АҚШ, Япония ўз заҳирасидаги нефтни бозорга чиқармоқда
АҚШ Эрондаги уруш туфайли кўтарилган нархларни пасайтириш мақсадида ўзининг стратегик нефт захирасидан 172 миллион баррел нефт чиқаради.
Чоршанба куни АҚШ Энергетика вазири Крис Райтнинг айтишича, бу 32 давлатдан иборат Халқаро энергетика агентлиги томонидан келишилган 400 миллион баррел нефтни кенгроқ чиқаришнинг бир қисмидир.
Райтнинг сўзларига кўра, заҳира нефтини бозорга чиқариш келаси ҳафта бошланади ва бу тахминан 120 кунни олади.
Райтнинг таъкидлашича, Қўшма Штатлар "келгуси йил ичида ушбу стратегик захираларни тахминан 200 миллион баррел билан алмаштиришни режалаштирган".
Яқин Шарқ можароси нефт етказиб беришга тўсқинлик яратгани сабабли Япония ҳам ўзининг стратегик захираларидан нефтни чиқаради.
"Япония дунёнинг бошқа мамлакатларига нисбатан Яқин Шарққа жуда юқори қарамликка эга. Бензин ва бошқа нефт маҳсулотларини етказиб беришда ҳар қандай узилишнинг олдини олиш учун биз нефт захираларимизни Катта еттилик қарорлари билан мувофиқлаштирамиз. Япония жаҳон энергия бозоридаги талаб ва таклифни юмшатиш учун шу ойнинг 16-кунида нефт заҳираларини бозорга чиқаради", деди Япония бош вазири.
Япония нефт таъминотининг қарийб 95 фоизи Яқин Шарққа боғлиқ.
Ҳормуз бўғозида кемаларга янги ҳужумлар таъминотнинг узилиши қўрқувини кучайтирди.
Таҳлилчилар Халқаро энергия агентлигининг рекорд даражада нефт захираларини истеъмолга чиқариш таклифи бу хавотирларни енгиллаштириш учун етарли эмаслигини айтишди.
Трамп АҚШ Эронга қарши урушида “жуда яхши ҳолатда” эканлигини айтди
Қўшма Штатлар Марказий қўмондонлиги Эроннинг камида учта учоғига берилган ҳаво зарбалари тасвирларини эълон қилди.
Қўмондонлик видеоларни эълон қилиш баробарида Теҳроннинг ҳаво имкониятлари кун сайин йўқолиб бораётганини ҳам билдирди.
Тасвирлардан АҚШ зарбаларига учраган учоқлар C-130 Hercules, P-3 Orion ва Ilyushin -76 эканини кўриш мумкин.
АҚШ Президенти Доналд Трамп Вашингтон Эронга қарши урушида “жуда яхши ҳолатда” эканлигини ва АҚШ “бўғозлардаги вазиятга жуда жиддий эътибор қаратишини” айтди.
“Биз жуда яхши ҳолатдамиз. Нима бўлаётганини кўряпсизми. Улар деярли чизиқнинг охирида. Бу биз буни дарҳол тугатамиз дегани эмас. Уларда денгиз флоти қолмади. Уларни ҳаво кучлари йўқ қилинди. Уларда ҳаво ҳаракати йўқ, ҳеч нарса йўқ. Уларда назорат тизимлари йўқ. Бўғозлар ажойиб ҳолатда. Биз уларнинг барча кемаларини йўқ қилдик. Уларда бир қанча ракеталар бор, лекин кўп эмас", - деди Трамп.
Уруш глобал бозорларни ларзага келтирди. Эрон Ислом инқилоби қўриқчилари корпуси жаҳон иқтисодиёти учун улушларни оширар экан, агар АҚШ ва Исроил ҳужумлари тўхтамаса, Форс кўрфазидан нефт ташилишини тўсиб қўйишини билдирган.
Нефт нархи АҚШ-Исроилнинг Эрон билан уруши пайтида аллақачон ошган эди. Шу ҳафта бошида нефт бироз тушди, лекин энди у яна кўтариляпти.
Ҳозирда дунё бозорида бир баррел нефт 100 долларга яқинлашган.
Чоршанба куни Теҳрон расмийлари дунё қўшинлари савдо кемаларига зарба бераётгани сабабли бир баррел учун 200 долларлик нефтга тайёр бўлиши кераклигини айтди.
Аммо кеча Кентукки штатида ўз тарафдорлари билан суҳбатда АҚШ президенти Доналд Трамп кечаги 32 давлатнинг нефт захираларидан фойдаланиш ҳақидаги қарори "нефт нархини сезиларли даражада пасайтиради" деди.
