Тель-Авивда бинолар шикастланди
Яқин Шарқдаги урушнинг учинчи ҳафтаси кетаркан, ҳали ҳам вазият кескинлигича қолмоқда.
24 мартга ўтар кечаси Эрон Исроилга бир нечта ракета зарбалари берди. Ҳаво ҳужуми сиреналари, жумладан, мамлакат жанубида, Тель-Авив ва Петах-Тиквада янгради.
Дрон орқали олинган видеода Эроннинг ракета ҳужуми натижасида Исроилнинг Тель-Авив шаҳридаги турар-жой биноларига етказилган зарар кўлами акс этган.
Исроил ҳарбийлари маълумотига кўра, Тель-Авив марказида ракета тушиши натижасида учта бино жиддий шикастланган. Тўрт киши жароҳат олган — уларга ёрдам воқеа жойида кўрсатилган. Хабар қилинишича, Исроилнинг жанубий қисмига қилинган ўқ ёмғирлари натижасида ҳеч ким жабрланмаган.
Айни пайтда Исроил Эронга зарбалар беришни давом эттирмоқда. Исроил мудофаа армияси 23 март куни ҳарбийлар Теҳрон марказига кенг кўламли зарбалар сериясини амалга оширганини, асосий қўмондонлик марказларини, жумладан, Ислом инқилоби муҳофизлари корпуси разведка бўлинмаси ва Эрон разведка вазирлигига боғлиқ объектларни нишонга олганини маълум қилди. Шунингдек, айтилишича, тун давомида исроиллик қўшинлар 50 дан ортиқ нишонларга, жумладан, баллистик ракеталар омборларига зарба берган.
Уруш шароитида Озодлик томонлар эълон қилаётган маълумотларни мустақил текшириш имконига эга эмас.
НАТО ва иттифоқчилар Ҳормуз масаласини мувофиқлаштирмоқда
НАТО Бош котиби Марк Рютте якшанба, 22 март куни 22 давлат Ҳормуз бўғози орқали кемалар қатновини тиклаш бўйича ҳаракатларни мувофиқлаштираётганини маълум қилди.
"Биз биргаликда ишлашимиз керак", — деди Рютте Fox News Sunday кўрсатуви бошловчиси Шеннон Бримга.
"Мен президентнинг ғазабланганини биламан, чунки у Европа ва бошқа иттифоқчилар жуда секин ҳаракат қилди деб ҳисоблайди. Яхши хабар шундаки, пайшанба кунидан бошлаб кўпчилиги НАТОга аъзо бўлган 22 давлат, шунингдек, Япония, Корея, Австралия, Янги Зеландия, БАА ва Баҳрайн, НАТОнинг кўпчилик бошқа давлатлари Ҳормуз бўғози эркинлигини таъминлаш бўйича унинг нуқтаи назарини амалга ошириш учун бирлашди ва бу имкон қадар тезроқ иш бошлайди, деди Марк Рютте.
Ушбу баёнот АҚШ президенти Дональд Трамп шанба куни (21 март) Теҳрон ҳаётий муҳим сув йўлини 48 соат ичида очмаса, Эрон электр станцияларини "йўқ қилиш" билан таҳдид қилганидан кейинги кескинлик кучайиши фонида айтилди. Трампнинг огоҳлантириши унинг тўртинчи ҳафтасига ўтган урушни "якунлаш" ҳақидаги аввалги баёнотларидан сўнг содир бўлди.
Нефт нархлари душанба куни Ҳормуз бўғози бўйича АҚШ ва Эрон қарама-қаршилиги кучайишига бозорларнинг реакцияси сифатида ўзгариб турди.
Энергетика инфратузилмасига таҳдидлар ҳақидаги хавфлар Вашингтоннинг санкцияларни вақтинча юмшатишига таъсир кўрсатди, бу Эрон нефтини денгиз орқали олиб киришга рухсат берди, натижада миллионлаб баррель нефть жаҳон бозорларига кириб келди.
Украин дронлари Ленинград вилоятидаги нефт базасини нишонга олди
Украина ҳам Россиянинг нефть ва энергетика инфратузилмасига ҳужумларни кучайтирмоқда. Кеча Ленинград вилоятига оммавий дрон рейди уюштирилди. Приморск портида дрон ҳужумидан сўнг ёнилғи солинган резервуарда ёнғин келиб чиққан.
Ленинград вилояти губернатори Александр Дрозденконинг маълум қилишича, бир сутка ичида минтақа устида 60 дан ортиқ дрон йўқ қилинган .
Приморск порти – Россиянинг энг йирик нефт юк ортувчи портларидан бири. Унинг куввати суткасига тахминан 1 млн баррель нефть ва 300 минг баррель дизель ёнилғисини ташкил этади. Порт ҳудудида иккита йирик нефт базаси ҳам жойлашган.
Шу вақт ичида Пулково аэропортида бир неча бор самолётларни қабул қилиш ва учиришга чекловлар жорий этилган . 22 январь кечидан бошлаб жами 48 та рейс бекор қилинган, 50 дан ортиқ рейс эса кечиктирилган .
Пулково аэропорти маълумотларига кўра, 22 март куни Пулково аэропортида 39 та рейс заҳира аэродромларга йўналтирилган, 34 та рейс икки соатдан кўп кечиктирилган, 30 та рейс бекор қилинган .
Д.Трамп: Эронга зарбалар 5 кунга кечиктирилди
АҚШ президенти Дональд Трамп Пентагонга Эрон энергетика инфратузилмасига зарба бериш беш кунга кечиктирилганини маълум қилди.
Унинг сўзларига кўра, АҚШ ва Эрон сўнгги икки кун давомида Яқин Шарқдаги ҳарбий ҳаракатларни "тўлиқ ва ҳар томонлама бартараф этиш" бўйича "жуда яхши ва самарали музокаралар" ўтказган.
"Ҳафта охиригача давом этувчи ушбу чуқур, батафсил ва конструктив музокараларнинг характери ва оҳангига асосланган ҳолда, мен Мудофаа вазирлигига жорий учрашувлар ва муҳокамалар муваффақиятли якунланган тақдирда, Эрон электр станциялари ва энергетика инфратузилмасига ҳар қандай ҳарбий зарбаларни беш кунга кечиктиришни буюрдим", деди Дональд Трамп.
АҚШ ва Эрон вакилларининг музокаралари мазмуни ҳозирча маълум қилинмаяпти.
Эрон расмийлари билан боғлиқ оммавий ахборот воситалари, хусусан Fars агентлиги манбаларга таяниб, АҚШ ва Эрон ўртасида на тўғридан-тўғри, на билвосита музокаралар бўлгани, Трамп Теҳроннинг таҳдидлари туфайли ўз талабидан чекингани ҳақида хабарлар тарқатди. Mehr агентлиги Эрон Ташқи ишлар вазирлигига таяниб, Трампнинг даъволари жаҳон бозорларида ёнилғи нархларини пасайтириш ва вақт ютишга қаратилганини маълум қилди.
Биржа индекслари Трампнинг баёнотига дарҳол кўтарилиш билан жавоб берди, Brent нефти нархи эса 10% дан кўпга пасайиб, баррели 100 доллардан пастга тушди.