Сафарбар қилинган тўпчиларнинг қариндошлари Путиндан ёрдам сўрамоқда
Москва вилоятидан сафарбар қилинган аскарларнинг хотинлари ва оналари Россия президенти Владимир Путин ҳамда мудофаа вазири Сергей Шойгуга видеомурожаат билан чиқишди.
Улар ўз ўғиллари ва эрлари Россия армияси таркибидан “ДХР” ва “ЛХР” кучлари ихтиёрига ўтказилганини, артиллериячи ҳарбий ихтисослиги бўйича ўқитилганига қарамай, энди улардан штурмчи отрядлар тузилаётганини айтиб шикоят қилганлар.
Боз устига, мурожаатга кўра, аскарлар зарур тайёргарликсиз, “тўп еми” сифатида олдинги чизиққа ташланмоқда. Аёллар сафарбарликка олинган қариндошлари штурмчиликка атиги 4 кун ўқитилганини айтишган.
“Мобилизация қилинган ўғил ва эрларимизни фронтнинг олди чизиғига “тўп еми” сифатида ташлашмоқда. Улар Украинада жанг қилишга тайёр, лекин штурмчи аскар бўлиб эмас, балки ўзлари эгаллаган ҳарбий ихтисослик бўйича. Биз уларни фронтнинг туташув чизиғидан олиб кетиб, артиллерия қуроллари ва ўқ-дори билан таъминлашни илтимос қиламиз”, дейилади мурожаатда.
Сўнгги ҳафталарда интернетда сафарбар қилинган аскарлар томонидан ёзилган кўплаб мурожаатлар пайдо бўлди.
Хусусан, Иркутск, Белгород, Калининград вилоятларидан, шунингдек Тувадан сафарбар қилинган аскарларнинг видеолари чиққан эди.
Уларнинг барчаси “ЛХР” ва “ДХР” қуролли тузилмалари ихтиёрига берилганидан ва зарур тайёргарликсиз, штурмчи аскар сифатида фронтга ташланаётганидан шикоят қилишган.
Мурожаатчиларга кўра, командирлар олдинги чизиққа боришмайди, аскарлар зарур қурол ва анжомларсиз, артиллерия ва разведка кўмагисиз жангга ташланади, ҳужумга ўтишдан бош тортувчиларга эса зўравонлик билан таҳдид қиладилар.
Бўлинмалар катта талафот кўрмоқда. Аскарлар улардан “тўп еми” ўлароқ фойдаланишаётганини ва “ўлимга” йўллашаётганини таъкидлайдилар.
Икки ҳафта ичида рус армиясида тасдиқланган йўқотишлар рекорд даражада ошган, 1638 нафарни ташкил этган
Медиазона Россия армиясининг Украинадаги тасдиқланган йўқотишларининг яна бир хулосасини эълон қилди, уларнинг ҳисоб-китоблари BBC билан биргаликда амалга оширилди: икки ҳафта ичида рўйхат 1638 кишига кўпайди ва 16774 кишига етди.
Бу бутун ҳисоб-китоб вақти учун максимал кўрсаткичдир, дея таъкидлайди нашр. Таъкидланишича, Вагнер гуруҳи ўлим сони бўйича энг сезиларли ўсишга эга ва энг катта йўқотишлар компания томонидан ёлланган маҳбуслар орасида.
Россия қўшинлари учун асосий йўналиш ҳали ҳам Бахмут, деб ёзади газета. “Медиазона” урушда ҳалок бўлганларнинг исм-шарифлари билан тасдиқланган сони (тармоқлардаги қариндошларининг хабарлари, минтақавий ОАВ ва маҳаллий ҳокимият хабарлари асосида) Россия қўшинларининг Украинадаги йўқотишларининг реал даражасини акс эттирмаслигини таъкидлайди. Аслида бу бир неча баравар юқори бўлиши мумкин.
Россия Бахмутда ҳужумларни кучайтирди
Россия кучлари Украинанинг Донецк вилояти Бахмут шаҳри атрофида ҳужумларини давом эттирмоқда.
Украина Бош штабининг 11 март кунги брифингида айтилишича, Россия кучлари фронт чизиғи бўйлаб, жумладан, Лиман, Бахмут, Авдийивка ва Шахтёрск атрофида “100 дан ортиқ ҳужум” уюштирган.
Шунингдек, Россиянинг Донецк вилоятига охирги 24 соат ичида 29 та ҳаво ҳужуми ва 4 та ракета ҳужуми уюштирган.
Украина ҳарбийларига кўра, тинч аҳоли ва фуқаролик инфратузилмасига зарар етган.
Бахмут бир неча ҳафтадан бери шиддатли жанглар саҳнасига айланди. Украина мудофаа вазири ўринбосари Ханна Маляр 10 март куни жанглар кучайгани ва Россия кучлари шаҳарни эгаллаш учун янги ҳаракатларни амалга ошираётганини айтди.
FT: Украина АҚШ ва Германия томонидан ваъда қилинган иккита “Патриот” ҳаво мудофаа тизимидан бирини олди
Украина АҚШ ва Германия томонидан ваъда қилинган иккита “Патриот” ҳаво мудофаа тизимидан бирини олди. Бу ҳақда The Financial Times хабар берди.
Нашрнинг ёзишича, тизим ҳали ишга туширилмаган. Голландия яна бир нечта ишга тушириш мосламаларини етказиб бериши кутилмоқда.
АҚШ президенти Жо Байден ва Германия канцлери Олаф Шолц аввалроқ Украина Қуролли кучларига ракетага қарши ва ҳаво ҳужумидан мудофаа тизимларини етказиб бериш бўйича келишиб олган эди. Хусусан, Германия Украинага “Пэтриот” ҳаво мудофаа тизимининг қўшимча батареясини, АҚШнинг Украина армиясига бериладиган батарея билан таъминлашга ваъда берди.
2023 йил январ ойида 100 га яқин ҳарбий хизматчилар “Пэтриот” ҳаво мудофааси билан ишлаш бўйича АҚШда машғулот ўтаганди.