Камала Ҳаррис: Хитойнинг Россия билан муносабатлари «хавотир»ли даражада чуқурлашмоқда
АҚШ вице-президенти Камала Харрис Россия Украинага бостириб кирганидан кейин Хитой-Россия билан муносабатларини чуқурлаштирганидан хавотирда эканлигини билдирди.
У Хитойнинг Россияни қўллаб-қувватлаши қоидаларга асосланган халқаро тартибни бузишини таъкидлади:
«Биз уруш бошланганидан бери Пекин Москва билан муносабатларини кучайтирганидан хавотирдамиз. Хитойнинг Россияга ёрдам кўрсатишга қаратилган ҳар қандай қадами фақатгина тажовуз ва қотилликни рағбатлантиради».
Мюнхен Хавфсизлик конференциясидаги нутқида у океан ортидан Украинага ёрдам давом этишини таъкидлади.
«Орадан бир йил ўтди, Киев букилмасдан, ҳали ҳам тик турибди. Россия эса заифлашди. Трансатлантик иттифоқ ҳозир ҳар қачонгидан ҳам кучлироқ. Россиянинг Украинадаги ҳаракатларига келсак, биз далилларни ўрганиб чиқдик. Ҳуқуқий тамойиллар нималигини биламиз. Россиянинг ҳаракатлари инсониятга қарши жиноятлар эканига шубҳа йўқ», - дея қўшимча қилди у.
Риши Сунак: Британия Украинага қирувчи самолётлар юборишни қўллаб-қувватлайди
Буюк Британия бош вазири Риши Сунак агар иттифоқчилар Украинага қирувчи самолётлар юборишга қарор қилса, уларни қўллаб-қувватлашини билдирди.
Сунак Мюнхен Хавфсизлик конференцияси арафасида берган интервьюсида Украина уруши «муҳим» паллага кирганини айтди:
«Барча иттифоқчиларга агар улар Украинани қирувчи самолётлар билан таъминлай олишса, биз уларни қўллаб-қувватлашга тайёрлигимизни айтдим. Ўзимизга тўхталсак, биз украиналик учувчиларни биринчилардан бўлиб НАТО стандартидаги самолётларни бошқаришга ўқитамиз».
Сунак ҳам Британиянинг собиқ бош вазирлари Борис Жонсон ва Лиз Трусс сингари Украинани қурол-яроғ етказиб бериш ва қўшинларни тайёрлаш билан дастаклашда қатъийлигини билдириб келмоқда.
Риши Сунак қирувчи самолётларни юборишни рад этган бироқ у Британия бошқа йўллар билан ёрдам бериши мумкинлигини айтди.
У Бирлашган Қироллик биринчилардан бўлиб "украиналик учувчиларни НАТО стандартидаги самолётларни бошқаришга ўқитади, деб айтди.
Полша Украинага МиГ самолётларини беришга тайёр, бироқ бунинг учун АҚШ бошчилигида коалиция тузилиши керак. Бу ҳақида Полша бош вазири Матеуш Мораветски таъкидлади.
Россия ҳужумларига қарамай, Украинанинг аксарият қисмида электр таъминоти мавжуд- Зеленский
Владимир Зеленский таъмирлаш бригадалари томонидан бажарилган ишларни мақтаб, Россиянинг бир қатор йирик ҳужумларига қарамай, Украинанинг аксарият қисми энергия таъминотига эгалигини билдирди:
"Украина ҳудудининг катта қисми энергия билан таъминланган. Бу бизнинг матонатимиз, Украинанинг қудрати, кўпчилик бўлиб амалга оширилган ва оширилаётган улкан ишларимизнинг яна бир тасдиғидир. Ҳамма энергияни тиклаш ва ҳимоя қилиш учун биргаликда меҳнат қилмоқда”.
Одессада илгариги ҳужумлар натижасида зарар кўрган энергетика объектларини ҳимоя қилиш учун мақсадли узилишлар бўлиб турибди.
Ж.Боррел: Зеленскийга камроқ қарсак ва кўпроқ қурол керак!
Европа Иттифоқи ташқи сиёсат бўйича масъул Жозеп Боррел 19-феврал, якшанба куни Ғарб Украинага кўпроқ ҳарбий ёрдам кўрсатиши ва етказиб беришни тезлаштириши кераклигини айтди
“Зеленский ва украиналикларга олқиш кўпу, аммо кам ўқ-дори кам. Бу парадокс. Уларни камроқ олқишлаш, лекин яхши қуроллантириш керак. Украиналиклар курашмоқда, ўз жонлари билан энг юқори нархни тўлаяпти, аммо бу уруш Европа заминида бўлиб ўтмоқда, бизга таъсир қилади ва бутун дунё бўйлаб глобал оқибатларга олиб келади, бу бизнинг хавфсизлигимизга ҳам таъсир қилади”, — деди Боррел Мюнхен хавфсизлик конференциясидаги нутқида.
Бахмутда жанг қилаётган украиналик ҳарбийлар шаҳарни ушлаб туриш учун Ғарбдан қуроллар келишини кутаётганини билдирди.
«Умид қиламизки, эртами-кечми европалик ҳамкорларимиздан ҳарбий ёрдам етиб келади. Қарши ҳужумга ўтиш учун бу ёрдамни кутяпмиз», деди Деревянко исмли ҳарбий.
Россиянинг ҳозирда бор кучи билан Бахмут эгаллашга уринмоқда. Урушдан олдин 70 000 га яқин аҳолиси бўлган шаҳар ҳозир вайронага айланиб, ҳувиллаб қолган.
"Бу урушда менда ҳеч қандай ҳис-туйғу йўқ. Мен буни ўз ишим деб биламан. Мен учун ўқ отиш посилка юбориш дегандай гап. Ҳеч қандай ҳаяжон йўқ", дейди украиналик мерган.
Исмини ошкор қилмаган украиналик мерган «Бахмут Украинадаги уруш кетаётган ҳудудлар орасида энг мураккаби» эканлигини айтади.
Бахмутни қўлга киритиш Россияга икки йирик шаҳар Краматорск ва Славянск сари йўл очади. Аммо Украина ва унинг иттифоқчилари вақт ва йўқотишлар ҳисобга олинса, бу Россия учун мағлубиятга тенг ғалаба бўлишини айтган.