Киев ва Харьковга яна ракеталар ёғилди, Белгородда ҳам портлашлар
Киев ва Харьковда Россия ракета ҳужумларидан жабрланганлар сони юзга яқинлашди.
Украина Қуролли Кучлари Бош Қўмондони Валерий Залужний душман 99 та дрон ва ракета билан ҳужум қилгани, шулардан 72 таси йўқ қилинганини айтди.
Россия Украинага отган ракеталардан бири Воронеждаги қишлоққа тушган.
Украина президенти Владимир Зеленский The Economist журналига берган интервьюсида Путинда тинчликка интилиш аломатларини кўрмаётганини айтди.
Киев ва Харьковга ҳужум
Янги йилнинг иккинчи куни Украинанинг Киев ва Харьков шаҳарлари яна портлашлардан ларзага келди.
Россия Украинанинг бу шаҳарларига ўнлаб дронларни ёғдирган. Украина мудофаа кучлари учирилган дронларнинг аксари уриб туширилганини айтмоқда.
Киев мери Виталий Кличконинг айтишича, йўқ қилинган ракеталарнинг бўлаклари бир қанча туманларга, жумладан, турар-жой биноларига тушган.
Киев ва Харьковда Россия ҳужумидан 90дан ортиқ одам жабрланган.
Кличконинг айтишича, 2 январ куни Киевнинг Печерский туманида газ қувурлари шикастланган, пойтахтдаги бир қанча биноларда электр энергияси узилган.
Киевнинг Соломенский туманидаги кўп қаватли уйга шикаст етган. У ерда қутқарувчилар юздан зиёд кишини эвакуация қилган. Бир аёл вафот этган. Киевда жами 27 киши касалхонага ётқизилган.
Харьковда Россия ракета ҳужумдан 91 ёшли аёл ҳалок бўлган.
Украина қуролли кучлари қўмондони Валерий Залужний Украина осмонида душманнинг 99 та дрон ва ракеталари қайд этилгани, шулардан 72 таси йўқ қилинганини билдирди.
Унинг сўзларига кўра, Украинага отилган ракеталар орасида 10та “Кинжал” ва 3 та “Калибр” қанотли ракеталари ҳам бўлган, уларнинг барчаси уриб туширилган.
Айни пайтда Украина шарқидаги 1, 4 миллион аҳолига эга Харков шаҳри ҳам Россия ракета зарбаларига учраган.
Бу шаҳарда ҳужумдан 40 дан ортиқ одам жабрлангани ҳақида хабарлар бор.
Украина президенти Владимир Зеленскийнинг сўзларига кўра, 31 декабрдан бери Россия Украина ҳудудига 170 га яқин ҳудкуш дронлар ва ўнлаб турли турдаги ракеталарни отган. Жами 96 киши яраланган, 4 киши ҳалок бўлган.
Украина энергетикларининг хабар беришича, қурбонлар ва вайронагарчиликлардан ташқари, Россиянинг Киевга ҳужуми оқибатида 260 минг истеъмолчи электрсиз қолган.
Россия президенти Владимир Путин 1 январь куни ярадор рус аскарлари билан учрашар экан ўз мамлакати қўшнисига қарши ҳужумларни “кучайтиришини” айтганди.
Путиннинг огоҳлантириши Россиянинг Украина билан чегарадош Белгород шаҳрининг ҳужумга тутилиши ортидан янгради.
30 декабр кунги Белгородга зарбалар оқибатида йигирмадан ортиқ одам ўлгани ва 100 дан ортиқ одамнинг яралангани хабар қилинганиди.
Россия 30 декабрдаги ҳужумда Украинани айблади.
Белгородда яна портлашлар
Айни пайтда Белгородда 2 январь куни ҳам портлаш овози эшитилди.
Маҳаллий аҳоли янги портлашлар бўлгани ҳақида хабар бермоқда - уларнинг сони камида 20 та бўлган.
