Буюк Британия Эронга қарши урушда АҚШга кўмаклашади
Эроннинг кутилмаган ҳужумлари сабабли Буюк Британия ўз ҳарбий базаларини АҚШ операциялари учун тақдим этади, деди Буюк Британия Бош вазири Кир Стармернинг Х платформасида британ миллатига қилган мурожаатида.
У Эрон дронларига қарши туриш учун Украина тажрибасидан фойдаланишини тасдиқлади.
- Биз ҳужум зарбаларида иштирок этмаяпмиз, лекин минтақада ўз мудофаамизни кучайтирамиз. Форс кўрфазидаги ҳамкорларимизга уларга ҳужум қилаётган Эрон дронларини уриб туширишда ёрдам бериш учун ўз мутахассисларимиз билан бирга Украинадан экспертларни жалб қиламиз, деди Буюк Британия Бош вазири Кир Стармер.
Эрон ОАВ собиқ президент Маҳмуд Аҳмадинажоднинг ўлими ҳақидаги хабарни рад этди. Эроннинг олтинчи президенти АҚШ ва Исроилнинг Теҳронга уюштирган биргаликдаги ҳужуми натижасида ҳалок бўлгани ҳақидаги хабарни ILNA агентлиги 1 март куни тарқатган эди. Сўнг хабар веб-сайтдан олиб ташланди.
Аҳмадинижод 2005-2013 йилларда Ирон президенти лавозимида ишлаган, бундан олдин Ардабил вилояти ҳокими ва Теҳрон шаҳар ҳокими бўлган.
Давлат телеканали IRIB орқали кўрсатилган видеомурожаатида Эрон президенти Масуд Пезешкиён уч кишидан иборат кенгаш тузилгани ва унинг иш бошлаганини эълон қилди. Ушбу кенгаш шанба куни АҚШ-Исроил ҳужумлари натижасида оятуллоҳ Али Ҳоманайи ҳалок бўлганидан сўнг вақтинча раҳбарлик вазифасини ўз зиммасига олган.
Эроннинг расмий IRNA ахборот агентлиги хабар беришича, Эрон ҳукумати мамлакат Конституциявий кенгаши юристи Алиреза Арофийни вақтинча раҳбарлик кенгаши аъзолигига сайлаган. Муваққат раҳбарлик кенгаши таркибига, шунингдек, президент Пезешкиён ва суд ҳокимияти раҳбари Ғуломҳусайн Муҳсинӣ-Эжеий ҳам киради.
2 мартга ўтар кечаси Ливан Исроилга оммавий ракета ҳужумларини амалга оширди
Исроил Мудофаа армияси Ливанга «Ҳизбуллоҳ» томонидан амалга оширилган ҳужумларга жавоб тариқасида зарбалар берганини маълум қилди («Ҳизбуллоҳ» АҚШ ва Исроилда террористик ташкилот деб тан олинган, аммо Ливанда қонуний сиёсий куч сифатида фаолият юритади).
Исроил армиясининг Шимолий ҳарбий округи қўмондони, генерал-майор Рафи Милонинг маълум қилишича, жанубий Ливан ва Байрутга қаратилган биринчи тўлқин зарбалари «юқори лавозимдаги жангарилар, штаблар ва террористик инфратузилма»га қаратилган. Байрутга берилган дастлабки зарбалардан сўнг, Исроил Ливаннинг шарқий ва жанубий қисмидаги қарийб 50 та қишлоқ аҳолисини янги ҳужумлар олдидан эвакуация қилишга чақирган.
Исроил томони Ливанга пиёда қўшинлар билан ҳужум қилиш масаласини кўриб чиқаётганини ҳам билдирди:
«Хизбуллоҳ кеча тунда ўт очди. Улар нима қилаётганини жуда яхши билишади. Биз бу ҳақда огоҳлантирган эдик. Бу уларга қимматга тушади. Биз яхши тайёрланганмиз. Биз тахминан юз минг заҳирадагиларни сафарбар қилдик, ўнлаб баталон, бригада ва дивизияларни жойлаштирдик. Улар шимолий чегарани ҳимоя қилиш учун тайёр ва барча эҳтимолий сценарийларга — ҳимоявий ва ҳужумкор ҳаракатларга ҳам тайёр. Барча вариантлар кўриб чиқилмоқда,” деди бригада генерали Эффи Дефрин, Исроил армияси матбуот котиби.
Биринчи тўлқин ҳужумдан кейин иккинчи тўлқин ҳам амалга оширилди. Исроил Мудофаа армияси Ливаннинг бир нечта ҳудудларида «Ҳизбуллоҳ»нинг қурол омборлари ва инфратузилмасига зарбалар берилганини маълум қилди.
Associated Press Ливан Соғлиқни сақлаш вазирлигига таяниб ёзишича, Исроил зарбалари оқибатида камида 31 киши ҳалок бўлган, яна 149 киши яраланган.
Яқин Шарқдаги вазият таранглашиши ортидан Ўзбекистон ҳукумати қатор баёнотлар қилди
Ўзбекистон ТИВ Яқин Шарқда вазиятнинг кескин равишда таранглашуви ва минтақада янги зиддиятли ҳолат юзага келганидан жиддий хавотирда эканини билдирди.
Мамлакат томонларни кескинлашувга сабаб бўладиган кейинги қадамлардан тийилишга чақирмоқда.
Айни пайтда, Ўзбекистон бош вазири Абдулла Арипов Саудия Арабистони, БАА ва Қатардан ватандошларни олиб келиш учун авиақатновларни ташкил этиш бўйича топшириқ берди. Бош вазир, шунингдек, Транспорт вазирлигига экспорт-импорт операциялари учун муқобил транспорт йўлакларини ишлаб чиқишни топширди.
Расмий маълумотларга кўра, биргина Саудия Арабистонида рейслар бекор қилингани сабаб қолиб кетган 1000 дан ортиқ ўзбекистонлик зиёратчи бор.
2026 йил 2 мартдан бошлаб Uzbekistan Airways томонидан Жидда – Тошкент йўналишида репатриация рейслари ташкил этилади. Ушбу рейслар орқали Умра зиёратига борган фуқаролар мамлакатга қайтарилади.
Ватандошларни қайтариш рейслари Саудия Арабистони, БАА (Дубай ва Абу Даби), Қатарга парвозларни амалга оширувчи барча авиакомпаниялар томонидан ташкил этилади. Яқин Шарқ мамлакатлари йўналишдаги парвозлар йўловчиларсиз амалга оширилиши айтилди.
Ташқи ишлар вазирлигига Ўзбекистондан парвозларни келишиш учун тегишли давлатлар билан музокаралар ўтказишга киришган.
Flightradar сайтига кўра, 2 март куни Тошкентдан Жиддага бир нечта авиапарвозлар амалга оширилган.
Шу билан бирга 2 март куни Абу Даби аэропорти ўз фаолиятини тиклагани хабари чиқди.
Ўзбекистон Ташқи ишлар вазирлиги Эронда жабрланганлар орасида Ўзбекистон фуқаролари йўқлигини маълум қилди. Теҳрондаги дипломатик ваколатхонага кўра, ҳозирда мамлакатда жами 81 нафар ўзбекистонлик бўлиб турибди.