Донбассдаги жангларда Россия армияси рекорд миқдорда талафот кўрмоқда
Украина Бош штабига кўра, 7 февраль куни фронтда Россия тарафидан 910 аскар ҳалок бўлган, бир кун аввал эса – 1030 аскар. Кенг кўламли уруш бошланганидан бери Россия жами 134 мингдан зиёд аскар йўқотган.
Уруш шароитида ушбу маълумотларни текшириш имкони йўқ, бироқ АҚШ разведкаси Россия талафотларини ўлганлар ва ярадорлар билан бирга 200 минг киши, дея баҳоламоқда. Бу ҳақда 3 февраль куни АҚШнинг The New York Times нашри ёзган эди.
Ўтган йилнинг ноябрида АҚШ штаб бошлиқлари бирлашган қўмитаси раҳбари Марк Милли Россия ўлганлар ва ярадорлар билан бирга 100 минг кишини йўқотганини айтган эди.
Шундай қилиб, Вашингтонга кўра, Россия армиясининг сўнгги уч ойда Украина урушида кўрган талафотлар 80 мингдан 100 минггача ёки ҳар ойда ўртача 26 мингдан 33 минггача ҳарбийни ташкил қилади. Ва бу маълумотлар Украина Бош штаби расмий маълумотларига яқин.
Россия ўз талафотлари ҳақида охирги марта 21 сентябрда расман ахборот берган. Ўшанда Шойгу Украинада Россиянинг 5937 нафар ҳарбий хизматчи ўлганини билдирган эди.
Кўмир конлари жойлашган Угледарда қақшатқич жанглар кетмоқда
Украина ва рус қўшинлари Угледарда стратегик устунликни қўлга киритиш учун кураш олиб бормоқда.
Угледар украин тилидан «кўмир инъоми» деган маънони англатади. Шаҳар Донецк вилояти учун курашда муҳим нуқтага айланди.
Шаҳарни эгаллаш иккала томонга ҳам Донбасни эгаллашда тактик устунлик беради.
«Болаларга зирҳли нимчаларни кийдириб кейин ташқарига олиб чиқамиз. Угледарда вазият жуда кескин», дейди ҳарбийлардан бири.
Угледар хавфсизлигини таъминлаш Украинага жануб томон қарши ҳужумларни амалга ошириши учун муҳим.
Қолаверса Угледар Донецк вилоятига яқин ва уни эгаллаш Россиянинг бутун минтақани назорат қилиш мақсадига янада яқинлаштиради.
«Угледарда шиддатли жанглар давом этмоқда. Тинч аҳолининг шаҳарда қолиши жуда хавфли. Одамлар ертўлаларда жон сақламоқда», дейди Донецк вилояти полицияси матбуот хизмати раҳбари Олександра Гаврилко.
Украина армияси мудофаа чизиғини ушлашда давом этар экан, минтақа учун кураш Россия қўшинларига қимматга тушмоқда.
Урушдан олдин 14 000 аҳолига эга Угледарда ҳозир 300 чоғли одам қолган.
Украина ҚК ўтган сутка давомида Украина шрқидаги 11 аҳоли масканида Россия қўшинлари ҳужумларини қайтарди
“Душман асосий кучларини Купянск, Лиман, Бахмут, Авдеевка ва Новопавловск йўналишларидаги ҳужум ҳаракатларига йўналтиришда давом этяпти. Бизнинг қўшинларимиз позицияларига зарбалар беришда оператив-тактик авиация ҳамда армия авиацияси фаол қўлланмоқда”, дейилади Бош штабнинг эрталабки ахборотида.
Қайд этилишича, “ўтган суткада Украина Мудофаа кучлари Луганск вилоятидаги Белогоровкада ва Серебрянск ўрмон хўжалигида, Донецк вилоятининг Торское, Фёдоровка,Бахмут, Иваново, Часов Яр, Первомайск, Победа, Марьинка ҳамда Угледар аҳоли масканлари ҳудудида Россия ҳужумларини қайтарган”.
Хабарга кўра, Мудофаа кучлари авиацияси ўтган суткада Россия бўлинмалари тўпланган нуқталарга 19 та зарба йўллаган, шунингдек зенит-ракета комплекслари позицияларига 2 та зарба берган.
