Украиналик учувчилар F-16ни мустақил бошқаришга тайёр бўлиб қолди
Тез орада украиналик учувчилар парвоз симуляторларидан ҳақиқий учоқларга ўтирадилар.
"Биз самолёт кабинасини тўлиқ такрорлайдиган парвоз симуляторларида таҳсил олаётган учувчиларнинг биринчи гуруҳи инструктор билан ҳақиқий жанговар тайёргарлик учоғига ўтишини кутамиз. Бу яқин келажакда амалга ошиши керак", - деди Украина Ҳарбий ҳаво кучлари сўзчиси Юрий Игнат.
Игнатнинг сўзларига кўра, ғарблик ҳамкорлар украиналик учувчилар технологияни жуда тез ўзлаштирганини таъкидламоқда.
"Биз жанговар учоққа ўтиш босқичида турибмиз, биринчи навбатда ўқитувчи билан бирга учишади, бу машғулотдан сўнг эса йигитларимиз мустақил учишга ўтади", деди Игнат.
Одесса устида 9та дрон уриб туширилди
23 октябр, душанбага ўтар кечаси Россия қўшинлари Одесса, Днепропетровск, Киев, Запороже ва Хмелницкий вилоятларида камикадзелар ва қанотли ракеталар билан ҳужум қилди, деб хабар берди маҳаллий ҳокимият вакиллари.
Одесса вилоятига дронлар ҳужуми тахминан уч ярим соат давом этди, натижада 9 та дрон уриб туширилди.
Хмельницкий ҳарбий маъмурияти раҳбарининг биринчи ўринбосари Сергей Тюриннинг сўзларига кўра, минтақага ҳужум қилган дронлар уриб туширилган.
Украина Қуролли кучлари Ҳарбий-ҳаво кучлари қўмондонлиги маълумотларига кўра, Россия қўшинлари аннексия қилинган Қримдаги Украинанинг жанубий, марказий ва шарқий вилоятларидаги Чауда бурнидан 13 та “Шаҳед”ни учирди. Барча дронлар Украина Қуролли кучлари ҳаво ҳужумидан мудофаа кучлари томонидан уриб туширилган.
Бундан ташқари, рус қўшинлари Киев вилоятига номаълум турдаги дрон билан ҳужум қилган. У ҳам Украина пойтахтига яқинлашаётганда отиб ташланган.
Севастополда портлаш овози
Тунда аннексия қилинган Қримнинг Севастопол шаҳрида ҳам портлашлар овози эшитилди.
"Нова Пошта"га ҳужумда 6 киши ўлдирилди
Шанба оқшомида Украинанинг Харков шаҳридаги почта омборига берилган ракета зарбаси оқибатида олти киши ҳалок бўлди. Харков губернатори Олег Синегубовга кўра, Россиянинг С-300 ракетаси томонидан содир этилган портлашда яна 17 киши жароҳат олди. маъмурлар икки киши ўта оғир аҳволда реанимацияда қолаётганини айтмоқда.
Қурбонларнинг барчаси Украинанинг “Нова Пошта” хусусий почта ва курерлик компанияси ходимларидир. Компания баёнотида айтилишича, ҳаво ҳужуми сиренаси ҳужумдан бир неча дақиқа олдин янгради, бу эса омбор ичидагиларни бошпана олишга вақтлари қолмаган.
Якшанба фирма учун мотам куни бўлиши айтилган.
Украина президенти Владимир Зеленский зарбани "оддий фуқаролик объектига" ҳужум сифатида баҳолади. Украина Харков почта омборига қилинган ҳужумга жавоб қайтаради, деди Владимир Зеленский.
“Россиянинг Харков яқинидаги «Нова Почта» терминалига ҳужуми ҳақида гапирсам, ҳозирда қутқарув операцияси якунланди, барча жабрланганларга зарур ёрдам кўрсатилди. Ҳужумда 17 киши яраланди, олти киши ҳалок бўлди. Қурбонларнинг яқинларига ҳамдардлик билдираман. Россиянинг ҳар бир террорига ва бу ҳужумга жавоб қайтарамиз, деди Владимир Зеленский.