НАТОга аъзо давлатлар Россия ҳужуми эҳтимолига режа ишлаб чиқдилар
Россия билан чегаралар яқинида НАТОнинг доимий ҳарбий базалари пайдо бўлиши мумкин.
Литва президенти Гитанас Науседа НАТОни Москва Беларусда тактик ядро қуролларини жойлаштиргани сабабли Россия билан алоқалар ва ҳамкорлик тўғрисидаги актни бекор қилишга чақирди.
Бундай ҳолда, Россия Федерацияси билан чегаралар яқинида доимий ҳарбий базаларни жойлаштириш мумкин бўлади.
Шунингдек, Совуқ уруш давридан бери биринчи марта НАТО Россия ҳужуми содир бўлган тақдирда режа бўйича келишиб олади, деб ёзади Рейтерс.
Душанба куни, НАТОнинг Вильнюс саммити бошланишидан бир кун олдин Альянсга аъзо мамлакатлар Россия тарафидан бўлажак муҳтамал ҳужумдан минтақавий ҳимояланиш режасини келишиб олди.
Бу ҳақда, ўз манбаларига таяниб Reuters ва dpa хабар бермоқда.
Режа саммитда тасдиқланиши керак. Унда фавқулодда вазиятларда НАТОнинг ўта муҳим ҳудудларини мудофаа қилиш батафсил тасвирланган.
Шу муносабат билан қандай ҳарбий имкониятлар зарурлиги белгиланган. Режага қуруқликдаги қўшинлар, ҳаво ва ҳарбий-денгиз кучларидан ташқари, кибернетик ва космик кучлар ҳам киритилган, дейилади dpa хабарида.
НАТО режаси ҳарбий бюджетларни ошириш, қурол-аслаҳа ишлаб чиқаришни кўпайтириш ҳамда Альянснинг кучли аъзолари томонидан кучсизроқ аъзоларга кўмак кўрсатилишини ҳам назарда тутади.
НАТО раҳбариятига кўра, ҳар бир аъзо мамлакат ўз ҳарбий бюджетини камида ЯИМнинг 2 фоизига ошириши лозим.
Ушбу режани бажариш учун бир неча йил вақт керак бўлиши айтилмоқда. Айни чоғда, ташкилот вакиллари Шимолий Атлантика иттифоқи муҳтамал тажовузларга зудликда жавоб қайтаришга шай бўлиши шартлигини таъкидлаганлар.
НАТО СССР ва Ғарб ўртасидаги совуқ уруш тугаганидан сўнг илк бор шунақа режани қабул қилаётгани эътиборга молик.
Reuters маълумотига кўра, Туркия режа жўғрофик жиҳатдан Анқара билан ҳудудий даъволашаётган Кипр сингари жойларни ҳам ўз ичига олишини рўкач қилиб, унинг қабул қилинишига тўсқинлик қилган.
Бироқ дипломатлардан бири Reuters билан суҳбатда Туркия алалоқибат муроса қилганини ва ўз эътирозларини қайтариб олганини айтган.
Россия Украинага бостириб кирганидан сўнг НАТО ўз стратегик концепциясида Россияни “хавфсизликка энг катта таҳдид” деб белгилади.
Шу муносабат билан НАТОнинг 2022 йили Мадридда ўтказилган саммитида Марказий Европа мамлакатларидаги контингентни ошириш билан Альянснинг шарқий қанотини мустаҳкамлашга қарор қилинди.
Ушбу мамлакатлардаги батальон жанговар гуруҳларини йирикроқ ҳарбий бўлинмалар – бригадалар билан алмаштириш таклиф қилинган.
Шу билан бирга, НАТОнинг Тезкор ҳаракат қилувчи кучлари миқдорини 40 мингдан 300 минг аскарга кўпайтириш режаланган.
Қуруқлик, ҳаво ва денгиз бўлинмаларидан иборат ушбу кучлар доимий дислокация жойидан саноқли кунлар ичида можаро ҳудудига етиб бориши керак бўлади.