Белгород губернатори тўртта ҳаво нишони урилганини айтмоқда.
"Бизнинг ҳаво ҳужумидан мудофаа тизимимиз Белгород ва Белгород вилояти устида 4 та ҳаво нишони уриб туширди", деди Белгород вилояти раҳбари Вячеслав Гладков.
Вазият оғир. Вайронагарчилик ҳақидаги маълумотларга аниқлик киритилмоқда. Воқеа жойида тезкор ва фавқулодда хизматлар ишламоқда”, — дейилади расмий хабарда.
Россия Украинага отган ракеталардан бири Воронеждаги қишлоққа тушган
Россиянинг Воронеж вилояти Петропавловка шаҳрида 2 январь эрталаб кучли портлаш бўлди. Дастлабки маълумотларга кўра, қишлоққа Украинага отилган Россия ракетаси урилган.
Маҳаллий аҳоли томонидан кўплаб вайрон бўлган уйларнинг видеолари интернетга жойлаштирилмоқда. Уларнинг сўзларига кўра, маҳаллий вақт билан соат 8: 38 да қишлоққа ракета тушган.
Украина манбаларига кўра, Петропавловка қишлоғида портлаган ракета Украинага самолётдан учирилган Россиянинг Х-101/555 русумли ракетаси бўлган.
Россия Мудофаа вазирлиги Петропавловка қишлоғидаги портлаш "ҳарбий учоқдан ўқ-дориларининг тасодифий чиқиши" билан боғлиқлигини айтмоқда.
Россия ҳарбийларига кўра, ҳодиса оқибатида олтита хусусий бино зарар кўрган. “Ҳодиса ҳолатлари юзасидан суриштирув ишлари олиб борилмоқда. Воқеа жойида комиссия ишламоқда, зарарнинг моҳиятини аниқлаш ва уйларни тиклашга кўмаклашмоқда”, — дейилади Мудофаа вазирлиги хабарида.
Зеленский: Россия “террорчи давлат”
Украина президенти Владимир Зеленский Россияни “террорчи давлат” деб атади. 1 январ куни The Economist журналига берган интервьюсида Зеленский Путинда тинчликка интилиш аломатларини кўрмаётганини айтди.
Зеленский таъкидича, Путин музокаралар олиб боришга интилаётганининг ҳар қандай белгиси унинг қўшинлари ва қурол-яроғлари тугаб бораётганининг белгиси холос.
Киев раҳбари, суҳбат чоғида ҳарбий стратегияси қандай бўлишига ҳам тўхталди. Зеленскийга кўра, бундан буён Украина қарши ҳужумларининг асосий йўналиши Қримдаги рус қўшинларининг кучини камайтириш бўлади.
1 январ куни Украинанинг порт шаҳри Одессага Россия учувчисиз учоқларининг ҳужуми оқибатида камида бир киши ҳалок бўлди, тўққиз киши яраланди.
Уриб туширилган дронларнинг қолдиқлар шаҳарнинг турли ҳудудларидаги турар-жой биноларига тушган ва бир нечта ёнғинларга сабаб бўлган.
"Ушбу ҳужум Украина Янги йилимизни нишонлаётганимизда содир бўлди. Одамлар байрам қилиш учун ўтиришларини яхши билган ҳолда, қандай ҳайвон бундай ишларни қилиши мумкин?"
Украина ҳарбийлари бир кечада Россия учувчисиз учоқларининг Одессага ҳужуми порт инфратузилмасини нишонга олганини ва зарба оқибатида порт терминалларидан бирида ёнғин чиққанини маълум қилди.
Ёнғин зудлик билан ўчирилгани ва қурбонлар йўқлиги айтилди.
Президент Владимир Зеленский янги йил муносабати билан қилган мурожаатида уруш иккинчи йилга яқинлашар экан, Украина жиддий қийинчиликларни енгиб ўтишда яна ҳам кучланганини таъкидлади.
