Украина армияси Донецкдаги жангларда "ютуқлар"га эришган
Украина армияси Донецк вилоятидаги жангларда маълум "ютуқлар"га эришганини даъво қилмоқда.
Шу билан бирга жанглар туфайли Запорожйе атом электр станциясида фалокат юз бериши эҳтимоли ҳам сақланиб қолмоқда.
Европа Иттифоқи етакчилари икки кунлик саммитда иштирок этиш учун Брюссельда жам бўлди. Етакчилар Украинани қанча керак бўлса, шунча вақт қўллаб-қувватлашга ваъда берди.
Украина Бош штаби Россия бор эътиборини “шиддатли жанглар давом этаётган” Лиман, Бахмут ва Маринка атрофидаги ҳудудларга қаратаётганини билдирди.
Бош штаб “оғир жанглар” давом этаётгани, бироқ украин қўшинлари Бахмут қанотларида рус қўшинларига босим ўтказишда давом этаётганини айтди.
Бош штаб ҳисоботида айтилишича, Украина кучлари “тобора олдинга илгариламоқда ва русларни эгаллаб олган позицияларидан сиқиб чиқармоқда”.
Озодлик радиоси уруш шароитида жанг майдонидан келаётган хабарларни тасдиқлай олмайди.
Россия бир кеча-кундузда Украинанинг қатор ҳудудларига дрон ва ракеталар билан ҳужум қилди.
Запорожье шаҳар кенгаши котиби Анатолий Куртев ва ҳарбийлар ҳужумда тинч аҳоли жабрланмагани ва катта зарар етмаганини маълум қилди.
“Яна бир тун нотинч ўтди. Бироқ эрталаб Запорожьеда вазият барқарор”, — деб ёзди Куртев.
Запорожье вилояти губернатори “фавқулодда вазият” юзага келган тақдирда кўриладиган ҳаракатларни яхшилаш учун атом станцияси атрофида тезкор машғулотлар ўтказаётганини маълум қилган эди.
Сал аввалроқ Киев Россияни Запорожье АЭСда "теракт уюштиришни режалаштираётганликда айблади.
Россиянинг БМТдаги доимий вакили Василий Небeнзя БМТ Хавфсизлик Кенгаши ва БМТ Бош котиби Антониу Гутерришга ёзма тарзда Россиянинг АЭСни портлатиш нияти йўқлигини билдирганини айтди.
Халқаро Валюта Жамғармаси ижроия кенгаши Украина бюджетини қўллаб-қувватлаш учун 900 миллион доллар ажратиш масаласини кўриб чиқиш якунлаганини хабар қилди. Мазкур молиявий ёрдам март ойида тасдиқланган.
Залужний: Ҳар бир метр қон эвазига
Украина Қуролли кучлари Запорожье ва Бахмут яқинида кичик илгари силжишга эришганликларини айтишмоқда.
Бахмут йўналишида украин бўлинмалари олдинга силжиб, шаҳар жанубидаги муҳим қўрғон Курдюмовка учун жанг қилмоқда..
Украина Қуролли кучлари бош қўмондони Валерий Залужний Тhе Wаshington Post газетасига берган интервьюсида Украинанинг қарши ҳужуми секин кечаётгани ҳақидаги баёнотлар уни ғазаблантиришини айтди. Чунки "ҳар бир метр қон билан олинади", дея таъкидлайди у.
Залужний, шунингдек, ҳамкорлардан Украинага кўпроқ ўқ-дорилар ва жанговар самолётлар етказиб беришни сўради.
Польша НАТОнинг ядровий алмашиш дастурига қўшилмоқчи
Польша бош вазири Матеуш Моравецки, Россиянинг Беларусда тактик ядро қуролини жойлаштириш режалари туфайли Варшава НАТОнинг ядровий алмашиш дастурига қўшилиш ниятида эканини.
"Россиянинг Беларусда тактик ядровий қуролларни жойлаштириш нияти муносабати билан биз бутун НАТОга "Шэринг" дастурида иштирок этиш учун мурожаат қилмоқдамиз. Якуний қарор, албатта, америкалик ва НАТОдаги ҳамкорларимизга боғлиқ бўлади. Лекин бу борада тезкор чора кўриш истагимизни билдирамиз”., деди Польша бош вазири.
НАТО аъзоси Германия ядровий алмашишда иштирок этади, яъни у ядровий қуролга эга эмас, лекин АҚШ қуролларини жойлаштиришга мезбонлик қилади. немис қирувчи самолётлари можаро пайтида ядровий бомбаларни нишонга олиб бориши мумкин.
Россиянинг Украинага бостириб кириши муносабати билан Ғарб билан зиддият кучайиб бораётган бир пайтда Президент Владимир Путин очиқчасига Россиянинг тактик ёки қисқа масофали ядровий қуролларини Беларус аллақачон қабул қила бошлаганини айтган.
Пригожин Беларусга қайтиши билан Минск жануби-шарқидаги ҳарбий базада чодирлар пайдо бўлган
Беларус пойтахти Минск жануби-шарқидаги ҳарбий базанинг сунъий йўлдошдан олинган тасвирларида сўнгги кунларда янги объектлар барпо этилгани кўриш мумкин.
Муваффақиятсиз қуролли қўзғолон ортида турган Россиянинг ёлланма аскарлардан иборат ҳарбий ширкати "Вагнер" учун Беларусда жой ажратилгани ҳақида хабар қилинган эди..
Россия оммавий ахборот воситалари 27 июнда Беларусга келган Евгений Пригожин ўзининг Вагнер ҳарбий бўлинмаси учун Минскдан 90 км узоқликдаги Асиповичи шаҳри яқинидаги бўш турган ҳарбий иншоотда янги база қуриши мумкинлигини хабар қилган.
Рейтер агентлиги қурилишнинг моҳиятини тасдиқлай олмади.
Беларус президенти Александр Лукашенко ўтган шанба куни исёнга барҳам берган келишув доирасида Вагнерни ўз мамлакатида операциялар ўтказишни таклиф қилганди.
Россия президенти Владимир Путин “Вагнер” жангчилари Россияга фуқаролар уруши олиб келиши билан таҳдид қилган қўзғолондан сўнг Беларусга кўчиб ўтишлари, россиялик ҳарбийлар сафига қўшилишлари ёки уйларига қайтишлари мумкинлигини айтган.
Пригожиннинг таъкидича, у Украинадаги урушдаги муваффақиятсизликлар учун айблаган ҳарбий раҳбариятни ўзгартириш ва Мудофаа вазирлиги назоратига бўйсуниш буйруғидан кейин ўз кучларининг йўқ қилинишига йўл қўймаслик учун қўзғолонни бошлаган.
Украина президенти 30 июн куни Россиядаги қўзғолон раҳбари Беларусга келгани айтилгач, у ўз генералларига шимолий чегарани мустаҳкамлашни буюрганини айтди, юқори мартабали мудофаа расмийси эса Украина қўшинлари “стратегик ташаббусни” Россиядан тортиб олганини даъво қилди.
Вашингтонда, АҚШ Армия генерали, штаб бошлиқлари бирлашган қўмитаси раиси Марк Миллининг айтишича, Украинанинг қарши ҳужуми Ғарбда кўпчилик кутганидек тез бўлмаса-да, тадрижий бормоқда.