Туркия Швециянинг НАТОга киришига яшил чироқ ёқди
Туркия президенти Ражаб Тоййиб Эрдўғон ва Швеция бош вазири Улф Кристерссон ўртасида ўтган Швециянинг НАТОга қўшилиши масаласидаги музокара муваффақиятли якунланди.
Вилнюсда ўтаётган НАТО саммити доирасидаги музокаралар чоғида Эрдўғон Швециянинг НАТОга қўшилиш таклифини парламентга юборишини билдирди.
Швеция ва Финляндия ўтган йили Россиянинг Украинага бостириб кириши манзарасида ўзларининг ҳарбий қўшилмаслик сиёсатидан воз кечиб, НАТОга аъзо бўлиш учун ариза топширган эди.
Франция ва Германия Украинага узоқ масофали ракеталар, танклар беради
Франция Украинага узоқ масофали ракеталар етказиб беришни бошлайди, бу эса Киев кучларига ўзини ҳимоя қилиш имконини беради, деди Франция президенти Эммануел Макрон:
“Мен Украинага ўз ҳудудини ҳимоя қилиш учун доктринамизга риоя қилган ҳолда, илғор қурол ва техникалар етказиб беришни кўпайтиришга қарор қилдим”.
У ваъда қилинган ракеталар тури ва миқдори ҳақида батафсил маълумот беришни истамади.
Бошқа хабарларда айтилишича, бу ракеталарнинг парвоз масофаси 250 дан 560 километргача.
Айни дамда НАТОга аъзо 31 давлат етакчилари Вилнюсда йиғилган. Саммитда Россия бошлаган уруш оқибатлари муҳокама қилинмоқда.
Германия канцлери Олаф Шолц ва мудофаа вазири Борис Писториус НАТОнинг Вилнюсдаги саммитида Украинага 700 миллион евролик янги қурол-яроғ пакетини тақдим этишини эълон қилади, деб ёзади Süddeutsche Zeitung газетаси манбаларга таяниб.
Янги қурол-яроғ пакетига иккита Патриот зенит-ракета тизими, 25 та Леопард танки, 40та Мардер пиёдалар жанговар машинаси, 20 мингта артиллерия снаряди киради.
Столтенберг: НАТО иттифоқчилари Украинага аниқ ва ижобий сигнал юборади
НАТО бош котиби Йенс Столтенберг Вилнюсда бўлиб ўтаётган саммитда НАТО аъзолари Украинанинг келажакда альянсга аъзо бўлиш шартларини аниқ эълон қилади дея таъкидлади.
Столтенберг Украина учун икки томонлама хавфсизлик кафолатлари мамлакатнинг келажакда НАТОга аъзолиги бўйича саммитда қабул қилинадиган қарорларга қўшимча бўлишини айтди:
"Итифоқчилар Украинага НАТОга аъзолик масаласида аниқ ва ижобий хабар беришларини кутяпман. Мен узоқ йиллик дастур билан бир қаторда Украина кучлари ва НАТО кучлари ўртасидаги ўзаро ҳамкорликни ривожлантириш учун 3 элементдан иборат пакетни таклиф қилдим. Бу Украинани НАТОга яқинлаштиради”.
Столтенберг журналистнинг Россия ядро позицияси ҳақидаги саволига Россия Беларусда ядро қуролини жойлаштиришини эълон қилганига қарамай, ядровий позициясида ўзгариш бўлмаган, дея жавоб қайтарди:
"Россиянинг ядровий риторикаси хавфли ва маъсулиятсиз. Россия билиши керак, ядро қуроли билан жанг қилиб бўлмайди ва унда ҳеч қачон ғолиблар бўлмайди. НАТО иттифоқчилари, Россиянинг ҳаракатларини диққат билан кузатиб боради. Биз Россиянинг Беларусга тактик ядро қуролини жойлаштириш қарорини қоралаймиз".
Унинг қўшимча қилишича, альянс “Вагнер” гуруҳи жангчиларининг Беларусга жойлашгани ҳақидаги гапларга унчалик ҳам ишонмайди.