Украина, Польша ва Болтиқбўйи давлатлари Олимпиада ўйинларини бойкот қилиш билан таҳдид қилмоқда
Париж-2024 Олимпиадаси раҳбарининг айтишича, келаси йилги ёзги ўйинларда Россия ва унинг иттифоқчиси Беларус спортчилари иштирок этиши мумкинми ёки йўқми, бу ҳақда Халқаро Олимпия қўмитаси қарор қилади.
Бу баёнот Украинадаги урушнинг бир йиллиги яқинлашаётган пайтда янграган.
Париж-2024 президенти Тони Эстангует Марселда журналистлар билан учрашув чоғида шундай деди..
“Албатта, мен бугун Украинани тўлиқ қўллаб-қувватлайман ва ҳозирда содир бўлаётган воқеалар барчамиз учун фожиа ва, албатта, 2024 йилда ким иштирок этиши муҳим эмас. бу можаро қандай ва қачон тугаши муҳим"
Украина агар россиялик ва беларуслик спортчиларга Олимпиадада иштирок этишларига рухсат берилса ўйинларни бутунлай бойкот қилиш билан таҳдид қилди.
Президент Владимир Зеленский Россия ва Беларус спортчиларига тақиқ қўйишдан бошқа ҳар қандай нарса "террорни қандайдир маъқул" деб кўрсатишини айтди.
Россиянинг Болтиқбўйи қўшниси Эстония бош вазири ҳам бу фикрни қўллаб-қувватлади.
Польша тақиқни қўллаб-қувватлаш учун 40 га яқин давлат, жумладан, АҚШ, Британия ва Канададан иборат коалиция тузиш ҳаракатида.
Россия ва Беларус спортчилари аллақачон кўплаб халқаро мусобақалардан четлаштирилган.
ХОҚ ўтган ҳафтада Россия ва Беларус спортчилари Осиё саралаш босқичида иштирок этишлари ва уларга қарши санксиялар туфайли Парижда нейтрал спортчилар сифатида иштирок этишлари мумкинлигини эълон қилди.
ХОҚ ижроия кенгаши аъзоларидан бири жума куни барча вариантлар ҳали ҳам кўриб чиқилаётганини айтди.
Россия ва Беларус спортчилари мусобақадан четлаштирилмаса, Эстония келаси йил Париж Олимпиадасини бойкот қилиши мумкин, деди мамлакат бош вазири Кажа Каллас.
Унинг баёноти Халқаро Олимпия Қўмитасининг (ХОҚ) ўтган ҳафта Европадаги мусобақаларда қатнашиши тақиқланган икки мамлакат спортчиларига Осиё мусобақалари орқали Олимпиада ўйинларига йўлланма олишлари мумкинлиги ҳақидаги эълонидан кейин янгради.
"Бизнинг саъй-ҳаракатларимиз бошқа дўстлар ва иттифоқчиларни россиялик ва беларуслик спортчиларнинг иштироки нотўғри эканлигига ишонтиришга қаратилган бўлиши керак. Бойкот - кейинги қадам", - деди Каллас Таллинда латвиялик ва литвалик ҳамкасблари билан учрашганидан кейин.
Болтиқбўйи ва Полша спорт вазирлари ҳам халқаро спорт ташкилотларини Украинадаги уруш шароитида худди шундай тақиқ қўйишга чақирган, Латвия ва Кийев эса ўйинларни бойкот қилиш билан таҳдид қилган.
Россия ва Беларус билан чегарадош Европа Иттифоқи ва НАТОга аъзо бўлган учта Болтиқбўйи давлати ва Польша Украинани кучли қўллаб-қувватлаган ва деярли бир йил аввал Москва босқинидан кейин биринчилардан бўлиб қурол юборган.
Резников: Ғарб танклари "темир мушт" бўлиб хизмат қилади
Украина мудофаа вазири НАТО давлатлари томонидан етказиб бериладиган янги танклар Киевнинг Россия мудофаа чизиғини ёриб ўтиш учун қарши ҳужумда “темир мушт” бўлиб хизмат қилишини айтди.
