“Уларни ўлимга жўнатишяпти”. Россиялик аёллар эрларини фронт олдига ташламасликни илтимос қилишмоқда
Интернетда сафарбар қилинган россиялик аскарларга оид иккита янги видеомурожаат ёйинланди. Аскарлар фронт ортида хизмат қилиш учун тайёрланишган бўлса-да, қўмондонлик уларни олдинги чизиққа ташлаб, “тўп еми” ўрнида қўллаётганидан арз қилганлар.
“Ярим соатдан сўнг олдинги маррага жўнаймиз. Қаергалиги номаълум, бизга ҳеч нимани тушунтиришмаяпти. Штурмчи бўласизлар, дейишди холос, аммо асбоб-анжом билан таъминлашмаган – на аптечка беришган, на тузукроқ зирҳли нимча”, дея зорланади видеодаги аскар.
Ушбу ролик 12 февраль куни ёзилган. Ҳарбийлар уни ижтимоий тармоқларда ёйиш учун қариндошларига юборишга муваффақ бўлганлар. Роликни аскарлардан бирининг хотини – самаралик Мария Сергеева ўзининг “ВКонтакте”даги саҳифасида ёйинлади. Унинг эри октябрда сафарбарлик доирасида аскарликка олинган экан.
“Янги йил байрамидан сўнг уларни махсус ҳарбий амалиёт ҳудудига жўнатишган. Дастлаб уларга комендантлик батальонида хизмат қиласизлар, дейишган экан, лекин кейин қисмни тарқатиб юборишган. Кимлардир чегарадаги 278-штурмчи батальонга тушган, кимлардир 1159-полкка. Бу видео ҳамма аскарларнинг хотинларига борган, биз ҳаракат қилишимиз учун. Уларни олдинги чизиққа жўнатиб қонунга хилоф иш қилишяпти”, дейди Мария Сергеева.
Тан олинмаган “ДХР” ҳудудида сафарбар қилинганлардан штурмчи бригада тузишмоқчи экан, аскарлар бунга қаршилик қилишмоқда.
“Йигитлар бунақа бўлишини кутишмаган. Тўғри, буйруқ ўз номи билан буйруқ. Аммо улар штурмчи сифатида жанг қилиш учун тайёрлашмаганини ва шунчаки тўп еми қилиб жўнатишмоқчи эканини тушуниб туришибди. Олдинги чизиққа ташлашган куниёқ икки киши ўлган. Ярадорлар ҳам бор”, дея давом этади Мария Сергеева.
Аскарлар штурмчи бригадага ўтказилганларидан ташқари, олдинги чизиқда улар етарлича таъминланмаганидан ҳам шикоят қилганлар.
Россия Украинанинг зирҳли техникаларига ҳужум қилди, Украина эса Россия позицияларига ҳаводан зарба берди
Россия сешанба куни сўнгги 24 соат ичида бир неча жабҳадаги ҳужумида Украина қўшинлари ва зирҳли техникалари йўқ қилинганини, Украина эса ҳаво кучлари Россия позицияларига 15 марта зарба берганини маълум қилди.
Россиянинг Купянск, Красний Лиман ва Донецк каби бир неча йўналишдаги ҳужумлари Украина Қуролли Кучларининг ҳарбийлари ва ҳарбий техникасига, жумладан зирҳли машиналар, енгил автомобиллар, гаубицалар ва ракета отиш мосламаларига зарар етказди, деди Россия Мудофаа вазирлиги матбуот котиби Игор Конашенков сешанба куни кундалик брифингда.
Конашенковнинг сўзларига кўра, ўтган кун давомида Россия қирувчи учоқлари Украина ҳарбий-ҳаво кучларининг МиГ-29 учоғи ва Ми-8 вертолётини, Россия ҳаво мудофаа кучлари эса тўртта ҲИМАРС МЛРС снарядларини уриб туширган ва Украинанинг еттита учувчисиз учиш аппаратини зарарсизлантирган.
