Россия Киевни "Кинжал" ракеталари билан ҳужумга тутди
9 март эрта тонгда Россия Украинани йирик ракета ҳужумига тутди. Киев, Харьков, Днепропетровск, Одесса, Львов ва кўплаб вилоятларда портлашлар содир бўлди.
Бу сўнгги бир ой ичидаги Россиянинг Украина шаҳарларига йирик ҳужуми бўлди.
Расмий маълумотларга кўра, Львов вилоятида беш киши, Днепропетровск вилоятида бир киши, Херсонда уч киши ҳалок бўлган. Киевда уч киши жароҳатланган.
Ҳужум туфайли Запорожье атом электр станциясида узилиш бўлди.
Киев мери Виталий Кличко пойтахтнинг жануби-ғарбий қисмида портлашлар содир бўлгани, шаҳар аҳолисининг 40 фоизи электр энергиясиз қолганини айтди.
Украина президенти ёрдамчиси Михайло Подолякнинг айтишича, россиялик ҳарбийлар ҳужумларни тунда, одамлар ухлаб ётган пайтда бошлаган.
Шунингдек, Украинанинг бошқа шаҳарларида ҳам портлашлар рўй берди.
Днепропетровск вилоятида бир киши ҳалок бўлди, икки киши яраланди, деб хабар берди губернатор Сергей Лисак.
Украина расмийларига кўра, пайшанба куни Херсон ҳам Россиянинг ракета ҳужумига тутилган. Бу ерда камида уч киши ҳалок бўлган.
Львов вилояти губернатори Максим Козицкий Золочив туманида аҳоли уйлари устига ракета урилиши оқибатида беш киши ҳалок бўлганини маълум қилди.
Житомир ҳам тунда Эронда ишлаб чиқарилган Шаҳед камикадзе дронлари галасига тутилди, деди шаҳар мери Сергей Сухомлин.
Сухомлиннинг айтишича, қурбонлар йўқ, бироқ коммунал хизматларда узилиш рўй берган.
Тунги ҳужумлардан кейин шаҳар сув ва электрсиз қолган.
Россия зарбалари Одесса ва Харков вилоятларини ҳам нишонга олди, маҳаллий ҳукумат хабарига кўра, электр таъминотида узилишлар ва темир йўл инфратузилмасига зарар етган.
Украина президенти Владимир Зеленский 10 та ҳудуддаги муҳим инфратузилма ва турар-жой биноларига зарар етганини билдирди.
Украина расмийларига кўра, Москва ўзининг олтита гипертовушли “Кинжал” ракетасини учирган, Украинада уларни уриб туширишнинг имкони йўқ.
Россия раҳбари Владимир Путин “Кинжал” ракеталарини НАТО жавоб бера олмайдиган қурол сифатида ўз чиқишларида таъкидлаб келади.
Россиянинг пайшанба кунги ракета ҳужумлари Европадаги энг йирик атом станциясини электр таъминотидан узиб қўйди.
Украинанинг атом энергетикаси давлат компанияси “Энергоатом” баёнотида айтилишича, Европадаги энг йирик Запорижья атом электр станцияси Россиянинг ракета ҳужуми оқибатида мамлакат электр тармоғидан узилган ва станция ҳозирда 18 та дизел генераторида ишламоқда.
“Энергоатом” станциянинг бешинчи ва олтинчи реакторлари тўхтатилгани ва станциянинг ишини таъминловчи дизел генераторлари атиги 10 кунга етарли ёқилғига эга эканлигини билдирди.
Станция Россия назорати остида, лекин украиналик техник ходимлар томонидан бошқарилади. Запорожье вилоятининг Москва томонидан ишғол қилинган қисмида Россия томонидан ўрнатилган расмийлар воқеани Украина томонидан қилинган “провокация” деб баҳолади.
Украина ҳарбийларига кўра, Россия ҳар хил турдаги 81 та ракетани учирган, ҳаво мудофааси 48 та қанотли ракетадан 34 тасини ва 8 та Шаҳиддан 4 тасини уриб туширган.