Алексей Резников ўзининг польшалик ҳамкасби билан бўлиб ўтган брифингда Ғарбнинг Украинага етказажак 155 миллиметрли артиллерия қуроллари Россиянинг жануб ва шарқдаги ҳужумларига қарши туришда зарур эканлигини қўшимча қилди.
"НАТО давлатларининг асосий танклари билан янги танк коалицияси - бу бизга қарши ҳужум учун керак, биз уларни мудофаа чизиғини ёриб ўтиш учун темир мушт каби фойдаланамиз", деди Резников.
Польша мудофаа вазири Мариуш Блащак Киевда украиналик ҳамкасби Резников билан музокаралар пайти Варшава Украина аскарларини Ғарб танкларидан фойдаланишга ўргатишда ёрдам бераётганини ва машғулотларни якунлаш “кунлар ёки ойлар эмас, ҳафталар” масаласи эканини айтди.
Ўтган ой Ғарб давлатлари Москва шарқда олдинга силжиш учун катта саъй-ҳаракатларни кучайтирган бир пайтда Украинага Россия босқинига қарши курашиш учун асосий жанговар танклар етказиб беришга ваъда берди,
Украина Ташқи ишлар вазири Дмитрий Кулеба ўз мамлакати 12 давлатдан иборат коалициядан 120 дан 140 тагача Ғарб танкларини, жумладан, Германиянинг “Леопард 2”, Британиянинг “Чалленжер 2” ва АҚШдан М1 “Абрамс” танкларини олишини айтди.
Зеленский: Украинанинг ЕИга аъзо бўлиши бўйича музокаралар шу йил бошлаши мумкин
Украинанинг Европа Иттифоқига аъзо бўлиш бўйича музокаралар шу йил бошлаши мумкин. Украина президенти Владимир Зеленский Киевда ЕИ юқори даражали расмийлари билан жума кунги музокаралар ортидан бу ҳақда таъкидлади.
"Бугун қандай аниқ натижаларга эришдик? Биз Украинанинг Европа Иттифоқига қўшилиш бўйича музокараларни шу йил бошлашимиз мумкинлигига тушуниш хосил қилдик”, деди Зеленский.
Европа Иттифоқи-Украина саммити ўтган йил феврал ойида Россия босқини бошланганидан буёнги Украина тупроғидаги илк саммит бўлди. Украина маҳсулотларининг Европа Иттифоқи бозорига киришини яхшилаш, бир неча ҳафталик ҳаво ҳужумларидан сўнг Украинага энергия эҳтиёжларини қоплашга ёрдам бериш, Россияга қарши янги санкциялар ва Россия раҳбарларини ҳарбий жиноятлари учун жазога тортиш каби масалалар саммит мухокамалари марказида бўлган.
Аммо саммитнинг ўзида тез аъзолик ваъдаси бўлмаган ва Европа Иттифоқининг Россияга қарши навбатдаги 10инчи санкцияси Киев кутганидан кучсиз бўлиши кутилмоқда.
Зеленский, шунингдек, Украина мудофаа қобилиятини кучайтириши кераклигини айтди ва Россияга нисбатан санкциялар босимини кучайтиришга чақирди.
Би-Би-Си: Урушда 13 мингдан ортиқ россиялик ҳалок бўлди, улардан 924 нафари сафарбар қилинганлар
Уруш бошланганидан бери Украинада 3 февраль ҳолатига кўра 13 мингдан ортиқ россиялик ҳалок бўлди, улардан 924 нафари сафарбар қилинганлардир. Бу маълумотларни “Медиазона” нашри ва кўнгиллилар жамоаси билан биргаликда Украинадаги россиялик ҳарбий хизматчиларнинг йўқотишлар рўйхатини тузаётган BBC Рус хизмати эълон қилди.
Журналистларнинг таъкидлашича, сўнгги уч ой ичида ўлганларнинг аксарияти сафарбар қилинган, кўнгиллилар ва маҳбуслардир.
