Қирғиз муҳожири: "Майор ҳафтасига бир неча бор келиб-кетарди"
Қирғизистонлик Нурлан Ўрмонов 19 ёшда, у Боткен вилоятининг Қадамжой туманида туғилган ва Россияга ишлаш учун келган: у Краснодардаги заводда ишлаган.
Яқинда Нурлан Краснодар ўлкасида ҳибсга олинган ва қарийб бир ой хорижликлар учун махсус изоляторда ўтирган. У ерда, мигрант йигитнинг сўзларига кўра, уни Россия армияси билан шартнома имзолашга ва Украинадаги урушга боришга мажбурлашган.
Нурлан ва бошқа муҳожирлар яқинда Россиянинг турли минтақаларида хавфсизлик кучлари томонидан ўтказилган оммавий аксилмигрант рейдлари пайтида ушланган.
“Она Ватан” ўрнига “Она Украина”
Украина пойтахти Киев мамлакатнинг совет ўтмишининг энг кўзга кўринган қолдиғи, шаҳар тепалигида турган “Она Ватан” ҳайкалини “Она Украина” деб номламоқчи. Киев ҳайкал тутган қалқонда тасвирланган шўъроларнинг “Болға ва ўроғ”и билан хайрлашишга тайёрланмоқда.
30 июл куни Европадаги энг баланд 62 метрлик Ватан ҳайкали тепасида ишлаётган саноат алпинистлари ўроқ ва болға билан икки гулчамбардан бирини кесиб, ерга туширди. Бу ҳайбатли ҳайкал 1981 йилда шахсан СССР раҳбари Леонид Брежнев томонидан очилган.
Анъанавий совет герби ўрнини Тризуб – Украина пойтахтида чилангарлар томонидан пайвандланган уч қиррали герб эгаллайди. Очилиш 24 август, Украина Мустақиллик кунига мўлжалланган.
"Москва Сити"га яна бир дрон ҳужум қилди
1 августга ўтар кечаси Москва шаҳрининг “Москва Сити” бизнес марказидаги IQ-Квартал биносига яна бир дрон келиб урилди. Бунгача Москва вилоятида портлашлар содир бўлгани хабар қилинганди. Москва мери Сергей Собяниннинг сўзларига кўра, 21 қаватда иморатнинг ташқи қисми шикастланган ва 150 квадрат метр майдоннинг ойналари синган.
Россия Мудофаа вазирлиги кечаси Москва вилоятида Украинанинг иккита учувчисиз учоқни уриб туширганини ва биттаси "электрон мослама ёрдамида "Москва Сити" мажмуаси ҳудудига қулатилганини” айтди. Бинонинг 21-қаватида Россия Иқтисодий тараққиёт вазирлиги жойлашгани маълум.
Москвага янги дрон ҳужуми муносабати билан Внуково аэропорти ишни бир муддатга тўхтатди.
Ҳалок бўлганлар ва жароҳатланганлар ҳақида маълумотлар ҳозирча йўқ.
Икки кун аввал, 30-июлга ўтар кечаси иккита дрон Москва Сити минораларига қулаган эди. 24 июл куни дронлар Москванинг қоқ марказига учиб келиб, улардан бири Россия Мудофаа вазирлиги биноси ёнидаги Комсомолский проспектига қулаган эди.
Бу уруш бошланганидан бери Москва шаҳрига қилинган 5чи ҳарбий дронлар ҳужумидир.
Кривой Рогда 1 август мотам куни деб эълон қилинди
Кеча Россия Украина жанубидаги Кривой Рог шаҳрига ракеталар билан ҳужум қилди. Украина расмийлари ҳужум оқибатида тўрт киши, жумладан, 10 ёшли қиз ва унинг онаси ҳалок бўлгани ва яна бир неча киши вайроналар остида қолиб кетганини хабар берди.
Шаҳар мери Александр Вилкул қурбонлар сони 5 кишига етгани, жароҳатланганлар 73 киши эканини хабар қилди.
Ҳукумат 1 августни Кривой Рогда мотам куни деб эълон қилди.