Россия Украинага дронлар ва ракеталар билан ҳужум қилди
Россия ҳарбийлари январга ўтар кечаси Украинага дронлар ва ракеталар билан зарба берди. Ҳужум натижасида Кременчуг туманидаги саноат объектида катта ёнғин содир бўлди, дея маълум қилмоқда маҳаллий маъмурият.
Украина Ҳаво кучларига кўра, Украина ҳудудига саккизта “Шаҳед” зарбдор дрони йўлланган, шундан тўрттаси уриб туширилган.
Бундан ташқари, Россия армияси Полтава вилоятига иккита “Искандер-М”, Донецк вилоятига эса учта ЗРК С-300 ракеталари билан зарбалар берган. Полтава, Донецк, Запорожье ва Днепропетровск вилоятларида муҳим инфратузилма объектлари ҳужумга учрагани айтилмоқда.
Полтава вилояти маъмурияти Кременчуг туманидаги саноат объектига дрон келиб урилиши натижасида катта ёнғин чиққанини билдирди. Бу қандай объектлиги очиқланмаган. Дастлабки маълумотларга кўра, қурбонлар ва жабрланганлар йўқ.
Astra телеграм-канали қайд этишича, Кременчугда йирик нефтни қайта ишлаш заводи бўлиб, корхона бир неча бор Россия зарбаларига учраган, охирги марта – ноябр ойи бошларида.
Бошқирдистонда бир эркак полиция ўғирлаб кетганидан сўнг ўлди
25 январда ОМОН ходимлари ўғирлаб кетган уфалик Ринат Даутов вафот этди. У норозилик чиқишларида иштирок этганликда гумон қилинган эди. Даутовнинг ўлими ҳақида опаси Залия Ахмадеева маълум қилган.
Ринат Даутов ўлганига доир маълумот 26 январ куни жамоат фаоли Фаил Алсиновга нисбатан суд ҳукми билан боғлиқ намойишларга бағишланган телеграм-каналларда пайдо бўлди. Ўша куни Ахмадеева укасининг жасадини таниб олиш учун моргга таклиф қилинган. Даутовнинг ота-онасига у спиртли ичимликлардан маст ҳолда бўлгани ва юраги тўхтаб қолгани айтилган. Ахмадеева эса укаси ичмаслигини таъкидламоқда. 26 январ куни аёлни моргга киритишмаган ва у эртасига келгач, кўрсатилган жасад укасиники эканини тасдиқлаган. Аёлга ўлим сабабини айтмаганлар.
Қариндошларига кўра, Даутов 25 январ куни Новие Чебенки қишлоғида яшовчи севган қизининг уйига келганида қўлга олиниб, номаълум тарафга олиб кетилган. Ахмадеева айтишича, бунга қадар Даутов полицияга чақирилиб, унга гўё норозиликда қатнашган “безори сифатида қандайдир қоғоз беришган”. Бироқ, аёлга кўра, укаси митингда иштирок этмаган, митинг бошланишидан 15-20 дақиқа аввал у ердан кетган.
Украина Россия дронларини уриб туширди
Украина ҳаво ҳужумидан мудофаа тизими Николаев, Днепропетровск, Хмельницкий ва Ривнеда саккизта рус дронини уриб туширган.
Украина Қуролли кучлари Бош штаби Россия дронлар билан бирга битта “Искандер-М” ҳамда учта С-300 ракетасини ҳам учирганини маълум қилган.
Ўз навбатида, россиялик ҳарбийлар Украинанинг Ярославль шаҳридаги “Славнефть-ЯНОС” нефтни қайта ишлаш заводига дрон ҳужумини қайтарганлар. Бу ҳақда вилоят губернатори Михаил Евраев маълум қилган. Евраев заводда ёнғин содир бўлмагани ва қурбонлар йўқлигини қўшимча қилган. Мазкур маълумотни мустақил манбалар томонидан текшириш имкони бўлгани йўқ.
Украина ҳарбий тизимида йирик коррупция ҳолати фош этилди
Украина Хавфсизлик хизмати мамлакат ҳарбийларига миномётлар сотиб олиш учун ажратилган 40 миллион доллар миқдоридаги маблағ ўзлаштирилгани билан боғлиқ жиноий схемани фош қилди.
Украина Хавфсизлик хизмати беш кишига нисбатан жиноят иши қўзғатилгани, бир киши Украина чегарасини тарк этаётган вақтда қўлга олингани ҳақида маълум қилган. Гумонланувчиларга қўйилаётган айблов ўз тасдиғини топса, улар 12 йилгача қамоқ жазосига ҳукм қилиниши мумкин.
Киев Европа Иттифоқи ва НАТОга қўшилиш саъй-ҳаракатларини тезлаштириш мақсадида коррупцияга қарши кураш олиб бормоқда. Ҳар икки блок Украинадан ташкилотга аъзо бўлиш учун коррупцияга қарши кенг кўламли ислоҳотлар ўтказишни талаб қиляпти.
УХХ қайдича, “Мудофаа вазирлигининг бир қанча амалдори ҳамда қурол-аслаҳа етказиб берувчи “Львов Арсенали” ширкати менежерлари снарядлар сотиб олишда қарийб 1,5 миллиард гривнани ўмарган”.