Араб давлатлари Эроннинг ҳужумларини қоралади
Олти араб давлати Эроннинг ҳужумларини суверенитет, халқаро ҳуқуқ ва БМТ Низомини бузиш сифатида кескин қоралади.
25 март куни эълон қилинган қўшма баёнотда Қатар, Қувайт, Бирлашган Араб Амирликлари, Баҳрайн, Саудия Арабистони ва Иордания Эрон томонидан қўллаб-қувватланган Ироқ фракцияларининг минтақа давлатлари ва инфратузилмасини нишонга олган ҳужумларини қоралади.
Давлатлар Ироқ ҳукуматини ўз ҳудудидан ҳаракатланаётган жангариларни тўхтатиш ва бундан кейин кучайишнинг олдини олиш учун зарур чораларни кўришга ундаган.
Баёнотда, шунингдек, суверенитет, хавфсизлик ва барқарорликни ҳимоя қилиш учун ўзини-ўзи мудофаа қилиш ҳуқуқини яна бир бор тасдиқлаган ҳолда, Эрон билан боғлиқ ухлаб ётган ҳужайралар ва Ҳизбуллоҳга алоқадор гуруҳлар қораланади.
Трамп Эронни музокаралар бўйича жиддийроқ бўлиш ҳақида огоҳлантирди
АҚШ президенти Доналд Трамп Теҳронни музокаралар бўйича жиддийроқ бўлишга чақирди.
"Улар жуда кеч бўлмасдан олдин жиддийроқ бўлишса яхши бўлади, чунки бу содир бўлгандан кейин ОРТГА ЙЎЛ ҚОЛМАЙДИ ва бу чиройли бўлмайди! " - дея баёнот берди Трамп.
Бир кун аввал Эрон АҚШнинг 15 банддан иборат тинчлик режасини кўриб чиқаётганини ва можарога барҳам бериш учун бажарилиши керак бўлган беш шартни илгари сурганини айтди.
Эрон тинчлик режаларида нима бор?
Трамп алоҳида постида НАТО ҳарбий алянсини АҚШга кампанияда ёрдам бермагани учун қоралаб, “АҚШ НАТОдан ҳеч нарсага муҳтож эмаслигини” қўшимча қилди.
Ўтган ҳафта Трамп НАТОдан нефт ва газ транзитининг муҳим йўли бўлмиш Ҳормуз бўғози хавфсизлигини таъминлашда ёрдам сўраган эди. Эроннинг баъзи кемаларга берган зарбалари ва Теҳрондан кўпроқ таҳдидлар туфайли сув йўлидаги юк ташиш деярли тўхтаб қолди.
НАТОга аъзо бўлган бир қанча Европа давлатлари можаро тугаганидан кейин ёрдам беришни кўриб чиқишга тайёр эканликларини билдиришган, бошқалари эса ҳеч қандай аниқ маълумотиз келган сўровни рад этишган.
ОАВ: Трамп Эронга 15 банли тинчлик режасини юборган
АҚШ президенти Доналд Трамп сешанба куни Америка маъмурияти Эрондаги “тўғри одамлар” билан урушни тўхтатиш бўйича келишувга эришиш учун музокаралар олиб бораётганини айтди.
Трампнинг таъкидлашича, эронликлар келишувга эришиш ниятида.
"Улар қўнғироқ қилишди. Улар келишувга эришмоқчи. Ва биз келишувга жуда тайёрмиз. Яхши келишув бўлиши керак ва энди урушлар, ядровий қуроллар бўлмаслиги керак. Улар энди ядро қуролига эга бўлмайдилар", - деди Трамп.
Президент Трамп Қўшма Штатлар Эронда ким билан гаплашаётгани ҳақида маълумот бермади, аммо бу Эрон олий раҳбари Оятуллоҳ Можтабо Хоманаий эмаслигини айтди.
Айни пайтда АҚШ Эронга урушни тугатиш учун 15 банддан иборат режа юборган. Бу ҳақда New York Times нашри ва Исроилдаги наршлар хабар берди.
Унинг мазмуни ҳақида ҳозирча расмий тасдиқ йўқ. Бироқ айрим тафсилотлар Исроил ва АҚШ нашрларида пайдо бўлмоқда.
Исроилнинг Channel 12 телеканали хабар беришича, режада қуйидаги талаблар бор:
- Натанз, Исфаҳон ва Фордовдаги ядровий иншоотлар ишдан чиқарилиб, йўқ қилинади
- Эрондаги фаолият устидан Халқаро атом энергияси агентлиги (IAEA) томонидан тўлиқ шаффофлик ва назорат ўрнатилади
- Эрон минтақадаги қуролланган прокси кучлардан воз кечади, уларни молиялаш ва қуроллантиришни тўхтатади
- Аллақачон қўлга киритилган ядровий салоҳият бутунлай тугатилади
- Ядровий қуролга эришмаслик бўйича мажбурият олинади
- Эрон ҳудудида уран бойитиш тўхтатилади, барча бойитилган материаллар IAEAга топширилади
- Ҳормуз бўғози очиқ қолади ва "эркин денгиз ҳудуди" сифатида сақланади
- Эрон ракеталари бўйича қарор кейинчалик қабул қилинади, аммо уларнинг сони ва парвоз масофаси чекланади ва фақат мудофаа мақсадида қўлланилади
Вашингтон бу маълумотни расман тасдиқламади ҳам, инкор ҳам қилмади. АҚШ президенти Доналд Трамп сўнгги кунларда Эрон билан музокаралар давом этаётганини айтган.
Эронга қарши бошланган ҳарбий кампания тўртинчи ҳафтага кирар экан АҚШ президенти Доналд Трамп Эрон электр станцияларига қарши ҳар қандай ҳарбий зарбаларни беш кунга қолдириш ҳақида буйруқ берганини айтди.
Зеленский: Россия Эронга разведка ёрдами бермоқда
Украина президенти Владимир Зеленский душанба куни Украина ҳарбий разведкаси Россия Эронга разведка маълумотларини беришда давом этаётганига оид "инкор этиб бўлмайдиган" далилларга эга эканини ва бундай фаолият Яқин Шарқдаги урушни фақат узайтиришини айтди:
"Асосий разведка бошқармаси. Эрон атрофидаги вазият бўйича ҳисобот. Россияликлар Эрон режимига разведка ёрдамини давом эттираётгани ҳақида далиллар тобора кўпаймоқда. Бу очиқча вайронкор фаолият бўлиб, тўхтатилиши керак, чунки у фақат янада беқарорликка олиб келади. Барча масъул давлатлар хавфсизликни таъминлаш ва каттароқ муаммоларнинг олдини олишдан манфаатдор: бозорлар аллақачон салбий реакция қилмоқда ва бу кўплаб мамлакатларда ёқилғи билан боғлиқ вазиятни анча мураккаблаштирмоқда. Эрон режимининг яшаб қолиши ва янада аниқ зарбалар беришига ёрдам бериш орқали Россия амалда урушни узайтирмоқда. Бунга жавоб бўлиши керак."
Кремль ўтган ҳафта The Wall Street Journal нашрининг Россия Эронга сунъий йўлдош тасвирлари ва такомиллаштирилган дрон технологияларини тақдим этаётгани ҳақидаги хабарини "фейк янгилик" деб рад этган эди.