Байден: "Биз ёнингизда қанча керак бўлса, шунча турамиз!"
АҚШ президенти Жо Байден Киевга ташрифи чоғида ўтказилган матбуот анжуманида Украинага оид муҳим баёнотлар берди:
"Биз Украинани дастаклаш учун дунёнинг барча илғор иқтисодиётларини, барча иттифоқчиларимизни жипслаштирдик. Мамлакатга замбараклар, ўқ-дори, машиналар, ҲҲМ воситалари ва янги HIMARS тизимларини етказиб бермоқдамиз".
"Ушбу ҳафтада Россия элитасига ҳамда уруш олиб боришда Россияга кўмаклашаётган ширкатларга қарши янги санкцияларни эълон қиламиз".
"Россия Украинани харитадан ўчириб ташламоқчи эди, аммо унинг режаси барбод бўлди, улар босиб олинган ҳудудларнинг ярмини бой бериб бўлишган, ёш ва истеъдодли россияликлар мамлакатдан қочиб кетишмоқда, чунки улар ватанларида истиқболдан умид йўқлигини билишади. Россия иқтисодиётининг аҳволи тобора ёмонлашмоқда, у орқада қараб кетяпти".
"Путин Украинани ожиз, бизнинг иттифоқчиларни эса тарқоқ деб хаёл қилди".
"Украина иқтисодиёти оғир шикаст олди, лекин мамлакатга бюджет ёрдами тариқасида “миллиардлар” тақдим этилади".
"Сиз (Зеленский) ва барча украинлар менга жасорат нималигини, озодликнинг қадрини ҳар куни эслатиб турасиз. Биз ёнингизда қанча керак бўлса, шунча турамиз».
Россия қўшинлари босиб олган ҳудудда окоп қазган тожик мигрантлари ваъда қилинган иш ҳақи тўланмагани учун Россия полициясига шикоят қилди
Бу ҳақда, Аминжон исмли мигрантга таянган ҳолда Baza телеграм-канали хабар бермоқда.
Аминжонга кўра, иш таклиф қилган кишилар ҳар битта окоп учун 800 минг рублдан пул тўлашга ваъда берганлар. Бу бир ой муқаддам бўлган, Аминжон ҳамда Ўзбекистон ва Тожикистон фуқароларидан иборат 32 киши автобусда Запорожье вилоятига борганлар.
Мигрантлар ташландиқ уйларга ўрнашишган. Окопларни тракторлар ёрдамида қазиб, ёғоч тўсинлар билан мустаҳкамлашган.
Аминжон бир ўзи иккита окоп қазган, аммо ишга ёллаган Сергей исмли шахс унга ваъда қилинган 800 минг ўрнига 595 минг рубль тўлаган.
Аминжон билан бирга ишлаган мигрантлардан айримлари Москвага қайта олишмаган, улардан бири қўл панжаларидан айрилган, яна бирининг кўричаги ёрилиб кетган, бироқ уларга ҳеч қандай тиббий ёрдам кўрсатилмаган, деб ёзади телеграм-канал.
Аминжон ва тожикистонлик яна уч мигрант полицияга ариза ёзади. Улар Сергей Евгеньевичга оид маълумотларни эслай олишмайди, чунки бирон қоғозга ёки шартнома қўл қўйишмаган эди.
Шикоятдан сўнг бегона рақамлардан таҳдидли қўнғироқлар бўла бошлайди: Baza суҳбатдошига кўра, нотаниш одамлар улардан аризани қайтариб олишни талаб қиларкан, “акс ҳолда сенларни топиб, ўлдириб юборамиз”, деб қўрқитишади.
Украинанинг босиб олинган ҳудудларига ишга йўлланган мигрантлар алданиб қолишганидан биринчи марта шикоят қилишаётгани йўқ.
Декабрь бошларида Россия босиб олган Мариуполни тиклашга борган тожик мигрантлари иш берувчилар уларни алдаб, ваъда қилинган ойликнинг ярмини тўлашганини билдирган эди.