Бундан ташқари, украин ҳарбийлари Су-25 учоғи ва “Орлан” русумли дронни уриб туширишгани айтилмоқда.
Совға қилинган мўйнали пўстинлар қайтариб олинди
“ДХР”да ҳалок бўлган ҳарбийларнинг беваларига пўстин совға қилиб, бу ҳақда пропаганда учун ролик тайёрлашди – аммо кейин бир неча аёлдан пўстинлар олиб қўйилди
Тан олинмаган “ДХР”да Игорь Стрелков (Гиркин)нинг сафдошлари ҳалок бўлган ҳарбийларнинг беваларига почапўстин совға қилинганини эълон қилишди. Бу ҳақда видео суратга олинганидан сўнг эса айрим аёллардан пўстинлар олиб қўйилган.
Стрелковнинг хотини Мирослава Регинская 6 февраль куни ўндан ортиқ аёл кўчада пўстин кўтариб тургани акс этган видеони эълон қилган эди. Роликда аёллардан бири у ерда ҳалок бўлган ҳарбий хизматчиларнинг оилалари йиғилишганини айтиб, “кутилмаган” ёрдам учун миннатдорлик билдиради. Кадр ортидаги эркак эса пўстинлар “Русский актив Москвы” ташкилотидан совға эканини, ташкилот бу аёлларни “ташлаб қўймаслигини” ва “тўққиз йилдан бери ёрдам бериб келаётганини” урғулаган.
“Феминистской антивоенное сопротивление” ташкилоти видеодаги аёллардан бири билан боғланди. Аёл видеоролик суратга олиб бўлингач, ундан ва камида уч дугонасидан пўстинларни олиб қўйишганини тасдиқлади. Аввалига уларга “бу пўстинлар сифати паст экан, сизларга бошқасини берамиз”, дейишган. Аммо кўпдан-кўп қўнғироқлардан сўнг беваларга “биз янглишибмиз, пўстинлар аслида бошқа одамларга аталган экан”, деб жавоб берганлар.
Аёлларга камера қаршисида гапиришлари учун Москвадан қимматбаҳо совғалар келтириб беришни ваъда қилганлар. Ташкилот суҳбатдошига кўра, пропаганда учун олинган видео ва фотолардаги бева аёллар кўпинча сохта бўлади. “Бунақаси тез-тез бўлиб туради, Москвадан ул-бул олиб келишади, биз ҳамиша хурсандмиз”, деган у.
Аммо суҳбатдош видеодаги барча аёллар ҳарбийларнинг бевалари эдими ёки йўқми, деган саволни жавобсиз қолдирган.
Калининградлик аскарлар арзи: “Бизни тайёргарликсиз ҳужумга ташлашмоқда!”
“ВКонтакте” тармоғида ҳарбий кийимли ва аскарча ниқоб тутган бир гуруҳ одамларнинг видеомурожаати ёйинланди. Роликда одамлар ўзларини октябрь ойида Калининград вилоятидан сафарбар қилинган аскарлар деб таништириб, Украинада уларни тайёргарликсиз ҳужумга ташлашаётганидан шикоят қилади.
Видеодаги бир киши уларнинг батальони штурмчи пиёдалар сифатида “ДХР” ихтиёрига берилганини айтади. Унга кўра, сафарбар қилинган аскарлар “штурм учун тайёрланмаган, батальон катта талафотлар кўрмоқда”, “командирлар узоқда, алоқа эса йўқ ҳисоби”.
Видеода Калининград вилояти раҳбарларидан “бирон тайинли чора кўриш” илтимос қилиниб, “бизни том маънода ўлимга йўллашяпти”, дейилган. Бир неча кун олдин, айтишларича, уларни “бир неча кундан бери ишғол этиш имкони бўлмаётган ҳудуд”га “тўп еми” қилибжўнатмоқчи бўлишганида улар бир овоздан бош тортишган, лекин бундан кейин “ўз қарорларида қаттиқ тура олмасликлари мумкин”. Видеода гапирган киши “бизни штурмга ҳал гал бир нечтадан олиб кетишяпти”, дейди.
Аскарларнинг шикоятидан сўнг Калининград маъмурияти Россия Мудофаа вазирлигига мурожаат қилди. Бу ҳақда РИА Новости вилоят маъмуриятининг матбуот хизмати бошлиғи Дмитрий Лисковга таянган ҳолда хабар бермоқда.