Қримда яна портлашдар содир бўлди
Аннексия қилинган Қримнинг Жанкой шаҳрида 20 март оқшомида бир нечта кучли портлашлар содир бўлди. Маҳаллий телеграм-каналлар хабарига кўра, портлашлар ҳарбий аэродром ҳудудида бўлган, шаҳарга украин дронлари ҳужум қилгани тахмин қилинмоқда.
Ўз навбатида Украина Мудофаа вазирлигининг Разведка бош бошқармаси Жанкойда Россиянинг темир йўл орқали жўнатишга ҳозирланаётган “Калибр” қанотли ракеталари йўқ қилинганини билдирди.
“Сирли “пақиллаш”лар Россиянинг демилитаризация жараёнини давом эттириб, Украинага тегишли Қрим яриморолининг озод этилишига замин яратмоқда”, дейилади украин разведкаси хабарномасида.
Россия Қримга раҳбар қилиб тайинлаган Сергей Аксёнов эса Жанкой ҳудудида Ҳаво мудофаа тизими ишга тушгани, уриб туширилган нишонларнинг бўлаклари турар жой ва дўконга шикаст етказиб, бир киши яраланганини маълум қилди.
Шифокорлар маълумотига кўра, 33 ёшли турғун ўртача жароҳат билан касалхонага ётқизилган.
Айни чоғда ASTRA телеграм-канали аниқлик киритишича, портлашлар Жанкой локомотив депосига, вокзал қўриқлаш хизмати биносига, товар-маҳсулот ва ёқилғи омборларига шикаст етказган. Станцияга ҳужум натижасида локомотив депосининг электр таъминотида узилишлар бўлмоқда.
Русларнинг 2 та Ту-95МС стратегик ракета ташувчиси Япон денгизи узра парвоз қилди.
Россия Мудофаа вазирлиги 21-март, сешанба куни иккита Ту-95МС стратегик ракета ташувчиси Япон денгизи узра режали парвозни амалга оширганини маълум қилди.
Су-30СМ ва Су-35С қирувчилари бомбардимончи самолётларни етти соатлик жанговар парвоз давомида кузатиб борди.
Парвозлар АҚШнинг Ҳинд-Тинч океани қўмондонлиги ва Япония Мудофаа кучлари Япония денгизи узра икки томонлама ҳарбий ҳаво машғулотларини ўтказганидан икки кун ўтиб ўтказилди. Шу куниёқ Япония бош вазири Фумио Кисиданинг Киевга ва Хитой раҳбари Си Цзинпиннинг Москвага ташрифлари амалга оширилди.
Экспертлар бу ҳаракатлар халқаро вазиятнинг янада таранглашишига олиб келишидан хавотир билдирмоқда.
ЕИ Украинага 2 миллиард евролик ўқ-дори беришни режаламоқда
Россия кучлари ўтган сутка давомида Бахмут, Авдивка, Лиман, Маринка ва Шахтёрск шаҳарларига 69 та ҳужум уюштирган.
Украина томонига кўра, Россия кучлари Донецк ва Запороже вилоятларида тинч аҳоли пунктларини ўққа тутмоқда, тинч аҳоли орасида қурбонлар бор.
Бош штабнинг қайд этишича, Херсон вилоятининг ишғол қилинган қисмида Россия кучлари тинч аҳолини Россия паспортини олиш учун зўравонлик қилмоқда.
Озодлик уруш шароитида бундай маълумотларни мустақил манбалардан тезкор текшириш имконига эга бўлмаётир.
Европа Иттифоқи ташқи ишлар ва мудофаа вазирлари эса Брюсселда, Украинага 2 миллиард евролик ўқ-дори ва артиллерия снарядларини етказиб беришни муҳокама қилиш учун йиғилди.
«Вақт тиғиз. Кўпроқ артиллерия ўқларини етказиб беришимиз керак», дея таъкидлади иттифоқнинг ташқи сиёсат бўйича раҳбари Жозеп Боррел.
Украина ташқи ишлар вазири Дмитрий Кулеба йиғилишда виртуал иштирок этиб, фронтдаги жорий вазият ҳақида маълумот берди.
Вазир, Киев Россиянинг шарқий фронтда ҳужумини тўхтатиш ва шу баҳорда қарши ҳужумга ҳозирлик кўриш учун ҳар ой 350 минг снаряд керак, деди. Европа Иттифоқига аъзо давлатлар Россиянинг босқини бошланганидан то ҳозиргача Украинага 13 миллиард долларлик ҳарбий ёрдам кўрсатди.
Бу учрашув давомида иттифоқ ташқи ишлар вазирлари украиналик болаларни Россияга мажбуран депортация қилгани учун Москвани жавобгарликка тортиш ҳамда Украина экспортини осонлаштириш чораларини кўриши ҳам айтилган.
17 март куни Гаага Халқаро жиноий суди Россия президенти Владимир Путин ва Россиянинг болалар ҳуқуқлари бўйича комиссари Мария Лвова-Беловани ҳибсга олишга ордер берди.
Россия президенти ХЖСнинг ордери ҳақида изоҳ бермади, бироқ унинг матбуот котиби бу қарорни қонуний аҳамиятга эга эмас, деб баҳолади.
Хитой раҳбари Си Цзинпин Москвага сафар қилмоқда
Цзинпин, Гаага суди Россия президенти Путинни қамоққа олишга ордер берганидан кейин у билан учрашган биринчи давлат раҳбари бўлди.
Россия ҳам, Хитой ҳам ХЖСга аъзо эмас.
«Си Цзинпиннинг айнан ҳозир Москвага ташриф буюриши у Путинни қўллаб-қувватлаётгани ҳақида жуда муҳим сигнал. Қолаверса, АҚШ ва Ғарбга ўзларининг ҳамжиҳат эканликларини, АҚШ ва Ғарб таъсирига қарши туришда бирлашганликларини кўрсатиш ҳам мақсад қилинган», деди Неw Аmerican Security маркази раҳбари ўринбосари Андреа-Кендал Тейлор.
АҚШ ҳам ХЖСнинг юрисдикциясини ратификация қилмаган. Бироқ президент Жо Байден Путинга қўйилган айбловлар асосли эканига ишонишини айтди.
«У аниқ уруш жиноятларини содир этган», деди Байден.
Вашингтон раҳбарияти, Хитойнинг Россия босқинини қоралашдан бош тортганини урғулаб, Пекиннинг Украинадаги урушда воситачилик қилишига ишонч билдирмаётир.
Хитой ўтган ой Украинада можарони тўхтатишни кўзда тутувчи 12 банддан иборат келишувни таклиф қилганди. Аммо, айни пайтда, Пекин Россияга қурол етказиб беришга тайёрланмоқда, деган хавотирлар бор.