Германия бунга розилик бермаган тақдирда ҳам бу танкларни Украинага берамиз. Биз Берлинга танкларини беришини сўраб, тинимсиз босим қиляпмиз. Уларда 350 та фаол, 200 та захирадаги танк бор. Шу боис, Германия Украинага ростдан ҳам ёрдам бериши мумкин. Украина ҳақиқатда қийналяпти ва бу жанг Европа хавфсизлиги ва тинчлиги учун жуда зарурдир”.
Айни пайтда Кремл матбуот котиби Песков Украинага Ғарб танкларини етказиб бериш ҳеч нарсани ўзгартирмаслиги, аксинча бу Украинанинг муаммоларини янада кўпайтиришини урғулади.
Франция Украинага Леклерк танкларини юбориш имкониятини истисно қилмади
Франция президенти Эммануел Макрон ҳам, Украинага Леклерк танкларини юбориш имкониятини истисно қилмади. Макрон матбуот анжуманида, танкларни юборишдан олдин украин ҳарбийларини ўқитишга кетадиган вақтни ҳисобга олиш кераклиги ва айни пайтда, бунинг ортидан Франциянинг хавфсизлигига таҳдид туғилмаслигига эътибор қаратиш кераклигини таъкидлади:
“Мен мудофаа вазирига Леклерк танкларини юбориш масаласини барча нарсани ҳисобга олган ҳолда кўриб чиқишга топшириқ бердим. Буни уч нуқтайи назардан келиб чиқиб кўриб чиқиш лозим: Аввало, бизнинг ҳаракатимиз можарони янада авж олдириб юбормаслиги керак, иккинчидан, бу Украинага самарали ёрдам бўлиши учун украин дўстларимизга танклардан фойдаланишни ўргатишимиз керак”.
Эстония Киевга замбараклар ва танк урувчи гранатомётлар беради
“Биз 155 мм калибрли барча гаубицаларимизни Украинага берамиз. Шу тариқа прецедент яратмоқчимиз, токи бошқа мамлакатлар Украинага унинг урушда ғалаба қозониши учун зарур қурол-аслаҳаларни беришга қизғаниб, ортиқ бирон баҳона тўқий олмасин”, деди Эстония элчиси Каймо Кууск.
Бу Эстония томонидан Украинага тақдим этилажак энг катта ҳарбий ёрдам пакети бўлиб, умумий қиймати 113 млн еврони ташкил қилади.
Ҳарбий ёрдам ўнлаб 155 мм калибрли FH-70 ва 122-мм калибрли D-30 гаубицаларини, минглаб 155 мм калибрли снарядларни, бир неча мингта М2 Carl Gustaf русумли танкка қарши гранатомётларни ҳамда артиллерия бўлинмалари учун зарур бошқа қурол-аслаҳаларни ўз ичига олади.
Ушбу қурол-аслаҳа партияси Украинага жўнатилганидан сўнг мамлакатнинг Киевга ҳарбий ёрдами ҳажми 370 миллион еврога етиши ва Эстониянинг йиллик ялпи ички маҳсулотининг бир фоиздан кўпроқ қисмини ташкил қилиши айтилмоқда.