Ўтган ҳафтанинг ўзида Украинада жанг қилган яна 500 нафар россиялик ҳалок бўлгани ҳақида хабарлар пайдо бўлди.
Очиқ манбалардан журналистлар 924 сафарбар қилинган русларнинг ўлими ҳақида билишади. Бу рақамга, шунингдек, 1 январ куни Украинанинг Донецк вилоятининг Россия томонидан босиб олинган қисмидаги Макеевка ўққа тутилиши чоғида ҳалок бўлган 99 киши ҳам бор.
Россия Мудофаа вазирлиги Макеевкадаги ҳужум пайтида 89 нафар россиялик ҳалок бўлганини тан олди - бу уруш бошидан бери Россия томонидан тан олинган энг кўп бир марталик йўқотишдир.
11 ой давомида Россия армиясининг йўқотиш динамикасини ўрганиб чиқиб, журналистлар шундай хулосага келишди: ҳозирда ҳалок бўлганларнинг асосий қисми кўнгиллилар, “Вагнер” ХҲШ ёлланма аскарлари (шу жумладан маҳбуслар) ва сафарбар қилинганлар. Улар биргаликда умумий сонининг чорак қисмини ташкил қилади. Йўқотишлар бундан да кўп бўлиши мумкин..
Урушнинг биринчи босқичида ҳаво-десант кучлари, денгиз пиёдалари корпуси, ГРУ махсус кучлари, яъни профессионал ва яхши тайёрланган тузилмалар энг катта йўқотишларга дучор бўлган.
Украинада ҳалок бўлган 13 000 дан ортиқ рус аскарларидан 1665 киши, яъни деярли 15% офицерлардир. Улар орасида тўрт нафар генерал ва 54 нафар полковник бор.
Журналистларнинг таъкидлашича, йўқотишларни ҳисоблашда улар фақат очиқ манбалардан олинган тасдиқланган маълумотлардан - Россия оммавий ахборот воситалари ва минтақавий ҳокимиятлар, шунингдек, маҳаллий аҳолининг хабарларидан фойдаланадилар, шунинг учун ҳақиқий қурбонлар сони камида икки баравар кўп бўлиши мумкин.
Мониторинг муаллифларининг энг консерватив ҳисоб-китобларига кўра, Украинага бостириб кириш пайтида Россия 26 мингдан ортиқ одамни йўқотиши мумкин эди. Россиянинг жами тузатиб бўлмайдиган йўқотишлари (яъни жароҳатлар, ўлим ёки бедарак йўқолганлар туфайли ишдан бўшатилганлар сони) камида 117 минг кишини ташкил қилиши мумкин.
АҚШ ва бошқа Ғарб расмийлари Украинадаги ҳалок бўлган ва яраланган рус аскарлари сони 200 мингга яқинлашганини тахмин қилмоқда. Бу ҳақда The New York Times нашри хабар берган.
Урушнинг сўнгги уч ойида Россиянинг йўқотишлари икки баравар кўпайган, деб ёзади газета. Нашр манбаларига кўра, Украинанинг Донецк вилоятидаги энг шиддатли жанглар кетаётган Бахмут ва Соледар ҳудудларида ҳар куни юзлаб россиялик ҳарбийлар ҳалок бўлмоқда ёки яраланмоқда. Бунга сабаб Россия ёмон тайёргарликдан ўтган сафарбар қилинган ва собиқ маҳбусларни фронтга жўнатмоқда, дейилади The New York Times нашри хабарида.
The New York Times газетасининг ёзишича, Украинанинг Бахмутдаги йўқотишлари Россияники билан солиштириш мумкин.
Умуман Украинанинг йўқотишларига келсак, нашр АҚШ Қуролли кучлари штаб бошлиқлари бирлашган қўмитаси раҳбари Марк Миллининг баҳосига таянади. 2022 йилнинг ноябрида у можаронинг ҳар икки томони 100 мингдан ортиқ одамини йўқотганини айтганди.
Россия Мудофаа вазирлиги йўқотишлар ҳақида сўнгги бор 21 сентабр куни 5937 киши ҳалок бўлгани ҳақида хабар берган эди.