Зеленскийнинг сўзларига кўра, уруш украиналикларни Россия ҳужумларига қарши туриш ва қийинчиликларга, жумладан, электр токининг мутазам узилиши ва ракета ҳужуми таҳдидларига мослашишга ўргатган.
“Йилнинг асосий натижаси, унинг асосий ютуғи Украинанинг кучайганидир”, деди Зеленский ўз мурожаатида.
"Украина яшаяпти. Украина курашяпти. Украина олдинга силжияпти ва албатта ғалаба қозонади", деди Зеленский.
Путин Украинага қарши ҳужумларни кучайтиришини айтди
Путин 1 январ куни Москва вилоятидаги ҳарбий госпиталда қилган изоҳида 25 кишининг ҳаётига зомин бўлган Белгороднинг ҳужумга тутилишини “террор ҳужуми” деб атади ва Украинага қарши ҳужумларни кучайтиришга ваъда берди.
Путин Украинани тинч аҳоли яшайдиган ҳудудларга ҳужум қилишда айблади, шу билан бирга, Россиянинг Украинадаги турар-жой ва тинч аҳоли пунктларига ракета ва учувчисиз учоқлар ҳужуми уюштиргани ҳақидаги кенг далилларга қарамай, Москва фақат ҳарбий объектларни нишонга олганини даъво қилди. Киев Белгородга қилинган ҳужумга изоҳ бермади.
Россия Фавқулодда вазиятлар вазирлигининг маълум қилишича, 30-декабр шанба куни Укаринанинг Белгород вилояти марказига уюштирган зарбалари оқибатида 25 киши ҳалок бўлган, 45 киши яраланган.
Вилоят губернатори Вячеслав Гладковнинг айтишича, турар-жой бинолари вайрон бўлган.
Украина шимолига туташган Белгород вилояти ҳам Россиянинг бошқа чегара ҳудудлари сингари йил давомида дрон ҳужумларига учрага.
Россия Белгородга ҳужум ортидан БМТ йиғилишини талаб қилди.
Шанба куни Хавфсизлик кенгашининг фавқулодда йиғилишида БМТ бош котиби ёрдамчиси Холид Хияри уруш «эскалацияси ва тарқалишининг реал хавфи»дан огоҳлантирди.
Баъзи ғарб давлатлари вакиллари Путин Россияси урушнинг бумеранг эффектини ҳис қилмасдан иложи йўқлигини айтиб, Россия ғарбида инсонлар ракета ҳужуми остида қолиб ўлаётганига Путин айбдор эканини айтишди.
Путин эса ҳарбий хизматчилар билан бўлган кенг кўламли суҳбатда Украинадаги уруш Россия фойдасига ўзгараётгани, Москва можарога барҳам беришга умид қилаётгани, фақат ўз шартлари асосида бўлишини айтди.
Путин 2023 йилда имзолаган ҳар икки фармонидан бири махфий бўлди
Россия президенти Владимир Путин 2023 йилда имзолаган фармонларнинг тенг ярми махфий бўлди. Бу ҳақда “Медизона” хабар берди.
Хабарда айтилишича, 2023 йилда Путин имзолаган фармонларнинг 49,5 фоизи расмий ҳуқуқий ахборот порталида эълон қилинмаган. 2022 йилда махфий қарорлар Путин имзолаган умиймий фармонлар сонининг 45 фоизини ташкил қилган эди.
“Медиазона”нинг билдиришича, ҳарбийларни мукофотлаш ва қамоқлардан урушга ёлланган маҳкумларни авф этиш тўғрисидаги айрим фармонларга ҳам махфийлик муҳри урилган.
Украина урушига қадар Россия президенти энг кўп махфий фармонлар чиқарган йил 2001 бўлган эди. Ўшанда иккинчи чечен уруши доирасида имзоланган фармонларнинг 47 фоизи махфий бўлган.
