Виктор Афзалов Сергей Суровикин ўрнига Россия Аэрокосмик кучлари раҳбари бўлди
Генерал-полковник Виктор Афзалов Россия Аэрокосмик кучларининг янги бош қўмондони этиб тайинланди. 2017 йилнинг октябридан 2023 йилнинг августигача бу лавозимни “”Генерал Армагеддон” лақаби билан танилган Виктор Суровикин эгаллаб турган. У бу лақабни Сурия ҳудудини ялпи бомбардимон қилиш тўғрисида авиацияга буйруқ берган пайтда олган.
“ТАСС” хабарига кўра, Афзалов 2017 йилдан бери Шарқий ҳарбий округнинг Ҳарбий ҳаво кучлари ва ҳаво ҳужумидан мудофаа армиясига қўмондонлик қилган.
Сергей Суровикин 2022 йилнинг октябридан 2023 йилнинг январигача Украинадаги рус қўшинларига қўмондонлик қилган. Унинг номи, хусусан, Украинанинг энергетика тизимига ҳужумлар кампанияси, шунингдек, Херсон ва Херсон вилоятининг ўнг қирғоқ қисмининг тарк этилиши билан боғлиқ эди.
Украинадаги рус ҳарбий қисмлари собиқ қўмондони Суровикин 24 июн куни Пригожин бошчилигида Вагнер ширкати ёлланма аскарлари қўзғолон қилганидан бери жамоатчиликка кўриниш бермади.
"Бир биримизни ўлдириш яхши иш эмас"
Россия армияси бир ҳафтадан ортиқ вақт давомида босиб олишга интилаётган Авдеевка шаҳарчасида одамлар яшамоқда. Тинимсиз бомбардимонлар ва авиация ҳужумлари остидан яшаётганларнинг аксари - ҳеч қаерга кетолмаётган кексалар.
Тамара ва Николай уруш пайтида бир-бирини топволган Авдеевка турғунлари.
Россия Украина ҳарбий самолётларини уриб туширганини, Украина эса Россия техникасига зарба берганини даъво қилмоқда
Шанба куни Россия ўз кучлари сўнгги 24 соат ичида Украина ҳарбий самолётлари ва учувчисиз учоқларини уриб туширганини, танклари ва бронетранспортларини йўқ қилганини, Украина эса ўз қўшинлари Россия ўқ-дори омборлари ва техникаларига ҳужум қилганини даъво қилди.
Россия Мудофаа вазирлиги ўша куни эълон қилган ҳисоботида, Россия ҳарбийлари Украинанинг бир неча ҳужумларини қайтаргани ва Украина шарқидаги Купянск, Лиман ва Донецк, жануби-шарқдаги Запороже ва жанубдаги Херсон йўналишларида бир неча марта ҳужум уюштирганини айтди.
Россия ҳарбий-ҳаво кучлари бўлинмалари, шунингдек, Украинанинг бир нечта ҳужумчи, қирувчи учоғи, вертолёти, шунингдек, 23 та дрон ва бошқа қуролларни уриб туширганини иддао қилди.
Шу куни Украина Миллий ахборот агентлигининг хабар беришича, сўнгги 24 соат ичида фронт минтақасида 100 дан ортиқ жанг бўлиб ўтган.
Украина ҳарбий-ҳаво кучлари Россия аскарлари, қурол-яроғлари ва ҳарбий техникаси жамланган ҳудудларга саккизта, ҳаво ҳужумидан мудофаа ракета тизимларига тўртта зарба берган.
Украина ракета-артиллерия ва артиллерия бўлинмалари ҳам Россия кучларига тегишли бир назорат нуқтаси, битта ўқ-дори омбори ва учта концентрациялашган қурол ва техника ҳудудини нишонга олганини даъво қилди.
Уруш шароитида томонлар бераётган маълумотларни тезкор текшириш имкони Озодликда йўқ.
Россиянинг Харковдаги почта марказига ракета ҳужуми оқибатида олти киши ҳалок бўлди
Украинанинг Харков шаҳридаги почта тарқатиш марказига Россия ракета зарбаси уюштириши натижасида томда катта ўра пайдо бўлди, деворлар ва объектнинг катта қисми вайрон бўлди, натижада олти киши ҳалок бўлди, 14 киши яраланди. Бу воқеа якшанба кунги видеотасвирларда кўрсатилган.
"Бугун Коротич шаҳридаги шаҳар типидаги аҳоли пунктига С-300 ракеталари билан икки марта ҳужум қилинди. Олти киши ҳалок бўлди, 14 киши яраланди. Барча қурбонлар маҳаллий шифохонада даволанмоқда. Тергов ишлари олиб борилмоқда. Суд-тиббиёт экспертлари жалб қилинган, ДНК тестлари ўтказилиши керак, чунки ҳалок бўлган икки кишининг жасади таниб бўлмас даражада ва уларни аниқлаш учун ДНК натижалари зарур”, дейди полиция ходими, полковник Михайло Цап.
Полициянинг айтишича, “Нова Почта” маркази ишчилари бомбапаноҳ томон югуришга улгурмаган, чунки сирена зарбадан бир сониягина олдин янграган.
Украина президенти Владимир Зеленский йўқотишларни тасдиқлади ва ҳалок бўлганларнинг оила аъзолари ва яқинларига ҳамдардлик билдирди.
"Россия террор ва қотиллик орқали ҳеч нарсага эриша олмайди. Барча террорчиларнинг борар жойи бир: қонун олдида жавобгарлик", деб ёзди у.
Украина Бош штабининг эрталабки ҳисоботига кўра, умуман олганда, сўнгги 24 соат ичида Украина ҳудудидаги армия позицияларида, ҳамда тинч аҳоли пунктларига 6 та ракета ва 53 та ҳаво ҳужуми, ракета тизимларидан 54 та ҳужум уюштирилган.
Рейтерс бу хабарларни мустақил равишда тасдиқлай олмади. Россия томони ҳеч қандай изоҳ бермаган.