Чеченистонда “Новая газета” журналисти Елена Милашина ва адвокат Александр Немов қаттиқ калтакланди
“Команда против пыток” ҳуқуқ ҳимоячилари гуруҳи “Новая газета” журналисти Елена Милашина ва адвокат Александр Немов Чеченистонда номаълум кишилар томонидан калтакланганини маълум қилди.
Улар чеченистонлик фаоллар – ака-ку Абубакар, Ибрагим ва Байсангур Янгулбоевларнинг онаси ва Олий суднинг собиқ судьяси Сайди Янгулбоевнинг хотини Зарема Мусаевага ҳукм ўқилишида иштирок этиш учун Чеченистонга учиб келишганди.
Мусаева 2022 йил январда чечен кучишлатар ходимлари томонидан Нижний Новгороддан ўғирлаб келинган эди. 4 июль куни бўлиб ўтган судда Зарема Мусаева 5,5 йил қамоқ жазосига ҳукм қилинди.
Дастлабки маълумотга кўра, адвокат ва журналист ўтирган автомобилни аэропортдан шаҳарга элтувчи йўлда қуролли одамлар тўхтатишган. Милашина ва Немов қаттиқ калтакланган, уларнинг жиҳозлари тортиб олиниб, мажақланган, дея маълум қилди “Команда против пыток”.
Воқеалар жойида бўлган “Осторожно Media” мухбири “Елена Милашинанинг бармоқлари синган, калтакланганидан сўнг у ҳушини йўқотган. Бундан ташқари, кўп аъзолари лат еган”, деб ёзди.
“Команда против пыток” лойиҳаси раҳбари Сергей Бабинецга кўра, Александр Немов оёғидан пичоқ билан яраланган бўлиши мумкин.
“Немовни, билишимизча, ўткир тиғли нарса, эҳтимол пичоқ билан оёғига уришган, ҳозир унинг ярасини тикишяпти. Иккиласини ҳам тепкилашган, қўл билан уришган, полипропилен қувур билан уриб қийнашган: уларга қилган ишларини, қатнашган судларини, Елена Милашина ёзган мақолаларни эслатишган. Яъни, бу бандитлар ҳужуми эмаслиги яққол кўриниб турибди. Немов билан Милашина ўз касб фаолияти туфайли жабр кўришди”, деди Бабинец.
Немовга кўра, ҳужум қилганлар у билан Милашинага Чеченистондан кетишни буюрган. “Сизни огоҳлантирдик. Ҳеч нима ёзманглар”, дея адвокатдан иқтибос келтиради Ксения-Собчак телеграм-канали.
“Мемориал” қўшимча қилишича, ҳужум қилганлар Милашинанинг устига зелёнка сепишган ва сочини олишган.
Россия дронининг 3 июлда Сумига ҳужуми. Қурбонлар сони учтага етди
Россияга оид камикадзе дроннинг Суми шаҳрига ҳужуми натижасида ҳалок бўлганлар сони учтага етди, 21 киши яраланди. Бу ҳақда Суми вилояти ҳарбий маъмурияти маълум қилди.
Шаҳар мэри Александр Лисенко ярадорлардан уч нафари ҳануз касалхонада қолаётганини айтди. 4 июль Сумида мотам куни деб эълон қилинди.
Украина расмийларига кўра, душанба куни Суми шаҳри марказига жами тўртта “Шаҳед” дрони учиб келган. Украина томони мазкур ҳолат юзасидан “уруш қонунлари ва одатларини бузиш орқали қасддан одам ўлдириш” моддаси бўйича жиноят иши очди.
Москвадаги аэропорт дрон ҳужумидан сўнг парвозларни вақтинча тўхтатди
Кремль Украина Москвага бешта дрон билан ҳужум қилгани, уларнинг ҳаммаси уриб туширилганини хабар берди.
Москвадаги Внуково аеропортида “аэропортга боғлиқ бўлмаган техник сабабларга кўра” парвозлар чекланди, деб хабар берди Росавиация агентлиги.
Қатор рейслар бошқа аэропортларга йўналтирилган.
