Украина биринчи хоними Елена Зеленская мамлакатда жинсий зўравонлик билан боғлиқ 171 ҳолат тергов қилинаётганини билдирди
Украина биринчи хоними Елена Зеленская Лвовда Европа Иттифоқи парламенти президенти ва Латвия биринчи хоними билан жинсий зўравонлик ва уруш жиноятларига бағишланган панель муҳокамасида қатнашди.
Зеленская Украина прокуратураси Украинада рус қўшинлари томонидан содир этилган жинсий зўравонлик билан боғлиқ 171 та ҳолат бўйича тергов олиб бораётганини маълум қилди:
"Бу рақам фақат аёллар билан чекланмайди, жабрланганлар орасида 39 эркак ва 13 нафар вояга етмаган бола ҳам бор. Биз бу ҳолатлар ҳақида жабрланганларнинг ўзидан билдик. Улар гапиришга куч топа олгани учун ҳам раҳмат. Ҳали билмаганларимиз қанчалигини билмаймиз”.
Европарламент президенти Роберта Мецола Украина урушда ғалаба қозонганидан кейин ҳарбий жиноятлар содир этганлар жазоланишига умид билдирди.
«Жасур украиналикларга нисбатан қилган ваҳшийликлари учун барча айбдорлар жавоб беради», деди Мецола.
Украина Россия ва унинг раҳбариятини уруш жиноятлари бўйича халқаро трибуналга тортиш йўлида халқаро ҳамкорларни бирлаштиришни мақсад қилган «Адолат учун бирлашганлар» конференциясига мезбонлик қилмоқда.
Украина аскари дрон ёрдамида рус дронини уриб туширди
Украина жануби-шарқидаги Угледар яқинида украин аскари ўз дрони билан Россия дронини қандай уриб туширганини сўзлаб берди.
Ўзини Данило деб таништирган ҳарбий хизматчи Угледар яқинида дрон ёрдамида доимий разведкани амалга оширади.
«21-асрда разведка мана шундай амалга оширилмоқда. 2014 йилдаги каби разведка гуруҳини душман олдига юбориш шарт эмас. Разведка учун энди шунчаки дронни ишга туширамиз, унинг оператори ҳам хавфсиз бўлади», деди Данило.
Данилонинг бўлинмаси дрон жанг майдонида рус дронини қулатгани акс этган видео билан бўлишди.
Рейтерс агентлиги кадрлар ҳаққонийлиги ва унинг санасини аниқлай олмади.
Баҳорда Угледар фронт чизиғида вазият қандай тус олиши мумкинлиги ҳақидаги саволга Данило ҳар икки томонда ҳам кўпроқ дронларни қўлланиши мумкинлигини айтди:
«Баҳорда об-ҳаво яхши бўлади. Бу дронлар учун каттароқ ҳудудни кузатишга имкон беради. Шундай экан, баҳорда дронлардан фойдаланиш ортади».
Украина ва Россия кучлари уруш давомида разведка ва душман нишонларига зарба беришда дронлардан кенг фойдаланиб келмоқда.
Россия мудофаа вазири Украинадаги рус ҳарбий қўмондонлари билан учрашди
Россия мудофаа вазири Сергей Шойгу кеча Бош штаб бошлиғи Валерий Герасимов ва унинг ўринбосари генерал Сергей Суровикин билан учрашди.
Учрашувда қўшинларни қурол-яроғ, ҳарбий техника ва ўқ-дорилар билан таъминлаш масалалари, шунингдек, захира бўлинмаларининг жанговар тайёргарлиги масаласи муҳокама қилинди, дейилади Россия Мудофаа вазирлиги берган баёнотда.
«Биз сиздан мамлакатимиз учун жуда зарур бўлган янги ғалабалар ва янги ютуқларни кутамиз», деди Шойгу.
Сергей Шойгу Украинада жойлашган Россия қўшинлари базасига камдан-кам ташриф буюради. У мазкур ташриф мобайнида ҳарбий хизматчиларни медаллар билан тақдирлади, юқори лавозимли қўмондонлар билан учрашди.
Трамп «Россия ва Украина ўртасидаги қирғинбарот урушни» тугатиши мумкинлигини айтди
Кеча Вашингтонда Республикачилар партиясининг йиллик йиғилишида мурожаат қилган Трамп ўзини «Учинчи жаҳон уруши»ни олдини оладиган ягона номзод деб атади:
«Мен бугун шу ердаман ва бу миссияни қила оладиган ягона номзодман. Учинчи жаҳон урушини жуда осонлик билан олдини оламан. Дунё яна бир жаҳон урушига қараб кетяпти. Агар тезроқ ўзгаришлар қилинмаса, биз Учинчи жаҳон урушини кўрамиз».
Трампга кўра, унинг Путин билан муносабатлари яхши ва Россия президенти унга қулоқ солади. «Бу учун бир кундан кўп вақт кетмайди», деди Трамп.
Трампнинг мазкур мурожаатини унинг тарафдорларидан бошқалар ҳам қўллайдими ёки йўқ бу савол остида.
Сўровномалар шуни кўрсатдики, республикачилардан кўпчилик сайловда ғалаба қозониш учун Флорида губернатори Рон ДеСантис каби номзод бўлиши керак деб ҳисобламоқда.