Шойгу: Бахмутни эгаллаш кейинги ҳужумларга имкон беради
Россия мудофаа вазири Сергей Шойгу Бахмутни эгаллаш Москва қўшинларига кейинги ҳужум операцияларини ўтказишга имкон беришини айтди.
Россия кучлари ўтган ёздан бери кичик шаҳар Бахмут устидан назоратни қўлга киритиш учун бир неча ойдирки жанг олиб бормоқда.
Шойгу, шунингдек, Ғарбнинг Украинага ҳарбий ёрдамни ошириши жанг майдонидаги вазиятни ўзгартирмаслигига қатъий ишонч билдирди.
«Артёмовскни озод қилиш давом этмоқда. Шаҳар Донбасдаги Украина қўшинлари учун муҳим марказ ҳисобланади. Уни назоратга олиш кейинги ҳужум ҳаракатларида, жумладан Украина мудофаа чизиғига чуқур кириб бориш имконини беради», - деди Шойгу.
Россия Донецк ва Луганскни ўз ичига олувчи Донбасс минтақасини ўз ҳудуди дея даъво қилади.
Украина қўшинлари Бахмутда «мудофаани ушлаб турибди»
Бахмут яқинида жанг қилаётган Украина ҳарбий бригадаси вакили украин кучлари шаҳарни ҳимоя қилишда давом этаётганини таъкидлади.
Никита Шандиба ўз интервьюсида рус қўшинлари ҳужумларни кучайтирганини маълум қилди.
"Душман бизнинг позицияларимизни эгаллашга ҳаракат қилиб, кичик гуруҳларда ҳужум уюштирмоқда. Аммо сўнгги бир неча кун ичида улар кўпчилик бўлиб ҳужум қиляпти. Ўттиз кишидан иборат бўлинма мудофаа чизиғимизни ёриб ўтишга ҳаракат қилди, аммо муваффақиятсизликка учради”, деди у.
Украина қўшинлари Бахмут ғарбидаги позицияларини мустаҳкамлаш учун чекинишга тайёрланётгандек, аммо ҳозирча шаҳардан чиқиб кетмоқчи эмас.
Бахмут Россия ҳужумларига қарамай ҳамон тик турибди, дейди украиналик чегарачи:
"Бу биринчи чегара қисми. Шаҳардаги вазият оғир. Душман бизнинг позицияларимизга бостириб кирмоқда, аммо муваффақият қозонмаяпти ва катта йўқотишларга дучор бўлмоқда. Иккита кўприкни портлатиб юборишгани ҳам уларга фойда бермади. Бизга керакли бўлган ҳамма нарсани оляпмиз. Шаҳар тик турибди, чунки Бахмут Украина бўлган ва шундай бўлиб қолади! Алоқада бўламиз!”.
Рейтерс видеода кўрсатилган, ҳудуднинг фотосуратига мос келадиган белги ва бинодан жойлашувни текширишга муваффақ бўлди. Рейтерс агентлиги видео олинган санани тасдиқлай олмади.
Москва Бахмутни қўлга киритиш Донбас ҳудудини тўлиқ эгаллаш учун зарурлигини айтади.
Киевга кўра, Россиянинг Бахмут учун жанглардаги улкан йўқотишлари ҳал қилувчи жанглар олдидан урушнинг келгуси йўналишини белгилаб бериши мумкин.
Зеленский: қўмондонлар Бахмутни ҳимоя қилишга ваъда берди
Украина президенти Владимир Зеленский Бахмут борасида кейинги қадамлар қандай бўлиши ҳақидаги саволга украин ҳарбий қўмондонлари шаҳарни ҳимоя қилишда давом этишга ваъда берганини билдирди.
«Иккала генерал ҳам чекинишни эмас, балки мудофаамизни кучайтиришни таклиф қилди», деди Зеленский ўзининг тунги мурожаатида.