"Мен бугун Халқаро энергетика агентлиги дунё бўйлаб турли миллий нефт захираларидан рекорд даражадаги 400 миллион баррел нефтни чиқаришни мувофиқлаштиришга рози бўлганини маълум қилишдан мамнунман, бу эса Америка ва дунё учун бу таҳдидни йўқ қилганимиз сабабли нефт нархини сезиларли даражада пасайтиради", таъкидлади Трамп.
Трамп Кентуккидаги чиқиши чоғида Қўшма Штатлар Эронга қарши урушда "ғалаба қозонди" деб даъво қилди, аммо унинг кучлари вазифа оҳиригача бажарилгунига қадар ҳужум қилишда давом этишини айтди.
“Сиз ҳеч қачон ғалаба қозонганингизни эрта айтишни ёқтирмайсиз. Аслида биринчи соатдаёқ ҳамма иш ҳал бўлганди", таъкидлади Оқ уй раҳбари.
Сўнгги кунларда Трамп уруш тўрт-олти ҳафта ёки ундан кўпроқ давом этиши мумкинлиги ҳақидаги тахминлардан тортиб, “тез орада” тугаши ҳақида турли баёнотлар берди.
Трамп АҚШ-Исроилнинг 28 февралда бошлаган Эронга ҳужуми Яқин Шарқ давлатини “деярли вайрон қилган”и, унинг раҳбарияти, қуролли кучлари ва ядровий дастурининг катта қисмини йўқ қилганини ҳам айтди.
Шундай бўлса-да, президент ва унинг маъмуриятидагилар ҳужумлар ҳали бери тўхтатилмаслигини айтишмоқда.
Шунингдек, Исроил ўз кампаниясини, жумладан, Ливанда Эрон билан иттифоқдош Ҳизбуллоҳ кучларига қарши ҳужумларни тўхтатишга тайёр эмаслигини ва “кенг нишонлар тўплами” сақланиб қолаётганини айтди.
“Биз амалиётларимизни кенгайтирамиз”, деди ҳарбий матбуот котиби бригада генерали Эффи Дефрин 11 март куни телевидениеда ўтказилган брифингда.
Можтаба Хоманаий "енгил яраланган, лекин ишини давом эттиряпти"
Эроннинг янги олий руҳоний раҳбари Оятуллоҳ Можтаба Хоманаий "енгил яраланган, лекин ишини давом эттиряпти". Бу ҳақда Рейтер агентлиги эронлик расмийга таяниб хабар берди.
Лекин, Эроннинг янги олий руҳонийси қачон яралангани ва Оятуллоҳ этиб сайланганидан бери нега жамоатчиликка кўринмаётгани хабар қилинмади.
11 март куни АҚШда нашр этиладиган "Ню-Йорк Таймс" нашри учта исми ошкор этилмаган эронлик расмийга таяниб, Эроннинг янги олий руҳоний раҳбари Оятуллоҳ Можтаба Хоманаий "оёқлари шикастлангани, аммо ҳушёр экани, алоқа имконияти чекланган, юқори хавфсизликдаги жойда паноҳ топгани" ҳақида хабар тарқатганди.
56 ёшли Мужтаба Хоманаийни якшанба куни олий раҳбар деб эълон қилишганидан бери у ҳали халққа мурожаат қилгани ёки ёзма баёнот бергани йўқ.
Эрон Президенти Масъуд Пезешкиённинг ўғли Юсуф Пезешкиён Мужтаба Хоманаий соғ-саломат эканлигини хабар қилган.
Можтаба Хоманаийнинг отаси Али Хоманаий 28 феврал куни Эронга қилинган АҚШ–Исроил зарбалари оқибатида ҳалок бўлган эди.
Эрон бош полициячиси намойишга чиқувчилар душман сифатида қарши олинишини айтди
Эрон полицияси бошлиғи Аҳмадризо Радан “кимки душман чақириғига қўшилиб кўча намойишига чиқса намойишчи эмас, душман сифатида қарши олинади” деб огоҳлантирди.
Раданнинг бу баёноти Қўшма Штатлар президенти Доналд Трамп Эрон фуқароларини АҚШ ва Исроил ҳукумати ҳужумлари туфайли юзага келган имкониятдан фойдаланишга ундаганидан сўнг айтилди.
Кўпгина эронликлар ўзгаришларни хоҳлайдилар ва баъзилари Оятуллоҳ Али Хоманаийнинг ўлимини, унинг хавфсизлик кучлари ҳукуматга қарши намойишларни бостириш учун минглаб одамларни ўлдирганидан бир неча ҳафта ўтиб, очиқ нишонлашди.
Урушнинг биринчи кунида ҳалок бўлган отаси ўрнига тайинланган олий руҳоний Можтаба Хаманаийни қўллаб-қувватловчилар ҳам митинглар ўтказган.