Путиннинг матбуот котиби: Қодировнинг ўғли билан бўлган воқеага изоҳ бермайман
Кремл матбуот котиби Дмитрий Песков Чеченистон раҳбари Рамзан Қодировнинг қамоқдаги ўсмир ўғлининг калтакланишига изоҳ бермаслигини айтди:
“Ҳа, кечирасиз. Мен дарҳол айтаман, мен Қодировнинг ўғли билан бўлган воқеага изоҳ бермайман. Илтимос, саволларингизни беринг. Мен изоҳ беришни истамайман”.
Россия Чеченистон раҳбари Рамзан Қодиров душанба куни Қуръонни ёқишда айбланган маҳбусни калтаклаган ўсмир ўғли Адам билан фахрланишини айтганди.
2004 йилда бомба портлаши оқибатида ҳалок бўлган отаси Ахмат изидан 46 ёшли Қодиров 2007 йилда президент бўлганидан бери Чеченистонни қаттиққўллик билан бошқариб келади. У Путиндан вайрон бўлган ҳудудни тиклаш учун катта маблағ олди ва барча катта лавозимларга ўз қариндошларини қўйди. Қодировнинг касаллиги ҳақида эса ҳанузгача миш-мишлар юрибди.
АҚШнинг янги санкциялари
Кеча, 27 сентябр куни Қўшма Штатлар Эронга ҳужумчи дронлар учун бутловчи қисмлар етказиб берган Эрон, Хитой, Гонконг, Туркия ва Бирлашган Араб Амирликларининг бешта юридик шахс ва икки жисмоний шахсига қарши санкциялар жорий қилди.
Россияда "Геран-2" деб аталган "Шаҳед" ҳужумчи дронлари ўтган йилнинг охирида фронтда қўлланила бошланди. Жорий йилда Татаристоннинг Елабуга шаҳрида дронларни йиғиш ташкил этилди ва унга муҳожирлар, жумладан ўзбек қизлар ишга таклиф қилинаётгани Озодликда хабар берилган эди.
"Украина Эрон ва Суриядаги Шаҳед заводларига зарба бермоқчи бўлган"
Украина август ойида Ғарб иттифоқчиларига Россиянинг Украина ҳудудига зарба беришда фойдаланилган Россия ва Эрон дронларидаги Европа компонентлари ҳақида махфий ҳисобот берди. Бу ҳақда чоршанба куни Британиянинг The Guardian газетаси Украина томонидан G7 мамлакатларига узатилган 47 бетлик ҳужжат билан танишганини ёзди.
Ҳисоботда Украина Эрон ва Суриядаги дрон ишлаб чиқариш майдончаларини йўқ қилиш учун қурол етказиб беришни сўраган. Украина ва Эрон ўртасидаги масофани ҳисобга олиб, бунга қандай эришиш мумкинлиги айтилмаган.
Газетанинг ёзишича, хабарда, Эроннинг Шаҳед дронларида Ғарбда ишлаб чиқарилган 50 дан ортиқ электрон компонентлар топилгани, ҳозирда ишлаб чиқарилиши Россияда қисман маҳаллийлаштирилгани айтилган.
Ҳужжатда Швейцария, Нидерландия, Германия ва Полшадан бўлган тегишли компонентларни ишлаб чиқарувчи бешта Европа компанияси номи келтирилган. Компонентлар Эронга Ўзбекистон, Туркия, Ҳиндистон, Қозоғистон, Вьетнам ва Коста-Рика каби учинчи давлатлар орқали киритилган.
Ўлганга - медал
Бошқирдистонда маҳаллий амалдорлар Украинадаги урушда қатнашган ҳарбий хизматчига медал “тақдим этиш” жараёнини фотошоп қилишибди.
Ваҳоланки Украинада оғир яраланган жангчининг ўзи бир муддат олдин вафот этган.
Бундай ҳаракатнинг сабабларини ҳеч бир амалдор тушунтира олмади. Изоҳга ҳожат йўқ…