Белгород ва Севастополга яна ракеталар билан зарба берилди
Россиянинг Белгород шаҳрига 3 январь куни тонгга яқин ракета билан зарба берилди. Бу ҳақда Белгород вилоят губернатори Вячеслав Гладков маълум қилди.
Унга кўра, шаҳарга отилган бир нечта ракета уриб туширилган. Вайроналар ва ҳалок бўлганлар тўғрисида маълумот йўқ. Гладковнинг айтишича, Валуйск шаҳар округи атрофидаги Солоти қишлоғи ҳам ҳужумга учраган. Бу қишлоқда икки уйнинг томига зарар етган ва ойналар синган. Ҳужум оқибатида қишлоқда ҳеч ким жабрланмаган.
“Белгородда вазият мураккаблигича қолмоқда. Саҳардан бери икки марта ҳужум бўлди. Ҳаводан мудофаа тизими ишлади. Ёруғ тушиши билан уйма уй юриб, келтирилган зарарни ўрганамиз”,- дейилади Гладковнинг билдирувида.
Хабарларда 3 январга ўтар кечаси Россия аннексия қилган Севастополга ҳам зарба берилгани айтилмоқда. Шаҳарнинг Россия томонидан тайинланган расмийларига кўра, ракета уриб туширилган ва ҳеч қандай зарар етказилмаган. Озодликнинг “Қрим.реалии” лойиҳаси эса Севастополда портлаш овозлари эшитилгани ҳақида ёзди. “Кримский ветер” телеграм каналининг иддао қилишича, Севастополда икки марта портлаш овози эшитилган ва шундан сўнг шаҳар узра тутун кўтарилган.
30 декабрда Белгородга Россиянинг Украинага қарши уруши давомида энг катта зарба берилган эди. Россия Фавқулодда вазиятлар вазирлигининг маълум қилишича, бунинг оқибатида 25 киши ҳалок бўлган, юздан ортиқ киши яраланган. 1 январда касалхонада 4 ёшли ярадор қиз вафот этгани маълум қилинди.
Украина ҳарбийлари бу ракета ҳужумлари тўғрисидаги хабарларга муносабат билдирмаяпти.
29 декабрда Россия Украина ҳудудига уруш бошланганидан бери энг кенг қамровли ҳужум уюштирган эди. Ўшанда Украинада тинч аҳолидан 40 нафарга яқин киши ҳалок бўлган ва ўнлаб киши яраланганди.
"Сўнгги уч кунда 300 ракета ва 200 дрон!"
Президент Владимир Зеленский сешанба, 2 январ куни Россия сўнгги уч кун ичида ҳужумларда 300 га яқин ракета ва 200 дан ортиқ дрон ишлатганини айтди. Зеленский кечки видеомурожаатида сўнгги ҳужумлар максимал вайронагарчиликка сабаб бўлганини билдирди.
"Бугун кун бўйи душман 100 га яқин ҳар хил турдаги ракеталар билан ҳужум қилди. Улар имкон қадар кўпроқ зарар етказиш учун муайян нишонларга зарба берди . Бу мутлақо онгли террор. 29 декабрдан бугунгача руслар Украинага 300 ракета ва 200 дан ортиқ дрон билан ҳужум уюштирди. Ҳозиргача ҳеч бир давлат дрон ва ракеталар иштирокидаги бу каби ҳужумни қайтармаган. Биргина бугуннинг ўзида 10 та Кинжал ракетаси уриб туширилди", деди Украина президенти.
Россия 29 декабрь куни уруш бошидан бери Украинага энг йирик ҳаво ҳужумини амалга оширди ва камида 39 кишининг ҳаётига зомин бўлди. Украина томони Россия йирик ҳужумлар учун ракеталарни тўплаётгани ҳақида огоҳлантирган эди.
Россия Украинанинг 2023 йил ўртасида бошланган қарши ҳужумини муваффақиятсиз тугагани айтиб келади. Сўнгги ойларда фронт чизиғида айтарли ўзгариш бўлмади.