Россия зарбаси оқибатида жами 12 киши ҳалок бўлди, улардан учтаси бола
Россия ҳарбийларининг Краматорскга берган зарбасидан сўнг ҳалок бўлганлар сони 12 кишига етди, қутқарув ишлари якунланди. Бу ҳақда Украина фавқулодда вазиятлар бўйича давлат хизмати хабар берди.
29 июн куни эрталаб яна бир марҳумнинг жасади вайроналар остидан олиб чиқилди. 12 киши, жумладан, уч нафар бола ҳалок бўлди. Ҳалок бўлганларнинг шахси аниқланган.
Украина Миллий полицияси маълумотига кўра, 65 киши жароҳатланган. Қурбонлар орасида Колумбиянинг уч фуқароси - Колумбия парламенти депутати Серхио Харамило, ёзувчи Эктор Абад ва журналист Каталина Гомес ҳам бор. Уларга украиналик ёзувчи Виктория Амелина ҳамроҳлик қилган, у ҳам яраланган ва аҳволи оғир.
27-июн оқшомида рус қўшинлари Краматорск томон ракета зарбалари берган эди. Ҳужум ресторанга (шаҳардаги машҳур пицерия) йўналтирилган, у ерда одам кўп бўлган. Бир қанча уй, дўкон, кафе ва бошқа муассасалар ҳам зарар кўрган.
Зарба “Искандер” ракетаси билан берилган. Украина хавфсизлик хизмати Краматорск томон ракеталарни нишонга йўллашда душманга координат берган шахсни қўлга олганини маълум қилди.
Украина Хавфсизлик кенгашига кўра, бу одам Россия Бош разведка бошқармаси томонидан ёлланган, топшириққа кўра у Краматорск ва Славянскда жойлашган Украина қўшинлари ҳақида маълумот тўплаши керак эди.
Унга 27-июн куни кафе очиқ ёки ёпиқлигини, мижозлар бор-йўқлигини аниқлаш вазифаси берилган.
"Душман агенти кўрсатмаларни бажариш учун яқин атрофда турган муассаса ва автомашиналарни яширин видеотасвирга олди. Шундан сўнг судланувчи тасвирга олинган файлни Россия ҳарбий разведкасига юборди. Бу маълумотни олган рус босқинчилари одам тўла кафега ракета отди", - дейилади хабарда.
Россия Мудофаа вазирлиги чоршанба куни Украинанинг Краматорск шаҳридаги Украинанинг 56-механизациялашган пиёдалар бригадаси қўмондонлигининг вақтинчалик базасини йўқ қилганини маълум қилди.
Чоршанба куни эрталаб Кремл Россия тинч аҳолига эмас, фақат ҳарбий нишонларга ҳужум қилади, деган узоқ йиллик позициясини такрорлади.
Озодлик уруш шароитида томонлар бераётган маълумотларни тезкор текшириш имконига эга эмас.
Зеленский: Украинага миллий “доктрина” керак
Владимир Зеленский Украинанинг янги доктринаси “адолат”га асосланишини айтди.
Ўзининг кечки видеомурожаатида Зеленский Украина учун доктрина зарурлигини таъкидлади:
"Бизга шундай ҳужжат керак. Украина учун, барча қўшниларимиз учун. Дунё бизнинг миллий мақсадимиз нима эканлигини, бу уруш биз учун қандай якунланиши кераклиги ҳамда урушдан кейин қандай бўлишимиз ҳақида билиши керак. Босқинчилар бизга қарши нима қилишмасин, қандай террор қўлламасин, улар Украинани синдира олмайди. Ҳеч нима уларни жавобгарликдан, бизни эса кафолатланган хавфсизлик ва эркинликдан ортга қайтара олмайди."
Зеленскийнинг таъкидлашича, доктрина бўйича таклифлар умуммиллий муҳокамага қўйилади.
