WP: АҚШ украин ҳарбийларига HIMARS учун мўлжални аниқлашда ёрдам бермоқда
Украина ҳарбийлари нишонни юқори аниқликда урадиган HIMARS ва АҚШнинг бошқа тизимларидан зарбалар беришда Европадаги АҚШ ҳарбийлари тақдим этган координатларга таянмоқда. Бу ҳақда Америка ва Украина расмийларига таяниб, The Washington Post нашри хабар бермоқда.
Украинанинг юқори мартабали манбасининг газетага айтишича, бу ёндашув Қўшма Штатларни Киевга узоқ масофага мўлжалланган қуролларни бериш мумкинлигига яна бир бор ишонч хосил қилдириш учун муҳим.
Унинг сўзларига кўра, украиналик ҳарбийлар ўзлари зарба бермоқчи бўлган нишонларни аниқлайди, кейин бу маълумотни қўмондонликка узатади, қўмондонлик эса АҚШ ҳарбийларидан координаталарни янада пухтароқ аниқлаштиририб олади. Агар координаталар тақдим этилмаса, нишонларга зарба берилмайди, дея айтган украин манбаси Washington Post нашрига.
Пентагон матбуот котиби генерал Патрик Райдернинг нашрга айтишича, Қўшма Штатлар "Украинага Россия агрессиясидан ҳимоя қилишда ёрдам бериш учун разведка маълумотларини тақдим этишини тан олган". Шу билан бирга, у украиналикларнинг ўзлари нишон излаётганини ва зарбалар бўйича якуний қарорни қабул қилаётганини таъкидлади. "АҚШ нишонларни маъқулламайди ва уларни танлашда иштирок этмайди", деди Пентагон вакили.
Украина армиясида Американинг HIMARS тизимлари ва радиуси 75 километрдан ошмайдиган М270 шунга ўхшаш кўп сонли ракеталар мавжуд.
Шу билан бирга, Вашингтон Киевнинг HIMARS тизимларидан учирилиши мумкин бўлган 300 километргача масофага учадиган АТАCМS ракеталарини етказиб бериш бўйича сўровини қаноатлантирмади. Оқ уй Украина ҳарбийлари Россия ҳудудидаги нишонларга зарба беришидан, бу урушнинг авж олишига олиб келиши ва АҚШни можарога тортишидан хавотирда.
Киев, ўз навбатида, Россиядаги нишонларга зарба бериш учун бундай қуроллардан фойдаланмаслигини таъкидламоқда.
Владимир Зеленский: Украина ғалабаси дунёни ўзгартиради
Украина президенти Владимир Зеленский 8-феврал, чоршанба куни Даунинг-стритдаги 10-уйга ташрифи чоғида Россия босқинидан ҳимоя қилишда кўрсатаётган ёрдами учун Британияга миннатдорчилик билдирди.
Унинг ташрифи Киев рус қўшинларини сиқиб чиқаришга ёрдам бериш учун Ғарбни кўпроқ қурол етказиб беришга ундаётган бир пайтга тўғри келди.
Украинанинг ғалабаси дунёни ўзгартиради, деди Зеленский Лондонга ташрифи чоғида:
“Биз биламизки, Россия ютқазади. Ва биз ҳақиқатан ҳам биламизки, ғалаба дунёни ўзгартиради ва бу дунё узоқ вақтдан бери кутган ўзгариш бўлади. Ўйлайманки, Бирлашган Қироллик биз билан ҳаётимиздаги энг муҳим ғалаба сари қадам ташламоқда. Бу уруш ғояси устидан ғалаба бўлади».
Зеленскийнинг Лондонга кутилмаган ташрифи унинг сўнгги бир йилдаги иккинчи хорижий сафаридир.
Бу ташриф Буюк Британия бош вазири Риши Сунак қирувчи-учувчилар ва денгиз пиёда аскарларини тайёрлаб беришни ўз ичига олган украин аскарлари машғулотларини кенгайтиришни ваъда қилганидан сўнг амалга оширилди.
Буюк Британиянинг таъкидлашича, машғулотлар украиналик учувчиларга келажакда "НАТО стандартидаги мураккаб қирувчи самолётлар"ни бошқариш имконини беради.
