Тоғли Қорабоғда ёқилғи омбори портлаши натижасида 20 киши ўлди, 290 киши жабрланди
Тоғли Қорабоғ ҳудудида, Степанакерт – Аскеран трассаси яқинидаги ёқилғи омбори портлаши натижасида 20 киши ўлиб, 290 киши жабрланди. Бу ҳақда тан олинмаган Тоғли Қорабоғ республикаси Соғлиқни сақлаш вазирлигига таяниб “Интерфакс” хабар қилмоқда.
“Тиббий марказларга танаси турли даражада куйган 290 киши ётқизилди. Етти киши касалхонада вафот этди. 13 кишининг жасадлари таниб олинганича йўқ. Ўнлаб одамлар жуда оғир аҳволда қолишмоқда”, дейилади хабарда.
Степанакерт марказий клиник шифохонасида беморлар эвакуацияга тайёрланмоқда. У ерга Арманистондан “зарур тиббий жиҳозлар, дори-дармон ва шифокорлар билан” вертолётлар жўнатилгани хабар қилинган.
Воқеа 25 сентябрь оқшомида содир бўлди. Тан олинмаган республиканинг Фавқулодда вазиятлар давлат хизмати портлаш ёқилғи резервуарларидан бирида содир бўлганини билдирди.
Тан олинмаган ТҚР инсон ҳуқуқлари бўйича вакили Гегам Степанян аввалроқ, жабрланганларни эвакуация қилиш учун Қорабоғдан Арманистонга ҳаво йўлагини очиш зарурлигини айтган эди.
Рамзан Қодиров маҳбусни калтаклаётган видеони тарқатди
Рамзан Қодиров ўғли Адам Қуръонни ёқишда айбланган талаба Никита Журавелни калтаклаганини тан олиб, ўзининг Телеграм-каналида ўғли билан фахрланишини” ёзди.
"Калтаклади ва тўғри иш қилди. Бундан ташқари, ҳар қандай Муқаддас Китобга тажовуз қилган, жумладан, уни намойишкорона ёқиб юборган ва шу орқали буюк мамлакатимизнинг ўн миллионлаб фуқароларини хафа қилган ҳар бир киши қаттиқ жазоланиши керак, деб ҳисоблайман," деб ёзди Чеченистон раҳбари.
Мамлакатимизда Россия президенти Владимир Владимирович Путин томонидан имзоланган Муқаддас Битикларни ҳимоя қилувчи ноёб қонун мавжуд. Мамлакат фуқароларининг диний қадриятлари давлат томонидан юқори даражада ҳимоя қилинади. Провокаторларга ўрин йўқ!
Видеода ҳарбий кийим кийган Адам Қодиров Журавелнинг бошига мушт туширгани ва тепгани, кейин уни полга йиқитгани ва калтаклашда давом этаётгани кўрсатилган.
Ўз навбатида, Россия Федерацияси Президенти ҳузуридаги Инсон ҳуқуқлари бўйича кенгаш аъзоси Ева Меркачева Қодиров томонидан эълон қилинган иқрорни "Россиянинг бутун ҳуқуқий тизимига қарши кураш" деб атади ва у Федерал Жазони ижро этиш хизматига Никита Журавелни зудлик билан Грознийдаги тергов ҳибсхонасидан бошқа вилоятга олиб кетилиши талаби қўйилган сўров юборган.
Аввалроқ Чеченистон Ахборот вазири Ахмед Дудаев Рамзан Қодировнинг 15 ёшли ўғли Адам талаба Никита Журавелни “диний туйғулар уйғунлигида” калтаклаганини тан олганди.
Никита Журавел 2023 йилнинг 21 май куни Волгоградда жоме масжиди олдида Қуръонни ёқиб юбораётган 11 сониялик видеода пайдо бўлгани учун ҳибсга олинган эди. Тергов қўмитасининг таъкидлашича, сўроқ пайтида Журавел “Украина махсус хизматлари кўрсатмаси бўйича 10 минг рубл мукофот эвазига ёқиб юборганини” тан олган.
Журавелга қарши диндорларнинг ҳис-туйғуларини ҳақорат қилгани учун жиноий иш очилиб, кейин у Чеченистонга кўчирилган эди.
Навалний 19 йиллик қамоқ жазосига апелляция берди
Москва апелляция суди бугун мухолиф сиёсатчи Алексей Навалнийнинг экстремизм айблови бўйича берган апелляциясини кўриб чиқади. Бу айблов Навалнийнинг қамоқ муддатига 19 йил қўшилишини англатади.
Владимир Путиннинг ашаддий танқидчиси бўлган Навалний фирибгарлик ва бошқа айбловлар билан 11 ярим йиллик қамоқ жазосига ҳукм қилинган эди.
"Путин ўз шахсий ҳокимиятини кенгайтириш учун қўшни давлатни азоб-уқубатга дучор қилмоқда, у ерда одамларни ўлдирмоқда. Эндиликда оддий ҳаёт кечираётган ва оиласига гамхўрлик қилиши керак бўлган кўп сонли Россия фуқароларини уруш ўчоғига ташламоқда. Шунинг ўзи жиноят эди, энди эса бу каттароқ жиноятга айланди”, деган эди Путин танқидчиси.
Навалнийнинг сиёсий ҳаракати қонундан ташқари деб топилиб, »экстремистик" деб эълон қилинган.
Латвия полицияси: “Я – русский” ёзувини ёпиштириб олган ҳайдовчиларга жарима солинади
Бу ҳақда полиция идораси Х (собиқ “Твиттер”) ижтимоий тармоғидаги саҳифасида маълум қилди.
Таъкидланишича, шунақа ёзувли автомобил аниқланганда полиция ҳайдовчидан уни дарҳол олиб ташлашни ва нима мақсадда ёпиштиргани ҳақида изоҳ беришни талаб қилади. Бундан ташқари, автомобил эгаси жаримага тортилади.
Полиция департаменти ойнасига “Я – русская” деган ёзув ёпиштирилган Латвия рақамли автомашина сурати интернетда тарқалгани ортидан шундай баёнот билан чиқди.
Латвия полициясига кўра, Украинадаги уруш манзарасида автомобилларда “провокация мазмунидаги ёзувлар” қўлланишига йўл қўйиб бўлмайди.
Аввалроқ Латвия Адлия вазирлиги мамлакат ичидаги Россия ва Беларусда рўйхатдан ўтган автомобилларни мусодара қилишга доир қонун лойиҳасини тайёрлаётгани хабар қилинганди.
Латвия сейми (парламенти) Россия уруш рамзларини жамоат жойларида намойиш этганлик учун жарималар белгилаган: Z ва V ҳарфлари учун жисмоний шахс 350, юридик шахс эса 2,9 минг еврогача жарима тўлайди. Бундан ташқари, мамлакатда “ҳарбий жиноятлар ва инсониятга қарши жиноятларни очиқча оқлаш ва улуғлаш” деган жиноий модда ҳам мавжуд. Россиянинг Украинага тажовузи айнан шунақа жиноятга тенглаштирилган.