Украина кучлари Бахмут атрофидаги “қаттиқ” жангларда аста-секин олға бормоқда
Мудофаа вазири ўринбосари Анна Маляр 29-июн куни берган баёнотида “Бизнинг қўшинларимиз ушбу шиддатли жангда ҳар бир қарич ерни узиб олиб олдинга интилмоқда", деди.
Унинг сўзларига кўра, рус қўшинлари "ўз позицияларини сақлаб қолишга, қарши ҳужумлар уюштиришга ҳаракат қилмоқда", аммо "аста-секин орқага чекинмоқда, йўқотишларга дучор бўлмоқда".
Украина қуруқликдаги қўшинлари қўмондони Александр Сирский Украина қўшинлари аста-секинлик билан олдинга силжишини айтди.
“Бахмут яқинида ҳужумларимиз бор ва улар давом этмоқда. Биз ҳаракатланмоқдамиз”, — деди Сирский Телеграмдаги каналида.
Бахмут май ойида қонли ва узоқ давом этган жанглардан сўнг рус қўшинлари томонидан қўлга олинди, шаҳар харобага айланди.
Украиналик қўмондон 29 июн куни унинг қўшинлари Бахмутдан 3,5 километр жанубда жойлашган Клишчевка қишлоғини назоратга олгани ҳақида хабар берди.
"Бу Бахмут жанубида ҳужум операциялари бошланадиган стратегик нуқта", деди Украина Қуролли кучларининг 57-бригадаси разведка компанияси қўмондони Денис Ярославский Озодлик радиосига.
Ушбу даъволарни мустақил равишда текшириш мумкин эмас.
Украина Бош штаби ўтган кун давомида асосан Донецкнинг ғарбий қисмидаги Лиман, Бахмут ва Маринка туманларида 40 та тўқнашув бўлиб ўтганини хабар қилди.
29-июн куни Херсон вилоятининг Белозерка шаҳрига рус қўшинларининг зарбалари натижасида 71 ёшли аёл ҳалок бўлди, яна икки киши яраланди, дея хабар берди вилоят ҳокимияти.
Уларнинг сўзларига кўра, отишмалар натижасида камида 12 та турар-жой биноси зарар кўрган.
Юқори даражадаги рус генерали Пригожиннинг исёнига хайрихоҳ бўлган бўлиши мумкин
Гап Россиянинг Украинадаги ҳарбий операциялари қўмондони генерал Сергей Суровикин ҳақида кетмоқда. У шанба кунидан бери омма олдида кўриниш бермаяпти.
АҚШ расмийларига кўра, Суровикин қуролли исёнга хайрихоҳ бўлган. Бироқ Ғарб разведкаси Суровикин исённи бирон бир тарзда қўллаб қувватлаганига оид аниқ маълумот келтирмади.
"Москва Таймс" газетасининг хабар беришича, Суровикин ҳозир ҳибсга олинган.
Қўзғолон бошланганидан сўнг Суровикин “Вагнер” жангчиларини дарҳол ўз базаларига қайтишга чақириб видеомурожаат жойлади.
Нью-Йорк Таймс газетасининг хабар беришича, Суровикин қўзғолон ҳақида олдиндан маълумотга эга бўлган. Россия ҳукумати унинг исёнга алоқаси бор ёки йўқлигини текширмоқда.
Кремль буни шунчаки асоссиз тахмин деб атади.
Суровикин - энг таниқли рус генералларидан бири, кузда у Украинадаги рус қўшинларининг қўмондони этиб тайинланган. Унинг номи Украина энергетика объектларини бомбардимон қилиш кампанияси, босиб олинган ҳудудларда истеҳкомлар чизиғини қуриш ва Херсон ва Днепрнинг ўнг қирғоғини ютқазиб қўйиш билан боғлиқ бўлиб, у буни "қийин қарор" деб атаган.
Кейинчалик у қўмондон ўринбосари бўлди.
Вагнер ХҲШ раҳбари Евгений Пригожин ҳам унинг ҳаракатларини бошқа армия қўмондонларига солиштириб, уни мақтаб гапирган.