Буданов: Севастополдаги Россия Қора денгиз флоти штабига ҳужумда 9 киши ҳалок бўлган
Украина разведкаси бошлиғи Кирилл Буданов “Америка Овози” радиосига берган интервюсида Севастополда камида 9 киши ҳалок бўлгани, 16 дан ортиқ киши, жумладан, Россия Қора денгиз флоти штаби бошлиғи, генерал-лейтенант Олег Цеков яраланганини айтди.
Озодлик радиоси бу маълумотни мустақил тасдиқлай олмайди.
Аннексия қилинган Севастополнинг Россия томонидан тайинланган губернатори Михаил Развожаев ҳужум оқибатида штаб биносида ёнғин чиққанини айтган.
У аҳолини шаҳар марказидаги денгиз флоти штаби жойлашган ҳудудга яқинлашмасликка чақирган.
Ҳозирда ўт ўчирувчилар штабда ишламоқда, шаҳар марказига элтувчи баъзи йўллар ёпилган.
Россия Мудофаа вазирлиги ҳужум оқибатида бир ҳарбий хизматчи бедарак кетганини айтмоқда.
Вазирликнинг даъво қилишича, ҳаво ҳужумидан мудофаа кучлари Севастополга учирилган жами бешта ракетани уриб туширган.
Украина ҳарбийлари Россия Қора денгиз флоти штаб-квартирасига ҳужум қилганини тасдиқлади, бироқ бу ҳақда кўп маълумот бермаяпти.
Зеленский Люблин шаҳрида полшалик кўнгиллилар билан учрашди
Украина президенти Владимир Зеленский Канададан қайтиш чоғида кутилмаган ташриф билан Полшада тўхтади. Зеленский у ерда полшалик кўнгиллилар билан учрашди ва уларга миннатдорлик билдирди:
«Бизга нафақат қўшни, балки ҳақиқий дўстдек яқин бўлган шундай ўғил ва қизларимиз борлиги учун Полша халқидан миннатдорман».
Полшалик журналист ва кўнгилли Бянка Залевска Россия Қримни аннекция қилган 2014 йилдан то ҳозирги кунга қадар Россиянинг тажовузи ҳақида туркум хабарлар бериб келади.
"Биз жуда миннатдормиз. Менимча, Украина бутун Европани, шу жумладан Полшани ҳимоя қилаётганини барча поляклар тушунади ва Украинадан миннатдор”, деди Залевска.
Зеленский Дамиан Дуда жамоаси билан Бахмут ва Соледардаги жангларда яраланган украиналик аскарларга ёрдам бергани, тиббий буюмлар сотиб олиш ва фронт шифокорларини тайёрлаш учун пул йиғганини эътироф этди.
Зеленскийнинг ташрифи Полша ўтган ҳафта Украинадан ғалла импортига қўйилган тақиқни узайтириш тўғрисида қарор қабул қилиб, Киев билан муносабатлари бироз кескинлашган пайтга тўғри келди.
Лавров Украина тинчлик режаси ва БМТнинг Қора денгиз бўйича ғалла келишувини жонлантириш таклифига шубҳа билдирди
Россия ташқи ишлар вазири Сергей Лавров Украина таклиф қилаётган тинчлик режаси ҳамда БМТнинг сўнгги лойиҳаси ҳақида гапирди. Унинг айтишича Украина тинчлик режаси ҳамда Қора денгиз ғалла ташаббусини жонлантириш бўйича таклифлар «ҳақиқатга яқин эмас»:
«Буни амалга ошириш мутлақо имконсиз. Бунинг иложи йўқ. Бу таклифлар реал эмас ва ҳамма буни тушуниб турибди, лекин айни пайтда бу музокаралар учун ягона асос эканлигини айтишмоқда».
Лавров агар Киев ва унинг Ғарбдаги иттифоқчилари айни позицияда қолса, можаро жанг майдонида ҳал бўлишини таъкидлади.
Лавровнинг Москва Россия қишлоқ хўжалик банкига нисбатан санкцияларни олиб ташлаш ва уни глобал SWIFT тизимига қайтариш бўйича ваъдалар бажарилмагани сабаб дон келишувини тарк этганини айтди.
Германия Украинага 400 миллион евролик янги ёрдам пакетини эълон қилди
Бу ҳақда Германия Мудофаа вазирлиги сайтида чоп этилган хабарда айтилади. Ажратилган маблағлар Украинага миналанган Гепард танклари, ИРИС-Т зенит-ракета комплекслари ва майдонларга қарши курашиш учун 200 дона МРАП зирҳли техникаси учун йўналтирилади.
Ёрдам пакети шунингдек, 155 мм артиллерия тизимлари учун ўқ-дорилар, миномёт ўқлари ва масофадан жойлаштирилган миналар учун АТ-2 мина ракеталарини ўз ичига олади.
Шунингдек, қишки жиҳозлар, аввал етказиб берилган тизимлар учун эҳтиёт қисмлар, транспорт воситалари ва “нафақат қуруқликда, балки денгизда ҳам тажовузкорга зарба берадиган 50 та сув усти дронлари берилади.
“Шундай қилиб, биз Украинага энг катта фойда келтирадиган асосий соҳаларга эътибор қаратмоқдамиз, шунинг учун биз асосий эътиборни артиллерия, ҳаво ҳужумидан мудофаа, ўқ-дорилар ва машғулотларга қаратамиз”, дейилади Рамштейннинг 15-йиғилиши якунлари бўйича эълон қилинган хабарда.
Германия Украинага ёрдам кўрсатиш бўйича Европада биринчи, дунёда эса АҚШдан кейин иккинчи ўринда туради, дея қайд этади Германия Мудофаа вазирлиги.