Йенс Столтенберг: Бахмут келаётган кунларда қулаши эҳтимолдан ҳоли эмас
НАТО Бош котиби Йенс Столтенберг Россия кучлари яқин кунларда Бахмутни қўлга киритишини истисно қилмайди. Бу ҳақда у Европа Иттифоқи Ташқи ишлар вазирларининг Стокгольмда ўтаётган учрашувида баёнот берди.
"Россия сифат жиҳатидан ўзига етишмаётган нарсани сон билан қўлга киритмоқчи. Улар кўп талафот берди... Бу Россияни кичик кўрмаслигимиз кераклигини яна бир бор таъкидлайди. Биз Украинани қўллаб-қувватлашимиз керак", деб айтди Столтенберг. Унинг сўзларига кўра, Украина кучларининг Бахмутда мағлубиятга учраши урушнинг бурилиш нуқтаси бўлмайди.
Сешанба куни президент Зеленский Бахмутда мудофаани ушлаб туриш қарори "тактик қарор" эканини айтган эди.
Европа Иттифоқи суди тадбиркор Евгений Пригожиннинг онасига нисбатан санкцияларни бекор қилди
Европа Иттифоқи суди бизнесмен ва Вагнер ХҲШ асосчиси Евгений Пригожиннинг онаси Виолетта Пригожинага нисбатан чеклов чораларини бекор қилди. Бу ҳақда суд қарорида айтилган.
Европа Иттифоқининг Виолетта Пригожинага қарши санкциялари Россиянинг Украинага кенг кўламли босқинидан сўнг киритилган. Бунинг мантиқий сабаби унинг Concord Management and Consulting ва ўғли билан боғлиқ бўлган бошқа бизнесларнинг эгаси эканлиги, шунингдек, Украинанинг ҳудудий яхлитлиги, суверенитети ва мустақиллигига путур етказадиган сиёсатни қўллаб-қувватлаши эди.
Виолетта Пригожина Европа Иттифоқи судига унга нисбатан санкциялар қўллаш қарорини бекор қилишни сўраб мурожаат қилди. Тақдим этилган материалларга кўра, Пригожина 2017 йилдан бери Concord Management and Consulting компаниясининг эгаси эмас. Шунингдек, Пригожинга нисбатан санксиялар жорий этилган пайтда унга алоқадор бошқа компанияларга эгалиги ҳам исботланмаган.
Суд Пригожинани санкциялар рўйхатига киритиш тўғрисидаги қарор фақат уларнинг муносабатларига асослангани, унинг ўғли Украинанинг ҳудудий яхлитлиги, суверенитети ва мустақиллигига путур етказадиган ҳаракатлар учун жавобгар бўлса ҳам, уни санкциялар рўйхатига киритишни асослаш учун етарли эмас, деб ҳисоблади.
Россия суди Украинадаги урушга қарши бўлган фаолни 8,5 йилга қамади
Москва суди ижтимоий тармоқлар орқали Украинадаги урушни қоралаган россиялик Дмитрий Иванов армия ҳақида ёлғон маълумот тарқатишда айблаб, саккиз ярим йиллик қамоқ жазосига ҳукм қилди.
Дмитрий Иванов Москва давлат университети талабаларидан иборат телеграм каналда урушни қоралаб келган. У қонунбузарлик содир этганини рад этди.
«Бир нарсани тушунишингиз керак, Россия президенти Владимир Путин эмас. Биз уни сайлаганимиз йўқ. У биздан Украина уруш бошлаш борасида ҳисоблашмади. Россияда ўн миллионлаб одам бу жиноий урушга қарши. Кўпчилигимизнинг Украинада дўстларимиз ва қариндошларимиз бор ва уларнинг ичидан ўтаётган нарсаларни ҳис қиляпмиз », дея таъкидлади Иванов Сота Телеграм каналидаги видеода.
Унинг адвокати Мария Эйсмонт Иванов жазони умумий тартибли колонияда ўташини маълум қилди.
Урушдан ва ҳарбий сафарбарликдан норози юз минглаб россияликлар мамлакатни тарк этди. Россияда урушни танқид қилганлар армияни обрўсизлантириш айби билан қамоққа олинади.