“Укринформ” агентлиги Украинанинг турли ҳарбий идораларидаги манбаларига таяниб сешанба куни маълум қилишича, сўнгги 24 соат ичида Россия қўшинлари тўққизта вилоят, жумладан, Суми, Запороже ва Донецкни ўққа тутган.
Фақат Бахмут йўналишида бу даврда 37 та тўқнашув бўлган.
Шу билан бирга, Украина ҳарбий-ҳаво кучлари Россия позицияларига 15 марта зарба берди ва битта Су-24М ва битта Су-25 самолётини уриб туширди.
Уруш шароитида томонлар бераётган маълумотларни тезкор текшириш имкони йўқ.
Бахмутдаги вазият оғирлигича қолмоқда
Сешанба куни Брюсселда ўтган “Рамштайн-9” учрашувида Украинага қурол-аслаҳа етказиб бериш масаласидан ташқари фронтдаги вазият ҳам муҳокама қилинди.
АҚШ Штаб бошлиқлари бирлашган қўмитаси раҳбари генерал Марк Миллей бугунги кунда Украина фронтидаги аҳвол энг мураккаб ҳудуд Бахмут эканини айтди.
“Бахмут яқинида вазият жуда оғир. Украин ҳарбийлари ҳужумларни қайтаришда давом этишмоқда. Мен бу урушни тинкақуритар уруш дея таърифлаган бўлар эдим. Нозик ҳарбий ҳаракатлар йўқ. Улар артиллериядан кўп фойдаланишмоқда. Бу қанчага чўзилишини айтиш қийин. Бир ҳафта давом этиши ҳам мумкин, россияликлар захираси тугагунича давом этиши ҳам мумкин”, деди Миллей.
АҚШ президенти маъмурияти вакили Жон Кирби, ўз навбатида, Вашингтонда ўтказилган брифинг чоғида Россия армияси Бахмутни ишғол эта олиши ёки олмаслиги мавҳумлигини, бироқ ишғол этган тақдирда ҳам бу уруш натижасини ҳал этмаслигини урғулади.
Аввалроқ “Вагнер ХҲШ” асосчиси Евгений Пригожин Бахмутдаги украин қўшинлари ҳозирча қуршовга олинмаганини айтар экан, “Бахмут бу яқин кунларда ишғол этилмайди” дея қўшимча қилган эди.
Бугун эса Донецк вилояти ҳарбий маъмурияти раҳбари Павел Кириленко Бахмутда қарийб 5000 нафар тинч аҳоли қолаётганини маълум қилди.
Уларни шаҳардан эвакуация қилиш давом этмоқда. 2021 йил бошида Бахмутда 75 минг киши яшар эди.
Угледар яқинидаги Украина аскарлари «душман олдинга силжий олмаётганини» маълум қилди
Украинанинг 79-ҳаво ҳужуми бригадаси Россия Донецк вилоятидаги фронт чизиғида ютуқларга эришмаганини билдирди.
«Умуман олганда, душман айтарли олға силжий олмаяпти. Фронтдаги бўлинмамиз тўхталадиган бўлсак, душман у ерда умуман олдинга силжигани йўқ. Мудофаа чизиғи бардам туришда давом этади. Душманни Донецк йўналишидаги позициялардан, ундан кейин эса Украинанинг чегараларидан узоқлаштирамиз», дейди украин армияси зобити Богдан.
«Депутат» лақабли ҳарбий Россия артиллерия ҳужумларини кучайтирганини қўшимча қилди:
«Душманнинг артиллерия ва миномётдан ҳужумлари сони ортди. Илгари кунига бир-иккита ҳужум бўларди, энди эса кунига ўндан ортиқ ҳужум қилишмоқда. Улар пиёда аскарлардан кўра кўпроқ артиллерияни ишга солмоқда».
Донецк вилоят губернатори Павло Кириленко Украина миллий телерадиокомпаниясига берган интервьюсида Россия Донецк фронт чизиғидаги барча объектларни артиллериядан ўққа тутганини билдирди.