Тожикистоннинг Россиядаги элчихонаси эса Озодлик радиоси билан суҳбатда тожикистонлик мигрантлар Мариуполни тиклаш ишларига жўнатилаётгани хусусида Россия ҳукуматидан расмий хабарнома олмаганини айтган. Бундан олдин элчихона Тожикистон фуқароларидан Украинанинг хавфли ҳудудларига боришдан тийилишни сўраган эди.
АҚШ ва Евроиттифоқ Россияга қарши янги санкциялар жорий қилади
Россия Украина ҳудудига бостириб кирганига бир йил тўлиши арафасида АҚШ президенти Жо Байден янги санкциялар киритишни режаламоқда. Бу ҳақда Bloomberg ўз манбаларига таяниб, хабар берган.
Айтилишича, бу гал Россия мудофаа саноати, энергетика сектори, молиявий муассасалари, шунингдек жисмоний шахсларига нисбатан чекловлар жорий этилади.
АҚШ ва бошқа мамлакатлар Россияга қарши янги санкциялар параметрларини муҳокама қилаётгани ҳақида аввалроқ АҚШ давлат котиби ўринбосари Виктория Нуланд баёнот берган эди.
Мулозимага кўра, янги санкциялар туркумига юқори технологик жиҳозлар етказиб беришга доир чекловлар ҳам киритилиши мумкин.
Бу орада Европа Иттифоқи ҳам Россиянинг Украинага қарши уруш бошлаганига бир йил тўлган кунларда кучга киритилажак янги санкциялардан дарак берди.
Еврокомиссия раиси Урсула фон дер Ляйенга кўра, ЕИнинг ўнинчи санкциялар туркуми доирасида ҳарбийлар томонидан қўлланиши мумкин бўлган саноат моллари (электроника, юк машиналари ва енгил автомобиллар эҳтиёт қисмлари) ҳамда қурилиш товарларини Россияга экспорт қилиш тақиқланади.
Бундан ташқари, дронлар, ракета ва вертолётлар ишлаб чиқаришда қўлланиши мумкин бўлган 47 номдаги электрон компонентларни сотишга чеклов ўрнатилиши мумкин.
Рамзан Қодиров: Бир кун келиб мен ҳам шахсий ҳарбий компаниям бўлишини режалаштирганман
Чеченистон раҳбари, Владимир Путиннинг яқин иттифоқчиси Рамзан Қодиров Евгений Пригожиннинг «Вагнер» ёлланма гуруҳига ўхшаш ўз шахсий ҳарбий компаниясини ташкил қилишни режалаштиргани ҳақида гапирди.
Ғарб таҳлилчилари Вагнер ва шунга ўхшаш ҳарбий компаниялар Россиядаги барқарорликка таҳдид солиши мумкинлигини билдирган.
Қодиров Телеграмъдаги каналида Вагнер Украинада «сезиларли натижалар»га эришгани ва хусусий ҳарбий компаниялар зарурат экани ҳақида ёзди.
«Ишонч билан айтишимиз мумкинки, Вагнер ҳарбий жиҳатдан ўз маҳоратини кўрсатди ва бундай хусусий ҳарбий компанияларга эҳтиёж борми ёки йўқми, деган мунозараларга ўрин қолдирмади», дея ёзган Рамзан Қодиров.
У шунингдек, «Давлат олдидаги хизматим тугагач, Евгений Пригожин билан рақобатлашишни ва хусусий ҳарбий компания тузишни жиддий режалаштирганман. Ўйлайманки, ҳаммаси яхши бўлади», дея таъкидлаган.
Қодиров ва Пригожин Украинадаги кучларини асосан Россия ҳарбий қўмондонлигидан мустақил равишда бошқаради. Улар иккаласи ҳам Путиннинг содиқ иттифоқчилар бўлсада, жамоатчилик олдида ҳарбий раҳбариятни танқид қилиб туради.
Вагнер гуруҳи Россиянинг Украинадаги урушида тобора кўпроқ тилга олинмоқда. Вагнер гуруҳи Бахмут шаҳрига бир неча ойдан бери давом этаётган ҳужумга бошчилик қилмоқда.