Путин нега исёндан кейин Пригожин билан учрашди?
Кремль “Вагнер” ХҲШ қуролли исёнидан сўнг президент Владимир Путин унинг раҳбари Евгений Пригожин билан учрашганини тасдиқлади.
Россия расмийлари учрашув бўлганини қарийб икки ҳафта яширди, аммо Франциянинг Libération газетаси Ғарб разведкасидаги манбаларига таяниб, бу ҳақида ёзганидан сўнг ортиқ сир тута олмади.
Мақола чиққанидан кейин Дмитрий Песков учрашув ўтказилганини тан олди. Путин Пригожин билан нималарни муҳокама қилган бўлиши мумкин? Кремль учрашув бўлганини нега яширди?
“Менимча, бу учрашув Пригожиннинг баҳридан ўтилмаслигига ишора. Машҳур ибора билан айтганда, Пригожин “аблаҳ бўлса ҳам, ўзимизнинг аблаҳ”. Унинг иши ёпилган, бироқ Россия Федерацияси ҳокимият тизимидаги мақоми сақланиб қолади – Кремль мана шундай мужда беряпти. Умуман, Россиянинг Пригожинга, унинг методларига, бизнесига шерик бўлиши мамлакатни бошқа, инсоний усуллар билан ортиқ бошқариб бўлмаслигини билдиради. Оддий бюрократия ёки ҳатто оддий армия билан уруш олиб бориб бўлмайди. Шу боис, ҳозирги Россияга бунақа нодир кўникмаларга эга одам зарур. Песков бу борада мунозара давом этаётганини тасдиқлаб берди. Бизда на парламент бор, на матбуот, ҳатто Путин билан жонли мулоқотлар ҳам бекор бўлди, Пригожинда эса ҳамма алоқалар бор, у Путин билан тўғридан-тўғри гаплаша олади”, дейди “Новая газета. Европа” бош муҳаррири Кирилл Мартинов.
Шойгу Россия Украинада кассетали снарядларни қўллаши билан таҳдид қилди
Россия мудофаа вазири Сергей Шойгу Украинага кассетали ўқ-дорилар берилган тақдирда Россия армияси ҳам жанг майдонида Украина қўшинларига қарши шунақа снарядларни қўллай бошлашини айтди.
Шойгу буни “мажбурий ва жавоб чораси” деб деб атар экан, “Россия кассетали ўқ-дориларни қўллашдан шу пайтгача ўзини тийди, ҳозир ҳам тийилиб турибди, чунки улар тинч аҳоли учун нақадар хатарлилигини тушунади”, дея урғулади.
Бироқ Украина расмийлари кенг кўламли уруш бошланганидан бери Россия армияси бир неча бор кассетали снарядлардан фойдаланганини даъво қилмоқда. Москва эса буни инкор этяпти.
New York Times: Украинага ATACMS беришлари мумкин
Оқ уй Украинага ATACMS олисга учар ракеталарини бериш масаласида ёпиқ муҳокамалар ўтказмоқда. Бу ҳақда икки америкалик ва бир европалик мулозимга таянган ҳолда New York Times хабар қилмоқда.
Газета суҳбатдошларига кўра, гап АҚШ армияси захирасидан “ер-ер” таснифидаги бир нечта ракетани Киевга бериш устида бормоқда.
Айни чоғда Пентагонда “ҳозир Украинага олисга учар ракеталар керак эмас”, деган фикр мавжуд. Қолаверса, АҚШда ATACMS унча катта эмас ва уларнинг ҳам аксари турли ҳудудлар, жумладан Корея яриморолига жойлаштирилган. Ракеталарнинг Украинага берилиши бошқа “қайноқ нуқталар” хавфсизлигига таҳдид туғдиради, деб ёзади New York Times.
Украина кўпдан бери ATACMS тактик ракета комплексларига эга бўлишга интилмоқда. Киев “300 километргача масофага учадиган ушбу ракеталар Россиянинг фронт чизиғидан анча узоқда жойлашган бўлинмаларига, таъминот объектларига зарба беришга имкон беради”, деб ҳисоблайди.
Нашр урғулашича, Украина ҚК ATACMS’лар ёрдамида Россиянинг аннексия қилинган Қримдаги базаларини йўқ қилишни истайди.
Вилнюсда хавфсизлик чоралари кучайтирилди
НАТОга аъзо мамлакатлар Украинага нисбатан Альянсга аъзо бўлиш ҳаракатлари режаси (АҲР) татбиқ этилмаслигига розилик берди. Бу ҳақда НАТО бош котиби Йенс Столтенберг ташкилотнинг Вильнюсдаги саммити доирасида ўтказилган матбуот анжуманида маълум қилди. Унга кўра, бу Украинанинг НАТОга қўшилиши муддатларига доир бирон аниқ маънони англатмайди.
“Иттифоқчилар ўзаро келишиб, шартлар бажарилганидан кейингина биз Украинага НАТОга киришга таклифнома берамиз”, дея Столтенбергдан иқтибос келтиради Би-би-си рус хизмати.
НАТОга аъзо бўлиш ҳаракатлари режаси – ташкилотга янги аъзоларни қабул қилиш дастури бўлиб, 1999 йилда маъқулланган. Ўтган йили Финляндия ва Швеция АҲДсиз Альясга таклифнома олган эди.
Украина президенти Владимир Зеленский, ўз навбатида, Украинани қабул қилиш масаласида сусткашлик қилгани учун Альянсни танқид қилди. “Вильнюс йўлида эканмиз, айрим масалалар Украинасиз муҳокама қилинаётгани ҳақида хабар келди”, деди у.
“Бир нарсани таъкидлашни истардим: булар Украинанинг НАТОга аъзо бўлишига эмас, балки НАТОга таклифномага доир жумлалар. На таклифнома бериш, на аъзо бўлиш бўйича аниқ вақт белгиланмаганлиги қип-қизил абсурд. На Украинани НАТОга таклиф этиш, на уни Альянс аъзоси қилиш учун тайёргарлик йўқдек туюлмоқда”, деб ёзди президент ўз телеграм-каналида.
Расмийларга кўра, АҚШ, Буюк Британия, Франция ва Германия Киевга мудофаа учун замонавий қуроллар, ўқув машғулотлари ва бошқа ҳарбий ёрдамлар кўринишида узоқ муддатли хавфсизлик кафолатларини тақдим этиши кутилмоқда. Зеленский НАТОнинг бошқа етакчилари билан ҳам учрашади. Альянс лидерлари Украинанинг келажаги НАТОда эканлигини эътироф этди, аммо аъзолик муддатини белгилашдан бош тортди.