Дастлабки маълумотларга кўра, уч дрон турли вақтларда Москва шаҳри томонга учаётган бўлган. Улардан иккитаси Новая Москвада радиоэлектрон кураш воситалари билан тўхтатилган ва Внуково аэропорти яқинига қулаган.
Аэропорт маъмурияти “техник сабабларга кўра учоқларни қабул қилиш ва учириш чекланган”ини билдирди.
Flightradar сервисида эса Анқарадан учиб келган бир учоқ Внуково атрофида бир соатдан кўпроқ айланганини кўриш мумкин.
“Яндекс. Расписание” хизмати маълумотига кўра, жами 31 та рейс кечиктирилган. Москва вақти билан эрталаб соат саккизда Внуково аэропортида парвозларга чеклов бекор қилина бошланган.
РИА Новости хабарида яна бир дрон Москва вилоятининг Кубинки деган жойида уриб туширилгани ва ҳарбий объект ҳудудига қулагани айтилади. Дастлабки маълумотларга кўра, ҳеч ким жабрланмаган, вайронагарчилик йўқ. Бошқа тафсилотлар очиқланмаган.
Телеграм-каналлар тутундан ҳосил бўлган булут акс этган видеоларни эълон қилмоқда. Маҳаллий аҳоли вакиллари айтишича, бир неча сония фарқ билан камида иккита портлаш содир бўлган, портлашлар сабаби эса ҲҲМ воситаларининг зарбалари бўлиши мумкин.
Shot телеграм-канали Москва остонасида уриб туширилган дронлардан бири ёки унинг парчалари Внуково аэропорти яқинида жойлашган Кривошеино қишлоғидаги хўжалик биноси устига тушганини ва бино ёниб кетганини хабар қилди.
Шунингдек Калуга вилоятида ҳам бир дрон уриб туширилгани хабар қилинмоқда.
Москва мэри Сергей Собянин Москвада жабрланганлар ва вайрон бўлган бинолар йўқлигини айтган.
Беларус президенти Лукашенко Пригожин Россияга қайтганини билдирди
Россияда ўтган ой бўлган қуролли исённи бостиришда воситачилик қилган Беларус президенти Александр Лукашенко Евгений Пригожин Беларусдан кетганини хабар қилди:
"Евгений Пригожин Санкт-Петербургда. Бугун эрталаб балки Москвага ёки бошқа жойга кетган бўлиши мумкин, аммо у ҳозир Беларусда эмас."
Лукашенко шунингдек, Вагнер бўлинмаларининг Беларусга кўчирилиши масаласи ҳал этилмагани, бу Россия ва Вагнерга боғлиқ эканини қўшимча қилди.
Унинг изоҳларидан кўринадики, келишув шартлари ва уни амалга оширилиш билан боғлиқ катта ноаниқликлар бор.
6-июл, пайшанба куни Кремл матбуот котиби Дмитрий Песков «Вагнер» етакчиси Евгений Пригожиннинг ҳаракатларини кузатмаётганини айтди.
Россия давлат телевидениеси чоршанбага ўтар кечаси “Вагнер” ХҲШ бошлиғи Пригожинни қаттиқ қоралади ва у уюштирган исён бўйича тергов давом этаётганини айтди.
Озодликнинг беларус хизмати ёзишича, Planet Labs сунъий йўлдошдан олган тасвирларда Беларусдаги илгари россиялик сафарбар қилинган аскарлар ҳарбий тайёргарликдан ўтган уч йирик полигон ҳудудидаги чодирлар йиғиб олингани қайд этилди. Гап Барановичи, Лепел ҳамда Осиповичи яқинидаги ҳарбий полигонлар ҳақида бормоқда.
Хусусан, 2023 йил 4 июлда олинган фотосуратда Барановичи яқинида жойлашган “Обуз-Лесновский” полигонидаги лагерь ғойиб бўлган. Сунъий йўлдошдан олинган тасвирлар 2022 йил октябрда солинган лагерь 30 июндан йиғила бошланганини кўрсатмоқда.
Лепел полигонига 2022 йилнинг октябрь ойи ўрталаридан Россия ҳарбийлари келиб жойлаша бошлаганди. 2023 йил 4 июлдаги фотода эса полигонда чодирлар демонтаж қилинаётгани акс этган.