Ғарб давлатлари янги йил бошидан бери Украинага ҳарбий ёрдам бериш ваъдаларини оширди, бироқ ҳозирча Киев сўраган қирувчи самолётларни етказиб беришга рози бўлмаяпти.
Украина: Россия жанглар авж олаётган паллада энг ҳалокатли кунни бошдан кечирмоқда
Украина денгиз пиёдалари 7-феврал, сешанба куни Россия томонидан босиб олинган Донецк шаҳри чеккаси Маринка яқинида “Град” ракеталарини учирди.
"Град" ракета батареяси қўмондони Евгений Рейтер агентлигига Россия қўшинлари Украинанинг Маринка яқинидаги позицияларига бостириб киришга уринаётганини айтди.
"24-феврал куни улар автоколонналарда бостириб келишган эди, аммо ҳозир улар турли хил йўллар билан ҳаракат қилишмоқда. Улар янада ичкарироқ кириш учун кичик пиёдалар гуруҳлари билан бостириб келмоқда. Ҳатто дастлабки артиллерия зарбаларисиз уларнинг пиёдалари ҳаракат қилмоқда".
Украина армияси маълумотига кўра, сўнгги 24 соат қарийб бир йилги уруш давридаги Россия қўшинлари учун урушнинг энг ҳалокатлиси бўлган.
Украина бир кечада россиялик ҳарбийларнинг ҳалок бўлганлар сонини 1030 нафарга оширди.
Рейтерс бу хабарни тасдиқлай олмади ва Россия ҳам сўнгги ҳафталарда кўп сонли Украина аскарларини ўлдирганини иддао қилди. Ҳар икки томондан душман қурбонлари ҳақидаги маълумотлар кўпинча ишончсиз деб ҳисобланади.
Аммо Киевнинг жанглар ҳозиргача энг қонлиси бўлган деган даъвоси шиддатли уруш авж олгани ҳар икки томоннинг таърифларига мос келади.
Мана Донецк вилоятидаги украиналик аскарлар Совет давридаги Град ракета тизимидан фойдаланаётганини кўриш мумкин.
Шарқдаги жанглар Киевда тартибсизликлар ҳақида хабарлар пайдо бўлган пайтга тўғри келмоқда.
Байден Украинадаги урушни “аср синови” деб атади ва Киевга “қанча керак бўлса, шунча” ёрдам ваъда қилди
АҚШ президенти Жо Байден Конгрессга мурожаатида Украинадаги урушни “аср синови” деб атади ва Киевга “қанча керак бўлса, шунча” ёрдам беришни ваъда қилди. Унинг нутқи Оқ уй сайтида жонли ёйин қилинди.
“Мен бу залдан бир йил олдин, Владимир Путин Украинага қарши шафқатсиз уруш бошлаганидан бир неча кун ўтиб гапирган эдим. Иккинчи жаҳон уруши йилларида Европанинг бошига тушган ўлим ва вайронагарчилик манзараларини хотирада жонлантирувчи мудҳиш ҳужум. Путиннинг босқинчилиги асрлар учун синов. Америка учун синов. Дунё учун синов. Биз энг асосий тамойилларга амал қиламизми? Биз суверенитетни қўллаб-қувватлаймизми? Биз халқнинг зулмсиз яшаш ҳуқуқини ҳимоя қила оламизми?»
АҚШ раҳбарига кўра, мамлакат глобал коалиция тузишга мувафақ бўлган: “Биз НАТОни жипслаштирдик ва глобал коалиция туздик. Биз Путин агрессиясига қарши турдик. Украина халқини қўллаб-қувватладик”, деди Байден.
АҚШ президенти Вашингтон украиналиклар ёнида “қанча керак бўлса, шунча” туришига ваъда берди.
АҚШ Украинага ҳарбий ёрдам кўрсатишда давом этмоқда. Учинчи февраль куни Пентагон умумий қиймати 2 млрд доллардан ортиқ янги ёрдам пакети ҳақида эълон қилди.
Унга 150 километргача масофадаги нишонларни ура оладиган GLSDB (Ground Launched Small Diameter Bomb) ракеталар ҳам киритилган. Аввалроқ Украина иттифоқчиларидан узоқдаги нишонларни урадиган қуроллар беришни бир неча бор сўраган эди.
Россия агрессияси бошланганидан бери АҚШ Украинага 29,3 млрд долларлик ҳарбий ёрдам кўрсатди.