Путин: Ғарб «ҳукмронлик» илинжида можаро бошлади
Россия президенти Владимир Путин Украинадаги можаро бошланишида Ғарбни айблаб, АҚШ бошчилигидаги Ғарб давлатлари дунёга «ҳукмронлик»қилишга интилаётганини айтди:
«Яна шуни айтмоқчиман: урушни айнан улар(Ғарб) бошлади. Биз уни тўхтатиш учун ўз кучимизни ишга соляпмиз. Донетск, Донбас ва Луганскка қарши янги ҳужумни режалаштириб, эндиликда Қрим ва Севастополга ҳужум қилишни ҳам аниқ мақсад қилишяпти. Биз буни кўриб билиб турибмиз. Улар ўзларининг бу мақсадларини Киевдан туриб баралла эълон қилишмоқда. Шундоғам бизга маълум нарсаларни энди очиқ айтишяпти. Биз ватанимизни, халқимизни ҳимоя қиламиз. Ғарбнинг мақсади эса чексиз ҳукмронликка эришиш».
У Ғарбнинг Россия иқтисодиётини санкциялар орқали издан чиқаришга уринишлари бесамар бўлаётганини айтиб, Ғарб миллиардлаб долларни йўқотаётгани, Россиянинг даромади эса тўхтаб қолмаганини таъкидлади.
Россия махсус ҳарбий операция тадбири баҳонасида 2022 йилнинг 24 февраль куни Украинага бостириб кирган эди.
Россия бир йил давомида Украинага минглаб ракета ва бомба ёғдирди, икки томондан ўн минглаб одам ҳалок бўлди, юз минглаб аҳоли уйи вайрон бўлди, энергетика тизими ишдан чиқарилгани сабаб миллионлаб украиналик электр, иситиш ва сув таъминотисиз қолди. Миллионлаб аҳоли қочқинга айланди.
Путин Федерация кенгашига мурожаатини бошлади
Россия президенти Владимир Путин Кремлда Федерация кенгашига мурожаатини бошлади. Украинага урушнинг бир йиллиги арафасида Путин ўз урушини Ғарбга қарши кураш сифатида тақдим қилиши кутилади.
Путиннинг мурожаати арафасида АҚШ президенти Жо Байден Киевга олдиндан эълон қилинмаган ташриф билан борди.
20 февраль куни президент Зеленский билан учрашган Байден Украинага яна ярим миллиард долларлик ҳарбий ёрдамни эълон қилди. Президент Байден Путиннинг мақсади "Украинани дунё харитасидан ўчириш" бўлгани, аммо унинг "режаси барбод бўлаётгани"ни айтди.
Кремль Байденнинг Киевга ташрифини шарҳламади.
Айни пайтда президент Байден Польшага етиб борган. У Россиянинг Украинага уруши бошланганининг бир йиллигига бағишланган нутқ билан чиқиши кутилмоқда.
Бахмут Донецкни тўлиқ эгаллашда муҳим шаҳар
Рус қўшинлари Украинага босқиннинг бир йиллиги арафасида Бахмутни нишонга олишда давом этмоқда.
Шиддатли жанглар натижасида шаҳар вайронага айланган. Кеча ҳам Бахмутда портлаш овозлари тинмади.
Россия бир неча ойдирки Донбаснинг шарқий саноат маркази бўлмиш Бахмутни эгаллашга ҳаракат қилиб келмоқда.
Бутун Донбас ҳудудини қўлга киритиш билан билан бир қаторда, Москва Украина қўшинларини тор-мор этиш ва қарши ҳужумга ўтишга йўл қўймасликни мақсад қилган.
Бахмут ҳимояси Украина учун Россия агрессиясига қаршилик рамзига айланиб улгурди. Шу билан бир қаторда бу Россиянинг энг илғор кучларини бартараф қилиш ҳамда келгуси қарши ҳужумлар учун ҳам имкон беради.
Байден ва Зеленский урушда ҳалок бўлган украиналик аскарлар хотирасини ёд этди
АҚШ президенти Жо Байден ва Украина президенти Владимир Зеленский Киевдаги украин аскарлари хотира ёдгорлигига ташриф буюрди
Киевдаги Хотира деворида 2014 йилда Россия Қримни босиб олганидан кейин ҳалок бўлган минглаб аскарларнинг суратлари акс этган.
Байден ва Зеленский Михайливиска майдонини кўздан кечираётган пайтда ҳаво тревогаси янгради.
Икки давлат раҳбарлари ҳалок бўлганлар хотирасига ҳурмат бажо келтирди. Президентлар хотира майдонига АҚШ ва Украина байроғи рангларидаги гулчамбарлар қўйди.