Зеленский ўз мурожаати давомида украиналик ҳарбий асирнинг отиб ўлдирилгани акс этган видеога ҳам тўхталди:
“Бугун босқинчилар олдида «Украинага шон-шарафлар!» деб айтган аскар шафқатсизларча ўлдирилгани акс этган видео тарқалди. Унинг сўнгги ҳайқириғига барчамиз бирдамлик билан жавоб беришимизни истайман: Қаҳрамонга шон-шарафлар! Қаҳрамонларга шон-шарафлар! Қотилларни эса албатта топамиз”
Украина бош прокурори воқеа юзасидан жиноий иш қўзғатилганини билдирди.
Россия ҳарбийлари украин асирини намойишкорона отиб ташлади
Душанба куни Украина ва Россия телеграм каналларида Украина қуролли кучлари кийимида бўлган ҳарбий асирнинг автоматдан отиб ташлангани видеоси тарқалди.
Видеода ўрмонда гўрга ўхшаган қазилган чуқур ичида 40 ёшлар чамасидаги эркакнинг сигарет чекиб тургани кўринади. Видео олаётган одам, «олишни бошладим», дейди.
Видеочи, эҳтимол, бу ҳарбийдан «илтимос отманглар, кечиринглар» деган гапни кутгандир.
Лекин бу пайт чуқурдаги одам тамакини чуқур тортар экан, видео олаётган шахсга тик қараб, «Слава Украине!», яъни «Украинага шон-шарафлар!» дейди.
Шу пайт икки томондан автоматлардан тариллатиб унга қаратиб ўт очилади ва у қулайди.
Олинган маълумотларга кўра, россияликлар ҳарбий жиноят содир этиб, украиналик ҳарбий асирни отиб ташлаган.
Россия ҳарбийлари отиб ўлдирган украин аскарини унинг хизматдошлари ва синглиси таниди. У княз Константин Острожский номидаги 30-алоҳида механизациялашган бригадада хизмат қилган Тимофей Шадура эканлиги тасдиқланди.
Бригада маълумотларига кўра, 41 ёшли Шадура Бахмут ҳудудидаги жангларда 2023-йил 3-февралдан бери бедарак йўқолган.
Аввалроқ украиналик журналист София Кочмар-Тимошенко Шадуранинг синглисининг сўзларидан иқтибос келтирган эди: "Юз фоиз менинг акам. Бу унинг кўзлари, овози ва сигарет чекиши ўзи".
Украина бош прокурори Андрей Костин ижтимоий тармоқларда тарқалган «қуролсиз одамнинг шафқатсизларча отиб ташланиши» бўйича жиноий иш қўзғатилганини маълум қилди. У Россияни уруш тўғрисидаги қонунларга риоя қилмасликда айблади.
Твиттерда ёйинланган 12 сониялик видеода қуролсиз, Украина армияси формасидаги ҳарбий ўрмонда отиб ташлангани акс этган.
Рейтерс видеонинг ҳақиқийлиги, санаси ва жойлашувини тасдиқлай олмади. Россия Мудофаа вазирлиги видео борасида қилинган сўровга жавоб бермади. Украина расмийлари ҳам воқеа қаерда ва қачон содир бўлганига аниқлик киритганича йўқ.
Украина президенти девони раҳбари Андрей Ермак видеодаги аскар украиналик ҳарбий асир бўлганини ва бу воқеа Россиянинг «қасддан олиб бораётган террор сиёсати»нинг бир қисми эканини таъкидлади.
“Ҳарбий асирни ўлдириш Россиянинг навбатдаги уруш жинояти. Бу «нацистлар» ҳақидаги сафсаталар ҳамда Кремль ташвиқоти билан суғорилган методик террор сиёсатининг бир кўриниши. Бу каби ҳар бир уруш жинояти жазосиз қолмайди. Биз уларнинг ҳаммасини топамиз." дея твит қолдирди Андей Ермак.
Украина ва Ғарб расмийлари Россия Украинага бостириб кирганидан бери содир этилган минглаб ҳарбий жиноятлар борасида далиллар йиғилганини айтган. Россия эса ўз ҳарбийлари Украинада тинч аҳолини ўлдирганини рад этиб келади.