АҚШ сенатори Россия ва Хитой таҳдидларига қарши мудофаа харажатларини оширишга чақирди
АҚШ Сенатидаги республикачилар етакчиси Митч МакКоннел Конгрессни Россия ва Хитойдан келаётган таҳдидларга қарши туриш учун келгуси йилда мудофаа харажатларини оширишга чақирди.
“Мудофаа бюджети таҳдиднинг табиатини акс эттириши керак. Бизда нафақат Россия балки Хитой ҳам бор. Ўйлайманки, бу муҳитда биз мудофаани кучайтиришни давом эттиришимиз керак”, деди МакКоннел.
МакКоннелл ўз чиқишида НАТОнинг бошқа давлатлари ҳам мудофаага эътиборни кучайтириши кераклигини қўшимча қилди.
Унинг бу сўзлари 2024 молия йилида мудофаа харажатларини жорий йилдаги даражада ушлаб туриш таклифларини кўриб чиқаётган АҚШ Вакиллар палатасида келишмовчиликка олиб келиши мумкин.
АҚШ Сенати 2023-молия йили учун рекорд даражада — 858 миллиард долларлик мудофаа бюджети лойиҳасини маъқуллаган.
Лойиҳа, хусусан, Россияни Европада «тийиб туриш» учун 6 миллиард доллар ажратиш, Украинага ёрдам бериш учун қўшимча 800 миллион доллар ажратиш, АҚШнинг Россия билан ҳарбий соҳада ҳамкорлигини тақиқлаш муддатини беш йилга узайтириш, шунингдек, Россияни халқаро ташкилотлар, шу жумладан G20 аъзолигидан чиқариб ташлашни талаб қилувчи буйруқларни ўз ичига олади.
Маълумот учун, 2022 йилда АҚШ мудофаа бюджети 770 миллиард долларни, 2021 йилда 740,5 миллиард долларни, 2020 йилда 740 миллиард долларни, 2019 йилда 738 миллиард долларни ташкил этган.
Блинкен Тошкентда: Россия ва Хитой ташқи ишлар вазирлари билан учрашиш ниятим йўқ
АҚШ Давлат котиби Энтони Блинкен 1 март куни Тошкентда журналистлар билан учрашар жкан Деҳлида бўлиб ўтадиган Катта йигирматалик йиғилишида Россия ва Хитой ташқи ишлар вазирлари билан учрашиш ниятида эмаслигини айтди.
Блинкен Қозоғистон ва Ўзбекистон бўйлаб қисқа сафари ортидан 1 март куни G20 йиғилишида қатнашиш учун Ҳиндистон пойтахтига боради, бу ерда Москванинг Украинага тажоввузи муҳокамаларнинг муҳим қисми бўлади.
Учрашувда Россия ташқи ишлар вазири Сергей Лавров ва Хитой ташқи ишлар вазири Цин Ганг иштирок этмоқда.
“Катта йигирматалик учрашувида Хитой ёки Россия ташқи ишлар вазирларини кўриш ниятим йўқ, у ёки бу турдаги гуруҳ йиғилишларида ҳам улар билан кўришаман деб ўйламайман”, деди Блинкен Ўзбекистон пойтахтида журналистларга.
Чоршанба куни Блинкен, шунингдек, июл ойидаги тартибсизликлар чоғида Ўзбекистон ҳуқуқ-тартибот идоралари томонидан инсон ҳуқуқлари бузилгани ҳақидаги даъволарни тўлиқ ва ошкора текшириш муҳимлигини айтди.
Блинкен Ўзбекистонга ташрифи чоғида бу ҳақда Қорақалпоғистон вилояти мухториятини чеклаш режалари туфайли 21 киши ҳалок бўлганидан саккиз ой ўтиб гапирди.
“Мамлакатларимиз ўртасидаги шериклик алоқалари тарихи Ўзбекистон мустақилликка эришган илк даврга бориб тақалади. Сўнгги йилларда у янада кучайди.
