Испания Украинага олтита Леопард 2 танкларини юборади
Бу ҳақда Эл Паиc газетаси ҳукуматдаги манбаларига таяниб маълум қилди.
Испания Мудофаа вазирлиги матбуот котиби изоҳ бериш Рейтер сўровига жавоб бермади.
Украина ташқи ишлар вазири Дмитрий Кулеба 12 давлатдан иборат коалициядан 120 дан 140 гача Ғарб танклари етказиб берилиши кутилаётганини таъкидлади.
Кулебанинг сўзларига кўра, бу танклар Германиянинг Леопард, Британиянинг Челленжер ва АҚШнинг М1 Абрамс танкларидир.
Шунингдек, Украина Франция Леклерк танкларини беришига ҳам умид қилмоқда.
Kремль: Украинага Ғарб қуролларини етказиб бериш фақат кескинлашувга олиб келади
Kремль Украинага Ғарб қурол-яроғларини етказиб бериш у ерда можаронинг янада кучайишига олиб келишини билдирди.
Kремль матбуот котиби Дмитрий Песков НАТОга аъзо давлатлар можарога кўпроқ аралашиб бораётганини айтиб, уларнинг Украинага қурол-яроғ етказиб беришлари можаро тизгинини ўзгартирмаслигини таъкидлади:
"Вазият боши берк кўчага кириб қолди. Бу яна бир бор жиддий кескинлашувга, кўпроқ НАТО давлатларининг можарога тўғридан-тўғри иштирокига олиб келади. Лекин бу нарса воқеалар ривожини ўзгартиришга қодир эмас ва ўзгартирмайди ҳам. Махсус ҳарбий операция давом этади”.
Ўтган ҳафта Германия ва АҚШ Украинага замонавий жанговар танклар етказиб беришини маълум қилган эди.
Еврокомиссия раҳбари: Украинани қўллаш узоқ давом этади
Еврокомиссия раҳбари Урсула фон дер Ляйен Европа иттифоқи Украинани узоқ муддатга қўллаб-қувватлаш фикрида эканини айтди.
“Биз ҳеч бир шартларсиз Украина тарафида турибмиз”, деди у Дюссельдорфда Германиянинг Христиан-демократик иттифоқи партияси ташкил қилган учрашувда сўзлаган нутқида.
Фон дер Ляйенга кўра, Украина Европа қадриятларини ҳимоя қилмоқда ва халқаро ҳуқуқ ҳурмат қилиниши учун кураш олиб бормоқда.
Бу эса, Еврокомиссия раиси фикрича, Украина урушда ғалаба қозониши шартлигини билдиради.
Сиёсатчи ғалабага, жумладан, Россиянинг энергоресурслар тижоратидан оладиган даромадларини камайтириш орқали эришиш мумкинлигидан баҳс этиб, янгиланадиган энергия манбаларига ўтишга чақирди.
Борис Жонсон: Путин менга ракеталари билан таҳдид қилган эди
Буюк Британиянинг собиқ бош вазири Борис Жонсон Россия президенти Владимир Путин ўтган йили февралда, Россиянинг Украинага босқини арафасида унга ракета зарбаси билан таҳдид қилганини айтди.
"У телефон суҳбати чоғида менга таҳдид қилганча шундай деди: "Борис, мен сизга озор беришни истамайман, лекин ракета зарбаси бериш учун бор йўғи бир дақиқа кифоя". Аммо менимча, Путин уни шунчаки музокараларга кўндиришга уринишимни хоҳлади. У яна шундай деди: "Борис, сиз яқин орада Украина НАТОга кирмайди, деб айтяпсиз, унда яқин орада нима бўлади?"деб инглиз тилида сўради. Мен эса Украина яқин келажакда НАТОга қўшилмайди, буни сиз жуда яхши биласиз, дея жавоб бердим”, дейди Жонсон Би-би-си суратга олган “Путин Ғарбга қарши” номли ҳужжатли фильмда Россия президентидан иқтибос келтираркан.
Узоқ давом этган бу суҳбат ўтган йилнинг февраль ойида бўлган, Путин эса Жонсон Украинага уруш очишнинг ҳалокатли оқибатларидан огоҳлантирганидан сўнг унга шундай таҳдидли жавоб қайтарган.
Жонсон, шунингдек, Украина яқин орада НАТОга кира олмаслигини Россия президентига уқтиришга уринган ва ҳар қандай босқин НАТОни Россия чегараларидан узоқлаштирмаслигини, билъакс, янада яқинлаштиришини айтиб, уни огоҳлантирган.
Kремль президент Владимир Путин “махсус ҳарбий операция” арафасида Борис Жонсон билан телефон мулоқотида унга ракета зарбаси билан таҳдид қилгани ҳақидаги гапларни ёлғон деб атади.
"Буюк Британия собиқ бош вазири Борис Жонсоннинг айтганлари ҳақиқатга тўғри келмайди. Бу ёлғон. Бу атайлаб қилинган ёлғон бўлиши мумкин. Буни жаноб Жонсоннинг ўзидан сўраш керак. Борис Жонсон Россия президенти у билан нима ҳақида гаплашаётганини тушунмаган. Ҳеч қандай ракета таҳдиди борасида гап бўлмаган", деди Кремль матбуот котиби Дмитрий Песков.
Песковнинг сўзларига кўра, Путин Жонсонга Украинанинг НАТОга қўшилиши, Россия чегаралари яқинида жойлаштириладиган НАТО ракеталари бир неча дақиқада Москвага етиб келишини англатади деб тушунтирган.
“Бу тушунмовчиликни нотўғри талқин қилиш бироз ғалати”, — деди Песков.