Испания ҳам Украинага Леопард танкларини жўнатишга хайрихоҳ
НАТОдаги иттифоқчиларнинг қарорларидан сўнг Испания мудофаа вазири Мадрид ҳам Украинани Германияда ишлаб чиқарилган Леопард 2 танклари билан таъминлашга хайрихоҳлигини билдирди.
Элкано тадқиқот марказининг хавфсизлик ва мудофаа бўйича тадқиқотчиси Феликс Артеганинг сўзларига кўра, Испанияда 108 та 2А4 танклари мавжуд.
2А4 кўплаб Европа мамлакатлари учун эски типдаги танк модели ҳисобланади.
Испания танкларининг қарийб ярми Шимолий Африкадаги Сеута ва Мелиля анклавларида жойлашган.
53 таси эса Сарагосадаги ҳарбий базада ҳамда улар қайта таъмирланиши керак, деди Артега.
Украинага Леопард 2 танклари етказиб берилишини Москва хавфли провокация сифатида кўрмоқда
Жоржтаун университети фахрий профессори Анжела Стентнинг айтишича, Германиянинг Россияга муносабати ўзгармоқда:
“Немислар ниҳоят украиналикларни Леопард танклари билан таъминлашга рози бўлгани ҳақиқатан ҳам Германиянинг Россияга нисбатан шу билан бирга Марказий ва Шарқий Европага нисбатан муносабатларида туб ўзгариш борлигини кўрсатади".
Германия мудофаа вазири Борис Писториуснинг юбориладиган танклар уч-тўрт ой ичида тайёр бўлишини маълум қилди.
Бироқ Германияда Украина ҳарбийларини тайёрлаш тез орада бошланади. Шунингдек, Германия ўқ-дорилар билан таъминлаши ҳам кўзда тутилган.
АҚШ Украинага 31 та Абрамс танкларини юборади
АҚШ Украинага бир неча ой ичида қиймати 400 миллион долларлик 31 та М1 Абрамс танкларини етказиб бериши ҳақида эълон қилди.
Оқ уйда Жо Байден тегишли қарорни эълон қилар экан, Германиянинг Украинага Леопард 2 танкларини етказиб бериш қарорини ҳам олқишлади.
"АҚШ иттифоқчи ва ҳамкорлар билан биргаликда Украина ўзини Россиянинг шафқатсиз тажовузидан ҳимоя қила олиши учун ҳаракат қилмоқда. Мен узоқ вақтдан бери Америка ва Европа бу қадар жипслашганига гувоҳ бўлмаганман", деди Жо Байден.
Қўшма Штатлар Абрамс танкларини Киевга бериш ғоясига ён бермай келаётганди, аммо Германияни Леопард 2 танкларини Украинага юборишга кўндириш учун қарорини ўзгартиришга мажбур бўлди.
"Россияга нисбатан ҳеч қандай танк ҳужуми таҳдиди йўқ", деди Байден.
Кремль матбуот котиби Дмитрий Песков Абрамс танкларини Украинага юборишни пулни беҳуда сарфлаш деб атади.
Украинадаги урушда ўлган яна бир Тожикистон фуқароси дафн этилди
27 ёшли Зулфиқор Муҳиддиновнинг жасади солинган тобут 22 январ куни Москвадан Душанбега олиб келинди.
У оилада ёлғиз ўғил эди. Зулфиқорнинг амакиси Хуршед Муҳиддинов Озоди радиосига берган интервюсида жияни у ердаги қурилиш ширкатларидан бирида ишлаганини айтди:
“2019 йили коронавирус авжига чиққан пайтида биз уни Россияга юборган эдик. Борганидан сўнг бир йилча қурилиш фирмасида ишлади. Биз унинг ишлаётганини аниқ билардик. Балки у бошқа йигитлар билан боғлангандир, билмайман, лекин у гиёҳванд моддаларнинг ноқонуний савдосида айбланиб ҳибсга олинган ва 6 йилдан ортиқ муддатга қамалган эди”, — деди у.
Зулфиқор Муҳиддиновнинг яқинлари у бир ярим йил қамоқда ўтиргани ва ўтган йилнинг октябр ойидан бери оиласи билан боғланмаганини маълум қилган.
Хуршед Муҳиддиновнинг айтишича, жияни урушга кетаётганини ҳеч кимга айтмаган. Ва бир неча кун олдин Россия Мудофаа вазирлиги вакиллари Муҳиддиновлар билан боғланиб, унинг Украинанинг Артемовск (Бахмут) шаҳрида ўлдирилгани ҳақида хабар беришган.
Яқинларининг сўзларига кўра, у ҳеч қаерда жанг қилмоқчи эмас, балки ватанига қайтиш учун муддати тугашини кутаётган эди.
Зулфиқорнинг онаси Нигора Муҳиддинова Россия қамоқхонасида жазо ўтаётган ўғли қандай қилиб Украинадаги урушда ҳалок бўлганини англай олмаётганини айтди.
Зулфиқор Мухиддинов 22 январ куни Душанбе шаҳридан 50 км узоқликда жойлашган Ҳисор шаҳрининг Яккатут қишлоғида дафн этилган. Қариндошларининг сўзларига кўра, у уйланиш учун пул йиғиш мақсадида Россияга ишлаш учун кетган эди, аммо тақдири бошқача якун топди.
Ҳозирча Россиядаги қамоқхоналарда жазо муддатини ўтаётган қанча тожикистонлик ҳалок бўлгани ҳақида аниқ маълумот йўқ. Охирги икки ой ичида Украинадаги урушда камида беш нафар тожикистонлик ҳалок бўлгани маълум бўлди.