Ўзбекистонда 2022 йил июль ойидаги тартибсизликлар чоғида ҳуқуқ-тартибот идоралари ходимлари томонидан содир этилган инсон ҳуқуқлари бузилиши ҳақидаги даъволарни тўлиқ ва ошкора текшириш ва айбдорларни жавобгарликка тортиш муҳимлигини алоҳида таъкидлайман", - деди Блинкен.
Россия фаластинликларни урушга ёлламоқда
Россия Украинага қарши давом этаётган урушда қатнашиш учун фаластинлик ёшларни ёлламоқда. Бу ҳақда Ливан разведка хизматларидаги манбага таяниб, The Media Line нашри хабар бермоқда.
Нашр суҳбатдошига кўра, фаластинликлар Россиянинг айрим ташкилотларидан 350 доллар олади. Ишга ёллаш Фаластин маъмуриятининг Ливандаги элчихонасига алоқадор шахслар томонидан амалга оширилади.
Бундан ташқари, ёллашда Ливаннинг “Ҳизбуллоҳ” радикал гуруҳи ҳам иштирок этмоқда, деб ёзади газета. Бу дронларни қандай бошқаришни биладиган ва шаҳарларда партизанлар урушида тажрибага эга бўлган фаластинликларни топишга ёрдам беради.
The Media Line нашрининг ёзишича, Россия фаластинликларни уруш жабҳасининг олд чизиғига жўнатмоқда. Газетанинг таъкидлашича, жами 300 га яқин фаластинлик тезкор тайёргарликдан сўнг фронтга жўнатилган. Яна 100 нафар фаластинлик урушга жўнатилишга тайёрланмоқда.
Путинга шикоят қилган рус аскарлари қайтадан олд жабҳага жўнатилган
Россия президентига олд жабҳадаги ҳужум бўлинмаларидан мудофаа бўлинмасига ўтказишни сўраб уч марта мурожаат қилган иркутсклик сафарбар жангчилар Донецк вилоятининг Авдиивка шаҳри яқинида қайтадан ҳужум бўлинмасига жўнатилган. Бу ҳақда “Сибир. Реалии” ҳарбий хизматчиларнинг яқинлари ва “Народ Байкала” нашрига таяниб хабар бермоқда.
Февраль ойининг бошида 1439-полкдан сафарбар қилинганлар Россия ҳукумати ва Владимир Путинга видеомурожаат қилган. Ҳарбий хизматчиларнинг сўзларига кўра, улар ноқонуний равишда, ҳужум бўлинмаларига юборилиш учун “ДХР” деб номланган қўмондонликка ўтказилган.
26 февралда, ҳарбий хизматчиларнинг иккинчи видеоси пайдо бўлган куннинг эртасига Иркутск вилояти губернатори Игор Кобзев ҳарбий прокуратурадан бу ҳақда тушунтириш сўрагани ва яқин кунларда сафарбар қилинганлар мудофаага ўтказилишига ваъда берганини айтди.
Куни кеча худди шундай видеомурожаат ҳарбий прокуратура ва Россия Мудофаа вазирлигига Тюмен вилоятидан сафарбар қилинганлар томонидан юборилган эди. Улар фронтга тайёргарликсиз жўнатилганидан шикоят қилишган.
Мобиллаштирилган руслар ёмон хизмат шароитлари, ўқ-дорилар этишмаслиги ва қўмондонлик томонидан зўравонлик ҳақида бир неча бор шикоят қилишди.
Улардан баъзилари Украинадаги жангларни давом эттиришдан бош тортган.
Аввалроқ Би-би-си рус хизмати сўнгги уч ой ичида ҳалок бўлганларнинг аксарияти сафарбар қилинганлар, кўнгиллилар ва маҳбуслар эканини хабар қилган эди. Умуман олганда, уруш бошланганидан бери журналистлар 15 мингдан ортиқ русларнинг ўлимини тасдиқлашга муваффақ бўлишди, уларнинг мингдан ортиғи сафарбар қилинганлардир.